"Þakklæti er uppljómun. Þegar maður er sannarlega þakklátur þá upplifir maður sterka tilfinningu velsældar og allsnægta. Þ.e. þegar maður er þakklátur þá vantar ekki neitt. Nú er ég ekki að tala um að hugsa um þakklæti eða segjast vera þakklátur heldur að finna fyrir þakklæti. Þegar það gerist er maður í núinu, augnablikinu og upplifir sannarlega velsæld.

 

Ef við skoðum andstæðu þakklætis, þá er það höfnun, viðnám, sjálfsvorkunn, þreyta, skortur. Í nútíma samfélagi verjum við mikilli orku í það að ætla að verða hamingjusöm og þakklát þegar við erum búin að ná tilteknum árangri eða markmiðum. Við lítum á gjafir tilverunnar oft sem áreiti frekar en ábendingu. Við finnum aðeins það sem við leitum að.

 

Ef maður byrjar daginn á því viðhorfi að ætla sér að finna fyrir velsæld, ást og allsnægtum, t.d. með því að horfa á fjölskyldu sína, maka og/eða börn og skoða hvað það er sem maður er þakklátur fyrir, þá verður niðurstaðan mjög líklega önnur en þegar maður byrjar á því að velta því fyrir sér hvað er að.

 

Allt sem við veitum athygli vex og dafnar. Við vitum að hvort sem við veitum því athygli sem við viljum eða viljum ekki, þá dafnar það með sama hætti. Ábendingin er að veita þakklætinu athygli, næra það og rækta eins og hvert annað blóm, þannig að það vaxi og dafni og gefi af sér ilm. Ekki að veita illgresinu eða skortinum athygli vegna þess að líkur eru á að það dafni á sama máta.

 

Þakklæti er val og þegar þú velur að vera í hugarástandi þakklætis og ferð að telja það sem ég kalla blessanir þínar í staðinn fyrir böl, þá fjölgar þessum blessunum jafn óðfluga og bölinu fækkar. Þú getur æft þig að vera í þakklæti t.d. með því að hugsa um allt sem þú hefur til þess að vera þakklát(ur) fyrir. Smám saman eykur þú þannig umfang þakklætisins. Þegar þú tengir þakklætið tilfinningalega þá fyrst öðlast þakklætið mátt.

 

Það tekur aðeins örfáar mínútur að ganga frá skráningu á námskeið. Smelltu hér!"

Smelltu hér til þess að fá bókina Lífsráðgjafann án endurgjalds! Þú getur lesið allt um skrefin 7 til velsældar

Kundalini jóga er stundum kallað móðir allrar jógaiðkunar.  Það býður upp á virkar leiðir til að takast á við álag nútímans.   Kundalini jóga er mjög"dýnamískt" - æfingarnar byggja á hreyfingu, takti og kröftugri öndun og eru bæði ætlaðar til að styrkja líkamann, gera hann sveigjanlegri og skapa innra jafnvægi - í taugakerfi, innkirtlakerfi og ónæmiskerfi.  Hugleiðsla er mjög aðgengileg og mikilvægur þáttur í Kundalini jóga.

 

Kennaranámið hefst í september 2010.  Kennarar koma víða að úr heiminum og allir með langa reynslu að baki.

 

Í kennaranáminu lærir þú um:  Orkustöðvarnar - möntrur - uppruna jóga, Kundalini-leiðina - jógískan lífsstíll (mataræði og rytma) - Asana og kriya (jógastöður og æfingar) - pranayama (öndunaræfingar) - hugleiðslu - mannspeki (samskipti og kynferði) - sálina; fæðingu, karma, dharma - Patanjali (jógíska heimspeki) - dauðann og það að deyja - djúpslökun og sjálfsstjórn.

 

Kynningin verður fimmtudaginn 27. maí, frá kl 19-21 í Ropeyoga Setrinu við Engjateig.  Dagskrá: Kynning á kundalini jóga og á náminu.  Jóga og hugleiðsla.  Spjall á eftir. 

Nánari upplýsingar á www.andartak.is.

Nýttu góða veðrið og uppskeru sumarsins til þess að grilla lífræna rétti. Hér eru nokkrar hugmyndir.

Best er að grilla eggaldin við mikinn hita. Það er tilvalið að marinera það með ólívuolíu, hvítlauk og sítrónusafa. Eins er gott að setja mulin sesamfræ yfir þegar búið er að grilla það.

Maísstangir eru vinsælar á grillið, bættu við hvítlaukssmjöri eða útbúðu marineringu með hvítlauki, ólívuolíu og stráðu svo dassi af sjávasalti yfir áður en stöngin er borðuð.

Sveppir eru yfirleitt mjög safaríkir og því þorna þeir ekki þegar þeir eru steiktir eða grillaðir við mikinn hita. Tilvalið að skella nokkrum á grillið og hafa sem meðlæti.

Ef þú hefur ekki prufað að grilla paprikur, þá vitum við hvað þú setur næst á grillið. Gott er að grilla þær stutt og skella beint á matardiskinn.

Marineraðu ferskan aspass með smá ólívuolíu og léttkryddaðu með salti og pipar. Settu grillið á háan hita og snöggeldaðu aspassinn á grillinu.

Hér neðst í fréttabréfinu fyrir neðan áður útgefin fréttabréf er að finna takka sem heitir Share, eða "deila með öðrum" á íslensku. Þegar smellt er á takkann gefst manni kostur á því að deila fréttabréfinu með vinum og fjölskyldu sem nota facebook, twitter og önnur kerfi.

Eins er hægt að smella á tengilinn Áframsenda á sama stað og Share takkinn er, en þá áframsendir maður fréttabréfið með tölvupósti á valda viðtakendur. Hjálpaðu okkur að koma upplýsingum um heilbrigðan lífsstíl á framfæri, þér og þínum til velsældar.

 

Þegar við hittum fólk í fyrsta sinn, tökum við yfirleitt eftir útliti þeirra, fatavali, viðmóti og hreinlæti.

Þegar fólk ilmar vel, er með flotta hárgreiðslu og klæðir sig snyrtilega þá hefur það iðulega jákvæðari áhrif heldur en þegar við mætum illa lyktandi og illa klæddu fólki. Vandinn er sá að þeir sem lykta illa gera sér ekki alltaf grein fyrir því sjálfir.

Því er mikilvægt að gæta að eigin hreinlæti á hverjum degi áður en farið er að heiman. Það er til fólk sem telur að það sé ekki nauðsynlegt að bursta tennurnar, en andremma getur verið fylgikvilli þess að bursta sig ekki a.m.k. tvisvar sinnum á dag, auk tannskemmda og sára í tannholdi.

Sumir geta aðeins farið einu sinni í föt á milli þvotta vegna svita og líkamslyktar sem sest í fötin, aðrir geta notað sömu fötin oftar. Lykilatriði er að fara í sturtu á morgnana og skola af sér svita og flösu, muna svo eftir að nota svitalyktareyði og ilmvatn/rakspíra. Það getur gert gæfumun að fara reglulega í klippingu, pantaðu næsta tíma strax að lokinni klippingu og settu í dagatalið.

Það hjálpar líka að eiga skóbursta og lit í skóskápnum og renna yfir skóna þegar þess þarf. Ekki má gleyma góða skapinu, ekkert jafnast á við sólskinsbros á björtum degi. Nóg er af fúlum Fúsum þarna úti, einlægt bros gæti bjargað deginum hjá einhverjum sem á það svo innilega skilið!

 

Það er einlægur ásetningur starfsmanna Rope Yoga setursins að móta heilnæma og friðsæla umgjörð um hug og heilsurækt, þar sem hver einstaklingur upplifir þá kærleiksríku hvatningu og innblástur sem hann þarf til að kynnast sínum innsta kjarna. Skapa andrúmsloft þar sem þátttakandinn vaknar til vitundar, tekur ábyrgð og tileinkar sér eiginleika leiðtogans með heildrænni lífssýn.

Við leggjum áherslu á að rækta hugarástand þakklætis með starfsemi okkar og teljum að með því að laða fram og birta það dýrmæta og fallega í hverjum iðkanda séum við að inna af hendi mikilvæga þjónustu til handa samfélagi okkar allra.

Það sem við sjáum og upplifum er sá raunveruleiki sem við sköpum og ræktum. Reynslan hefur kennt okkur að viljum við breyta aðstæðum þá þurfum við fyrst að breyta eigin viðhorfum og viðmóti. Í þeim einfalda sannleika liggur vissa okkar um virkni Ropeyoga í fegurri og kærleiksríkari heimi.

Lifandi Næring með lífræna næringu og umhverfisvænan varning sem nærir og styður ásetning viðskiptavina. Við leggjum áherslu á náttúruleg efni og  endurvinnslu.