"Frá upphafi hefur Rope Yoga verið hugsað sem heildrænt kerfi sem veitir iðkandanum þann stuðning og þau verkfæri sem hann vill nýta sér til fullkominnar velsældar. Það er byggt á kenningum Hatha yoga en er með sjálfstæða heimspeki. Yoga þýðir eining og markmiðið með yoga er að ná jafnvægi milli líkama, hugar, tilfinninga og sálar. Mismunandi tegundir yoga beita mismunandi aðferðafræði. T.d. gengur Bhakti yoga út á tilbeiðslu hjartans. Karma yoga gengur út á orsakafræði, að taka ábyrgð á sinni tilvist og vita að orsök og afleiðing eru samverkandi þættir. Raja yoga gengur út á að rækta hugann með hugleiðslu, ná stjórn á hugarbylgjunum og öðlast frelsi.

Rope Yoga er samtvinnað þessum nálgunum í yoga, þar sem bestu þættir þessara iðkana hafa verið settir fram í einu kerfi. Það sem aðgreinir Rope Yoga sérstaklega frá Hatha yoga er þessi beina kviðnálgun. Hreyfingarfræðin eru önnur, vegna þess að ég gerði mér grein fyrir því að nútíma maðurinn á mjög erfitt með að virkja kviðinn. Ef við tökum fyrir þessar hefðbundnu kviðæfingar sem fólk iðkar reglulega, t.d. uppsetur þar sem fólk rykkir í hálsvöðvana þegar höfuðið fer á undan, hálsvöðvarnir rykkja í bakvöðvana og á sama tíma er vogarafli beitt sem tekur á fótleggjum og mjaðmagrindarvöðvum. Öll þessi hreyfing rykkir síðan í neðra bakið.

Þar sem yoga þýðir eining, vildi ég búa til kerfi sem vinnur úr innsta kjarna manneskjunnar andlega, líkamlega, huglægt og tilfinningalega. Ég vildi búa til kerfi sem væri ekki að rykkja í vöðva og stoðkerfi líkamans, heldur vinna með líkamann í flæði, styrkja hann og efla. Með því að njóta aðstoðar bandanna þá getur maður byrjað að læra að sleppa fótleggjunum sem eru undirstaða okkar tilvistar líkt og stofninn sem stendur undir trénu. Um leið og við byrjum að slaka á fótleggjunum komumst við fram hjá mjaðmagrindarvöðvunum og inn í kviðinn. Þannig sleppum við því að virkja bakið og aðra stoðvöðva eins og háls og herðar. Þetta gefur iðkandanum möguleika á að ná djúpt inn í kviðinn og efla virkni í kviðvöðvunum.

Þessi iðkun með kviðvöðvana örvar meltingu og úrvinnslu á næringarefnum sem veitir líkamanum meiri orku, auk þess þjálfast öll líffæri og við styrkjum sogæðakerfið og þindina. Í kringum þessi líffæri og vöðva eru allar forsendur orkumyndunar í líkamanum. T.d. er sogæðakerfið holræsakerfi líkamans og með því að örva virkni þess með djúpöndun og vöðvasamdrætti erum við að gera það mun skilvirkara. Það er jafn mikilvægt að losa og að innbyrða. Bæði þvagfæri og ristill verða fyrir mikilli örvun og hvatningu og öll losun verður skilvirkari, þar með öll orku- og hringrásarvinnsla líkamans.

Í Rope Yoga eru böndin fyrsta stig nálgunar. Í framhaldi af þeim förum við í flæðisæfingar sem leggja áherslu á kjarna líkamans. Því næst er farið í öndunaræfingar sem eru sérstaklega hannaðar með þennslu og útvíkkun lungna í huga. Gerðar eru stöðuæfingar og superbrain yoga æfingar og loks er áhersla lögð á teygjur eftir að kviðæfingum lýkur. Líkamlega er þetta önnur nálgun vegna þess að við njótum aðstoðar bandanna. En Rope Yoga er með heimspeki sem byggir á sjö skrefum. Þau nefnast skrefin sjö til velsældar þar sem iðkandanum er gerð grein fyrir persónulegri ábyrgð í tilverunni og vísar til þess að við getum lært að vera leiðtogar eða slys.

Rope Yoga gefur m.a. þann skilning að það er engin spenna í meðvitundarlausum manni. Það þýðir að enginn ótti, samdráttur eða sársauki er í holdi nema það séu viðhorf eða skoðun að baki. Þetta er það sem við erum fyrst og fremst að vinna með, viðhorf okkar og skoðanir. Rope Yoga er hannað þannig að það er virðing fyrir því að þú ert fullkomin(n) eins og þú ert núna. Til þess að viðhalda þeirri einingu, þá þurfum við að veita öllum þáttum okkar tilvistar sömu athygli, alúð og virðingu.

Þú ert orka og ræður því hvernig þú ferð með hana."