ᔭᓄᐊᕆ 2017
ᐊᕐᕌᒍᓕᒫᒧᑦ ᓴᓇᔨᓄᑦ ᐊᑭᓕᖅᓱᖅᑕᐅᔾᔪᑎᑦ  ᐱᔭᐅᔭᕆᐊᖃᓕᖅᑐᑦ
ᕕᕗᐊᕆ 28, 2017

ᐃᖅᑲᓇᐃᔭᖅᑎᑦᑎᔨᑦ, ᐳᐃᒍᖅᑕᐃᓕᒋᔅᓯ ᓇᖕᒥᓂᖃᕐᕕᐅᔪᓕᒫᑦ WSCC Connect-ᑯᑦ ᐃᑭᐊᖅᑭᕕᖓᓐᓄᑦ ᐃᓯᕈᓐᓇᖅᑐᐃᓐᓇᐅᒋᐊᖃᕐᒪᑕ ᑐᓂᓯᓂᐊᓕᕌᖓᑕ ᐊᕐᕌᒍᓕᒫᖅᓯᐅᒻᒥᒃ ᓴᓇᔨᓄᑦ ᐊᑭᓕᖅᓱᖅᑕᐅᔾᔪᑎᓂᒃ. APR−ᒥ ᑐᓂᔭᐅᔪᒃᓴᑦ ᐱᐊᓂᒃᓯᒪᔭᕆᐊᖃᖅᑐᑦ ᕕᕗᐊᕆ 28, 2017−ᒧᑦ ᑎᑭᓪᓗᒍ, ᐊᑭᓕᒃᓴᖅᑖᓛᕈᒪᙱᑐᐊᕈᔅᓯ. ᐳᐃᒍᖅᑕᐃᓕᓗᓯ ᑐᓂᓯᔭᕆᐊᒃᓴᖅ ᓴᓇᔨᓄᑦ ᐊᑭᓕᖅᓱᐃᓚᐅᙱᒃᑲᓗᐊᕈᔅᓯ. ᑭᖑᕙᓯᒃᑐᑦ ᑐᓐᓂᖅᑯᑕᐅᔪᑦ ᐊᑭᓕᒃᑲᓐᓂᕆᐊᖃᓲᖑᕗᑦ 15%−ᒥ ᐊᕐᕌᒎᓵᖅᑑᑉ ᐃᖅᑲᓇᐃᔭᖅᑎᑦᑎᔨᒧᑦ ᓴᓇᔨᓄᑦ ᐊᑭᓕᖅᓱᖅᑕᐅᔾᔪᑎᑦ ᖃᐅᔨᓴᖅᑕᐅᓯᒪᔪᓄᑦ.

ᐃᑲᔪᕈᓐᓇᖅᑐᒍᑦ! ᐃᑲᔪᖅᑕᐅᔭᕆᐊᖃᕈᔅᓯ ᖃᐅᔨᒋᐊᕈᓐᓇᖅᐳᓯ ᐅᕗᖓ ᐃᑭᐊᖅᑭᕕᖕᒧᑦ Employer Services ᐅᕝᕙᓘᓐᓃᑦᐅᖃᓗᒡᓗᓯ ᐊᑭᖃᙱᑦᑐᒧᑦ 1-800-661-0792.
ᑭᓱᑦ ᓄᑖᖑᕙᑦ
WSCC−ᑯᑦ ᑎᑎᖅᑲᖁᑎᖏᑦ ᓇᓗᓇᐃᖅᓯᒪᔪᑦ

ᐊᖓᔪᖅᑳᑉ ᐅᖃᐅᓯᒃᓴᖏᑦ

ᐃᓱᒪᓚᐅᖅᓯᒪᕕᑦ ᓯᕗᓕᖅᑎᑦ ᖃᓄᖅ ᐃᓱᒪᖕᒪᖔᑕ ᑕᕝᕙᓂ WSCC−ᑯᑦ ᐱᓕᕆᕝᕕᐊᓂ? ᑕᒪᑐᒪᓂ ᑕᖅᑭᕐᒥ, ᑕᑯᔪᓐᓇᖃᑦᑕᕐᓂᐊᓕᖅᑐᓯ WSCC−ᑯᑦ ᐊᖓᔪᖅᑳᖓ ᐊᒻᒪ ᐊᐅᓚᑦᑎᔨᒻᒪᕆᖓ, ᑏᕝ ᒍᕋᓐᑎ, ᐱᓕᕆᐊᕆᕙᓪᓕᐊᔭᖏᓐᓂᒃ ᑎᑎᕋᖅᑕᖏᓐᓂᒃ ᐅᕙᓂ ᐃᑭᐊᖅᑭᕕᖕᒥ ᐊᖓᔪᖅᑳᑉ ᐅᖃᐅᓯᒃᓴᖏᑦ.

ᖃᖓᑦᑎᐊᓕᓴᐅᓛᖅ ᑎᑎᕋᓚᐅᖅᑕᖓ, ᑏᕝ ᐅᖃᐅᓯᖃᓚᐅᖅᐳᖅ Meredith ᑐᙵᕕᖏᓐᓂᒃ. ᐅᖃᐅᓯᒃᓴᖃᕐᕕᒋᒍᔅᓯᐅᒃ, ᐊᐱᖅᑯᑎᒃᓴᖃᕈᔅᓯ, ᐃᓱᒪᒋᔭᖃᕈᔅᓯᓘᓐᓃᑦ ᓯᕗᓂᒃᓴᑦᑎᓐᓂ ᓴᖅᑭᑕᐅᖃᑦᑕᓛᖅᑐᑯᓂᒃ, ᐅᓇ ᓇᕿᓪᓗᒍ ᐃᕐᖐᓐᓈᖅᑕᐅᒃᑯᑦ ᑎᑎᕋᕐᕕᒋᓗᒍ.

ᐱᔪᓐᓇᕐᒥᔭᓯ ᐃᑭᐊᖅᑭᕕᖕᒥ ᒪᒃᐱᖅᑐᒐᖓᓐᓂᒃ ᐅᑯᓇᓂ www.wscc.nt.ca ᐅᕝᕙᓘᓐᓃᑦ www.wscc.nu.ca.

ᒫᓐᓇ ᐱᔭᒃᓴᐅᔪᑦ: ᓄᑖᙳᕆᐊᖅᑎᓪᓗᒍ ᐋᓐᓂᖅᑐᖅᓯᐅᑎᓯ WSCC−ᑯᓐᓂᙶᖅᑐᒥᒃ ᐋᓐᓂᖅᑐᖅᓯᐅᑎᓄᑦ ᑎᑎᕋᖅᑕᐅᖃᑕᐅᓗᓯ



ᖃᐅᔨᒪᕕᓯ OHS−ᑯᑦ ᒪᓕᒋᐊᓕᖏᑦ ᐱᔭᕆᐊᖃᖅᑎᑦᑎᓲᖑᖕᒪᑕ ᐸᐸᑦᑎᔭᕆᐊᖃᖅᖢᓯ ᓴᓇᑎᓪᓗᒋᑦ−ᐋᓐᓂᖅᑐᕕᓂᕐᓂᒃ ᓄᓇᑦᓯᐊᒥ ᐊᒻᒪ ᓄᓇᕗᒻᒥ ᐅᑭᐅᓄᑦ ᐱᖓᓱᓄᑦ? ᑖᒃᑯᓄᖓ ᐱᔭᐅᔭᕆᐊᓕᖕᓄᑦ ᐱᓯᒪᖃᑕᐅᔪᒪᒍᔅᓯ, WSCC−ᑯᑦ ᐊᑐᐃᓐᓇᕈᖅᑎᑦᑎᓯᒪᕗᑦ ᓴᓇᕝᕕᒋᔭᐅᔪᓂᒃ ᑖᒃᑯᓂᖓ ᓄᑖᓂᒃ ᐋᓐᓂᖅᑐᓕᕆᓂᕐᒧᑦ ᐃᑲᔫᑎᒃᓴᓂᒃ. ᑕᕐᕋᖓᓐᓂ ᐱᕝᕕᒋᔪᒪᓗᒋᑦ ᐃᕐᖐᓐᓈᖅᑕᐅᒃᑯᑦ ᑎᑎᕋᕐᕕᒋᓗᒋᑦ ᐅᕗᖓ info@wscc.nt.ca.

WSCC-ᑯᑦ ᐅᓪᓗᖅᓯᐅᑎᖓ 2017−ᒧᑦ

ᐊᕐᕌᒍᑕᒫᑦ, WSCC−ᑯᑦ ᓴᖅᑭᑎᑦᑎᓲᑦ ᐅᓪᓗᖅᓯᐅᑎᓂᒃ ᓇᓗᓇᐃᖅᓯᒪᕙᒃᖢᑎᒃ ᐊᕐᕌᒍᒥ ᕿᑲᕐᓇᐃᑦ ᐊᒻᒪ  WSCC−ᑯᓐᓂ ᐱᒻᒪᕆᐅᒋᔭᑦ ᐅᓪᓗᐃᑦ ᖃᓄᐃᓕᐅᖅᑕᐅᓂᐊᖅᑐᓪᓗ ᓄᓇᑦᓯᐊᒥ ᓄᓇᕗᒻᒥᓗ. ᐅᓪᓗᖅᓯᐅᑎᑖᕈᒪᒍᔅᓯ ᓴᓇᕝᕕᔅᓯᓐᓄᑦ, ᐃᕐᖐᓐᓈᖅᑕᐅᒃᑯᑦ ᐅᕗᖓ ᑎᑎᕋᕐᕕᐅᔪᓐᓇᖅᑐᒍᑦ.


              
ᑕᕐᕆᔭᐅᓯᐅᕐᓂᕐᒥᒃ ᓵᓚᒃᓴᕋᓱᒃᑐᓂᒃ 2017−ᒥ: ᐱᔾᔪᑎᒋᓗᒍ ᐊᑦᑕᕐᓇᖅᑐᒧᐊᖅᑕᐃᓕᓂᖅ

ᑭᒡᒐᖅᑐᖅᖢᒋᑦ ᑲᓇᑕᒥ ᐱᓕᕆᕝᕕᒃ ᐋᓐᓂᐊᖅᑖᖅᑕᐃᓕᔾᔪᑎᓄᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ (CCOHS), WSCC−ᑯᑦ ᓱᓕ ᐱᓕᕆᑎᑦᑎᓂᐊᖅᑐᑦ ᐊᕐᕌᒍᑕᒫᑦ ᐱᓕᕆᐊᖑᓲᖑᓕᖅᑐᒥᒃ ᑕᕐᕆᔭᐅᓯᐅᕐᓂᕐᒥᒃ ᓵᓚᒃᓴᖅᑎᑦᑎᓇᓱᒡᓗᑎᒃ ᐊᖓᔪᒃᖠᕐᓂ ᐃᓕᓐᓂᐊᖅᑎᓂᒃ ᓄᓇᑦᓯᐊᒥ ᐊᒻᒪ ᓄᓇᕗᒻᒥ. WSCC−ᑯᑦ ᐊᐅᓚᑦᑎᓲᖑᕗᑦ ᓄᓇᕘᒥ/ᓄᓇᑦᓯᐊᒥ ᓵᓚᒃᓴᕋᓱᒃᑐᓂᒃ ᐊᐅᓪᓚᖅᑎᑎᓚᐅᙱᓐᓂᖏᓐᓂᒃ ᓵᓚᒃᓴᕐᓂᐊᖅᑐᒥᒃ ᑕᕐᕆᔭᐅᓯᐊᒥᒃ CCOH−ᑯᓐᓄᑦ ᑲᓇᑕᒥ ᓵᓚᒃᓴᕋᓱᖕᓂᐅᓂᐊᖅᑐᒥᒃ.

ᐅᑭᐅᖅ ᑕᓪᓕᒪᒋᓕᖅᑕᖓᓐᓂᒃ, ᓵᓚᒃᓴᕋᓲᑕᐅᓂᐊᖅᑐᖅ ᐱᓇᔪᒃᑕᐅᔪᓐᓇᕐᓂᐊᖅᑐᖅ ᐊᖓᔪᒃᖠᕐᓂ ᐃᓕᓐᓂᐊᖅᑎᓕᒫᓄᑦ ᐃᓕᓐᓂᐊᕈᑎᓕᖕᓄᑦ 9-ᒥ 12-ᒧᑦ, ᑕᒪᑐᒪᓂ ᐅᑭᐅᕐᒥ ᐱᓕᕆᐊᖑᓂᐊᖅᑐᖅ #FocusOnSafety. ᑕᕐᕆᔭᐅᓯᐊᕆᔭᒥᓄᑦ ᓵᓚᒃᓴᒃᑐᖅ ᑮᓇᐅᔭᑖᕋᔭᖅᑐᖅ $1000, ᐊᒻᒪ ᓱᓕ $1000−ᑲᓐᓂᕐᒥ ᑐᓐᓂᖅᑯᓯᐊᕋᔭᖅᖢᑎᒃ ᐱᓇᔪᒃᑐᑦ ᓵᓚᒃᓴᖅᑑᑉ ᐃᓕᓐᓂᐊᕐᕕᒋᔭᖓ. ᑕᒪᕐᒥᒃ ᐱᓇᔪᒃᑐᑦ ᐃᑲᔪᖅᓱᐃᔪᒥᒃ ᐃᓕᓴᐃᔨᖃᕆᐊᖃᖅᐳᑦ ᐃᓕᓐᓂᐊᕐᕕᖓᓐᓂᙶᖅᑐᒥᒃ ᑲᒪᔨᒋᔭᐅᕙᒡᓗᓂ ᐃᑲᔪᖅᓱᐃᕙᒡᓗᓂᓗ ᓵᓚᒃᓴᕋᓱᒃᑐᓂᒃ.

ᑕᕐᕆᔭᐅᓯᐊᑦ ᑕᑯᒃᓴᐅᑎᑦᑎᔭᕆᐊᖃᖅᐳᑦ ᓴᓇᕝᕕᒋᔭᐅᔪᒥᒃ ᐊᑦᑕᕐᓇᖅᑕᐃᓕᒪᓂᕐᒥ ᑕᑯᒃᓴᐅᑎᑦᑎᔪᓂᒃ, ᐅᖃᐅᓯᒃᓴᑎᑦ ᐃᓱᒪᖅᓲᑎᒋᔪᓐᓇᖅᑕᓯ. ᐱᓚᕆᖅᑰᔨᒐᓗᐊᖅᐸᑦ, ᑎᑎᕋᐅᔭᐅᒐᓗᐊᖅᐸᑦ, ᐊᐅᓚᖅᑰᔨᙳᐊᖅᑑᒐᓗᐊᖅᐸᑦ, ᑐᓴᕐᓈᒐᒃᓴᐅᒐᓗᐊᖅᐸᑦ, ᖃᓄᑐᐃᓐᓇᖅ ᐃᓱᒪᒋᔭᐅᔪᑦ ᑐᓐᓂᖅᑯᑕᐅᔪᓪᓗ ᑐᙵᓱᒃᑎᑕᐅᔪᐃᓐᓇᐅᓂᐊᖅᑐᑦ. ᐃᓕᖕᓂ ᐊᐱᕆᓗᑎᑦ ᓴᓇᔩᑦ ᐊᒻᒪ ᐃᖅᑲᓇᐃᔭᖅᑎᑦᑎᔩᑦ ᐃᑲᔪᕈᓐᓇᕐᒪᖔᑕ ᓴᖅᑭᔮᖅᑎᑦᑎᓕᕐᓗᑎᒃ ᐊᑦᑕᕐᓇᙱᑦᑐᒥᒃ ᓴᓇᕝᕕᖕᒥ ᓴᓇᔨᓕᒫᓄᑦ.

ᑐᓂᓯᓂᐊᕐᓗᓂ ᑭᖑᓪᓕᖅᐹᖅ ᐅᓪᓗᖅ 2017-ᒥ #FocusOnSafety ᓵᓚᒃᓴᕋᓱᒃᑐᓂᒃ ᐊᐃᕐᕆᓕ 1, 11:59 ᐅᓪᓗᒃᑯᑦ ᕿᑎᕐᒥᐅᑦ ᖃᐅᔨᓴᐅᑖ ᒪᓕᒡᓗᒍ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᒪᓕᒐᖏᓐᓂᒃ ᒪᓕᒋᐊᓕᖕᓂᓪᓗ, ᖃᓄᕐᓗ ᐱᓇᔪᖃᑕᐅᔪᓐᓇᕐᒪᖔᑦ, ᐊᓯᖏᓐᓂᒡᓗ, ᐳᓛᕈᓐᓇᖅᑕᓯ ᑕᕐᕆᔮᒃᓴᓕᐊᑦ ᓵᓚᒃᓴᕋᓱᒃᑐᑦ ᐅᓇ ᒪᒃᐱᖅᑐᒐᖅ ᓇᕿᓪᓗᒍ.
ᐊᑦᑕᕐᓈᕿᙱᓪᓗᓂ ᓯᑭᑑᑲᑕᖕᓂᖅ
ᐃᖅᑲᐃᑎᑦᑎᔾᔪᑎ

ᐅᕙᑦᑎᓐᓂ ᑐᓴᕆᐊᖃᙱᑦᑎᐊᖅᑐᓯ ᓯᑭᑑᑲᑕᖕᓂᖅ ᐃᓚᒋᔭᐅᓪᓚᕆᖕᓂᖓᓂ ᐅᑭᐅᒃᑯᑦ ᐱᓕᕆᐊᖑᓲᓂᒃ ᐅᑭᐅᖅᑕᖅᑐᒥ ᐃᓅᓯᑦᑎᓐᓂ, ᐅᑭᐅᖅᑕᖅᑐᒥᐅᓪᓗ ᖃᔅᓯᑲᓪᓛᓗᐃᑦ ᐅᑭᐅᙳᕌᖓᑦ ᓯᑭᑑᑲᑕᓕᖅᐸᒃᖢᑎᒃ. ᓱᖏᐅᙵᔪᐊᓘᒐᓗᐊᕈᕕᑦ ᓯᑭᑑᑲᑕᖕᓂᕐᒥᒃ, ᐱᒻᒪᕆᐅᖏᓐᓇᐅᔭᖅᐳᖅ ᐊᑦᑕᕐᓇᖅᑐᒃᑰᔾᔮᕋᓱᒋᙱᓪᓗᑎᑦ. ᐃᓕᖕᓂ ᐃᖅᑲᐃᓯᑎᑉᐸᒡᓗᑎᑦ (ᐃᓚᑎᓪᓗ) ᐊᑦᑕᕐᓇᖅᑐᒧᐊᑳᓪᓚᖕᓂᕈᔅᓯ ᖃᓅᔭᕆᐊᖃᕋᔭᕐᒪᖔᔅᓯ ᓯᑭᑑᖅᐸᒃᑐᓕᒫᓄᑦ ᖃᐅᔨᒪᔭᐅᔭᕆᐊᖃᖅᑐᓂᒃ. ᖃᓄᓗᒃᑖᕐᓗ ᐱᓕᕆᓂᐅᕙᒃᑐᓂᒃ ᐃᓅᓯᑦᑎᓐᓂ, ᐱᕙᒌᔭᖅᓯᒪᖃᑦᑕᕐᓂᖅ ᐱᒻᒪᕆᐅᓛᖑᕗᖅ. ᐅᕝᕙᐅᑯᐊ ᖃᐅᔨᒪᔭᕆᐊᖃᖅᑕᕗᑦ:

ᓯᑭᑑᒃᑯᑦ ᐊᐅᓪᓚᓚᐅᖏᓐᓂᔅᓯᓐᓂ
  • ᓯᓚᓯᐅᑦ ᖃᐅᔨᒋᐊᖅᑳᕐᓗᒍ, ᐱᕙᒌᔭᕈᓐᓇᕐᓂᐊᕋᕕᑦ ᐊᓐᓄᕌᖅᑐᑦᑎᐊᕐᓗᑎᓪᓗ ᓈᒻᒪᒃᑐᓂᒃ.
     
  • ᓯᑭᑑᖅ ᐃᖏᕐᕋᔾᔪᑎᖏᑦ ᖃᓄᐃᙱᑦᑎᐊᕋᓗᐊᕐᒪᖔᑕ ᖃᐅᔨᓴᖅᑕᐃᓐᓇᕆᓗᒋᑦ, ᐊᒻᒪ ᓯᑰᑉ ᖄᖓᒍᑦ ᓯᑭᑑᑲᑕᙱᓪᓗᑎᑦ ᖃᓄᖅ ᐃᔾᔪᑎᒋᖕᒪᖔᑦ ᓇᓗᑐᐊᕈᖕᓂ. ᓯᑯᒃᑰᖅᐸᙱᓪᓗᓯ ᓵᑦᑐᒃᑯᑦ, ᕿᓄᒃᑯᑦ, ᐊᐅᒃᑲᕐᓂᐅᑉ ᖃᓂᒋᔮᒍᑦ, ᐅᕝᕙᓘᓐᓃᑦ ᖃᖓᑦᑎᐊᖅ ᓯᑯᖃᕈᓐᓃᕌᓪᓚᓚᐅᕐᓗᓂ ᖁᐊᒃᑲᓐᓂᖅᓯᒪᔪᒧᑦ. ᐅᐸᒃᐸᙱᓪᓗᒋᑦ ᑕᑯᓕᒪᙱᑕᓯ ᖁᐊᖅᓯᒪᔪᑦ ᑕᓰᑦ ᐊᒻᒪ ᑰᑦ; ᐃᒪᖅᑕᖃᕐᓂᕐᓗᓂ ᑕᑯᙱᑦᑐᓐᓇᕋᔅᓯᐅᒃ. ᓄᓇᔅᓯᓐᓂ ᓯᑭᑑᓕᕆᕝᕕᒃᓯ ᒫᓐᓇᓕᓴᐅᓛᓂᒃ ᑐᑭᓯᒋᐊᒐᒃᓴᖃᓲᑦ ᐃᖏᕐᕋᕝᕕᒃᓴᓂᒃ ᐊᒻᒪ ᓯᑯ ᖃᓄᐃᑦᑑᓂᖓᓂᒃ.
     
  • ᐅᖅᓴᒃᓴᑦᑎᐊᕐᓗᑎᑦ! ᐊᐅᓪᓛᖅᓯᒪᓂᐊᖅᑎᓪᓗᑎᑦ ᓈᒻᒪᒃᑐᒥᒃ ᐅᖅᓱᖃᑦᑎᐊᖅᐸᒡᓗᓯ. ᐅᖅᓴᒃᓴᓕᕌᖓᔅᓯ, ᒪᓕᑦᑎᐊᖅᐸᒡᓗᒋᑦ ᒪᓕᒋᐊᓕᑦ ᐱᕐᕈᓗᒡᓗᓯ ᐆᖁᓇᓯ.
     
  • ᓯᑭᑑᖅᓯ ᑲᓕᒧᐊᕐᓂᐊᓕᕌᖓᔅᓯᐅᒃ ᐲᕐᓂᐊᓕᕌᖓᔅᓯᐅᒡᓗ, ᐃᑲᔪᖅᑎᖃᕈᒪᕙᒡᓗᓯ. ᐃᓕᖕᓂ ᐊᒃᓱᕈᖅᑎᓗᐊᙱᓪᓗᑎᑦ, ᑐᐊᕕᐊᕆᙱᓪᓗᓯᐅᒡᓗ ᓄᑭᔅᓯᓐᓂ ᐊᒧᒃᓯᖦᖤᕐᓂᐊᕋᔅᓯ ᐋᓐᓂᕐᓗᓯᓗ ᐃᓕᙵᖦᖤᕐᓂᐊᕋᔅᓯ.
     
  • ᖃᐅᔨᒪᑦᑎᐊᕐᓗᒋᑦ ᕿᐅᓗᐊᓕᕐᓂᕈᔅᓯ ᖃᐅᔨᒪᔭᕆᐊᓖᑦ.
     
  • ᓯᑭᑑᖅᓯ ᖃᐅᔨᒪᓗᓯᐅᒃ: ᐊᑲᐅᓛᖑᖕᒪᑦ ᖃᐅᔨᒪᑦᑎᐊᕐᓗᓂ ᓯᑭᑑᕐᓂᒃ ᓯᑭᑑᑦ ᐊᔪᖅᓯᑳᓪᓚᒃᑐᐊᓘᓐᓂᖅᐸᑦ. ᓇᕿᑦᑕᐅᑎᑯᓘᔭᖏᑦ ᖃᐅᔨᓴᖅᐸᒡᓗᒋᑦ ᓱᖏᐅᓴᕐᓗᑎᑦ ᐊᒻᒪ ᓈᒻᒪᒋᑦᑎᐊᖅᑕᖏᓐᓂᒃ ᐅᖅᓱᖅᑎᕈᓯᖅᐸᒡᓗᒍ.
     
  • ᐊᐅᓪᓚᕐᓂᐊᕌᖓᕕᑦ ᐃᓕᖕᓂᒃ ᑐᓴᖅᑕᐅᑎᑉᐸᒡᓗᑎᑦ, ᓇᐅᒃᑰᕐᓂᐊᕐᒪᖔᖅᐱᑦ, ᓯᑭᑑᑦ ᑕᐅᑦᑐᐊ ᖃᓄᐃᑦᑑᖕᒪᖔᑦ, ᖃᑯᒍᓗ ᐅᑎᓛᕐᒪᖔᑦ ᓇᓗᓇᐃᑦᑎᐊᖅᐸᒡᓗᑎᑦ.

ᐃᓕᖕᓂ ᐸᕐᓇᑦᑎᐊᖅᐸᒡᓗᑎᑦ
  • ᐊᓐᓄᕌᖅᑐᑦᑎᐊᖅᐸᒡᓗᑎᑦ: ᐃᑭᐊᕐᒥᓕᖕᓂᒃ ᐊᓐᓄᕌᖅᑐᖅᓯᒪᕙᒡᓗᑎᑦ, ᓯᑭᑑᖅᑐᖅᓯᐅᑎᓪᓗ ᐃᒡᒐᐃᑦ, ᐃᔅᓴᔭᙱᑦᑐᑦ ᐊᑕᔪᐃᑦ ᐊᒻᒪ ᐊᒡᒑᑦ, ᐊᒻᒪ ᐅᑭᐅᖅᓯᐅᑏᖕᓂ ᑲᒫᓗᖕᓂ ᐃᒻᒪᒃᑕᙱᑦᑐᓂᒃ ᐊᓚᓂᖃᕐᓗᑎᒃ. ᐊᓐᓄᕌᕆᔭᑎᑦ ᑕᖅᓵᕐᓗᒋᑦ, ᖃᐅᒻᒥᑕᐅᓗᓂᓗ ᑕᖅᓴᐅᓐᓇᖅᑐᓕᖅᓯᒪᓗᒋᑦ−ᑖᖅᓯᑎᓪᓗᒍ ᐃᖏᕐᕋᓂᐊᖅᑎᓪᓗᑎᑦ ᑕᖅᓴᐅᓐᓇᖅᑐᓕᖕᓂ ᐊᑐᖁᔭᐅᓗᐊᙳᐊᕋᔭᖅᐳᓯ.
     
  • ᐅᑯᓂᖓ ᐴᖅᑲᐃᓗᑎᑦ:
    • ᐋᓐᓂᖅᑐᖅᓯᐅᑎᑦ; 
    • ᑐᐊᕕᕐᓇᖅᑐᖃᓕᕐᓂᖅᐸᑦ ᓴᓇᕐᕈᑎᓂᒃ, ᑮᒃᑲᓐᓂᕐᒥᒡᓗ; 
    • ᐃᑲᔪᖅᑕᐅᔭᕆᐊᖃᓕᖅᑐᓄᑦ ᓱᓇᒃᑯᑖᒃᓴᑦ: ᖁᒻᒧᑦ ᖁᑭᕆᐊᕐᓗᓂ ᖃᐅᒻᒪᒃᑕᔫᑦ, ᐃᑭᑎᑦᑎᔾᔪᑎᑦ (ᐃᒃᑭᑏᑦ ᐅᕝᕙᓘᓐᓃᑦ ᐃᖕᓃᑦ/ᑲᓱᐃᑦ) ᐅᔅᓯᒃᑐᒧᑦ ᐴᖅᓯᒪᓗᑎᒃ, ᓴᕕᒃ/ᐸᓇ, ᑭᓪᓘᑦ, ᐅᓚᒪᐅᑎᒥᒡᓘᓐᓃᑦ, ᑑᕐᒥᒃ, ᐃᑭᑦᑕᖅᑐᒥᒃ (ᕚᑕᓖᖃᒃᑲᓐᓂᕐᓗᒍ), ᐅᕕᙱᐊᕋᐅᒻᒥᒃ, ᑕᒧᓗᒐᒃᓴᓂᒃ ᐆᒻᒪᕆᒃᓯᓐᓇᖅᑐᓂᒃ ᓲᕐᓗ ᖃᖅᑯᐊᒐᐃᑦ ᐅᕝᕙᓘᓐᓃᑦ ᒍᕋᓅᓚ ᐸᕐᔅ, ᐊᓐᓄᕌᒃᑲᓐᓂᕐᓂᒡᓗ; 
    • ᐅᐸᒍᒪᔭᕐᓄᑦ ᖃᐅᔨᒪᔾᔪᑎᑦ: ᑕᒻᒪᕇᒃᑯᑎᑦ, ᐅᐸᒐᓱᒃᑕᕐᓄᑦ ᓄᓇᙳᐊᒥᒃ, ᑎᒃᑯᐊᖅᑑᑎᑦ; ᐊᒻᒪ 
    • ᐅᖃᓘᑎᑦ: ᑕᒫᓂᕐᕆᔪᒥᒃ ᐅᖃᓘᑎᕋᓛᒥᒃ ᓇᒃᓴᖅᐸᒡᓗᑎᑦ ᐅᖃᓗᒍᓐᓇᖅᑐᒦᒃᑯᕕᑦ. ᖃᐅᔨᒪᒍᕕᑦ ᐅᖃᓘᑎᕋᓛᒧᑦ ᐅᖃᓗᒍᓐᓇᙱᑦᑐᒦᓐᓂᐊᕈᕕᑦ, ᑐᓴᖅᑎᑦᑎᕙᒡᓗᑎᑦ ᐃᓅᖃᑎᔅᓯᓐᓂ ᓇᒧᙵᐅᔪᒪᖕᒪᖔᖅᐱᑦ, ᖃᖓᑦᑕᖅᑎᑕᐅᓯᒪᔪᒃᑯᓪᓗ ᐅᖃᓘᒻᒥᒃ ᓇᒃᓴᖅᐸᒡᓗᑎᑦ ᐱᖃᑐᐊᕈᕕᑦ.
ᐊᑦᑕᕐᓈᕿᙱᓪᓗᓯ ᐊᖁᑉᐸᒡᓗᓯ
  • ᓈᒻᒪᒋᔭᕐᓂᒃ ᐊᖁᑉᐸᒡᓗᑎᑦ: ᐊᖁᖃᑦᑕᕆᐅᓕᓵᖅᑐᑦ ᐃᒡᓕᓂᒃᑰᖏᓐᓇᕆᐊᖃᖅᐳᑦ ᖃᐅᒪᑎᓪᓗᒍᓗ ᐃᖏᕐᕋᕙᒡᓗᑎᒃ.
     
  • ᓯᑭᑑᖅᐸᒡᓗᓯ ᓈᒻᒪᒃᑐᒥᒃ ᐃᖏᕐᕋᕙᒡᓗᓯ. ᐊᖅᑯᑎᒃᑯᑦ ᓱᒃᑲᓴᕆᐊᖃᕐᓂᕐᒧᑦ ᓇᓗᓇᐃᒃᑯᑕᑦ ᒪᓖᓐᓇᐅᔭᕐᓗᒋᑦ ᐊᒻᒪ ᐊᖅᑯᑏᑦ/ᐃᒡᓕᓂᕐᒦᑦᑐᑦ ᓇᓗᓇᐃᒃᑯᑕᑦ.
     
  • ᓄᕗᐊᕐᔪᒃᑰᕐᓂᐊᓕᕌᖓᔅᓯ ᖃᖅᑲᒃᑰᕐᓂᐊᓕᕌᖓᔅᓯᓗ ᐅᔾᔨᖅᓱᑦᑎᐊᖅᐸᒡᓗᓯ. ᐅᔾᔨᖅᓱᓗᐊᒃᑲᓐᓂᖅᐸᒡᓗᓯ ᐅᐸᓕᒪᙱᑕᔅᓯᓐᓄᐊᕌᖓᔅᓯ ᐅᕝᕙᓘᓐᓃᑦ ᕿᒡᒍᒃᑰᓕᕌᖓᔅᓯ; ᐊᐴᓪᓚᑎᑐᐃᓐᓇᕆᐊᖃᕋᔅᓯ ᐊᑦᑕᕐᓇᖅᑐᓄᑦ ᑕᑯᒃᓴᐅᙱᖦᖢᑎᒃ ᐅᔭᑳᓪᓚᖕᓇᖅᑐᓄᑦ, ᓲᕐᓗ ᓇᐹᖅᑐᕕᓃᑦ ᐊᐳᒻᒧᑦ ᓴᐅᓯᒪᔪᑦ ᐅᕝᕙᓘᓐᓃᑦ ᐅᔭᕋᓱᒡᔪᐃᑦ.
     
  • ᓯᑭᑑᑉ ᖃᐅᒻᒪᖅᑯᑎᖏᑦ ᐊᒻᒪ ᐃᖅᑯᐊᑕ ᖃᐅᒻᒪᖅᑯᑎᖏᑦ ᐃᑯᒪᑏᓐᓇᖅᐸᒡᓗᒋᑦ ᑕᐅᑐᒍᓐᓇᕐᓂᐊᕋᕕᑦ ᑕᐅᑐᒃᑕᐅᔪᓐᓇᕐᓗᑎᓪᓗ.
     
  • ᐊᔪᕐᓇᙱᑐᐊᕌᖓᑦ ᐃᓄᑑᓗᑎᑦ ᐊᐅᓪᓚᖅᐸᙱᓪᓗᑎᑦ: ᐊᑲᐅᓂᖅᐹᖑᕗᖅ ᐊᐅᓪᓚᓚᐅᑲᖕᓂᐊᖅᑎᓪᓗᓯ ᐃᓄᒋᐊᕌᕐᔪᒃᐸᒡᓗᓯ. ᑭᓯᐊᓂ ᐅᓄᓗᐊᖅᑐᓂᒃ ᓯᑭᑑᕐᒦᑎᑦᑎᕙᙱᓪᓗᓯ.
     
  • ᐃᓄᖕᓂ ᓯᑭᑑᒃᑯᑦ ᑲᓕᑉᐸᙱᓪᓗᓯ ᖃᒧᑎᒦᑦᑐᓂᒃ, ᐅᓂᐊᕈᑎᓃᑦᑐᓂᒃ, ᐊᒃᓴᓗᐊᓃᑦᑐᓂᒃ ᐃᑭᐊᖓᓃᓲᑦ ᐳᕕᖅᓯᒪᔪᓃᑦᑐᓂᒃ, ᐊᒃᓴᓗᐊᒦᑦᑐᓂᒃ, ᐅᕝᕙᓘᓐᓃᑦ ᐊᖕᒪᓗᖅᑕᓄᑦ ᐅᓂᐊᕈᑎᓃᑦᑐᓂᒃ. ᑲᓕᑦᑕᕆᐊᖃᕈᔅᓯ, ᐊᑦᑕᕐᓇᙱᓛᖑᔪᓐᓇᖅᑐᖅ ᖃᒧᑏᒃ ᓴᕕᕋᔭᖕᒥ ᑲᓗᑎᖃᕐᓗᑎᒃ. ᐃᓄᖕᒥ ᐅᕝᕙᓘᓐᓃᑦ ᐱᖁᑎᓂᒃ ᑲᓕᒃᑯᔅᓯ, ᓱᒃᑲᓴᖅᑕᐃᓕᒋᔅᓯ ᒪᓂᕋᐅᓂᒃᑰᕐᓗᓯᓗ, ᓇᐹᖅᑐᑦ ᐅᔭᖅᑲᓪᓗ ᖃᓂᒋᔮᒎᖅᐸᙱᓪᓗᓯ, ᐊᒻᒪ ᓯᑭᑑᑦ ᐊᓯᖏᑦ ᖃᓂᒋᓗᐊᖅᐸᙱᓪᓗᒋᑦ. ᖁᙱᐊᖅᑎᑕᖃᖅᐸᒡᓗᓂ ᓯᑭᑑᕐᒦᖃᑕᐅᔪᒥᒃ ᑲᓕᑕᐅᔪᖃᕌᖓᑦ.
     
  • ᐅᓐᓄᐊᒃᑯᑦ ᐃᖏᕐᕋᑎᓪᓗᓯ, ᓯᑭᑑᑉ ᖃᐅᒻᒪᖅᑯᑎᖏᑦ ᐃᑯᒪᑎᑦᑎᐊᖅᐸᒡᓗᒋᑦ, ᑖᖅᑎᓪᓗᒍ ᑕᖅᓴᐅᓐᓇᖅᑐᓂᒃ ᐊᑐᖅᐸᒡᓗᓯ, ᓱᒃᑲᐃᓵᕐᔫᒥᕙᒡᓗᓯᓗ.
ᓄᓇᓕᐸᐅᔭᓕᒫᑦ ᐊᒻᒪ ᓄᓇᓕᓕᒫᑦ ᓯᑭᑑᕐᒧᑦ ᒪᓕᒐᖁᑎᖃᖅᑐᓕᒫᑦ ᐊᒻᒪ ᒪᓕᒋᐊᖃᖅᑐᓕᒫᑦ (ᐅᓇ ᐆᒃᑑᑎᒋᓗᒍ, ᑕᑯᒋᐊᕐᓗᒍ ᔭᓗᓇᐃᒥ ᓄᓇᓕᐸᐅᔭᖓᓐᓂ ᒪᓕᒐᖏᑦ here ᓇᕿᓪᓗᒍ ᑕᑯᒋᐊᕈᓐᓇᖅᑕᓯ). ᓄᓇᓕᖕᓂ ᒪᓕᒐᕆᔭᐅᔪᑦ ᖃᐅᔨᓇᓱᑦᑎᐊᕐᓗᒋᑦ ᒪᓕᒃᐸᒡᓗᒋᓪᓗ ᖁᓛᓂ ᐃᑲᔫᑎᒃᓴᑦ ᓯᑭᑑᒃᑯᑦ ᐃᖏᕐᕋᑲᑕᖕᓂᐊᓕᕌᖓᕕᑦ ᐃᓱᒫᓗᓗᐊᖃᑦᑕᖁᓇᓯ.
ᐳᔪᕐᓗᒃ ᑐᖁᓐᓇᖅᑐᒥᒃ ᐅᔾᔨᕈᓱᑦᑎᐊᕐᓂᖅ
ᐊᑦᑕᕐᓇᖅᑕᐃᓕᒪᓂᕐᒧᑦ ᐱᕙᒌᔭᕈᑎᑦ ᖃᐅᔨᒪᑦᑎᐊᖏᓐᓇᕐᓗᒋᑦ

ᐅᔾᔨᖅᓱᕆᐊᖃᕐᓇᖅᓯᕗᖅ ᐋᓯ: ᓯᓚ ᓂᒡᓚᓱᒃᑐᖅ, ᐊᖏᕐᕋᑐᐊᕌᖓᔅᓯᓗ ᐃᒡᓗᓯ ᐃᑭᒋᐊᕈᒪᑐᐃᓐᓇᑦᑎᐊᓕᕐᖢᓯᐅᒃ ᐃᓕᔅᓯᓐᓂ ᐅᖅᑰᑎᓐᓇᓱᒃᖢᓯ. ᐃᑭᒋᐊᑐᐊᕌᖓᔅᓯ, ᑭᓯᐊᓂ, ᐃᓕᔅᓯᓐᓂ ᐊᐱᕆᕙᒡᓗᓯ ᐳᔪᕐᓗᒃ ᑐᖁᓐᓇᖅᑐᒧᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᕙᒌᔭᑦᑎᐊᖅᓯᒪᒐᓗᐊᕐᒪᖔᔅᓯ.

ᐳᔪᕐᓗᒃ ᒑᓯᐅᕗᖅ ᓴᖅᑭᓲᖑᔪᖅ ᐃᑯᐊᓚᑦᑎᐊᖏᑎᓪᓗᒍ ᐅᖅᓱᐊᓗᒃ. ᑕᒪᒃᑯᐊ ᐅᖅᓱᐊᓗᐃᑦ ᐃᓚᖃᑉᐳᑦ ᒑᓯᒥᒃ, ᐊᒻᒪᓗ ᑭᓂᖅᑐᑦ - ᑕᒪᕐᒥᒃ ᐊᑐᖅᑕᐅᓱᖑᔪᑦ ᖃᐅᑕᒫᑦ ᐅᕙᑦᑎᓐᓄᑦ ᐊᒥᓱᓄᑦ.

ᐳᔪᕐᓗᒃ ᑕᑯᔭᔅᓴᐅᖏᓚᖅ, ᑎᐱᖃᕋᓂᓗ ᐊᒻᒪᓗ ᓇᐃᕝᕙᓪᓚᒐᔅᓴᐅᖏᑦᑐᓂ, ᑭᓯᐊᓂᓕ ᑐᖁᓐᓇᖅᑐᒻᒪᕆᐅᕗᖅ. ᑐᖁᓐᓇᖅᑐᓕᒃ ᖁᓛᓂ 35 ppm (ᐃᓚᖏᑦ-ᐊᑕᐅᓯᖅ-ᒥᓕᐊᓐ), ᐊᒻᒪᓗ ᓄᐊᑉᐸᓪᓕᐊᒍᓐᓇᖅᑐᓂ ᐃᓪᓗᒋᔭᐅᔪᓂ ᐋᖅᑭᒃᓯᒪᑦᑎᐊᖏᑦᑐᒃᑯᑦ ᐅᕝᕙᓘᓐᓃᑦ ᓱᕋᔅᓯᒪᑉᐸᑦ ᐅᖅᑰᓴᐅᑎᑦ.

ᐅᖅᑰᓴᐅᑎᑦ ᐊᒻᒪᓗ ᐅᖅᓱᐊᓗᒃᑐᖅᑐᑦ ᐳᔪᕐᓗᒃᑖᕈᓐᓇᖅᑐᑦ ᐅᑯᐊᖑᕗᑦ:
  • ᑭᓂᖅᑐᖅ, ᒑᓯ, ᓴᒃᑯ, ᐊᒻᒪᓗ ᕿᔪᑦ ᐃᒐᐃᑦ;
  • ᐅᖅᑰᓴᐅᑎᑦ;
  • ᐆᓇᖅᑐᖃᐅᑎᑦ;
  • ᒑᓯᒨᖅᑐᑦ ᐅᖅᑰᓴᐅᑏᑦ;
  • ᐊᐅᓚᐅᑎᓖᑦ ᐱᓕᕆᔾᔪᑎᑦ ᓱᕐᓗ ᐊᐅᓚᑕᒐᐃᑦ ᐊᐅᓚᐅᑎᕋᓛᑦ; ᐊᒻᒪᓗ
  • ᐃᒐᐃᑦ ᕿᔪᑦᑐᖅᑐᑦ ᑲᑉᐳᔭᖅᑐᑦ.
ᐳᔪᕐᓗᒃ ᐅᓗᕆᐊᓇᓪᓚᑦᑖᖅᑐᖅ, ᑭᓯᐊᓂᓕ ᖃᓄᐃᓕᐅᕈᓐᓇᕆᕗᑎᑦ ᐊᑦᑕᓇᐃᖅᓯᒪᑦᑎᐊᕈᓐᓇᖁᓪᓗᑎᑦ ᐊᖏᕐᕋᓐᓂ ᐊᒻᒪᓗ ᐃᖅᑲᓇᐃᔭᖅᕕᓐᓂ:
  • ᐋᖅᑭᒃᓯᓗᑎᑦ ᐳᔪᕐᓗᒥᒃ ᖃᐅᔨᓴᕈᑎᓂᒃ ᓈᒻᒪᑉᐸᑦ.
  • ᖃᐅᔨᓴᖃᑦᑕᐃᓐᓇᕐᓗᒍ ᐳᔪᕐᓗᕐᒧᑦ ᖃᐅᔨᓴᕈᑏᑦ. ᐹᑕᓖᖏᑦ ᐱᔪᓐᓇᑎᑦᑎᐊᕐᓗᒋᑦ ᐊᒻᒪᓗ ᖁᖁᐊᖁᑎᖓ ᐱᔪᓐᓇᑎᐊᕐᓗᓂ.
  • ᐅᖅᑰᓴᐅᑏᑦ ᑲᒪᒋᔭᐅᑦᑎᐊᖃᑦᑕᕐᓗᓂ ᐊᒻᒪᓗ ᖃᐅᔨᓴᖅᑕᐅᕙᓪᓗᓂ ᐱᓕᕆᔨᒻᒪᕆᒻᒧᑦ.
  • ᐊᕐᕌᒍᑕᒫᑦ ᖃᐅᔨᓴᖅᑕᐅᖃᑦᑕᕐᓗᑎᒃ ᐃᓪᓗᓯᓐᓂᑦᑐᑦ ᐅᖅᓱᐊᓗᒃᑐᖅᑐᓕᒫᑦ ᐊᒻᒪᓗ ᐃᖅᑲᓇᐃᔭᖅᕕᓐᓂ.
  • ᐃᒐᖃᕈᕕᑦ ᐅᕝᕙᓘᓐᓃᑦ ᐊᐅᓚᐅᑎᓕᒻᒥᒃ ᐅᖅᓱᐊᓗᒃᑐᖅᑐᒥᒃ ᐱᕕᑭᑦᑐᒥ, ᐊᓂᐊᕕᖃᑦᑎᑎᐊᕐᓗᒍ.
  • ᖃᐅᔨᑎᓪᓗᒍ ᐃᖅᑲᓇᐃᔭᖅᕖᑦ ᐅᓗᕆᐊᓇᖅᑐᖅᑕᖃᑉᐸᑦ ᐳᔪᕐᓗᒃᑕᕈᑎᐅᑐᐃᓐᓇᕆᐊᓕᒻᒥᒃ.
ᐳᔪᕐᓗᒃ ᐅᕿᓐᓂᖅᓴᐅᒻᒪᑦ ᐊᓂᕐᓂᖅᓴᒥᒃ, ᐊᒻᒪᓗ ᓯᐊᕐᒪᕈᓐᓇᖅᑐᓂᒃ ᓇᒧᑐᐃᓐᓇᑦᑎᐊᖅ ᐃᓪᓗᕈᓯᕐᒧᑦ. ᐋᖅᑭᒃᓯᓗᓂ ᐳᔪᕐᓗᒧᑦ ᖃᐅᔨᓴᕈᑎᒥᒃ, ᖁᑦᑎᑦᑐᒦᑎᓪᓗᒍ ᐊᕙᓗᒥ ᐅᕝᕙᓘᓐᓃᑦ ᖁᓛᓂ. ᐳᔪᕐᓗᒧᑦ ᖁᖁᐊᕈᑎᑦ ᐋᖅᑭᒃᑕᐅᔭᕆᐊᖃᒻᒥᔪᑦ ᕿᑎᐊᓃᑎᓪᓗᒋᑦ ᐃᓪᓘᑉ, ᐊᒻᒪᓗ ᐅᖓᓯᑦᑐᒦᑎᓪᓗᒋᑦ ᐅᖅᓱᐊᓗᒃᑐᖅᑐᑦ, ᑕᒪᒃᑯᐊ ᐊᑐᖅᑕᐅᓲᑦ ᐅᖅᓱᐊᓗᒃᑐᖅᑐᑦ ᒥᑭᔫᒐᓗᐊᒥᒃ ᐳᔪᕐᓗᒥᒃ ᐳᑦᑐᐊᕿᔭᕐᒪᑕ ᐃᑭᑕᐅᒑᖓᒥᒃ.

ᐊᑯᓂᐅᖃᑦᑕᕐᒪᑦ ᐅᑭᐅᖅ ᐊᕐᕌᒍᑕᒫᑦ, ᐳᔪᕐᓗᕐᒥᑦ ᖃᐅᔨᒪᓇᓱᐊᕐᓂᖅ ᐱᒻᒪᕆᐅᕗᖅ. ᑕᑯᓂᐊᓚᐅᕆᑦ ᐅᕗᖓ.
wscc.nt.ca   /  1.800.661.0792   *   wscc.nu.ca  /  1.877.404.4407