"Það eru engin vandamál í lífi fólks, aðeins tækifæri. Stærsta tækifærið í sambúð eða samböndum fólks er nánd. Í einfaldleikanum, þrátt fyrir að það sé ekki alltaf eins auðvelt, ef við erum ekki að vinna að nánd, þá erum við að vinna að sundrung. Það er enginn millivegur. Tækifærið er að vera breytingin sem maður vill að aðrir séu. Það eru engin vandamál nema okkar eigin upplifun. Það sem við sjáum í fari annarra sem við teljum að megi betur fara, það er í raun og veru okkar eigið viðnám. Ef það er eitthvað að, þá er það að mér. Hvað er það sem maður ætlar að leggja sambandinu til, ekki hvað ætlar maður að fá út úr því.

Ef sambandið sem maður hefur stofnað til er viðskiptasamningur þar sem maður ætlast til þess að maður fái þetta eða hitt af því að maður gerir eitt og annað, þá er maður í raun og veru í skilyrtu sambandi þar sem að það væri eðlilegra að búa til kaupmála. Eðlileg og falleg ástarsambönd ganga út á það að vera í örlæti og vera alltaf að leggja sig fram við að gera sambandið betra og fallegra án áhengju. Þegar maður telur sig vera tilbúinn til þess að vera í sambandi þar sem aðal tilgangurinn er að gefa af sér skilyrðislaust, þ.e. að vera ást og örlæti, þá blómstrar allt. Ef við hins vegar förum inn í samband þar sem við teljum að okkar skortur verði uppfylltur, þá erum við að búa til ferli vanmáttar og blekkingar þar sem að væntingar og kröfur eru verðmerktar.

Ef að samband á að blómstra þá þarf maður að sinna því af einlægni og alúð. Maður þarf að vinna stöðugt að því að gera blómið sitt fallegra, koma fram við sína nánustu og umhverfi sitt eins og maður vill að komið sé fram við mann sjálfan. Gera alltaf sitt besta og koma fram af einlægni og af ást, án skilyrða. Maður fær bara til baka það sem maður gefur og við vitum öll að þegar maður gefur af sér í einlægni er maður að þiggja og það er sönn velsæld."

Niðurstöður rannsóknar á nálastungumeðferð við bakverkjum bendir til þess að nálastungur og aðferðir í takt við nálastungumeðferð virki til þess að draga úr verkjum. Rannsókn var gerð á yfir 600 einstaklingum sem höfðu ekki prufað nálastungumeðferð áður.

Hópnum var skipt í 4 hópa, einn hóp sem fékk engar nálastungur, annan sem fékk nálastungur án þess að nálin færi í gegnum húðina, í þriðja hópnum fékk fólk nálastungumeðferð og í fjórða hópnum fékk fólk mjög öfluga nálastungumeðferð. Allir þrír hóparnir sem fengu meðferð sýndu bata og benda niðurstöðurnar til þess að nálastungur dragi úr bakverkjum. Könnun leiddi í ljós að 17% Bandaríkjamanna nota óhefðbundnar lækningar til þess að draga úr bakverkjum, þar af notuðu 5% nálastungumeðferð.

 

Veitingastaðurinn Gló í Listhúsi býður upp á ljúffenga og holla rétti úr úrvals hráefni. Þegar þú kemur á Gló færðu hlýjar mótttökur brosandi starfsfólks sem tekur sér tíma til þess að aðstoða þig við að velja rétti sem henta þér hverju sinni. Þú færð alltaf hollt og gott að borða hjá okkur.

Lögð er áhersla á góða þjónustu og notalegt umhverfi á meðan þú borðar eftirlætis heilsuréttinn þinn. Skoðaðu heimasíðu Gló þar sem þú finnur m.a. matseðil dagsins.

Ef þú ert á hraðferð getur þú tekið kræsingarnar með þér.

 

Ármann Kojic er fyrrum afreksmaður í ólympískum kappróðri og siglingum. Hann byrjaði að æfa RopeYoga fyrir 4 árum út í Los Angeles og tók kennaranám á síðasta ári. Hann stundar einnig Ashtanga Yoga og hugleiðslu af kappi. Hann er mikill áhugamaður um kenningarnar á bak við RopeYoga og er heillaður af heimspekinni og næringarhlutanum á bak við RopeYoga. "Það sem er svo yndislegt að átta sig á er að það er ekkert aðskilið og þegar fólk kemur til okkar og vill taka á einhverjum einum þætti í lífi sínu sér það fljótt árangur á öllum sviðum. Þetta er sannarlega hug og heilsurækt."

Ármann á að baki Norðurlandameistaratitil í kappróðri, 3 heimsmeistaramót í Kappróðri þar sem hann náði lengst að komast í undanúrslit. Hann er einnig fyrrrum kennari í siglingum og vatnaíþróttum hjá Íþrótta- og tómstundaráði. Ármann er einnig grafískur hönnuður og markaðsfræðingur og vinnur að því að koma Rope Yoga og Gló Motion á framfæri bæði út frá einkaþjálfun, hönnun á útliti og markaðssetningu. Auk þess vinnur hann sem markaðsstjóri hjá Íslenskri Erfðagreiningu.

"Mér finnst frábært að fá mér grænan orkushake á morgnanna annaðhvort með uppskrift frá Sollu þar sem ég nota agúrku, sellerí, engifer og lime. Stundum fer ég líka í Alkalive ph grænt duft blandað með hörfræum, bee pollen og banana. Maður finnur alveg frábæra orku sem endist allan daginn."

Nudd hefur góð áhrif á líkama og sál. Snertingin verður til þess að líkaminn dælir endorfínum út í blóðrásina, eykur framleiðslu serótóníns sem verður til þess að draga úr stressi og lækka blóðþrýstinginn. Þetta framkallar afslöppun og vellíðunartilfinningu, svo ekki sé talað um orkuflæði líkamans sem eykst til muna.

Rannsóknir benda til þess að nudd hafi jákvæð áhrif á þá sem þjást af ýmsum andlegum kvillum, s.s. kvíða, þunglyndi eða átröskun. Fyrir þá sem þora, þá er fótanudd sérstaklega streitulosandi. Margir eiga í hatursfullu sambandi við tærnar á sér, lykillinn er hins vegar að elska tærnar og hugsa vel um þær. Fæturnir eru fullir af næmum svæðum sem eru jafnan örvuð í svæðanuddi. Margir finna sársauka þegar þessi svæði eru örvuð, en við það slaknar á vöðvum líkamans.

Verðu tíma til þess að nudda tærnar eða bakið á einhverjum sem þér þykir vænt um og hjálpaðu til við að losa um streitu, tilfinningaflækjur og líkamleg óþægindi.

 

Heimild: National Institute of Arthritis and Musculoskeletal and Skin Diseases

Yfir 200 manns hafa skráð sig á fyrirlestra David Wolfe sem fara fram í Rope Yoga Setrinu 7. og 8. nóvember n.k. Uppselt er á fyrirlestrana en ógreidd sæti verða seld í lok vikunnar.

Árangur David "Avocado" Wolfe síðasta áratug á sviði hráfæðis, ofurfæðis, jurta og kakóbauna hefur verið kraftaverki líkast. Nú hefur þú tækifæri til þess að uppgötva leyndardóminn sem gert hefur David einn þann fremsta í heiminum á sviði lífræns fæðis.  David mun fara náið í uppgvötanir sínar á mataræði með ofurfæði og athuganir á fæði sem eykur líkurnar á langlífi. David er þekktur fyrir frumkvöðlastarf sitt í athugunum á mataræði til þess að takast á við candida sýkingar, stuðla að sterkari beinum, heilbrigðari liðum, auka þyngdartap, betri geðheilsu og vellíðan og hægja á öldrun, svo eitthvað sé nefnt.

David verður með fyrirlestra í Rope Yoga Setrinu, Listhúsi í Laugardal 7. - 8. nóvember 2009 frá kl. 14-17 á vegum Raw Solla og Rope Yoga Setursins. Verð aðeins 2.990 kr. Wolfe mun m.a. fjalla um ofurfæði sem fæðu framtíðarinnar, hvernig á að viðhalda heilsu, hamingju og kjörþyngd fyrir lífstíð. Hann mun sýna fram á einfaldar aðferðir til þess að útbúa bestu næringu sem völ er á með notkun blandara og hreinna náttúruafurða. Hann mun einnig fjalla um notkun ofurfæðis til þess að takast á við sjúkdóma.

Á meðal þess ofurfæðis sem Wolf mun fjalla um er Goji ber, kakóbaunin (hrátt súkkulaði), maca rótin, þörungar, aloa vera, þari, spírulína, blá-grænir þörungar, chlorella, acai, bee pollen, hampur og camu camu ber.

Vefsíðan ropeyogasetrid.is hefur fengið andlitslyftingu, búið er að gera hana aðgengilegri og þægilegri fyrir gesti síðunnar. Framsetning námskeiða og fyrirlestra er nú mun skýrari en áður, eins er tengill á greinar og mola um bætiefni og nýjasta eintak fréttabréfsins er aðgengilegt á forsíðunni. Mikið af efni er á vefnum, upplýsingar um heimspekina sem liggur að baki Rope Yoga og Gló Motion, eins er hægt að lesa allt um skrefin sjö til velsældar.