ᑲᔪᖏᖅᓴᐃᖏᓐᓇᖅᐳᒍᑦ ᐊᑦᑕᕐᓇᖏᑦᑐᒦᖏᓪᓗᑎᑦ ᐊᒻᒪ ᑭᒃᑯᓕᒫᑦ ᐃᖅᑲᐅᒪᑎᓪᓗᒋᑦ ᐊᑦᑕᕐᓇᖅᒦᒋᐊᖃᖏᓐᓂᖏᓐᓂ ᖃᐅᑕᒫᖅ. ᓂᕆᐅᒃᑎᓪᓗᑎᑦ ᐱᓇᓱᐊᕈᓯᐅᑉ ᓄᙳᐊᓂ ᐊᐅᓪᓚᕐᓂᐊᖅᑎᓪᓗᑎ, ᐱᖃᓐᓇᕆᔭᑎᑦ ᐃᓚᑎᓪᓗ ᓂᕆᖃᑎᒋᐊᓂᖅᑎᓪᓗᒋᑦ, ᕿᑐᕐᖓᑎᑦ ᐱᕈᖅᑎᓪᓗᒋᑦ ᑕᐅᑐᒃᑎᓪᓗᒋᑦ, ᐅᕝᕙᓘᓐᓃᑦ ᓯᓚᕐᔪᐊᒥ ᐊᐅᓪᓚᕐᓂᐊᖅᑎᓪᓗᑎᑦ, ᐃᓅᓯᑦᑎᓐᓂᑦ ᑭᓱᖃᖅᑐᐃᓐᓇᐅᕗᒍᑦ ᐊᑦᑕᕐᓇᖏᑦᑐᒥ ᐃᖅᑲᓇᐃᔭᕐᓂᐊᖅᑎᓪᓗᑎᑦ ᐊᑑᑎᓪᓚᕆᒃᐳᖅ.

ᑕᐃᒪᓐᓇ ᐊᑦᑕᕐᓇᖅᑕᐃᓕᒪᔪᓕᕆᔨᒃᑯᑦ ᓇᓪᓕᐅᒃᑯᒫᓕᕆᔨᓪᓗ ᓴᓇᓯᒪᕗᑦ ᑖᒃᑯᐊ #ᐊᑑᑎᔪᒥ (#worthit) ᑳᕕ ᐴᖅᑲᖅᑐᓂ. ᐅᓪᓚᙳᓗᐊᕈᓐᓇᖏᑦᑐᖅ ᐅᓪᓗᕐᒥᑦ ᐃᓱᒪᒋᐊᓕᖅᑎᓪᓗᓂ ᐊᑦᑕᕐᓇᖅᑐᒦᖏᓐᓂᖅ − ᐊᒻᒪ ᐊᑦᑕᕐᓇᖅᑐᒦᖏᓪᓗᓂ ᐊᖏᕋᐅᓗᓂ − ᖃᖓᑐᐃᓐᓇᒃᑯᓪᓗ ᐃᒻᒥᓄᑦ ᐃᖅᑲᐃᑎᑦᑎᓇᓱᐊᕐᓗᓂ ᐊᓯᖏᓪᓗ ᐊᑦᑕᕐᓇᖅᑐᒦᖏᓪᓗᑎᑦ ᐃᖅᑲᓇᐃᔭᕐᕕᖕᒥᑦ.

ᐱᖃᑕᐅᒋᑦ #ᐊᑑᑎᔪᒥ ᐊᑦᑕᕐᓇᖏᑦᑐᒥᑦ ᐊᑭᑦᑐᕋᐅᑎᑎᓪᓗᒋᑦ: ᐊᔾᔨᙳᐊᒥᑦ ᓇᒃᓯᐅᔾᔨᓗᑎᑦ @WSCCNTNU ᐃᕕᙳᐊᒥᑦ ᐊᒻᒪ ᑲᕖᑐᖅᑎᓪᓗᑎᑦ ᐅᕝᕙᓘᓐᓃᑦ ᐊᔾᔨᙳᐊᒥ ᐃᖅᑲᓇᐃᔭᕐᕕᖕᒥᑎᓪᓗᑎᑦ ᐊᑦᑕᕐᓇᖏᑦᑐᒥ ᐊᒻᒪ ᑳᕕ ᐃᓗᓕᖓ ᐅᕝᕙᓘᓐᓃᑦ ᐊᔾᔨᙳᐊᒥ ᐃᕝᕕᙳᐊᒥ ᐃᖅᑲᓇᐃᔭᕐᕕᖕᓂᑦ ᐊᑦᑕᕐᓇᖏᑦᑐᒦᖏᑎᓪᓗᑎᑦ ᐊᒻᒪ ᓇᓗᓇᐃᒃᑯᑕᖃᖅᖢᓂ #ᐊᑑᑎᔪᒥ ᓴᓚᒃᓴᕈᓐᓇᕐᓗᑎᑦ ᓴᓚᒃᓴᐅᑎᑦᑎᕙᖕᓂᑦ. ᓂᕈᐊᖃᑦᑕᕐᓂᐊᖅᑐᒍᑦ ᑕᖅᑭᑕᒪᖅ ᓴᓚᒃᓴᖅᑐᒥ, ᑳᕕᐅᑉ ᐴᖓ ᑭᖑᓪᓕᖅᐹᕆᓕᖅᑕᖓᓂ. ᑐᓂᐅᖃᐃᓛᖅᑐᑦ ᑕᑯᑎᑎᒍᓪᓗ Facebook-ᑯᑦ ᐅᕝᕙᓘᓐᓃᑦ Twitter-ᑯᑦ ᖃᓄᐃᒻᒪᑦ ᐃᓱᒪᒋᕕᐅᒃ ᐊᑦᑕᕐᓇᖏᑦᑑᕗᖅ #ᐊᑑᑎᔪᒥ (#worthit).

ᐊᑦᑕᕐᓇᖅᑕᐃᓕᒪᔪᓕᕆᔨᒃᑯᑦ ᓇᓪᓕᐅᒃᑯᒫᓕᕆᔨᓪᓗ, ᑲᑐᔾᔨᖃᑎᖃᖅᖢᑎᒃ ᑲᓇᑕᒥᐅᓂ ᐃᖅᑲᓇᐃᔮᒧᑦ ᖃᓄᐃᖏᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ, ᓴᓇᓯᒪᕗᑦ ᐃᖅᑲᓇᐃᔭᕐᕕᖕᒥᑦ ᓱᕈᖕᓇᖅᑐᓂ ᑐᓴᐅᒪᔾᔪᑎᓂᒃ 2015−ᒥᑦ ᖃᕋᓴᐅᔭᒃᑯᑦ ᐃᓕᓐᓂᐊᕈᑎᒥᑦ ᐃᖅᑲᓇᐃᔭᖅᑎᓄᑦ ᐃᑲᔪᕈᓐᓇᖁᓗᖏᑦ ᐃᖅᑲᓇᐃᔭᖅᑎᑦᑎᔨᖏᓄᑦ ᐅᕝᕙᓘᓐᓃᑦ ᑐᓴᒐᒃᓴᓂ ᐃᓕᓐᓂᐊᕈᑎᒧᑦ ᐅᓪᓗᒥᒨᖓᔪᓂ.

ᐊᑦᑕᕐᓇᖅᑕᐃᓕᒪᔪᓕᕆᔨᒃᑯᑦ ᓇᓪᓕᐅᒃᑯᒫᓕᕆᔨᓪᓗ ᐃᑲᔪᓛᖅᑐᑦ 1,000-ᓂᑦ ᐊᑭᖃᖏᑦᑐᓂ ᐃᓂᑕᖃᓛᖅᐳᑦ ᖃᕋᓴᐅᔭᒃᑯᑦ ᐃᓕᓐᓂᐊᕈᑎᓂ. ᑖᓐᓇ ᐃᑲᔫᑎᐅᓂᐊᖅᑐᖅ ᐃᖅᑲᓇᐃᔭᖅᑎᓄᑦ ᐊᒻᒪ ᐃᖅᑲᓇᐃᔭᖅᑎ ᒪᓕᒋᐊᖃᖅᑕᖏᓐᓂᑦ ᐃᓕᓐᓂᐊᖁᔭᐅᓯᒪᔪᓂᑦ ᐊᒻᒪ ᑐᑭᓯᐅᒪᑦᑎᐊᕈᓐᓇᖁᓗᒋᑦ ᐊᓯᔾᔨᕌᖓᒥᑦ ᓇᓗᓇᐃᒃᑯᑕᖏᑦ ᐊᑦᑕᕐᓇᖅᑐᓂᑦ ᐱᖁᑎᓂ ᐊᒻᒪ ᑎᑎᖅᑲᖁᑎᖏᑦ ᐊᑐᐃᓐᓇᐅᒋᐊᓕᖕᓂᑦ ᐃᖅᑲᓇᐃᔭᕐᕕᖕᒥᑦ.

ᐃᖅᑲᓇᐃᔭᖅᑎᑦ ᐊᒻᒪ ᓂᐅᕈᖃᑎᖃᖅᑎᑦᑎᓯᐅᑦ ᑐᓴᐅᒪᑎᑦᑎᔭᕆᐊᓖᑦ ᓄᑖᓂ ᑐᓴᒐᒃᓴᓂ, ᖃᐅᔨᒪᔭᐅᓕᓚᐅᖅᐳᑦ ᐃᖅᑲᓇᐃᔭᕐᕕᖕᒥᑦ ᐊᑦᑕᕐᓇᖅᑐᓂ ᑐᓴᐅᒪᔾᔪᑎᓂ ᑎᒥᙳᖅᑕᐅᓚᐅᖅᑎᓪᓗᒍ ᓯᓚᕐᔪᐊᒥ ᐊᑐᖅᑕᐅᓯᐅᓂ ᓇᓗᓇᐃᖅᓯᒪᔪᓂᑦ ᐊᒻᒪ ᓇᓗᓇᐃᒃᑯᑕᖏᑦ ᐃᓛᖅᑐᕈᑎᓂ ᕖᕝᕗᐊᕆ 2015−ᖑᑎᓪᓗᒍ.

ᐃᖅᑲᓇᐃᔭᕐᕕᖕᒥᑦ ᐊᑦᑕᕐᓇᖅᑐᓂ ᑐᓴᐅᒪᔾᔪᑏᑦ ᐱᖃᓯᐅᔾᔨᕗᑦ ᓄᑖᓂ ᓇᓗᓇᐃᒃᑯᑕᕐᓂᑦ ᐱᓗᐊᖅᑐᒥᑦ ᖃᓄᐃᖏᑦᑑᓂᖏᑦ ᐊᑦᑕᕐᓇᖅᑐᑦ, ᖃᓄᖅ ᑲᒪᒋᔭᕆᐊᒃᓴᖏᓐᓂᑦ ᐊᒻᒪ ᐃᓂᖃᖅᑎᑦᑕᕆᐊᒃᓴᖏᓐᓂᑦ, ᐊᓂᖅᑎᕆᔾᔪᓐᓇᖅᓯᑎᑦᑎᓂᕐᒧᑦ ᐃᑲᔫᓯᑎᓂ ᐊᒻᒪ ᖃᓄᑎᒋᑦ ᐊᑦᑕᕐᓇᖅᑑᒪᖔᑕ. ᐃᖅᑲᓇᐃᔭᖅᑎᑦ ᐃᓕᓐᓂᐊᖅᑎᑕᐅᒋᐊᓖᑦ ᓇᓗᓇᐃᖅᓯᓇᓱᐊᕐᓗᑎᑦ ᐊᑦᑕᕐᓇᖅᑐᓂ ᖃᓄᕐᓗ ᑲᒪᒋᔪᓐᓇᕐᒪᖔᑦ ᐊᑦᑕᕐᓇᖏᓪᓗᑎᑦ.

ᑭᓇᑐᐃᓐᓇᖅ ᐃᓕᓐᓂᐊᕆᐊᖃᖅᑐᑦ ᐃᖅᑲᓇᐃᔭᕐᕕᖕᒥᑦ ᐊᑦᑕᕐᓇᖅᑐᓂᑦ ᑐᓴᐅᒪᔾᔪᑎᖏᓐᓂᑦ ᑕᑯᒋᐊᕈᓐᓇᖅᐳᖅ ᐄᑉᐳ 15 ᐊᑦᑕᕐᓇᖅᑕᐃᓕᒪᓂᕐᒧᑦ ᑲᑎᒪᔨᕋᓛᖏᑦ ᐃᑭᐊᕿᕝᕕᐊᓂ ᐱᔭᕇᕋᓱᒡᓗᒍ $10-ᒥᑦ ᐊᑕᐅᓯᕐᒥᑦ ᐃᓄᖕᒧᑦ.

ᐊᐱᖅᑯᑎᖃᕐᓂᕈᕕᑦ ᖃᓄᑐᐃᓐᓇᖅ, ᐅᖄᓚᔪᓐᓇᖅᐳᑎᑦ 1-800-661-0792−ᒧᑦ ᐊᒻᒪ ᐅᖃᖃᑎᕈᒪᓗᑎᑦ ᒥᑕ ᐊᑐᓕᓐᒧᑦ, ᐊᑦᑕᕐᓇᖅᑕᐃᓕᒪᔪᓕᕆᔨᒻᒪᕆᑦᑎᓐᓄᑦ.

ᑐᓴᒃᑲᓐᓂᕈᒪᓐᓂᕈᕕᑦ ᐃᖅᑲᓇᐃᔭᕐᕕᖕᒥᑦ ᓱᕈᖕᓇᖅᑐᒥᑦ ᑐᓴᐅᒪᔾᔪᑎᓂ 2015−ᒥᑦ, ᑕᑯᒋᐊᕐᓗᒍ ᐃᖅᑲᓇᐃᔭᕐᕕᖕᒥᑦ ᓱᕈᖕᓇᖅᑐᓂᑦ ᑐᓴᐅᒪᔾᔪᑏᑉ ᒪᒃᐱᖅᑐᒐᖓᓂ ᑕᑯᒋᐊᕐᓗᒍᓗ ᐊᑐᖅᑕᐅᓯᖑᔪᑦ ᐊᑕᐅᓯᒪᔭᖏᑦ ᐊᑖᓂᑦᑐᑦ, ᐊᑐᐃᓐᓇᐅᕗᑦ ᖁᓪᓗᓈᑎᑐᑦ, ᐅᐃᕖᑎᑐᑦ, ᐃᓄᒃᑎᑐᑦ ᐊᒻᒪ ᐃᓄᐃᓐᓇᖅᑐᑦ:

ᐊᕐᕌᒍᑕᒫᖅ 1,000 ᑲᓇᑕᒥᐅᑦ ᐃᖅᑲᓇᐃᔭᖅᑎᖏᑦ ᐃᓅᔪᓐᓃᖅᑐᕕᓃᑦ ᐃᖅᑲᓇᐃᔭᕐᕕᐊᓂ ᐱᕈᓗᐊᕿᔪᕕᓂᐅᑎᓪᓗᒋᑦ, ᐋᓐᓂᐊᖅᑖᖅᑎᓪᓗᒋᑦ ᐅᕝᕙᓘᓐᓃᑦ ᐋᓐᓂᖅᑐᕕᓂᐅᑎᓪᓗᒋᑦ.

ᐄᑉᐳ 28-ᒥᑦ ᑲᓇᑕᒥᑦ ᕿᒃᓵᖕᓇᖅᑑᑉ ᐅᓪᓗᕆᓂᐊᖅᑕᖓᑦ. ᐅᓪᓗᕆᓂᐊᖅᑖ ᐃᖅᑲᐅᒪᓂᖃᖁᓗᒋᑦ ᐃᓅᔪᓐᓃᖅᑐᕕᓃᑦ ᐅᕝᕙᓘᓐᓃᑦ ᐋᓐᓂᖅᑐᕕᓂᐅᑎᓪᓗᒋᑦ ᐃᖅᑲᓇᐃᔭᕐᕕᖕᒥᑦ. ᐅᓪᓗᕆᖃᓯᐅᑎᕚ ᓄᑖᖑᖅᑎᑕᐅᓗᓂ ᐊᖏᖅᓯᒪᔭᕗᑦ ᐊᑲᐅᓯᔾᔫᒥᖁᓗᒍ ᖃᓄᐃᖏᑦᑎᐊᕐᓗᑎᑦ ᐊᑦᑕᕐᓇᖅᑐᒦᖏᓪᓗᑎᒡᓗ ᐃᖅᑲᓇᐃᔭᕐᕕᖕᒥᑦ ᐱᓂᕐᓗᒃᑐᖃᒃᑲᓐᓂᖁᓗᒍ.

ᓄᓇᑦᑎᐊᕐᒥᑦ ᐃᖅᑲᓇᐃᔮᒧᑦ ᓴᖅᑭᔮᖅᑎᑦᑎᓂᐊᕐᒪᑕ ᑭᒃᑯᑐᐃᓐᓇᕐᓄᑦ ᐃᓕᓴᕆᔭᐅᓂᖃᕐᓗᑎᑦ ᐃᖅᑲᐅᒪᓗᒋᑦ ᐊᒻᒪ ᐃᓅᔪᓐᓃᖅᑐᕕᓃᑦ ᐃᖅᑲᓇᐃᔭᖅᑎᑦ. ᐃᓕᓴᕆᔭᐅᓂᕆᓂᐊᖅᑕᖓᑦ ᒪᓕᒐᓕᐅᕐᕕᖕᒥᑦ ᔭᓗᓇᐃᒥᑦ ᐊᒻᒪ ᐃᖃᓗᖕᓂᑦ ᐅᓪᓗᑐᐃᓐᓇᐅᓕᖅᐸᑦ, ᐄᑉᐳ 28−ᒥᑦ ᐅᓐᓄᓴᒃᑯᑦ. ᑭᒃᑯᓕᒫᑦ ᐅᐸᒍᓐᓇᖅᑐᑦ ᑐᙵᓱᒃᑎᑕᐅᕗᑦ.