ᑎᓯᐱᕆ 2016
ᖁᐊᔭᕿᓐᓂᖅ, ᐹᓪᓚᖕᓂᖅ, ᐊᒻᒪᓗ ᐅᕐᕈᓂᖅ
ᑕᒪᑐᒪᓂ ᖁᕕᐊᓱᕝᕕᐅᑎᓪᓗᒍ ᑲᒪᒋᑦᑎᐊᕆᑦ!

ᖁᕕᐊᓱᕝᕕᙳᕐᐸᓪᓕᐊᑎᓪᓗᒍ, ᓇᒧᙵᑲᑕᑯᓗᐃᔭᕆᐊᖃᖅᑐᒃᓴᐅᓂᐊᕋᕕᑦ. ᖁᕕᐊᓲᑎᒃᓴᓂᒃ ᓂᐅᕕᑯᓗᐃᔭᓕᕐᓇᖃᑦᑕᕐᒪᑦ ᐱᕙᒌᔭᕋᓱᓪᓗᒋᓪᓗ ᖁᕕᐊᓱᕝᕕᒻᒥ ᓂᕆᔭᐅᓂᐊᕐᑐᓂᒃ ᐱᖃᓐᓇᕆᔭᕐᓄᑦ ᐃᓚᒋᔭᕐᓄᓪᓗ. ᑕᐃᒪᐃᒃᑲᓗᐊᕐᑎᓪᓗᒍ, ᖃᓐᓂᒐᓚᒃᑎᓪᓗᒍᓗ, ᐱᒻᒪᕆᐅᕗᖅ ᐅᔾᔨᓴᑦᑎᐊᕐᓂᕐᓴᐅᒍᕕᑦ ᐊᕙᑎᖕᓃᑦᑐᒥᒃ ᖁᐃᑦᑕᐃᓕᒪᓗᑎᑦ, ᐹᓪᓚᒃᑕᐃᓕᒪᓗᑎᑦ, ᐅᕐᕈᑦᑕᐃᓕᒪᓗᑎᓪᓘᓐᓃᑦ.

ᖁᐊᔭᕿᓐᓂᕐᓴᐅᔪᓐᓇᕋᕕᑦ. ᐹᓪᓚᓪᓗᑎᓪᓘᓐᓃᑦ ᐅᕐᕈᓗᑎᓪᓘᓐᓃᑦ ᐅᑭᐅᖑᑎᓪᓗᒍ, ᑭᓯᐊᓂ ᐃᓕᖕᓂᒃ ᐃᖅᑲᐃᑎᑦᑎᔪᒪᕗᒍᑦ ᐱᕐᕈᓗᐊᕿᖁᓇᑎᑦ. ᐃᖅᑲᐅᒪᒋᑦ:
  • ᓈᒻᒪᒃᑐᒧᑦ ᑲᒥᒃᐸᓪᓗᑎᑦ ᓈᒻᒪᒋᑦᑎᐊᕐᑕᕐᓂᒃ;
  • ᐸᕐᓇᒃᓯᒪᑦᑎᐊᖃᑦᑕᕐᓗᑎᑦ ᑐᐊᕕᖏᓪᓗᑎᓪᓗ; ᐊᒻᒪᓗ
  • ᐊᕙᑎᒋᔭᐃᑦ ᐅᔾᔨᕐᓴᑦᑎᐊᕐᓗᒍ.
ᖁᐃᔭᕿᑦᑕᐃᓕᒪᔪᓐᓇᕐᐳᑎᑦ, ᐹᓪᓚᒃᑕᐃᓕᒪᓗᑎᑦ ᐅᕐᕈᑦᑕᐃᓕᒪᓗᑎᓪᓘᓐᓃᑦ. ᑲᒪᒋᑦᑎᐊᕐᓗᑎᑦ ᖃᓄᐃᖏᑦᑎᐊᖁᕙᒋᓪᓗ ᖁᕕᐊᓱᕝᕕᐅᑎᓪᓗᒍ; ᐊᑦᑕᕐᓇᖅᑕᐃᓕᒪᓂᖅ ᐊᑑᑎᖃᑦᑎᐊᖏᓐᓇᐅᔭᕐᒪᑦ.
ᐊᕐᕌᒍᑕᒫᑦ ᑮᓇᐅᔾᔭᒃᓵᓄᑦ ᐅᓂᒃᑳᓕᐊᖅ
ᑐᓂᓵᓕᒍᓐᓇᕐᐸᑎᑦ ᔮᓄᐊᕆ 3-ᖑᓕᕐᐸᑦ

ᐃᖅᑲᓇᐃᔮᖃᕐᑎᑦᑎᔨᐅᔪᑦ, ᑎᓯᐱᕆᐅᑉ ᐱᒋᐊᓕᓵᕐᓂᖓᓂ ᑐᑭᓯᒋᐊᕈᑎᒃᓴᖅᑖᕐᑎᑕᐅᓚᐅᕐᓯᒪᒐᔅᓯ ᑐᓂᓯᔭᕆᐊᖃᓂᔅᓯᓐᓂᒃ ᐊᕐᕌᒍᑕᒫᑦ ᑮᓇᐅᔾᔭᒃᓵᓄᑦ ᐅᓂᒃᑳᓕᐊᒥᒃ (APR). ᐱᓕᕆᕝᕕᐅᔪᓕᒫᑦ ᐃᒪᐃᑦᑕᕆᐊᖃᓪᓚᕆᒃᐳᑦ ᐅᕗᓐᖓᕐᓗᑎᒃ WSCC Connect ᐃᓚᒋᔭᐅᓗᑎᒃ ᐅᓂᒃᑳᓕᐅᖁᓪᓗᒋᑦ ᐊᕐᕌᒍᑕᒫᑦ ᑮᓇᐅᔾᔭᒃᓵᓄᑦ ᐅᓂᒃᑳᓕᐊᒥᒃ, ᑐᓴᖅᑎᑕᐅᒐᔭᕐᑐᑦ ᓇᓗᓇᐃᔭᕐᓯᒪᔪᓕᖕᓂᒃ ᑐᓂᓯᔭᕆᐊᖃᕐᓂᕐᒥᒃ ᐊᕐᕌᒍᑕᒫᑦ ᑮᓇᐅᔾᔭᒃᓵᓄᑦ ᐅᓂᒃᑳᓕᐊᒥᒃ ᐃᑭᐊᖅᑭᕕᒃᑯᑦ.

ᓯᕗᓂᐊᒍᑦ ᐱᔾᔪᓯᕆᔭᐅᖃᑦᑕᕐᓯᒪᔪᑦ ᑎᑎᖅᑲᒃᑯᕕᒃᑰᕐᑎᑦᑎᓂᖅ ᓱᒃᑲᔪᒃᑰᕐᑎᑦᑎᓂᕐᓘᓐᓃᑦ ᐊᑐᖅᑕᐅᕙᒍᓐᓃᕐᒪᑕ.

ᐊᕐᕌᒍᑕᒫᑦ ᑮᓇᐅᔾᔭᒃᓵᓄᑦ ᐅᓂᒃᑳᓕᐊᖅ ᑐᓂᓵᓕᔪᓐᓇᕋᔭᕐᐸᑦ ᐱᒋᐊᕐᓗᓂ ᔮᓄᐊᕆ 3-ᒥ. ᒪᑐᕝᕕᒃᓴᖓ ᑐᓂᓯᓂᕐᒧᑦ ᕕᕗᐊᕆ 28.

ᐃᑲᔪᕈᒪᓪᓗᑕ ᐅᕙᓃᔾᔪᑎᒋᕙᕗᑦ! ᐃᑲᔪᖅᑕᐅᔪᒪᒍᕕᑦ ᖃᐅᔨᒋᐊᕐᕕᒋᓗᒍ ᐃᖅᑲᓇᐃᔮᖃᕐᑎᑦᑎᔨᐅᔪᓄᑦ ᐱᔨᑦᑎᕋᖅᑏᑦ ᐅᖄᓚᕕᒋᓗᒍᓘᓐᓃᑦ ᐊᑭᖃᖏᑦᑐᒃᑯᑦ 1-800-661-0792.
ᑐᓴᐅᒪᖃᑦᑕᐅᑎᓂᕐᒧᑦ ᐱᔪᓐᓇᕐᓂᖓ

ᐅᑭᐅᖅᑕᖅᑐᒥᐅᑦ ᐃᒥᓄᑦ ᑕᑎᒋᖃᑦᑕᐅᑎᓐᓇᐅᔭᖅᐳᑦ ᐱᓕᕆᖃᑎᒌᒃᐸᒃᖢᑎᒡᓗ. ᑕᐃᒪᐃᖃᑦᑕᕋᑦᑕ.

ᑕᐃᒪᓐᓇ Safety Share, ᑖᓐᓇ ᓄᑖᖅ ᖃᕋᓴᐅᔭᒃᑯᑦ ᐃᖅᑲᓇᐃᔭᖅᑎᓂᑦ ᑐᓴᐅᒪᑎᑦᑎᔪᓐᓇᖅᐳᑦ, ᐊᐱᖅᓱᕐᓗᑎᒃ, ᑲᑐᔾᔨᖃᑎᒌᒡᓗᑎᑦ ᐊᒻᒪ ᑐᓴᕆᐊᖃᓪᓚᕆᒃᑐᓂᒃ ᐊᑐᐃᓐᓇᐅᑎᑦᑎᒐᔭᖅᐳᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᑖᒃᑯᓂᖔᖅᑐᓂᑦ.

Safety Share ᖃᓪᓗᓈᑐᑦ ᐅᐃᕖᑐᓪᓗ ᐊᑐᐃᓐᓇᐅᕗᖅ. ᑲᑎᙵᔪᓂᒃ ᑐᓴᐅᒪᖃᑦᑕᐅᔪᑦ 6−ᓂᑦ ᐊᔾᔨᒌᖏᑦᑐᓂᒃ ᐃᑲᔫᑎᐅᔪᓐᓇᖅᑐᓂᒃ ᐃᖅᑲᓇᐃᔭᖅᑎᓄᑦ ᓇᓗᓇᐃᖅᑕᐅᑲᐅᑎᒋᔪᓐᓇᖅᑐᓂᑦ ᑐᓴᕈᒪᔭᕐᒥᓂᑦ. ᐅᑯᐊᖑᕗᑦ: ᑐᓴᖅᑕᐅᔭᕆᐊᖃᓪᓚᕆᒃᑐᑦ ᐊᑦᑕᕐᓇᖅᑕᐃᓕᒪᓂᕐᒧᑦ, ᐊᑦᑕᕐᓇᖅᑕᐃᓕᒪᔾᔪᑕᖃᑦᑕᖅᑐᑦ, ᑐᓴᒪᖃᑕᐅᑎᔭᕆᐊᖃᕐᓂᖅ, ᕿᓂᕐᓗᑎᑦ ᐃᑲᔫᑎᒃᓴᓂᑦ, ᐱᕙᓪᓕᐊᔪᑦ ᐊᒻᒪ ᐅᖃᐅᓯᕆᔭᐅᒐᔪᒃᑐᓂᑦ. ᐅᖃᖃᑎᒌᖃᑕᐅᔪᓐᓇᕐᓂᖅ; ᐊᔾᔨᙳᐊᓂᑦ ᓴᖅᑭᔮᖅᑎᑦᑎᓂᖅ ᑐᓴᒐᒃᓴᖃᕐᓂᕐᓘᓐᓃᑦ; ᐅᖃᐅᓯᑎᑦ ᓴᖅᑭᔮᖅᑎᓪᓗᒋᑦ; ᐊᒻᒪ ᐊᐱᖅᑯᑎᒃᑯᕕᐊᓂ ᐊᑐᕐᓗᑎᑦ ᑭᐅᔭᔪᒪᓐᓂᕈᕕᑦ ᐊᐱᖅᑯᑎᓐᓂᑦ ᑭᐅᔾᔪᑎᖃᖅᐸᒌᖅᑐᓂᑦ.

ᐊᑦᑕᕐᓇᖅᑕᐃᓕᒪᓂᕐᒧᑦ ᑐᓴᐅᒪᖃᑦᑕᐅᓂᖅ ᐊᑐᐃᓐᓇᐅᕗᖅ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᓇᓪᓕᐅᒃᑯᒫᓕᕆᔨᓪᓗ ᐃᑭᐊᕿᕝᕕᐊᓄᑦ ᐅᕝᕙᓘᓐᓃᑦ www.safetyshare.wscc.nt.ca−ᒧᑦ.
ᓇᖕᒥᓂᖅ ᐃᓱᒪᖅᓲᑕᐅᔪᖅ ᐊᑐᖃᑕᐅᕙᖕᓂᕐᒧᑦ ᐱᔭᐅᔭᕆᐊᖃᓕᖅᐳᖅ
ᐅᓪᓗᖅᓯᐅᑎᓯ ᓇᓗᓇᐃᒃᑯᑦᑎᖅᓯᐅᒃ: ᑎᓯᐱᕆ 31, 2016

ᓇᖕᒥᓂᖃᖅᑎᐅᒍᕕᑦ, ᐱᓕᕆᖃᑎᒋᔭᐅᕙᒃᑯᕕᑦ, ᓇᓗᓇᐃᔭᖅᓯᒪᓗᑎᑦ ᑲᑎᒪᔨᒋᔭᐅᒍᕕᑦ, ᓇᖕᒥᓂᕐᓘᓐᓃᑦ-ᐃᖅᑲᓇᐃᔭᕐᕕᖃᕈᕕᑦ, ᐱᑎᑕᐅᕙᙱᓚᑎᑦ ᐱᓇᔪᙱᓪᓗᒍ WSCC−ᒧᑦ  ᐊᑐᖅᑎᑕᐅᓂᕐᒥᒃ ᐃᖅᑲᓇᐃᔭᖅᑎᑕᐅᓂᒃᑯᑦ. ᐱᑎᑕᐅᔪᒪᒍᕕᑦ  WSCC−ᒧᑦ ᐊᑐᖅᑎᑕᐅᓂᕐᒥᒃ, ᐊᑎᓕᐅᕆᐊᖃᕋᔭᖅᐳᑎᑦ ᓇᖕᒥᓂᖅ ᐃᓱᒪᖅᓲᑕᐅᔪᒧᑦ ᐊᑐᖃᑕᐅᕙᖕᓂᕐᒧᑦ, ᑖᓐᓇᓗ ᐃᓕᖕᓂᒃ ᐱᑎᑦᑎᕙᒃᖢᓂ ᐊᔾᔨᑦᑎᐊᙱᓐᓂᒃ ᐱᕚᓪᓕᕈᑕᐅᕙᒃᑐᓂᒃ ᐊᓯᖏᓐᓄᑦ ᐃᖅᑲᓇᐃᔭᖅᑎᒋᔭᐅᔪᓄᑦ ᐃᖅᑲᓇᐃᔭᕐᕕᒋᔭᐅᔪᒥ ᐋᓐᓂᐊᖅᑕᖃᑐᐃᓐᓇᕆᐊᖃᕐᓂᖓᓄᑦ ᐃᓕᙵᒃᑐᖃᕐᓗᓂᓗ.

ᐱᓇᔪᒍᓐᓇᖅᐳᑎᑦ ᐊᑐᖅᑕᐅᑎᑕᐅᓂᕐᒥᒃ ᐊᑕᐅᓯᕐᒧᑦ ᑕᖅᑭᒧᑦ ᒥᑭᓐᓂᖅᐹᖃᑉᓗᓂ ᑎᑭᓪᓗᒍᓗ ᐊᕐᕌᒍᓕᒫᒧᑦ. ᓄᑖᙳᖅᑎᑦᑎᖃᑦᑕᕆᐊᖃᖅᐳᑎᑦ ᐊᑐᖅᑎᑕᐅᓂᕆᔭᕐᓂᒃ ᐊᕐᕌᒍᑕᒫᑦ, ᓄᑖᙳᕆᐊᖅᑎᑦᑎᓃᓪᓗ ᐱᔭᐅᓯᒪᔭᕆᐊᖃᖅᐸᒃᐳᑦ ᑎᓯᐱᕆ 31, 2016−ᒥ.

ᑕᑯᔪᒪᓗᒍ ᐃᓗᓪᓕᖅᓱᕈᒪᓗᒍᓗ ᐅᓇ, ᓇᖕᒥᓂᖅ ᐃᓱᒪᖅᓲᑕᐅᔪᒧᑦ ᐊᑐᖃᑕᐅᕙᖕᓂᕐᒧᑦᑎᑎᕋᕆᐊᓕᒃᐅᓇ, here ᓇᕿᓪᓗᒍ, ᖃᕆᑕᐅᔭᒃᑯᓪᓘᓐᓃᑦ ᑎᑎᕋᕐᕕᒋᓗᒋᑦ ᐃᖅᑲᓇᐃᔭᖅᑎᓄᑦ ᐱᔨᑦᑎᕋᖅᑎᒋᔭᐅᕙᒃᑐᑦ ᐅᕙᓂ, Northwest Territories ᐅᕝᕙᓘᓐᓃᑦ ᐅᓇ, Nunavut ᑐᓴᖅᑕᖃᒃᑲᓐᓂᕈᒪᒍᕕᑦ.
ᐅᓂᒃᑳᓕᐅᕐᓂᖅ ᐊᑦᑕᕐᓇᕐᑐᖃᕐᑐᖅ ᐱᓕᕆᐊᕆᔭᐅᔪᒥᒃ
ᖃᐅᔨᑐᐊᕈᕕᐅᒃ, ᐅᓂᒃᑳᓕᐅᕆᐊᖃᖅᐸᑦ

ᐅᓂᒃᑳᓕᐅᕐᓂᖅ ᐊᑦᑕᕐᓇᕐᑐᖅ ᐱᓕᕆᐊᒥᒃ ᐃᑭᐊᖅᑭᕕᒃᑯᑦ-ᐱᔨᑦᑎᕋᕈᑎ ᐊᔾᔨᐅᖏᑦᑑᓪᓗᓂ ᐱᔨᑦᑎᕋᕈᑎᐅᕗᖅ WSCC Connect: ᐱᓕᕆᔾᔪᑎᐅᓇᓱᐊᕐᓯᒪᕗᖅ ᑭᒃᑯᓕᒫᓄᖓᓪᓗᓂ, ᑐᑭᖃᕐᑐᖅ ᐃᓚᒋᔭᐅᔾᔪᑎᑖᕆᐊᑐᖏᑦᑐᑎᑦ ᑖᓐᓇ ᐱᔨᑦᑎᕋᕈᑎ ᐊᑐᐃᓐᓇᕆᓇᓱᐊᕐᓗᒍ. ᐃᓕᓴᖅᓯᓯᒪᒐᑦᑕ ᑭᒃᑯᑐᐃᓐᓇᐃᑦ ᖃᐅᔨᔪᓐᓇᕐᒪᑕ ᖃᓄᐃᓕᖓᓂᐅᔪᒧᑦ, ᐅᓗᕆᐊᓇᕐᑐᒥᒃ, ᐅᕝᕙᓗ ᖃᓄᐃᓕᖓᓂᕆᔭᖓᓂᒃ ᑕᒪᓐᓇ ᐃᓄᖕᒧᑦ ᐋᓐᓂᕈᑕᐅᑐᐃᓐᓇᕆᐊᓕᒃ ᐅᕝᕙᓗ ᐃᖅᑲᓇᐃᔭᕐᕕᐅᔪᒧᑦ ᖃᓂᒻᒪᒍᑕᐅᓗᓂ. ᐅᓂᒃᑳᓕᐅᕐᓂᖅ ᐊᑦᑕᕐᓇᕐᑐᖅ ᐱᓕᕆᐊᒥᒃ ᑕᐃᒪᐃᒻᒪᑦ ᐱᓕᕆᔾᔪᑎᐅᕗᖅ ᑭᒃᑯᑐᐃᓐᓇᕐᓄᑦ ᐅᓂᒃᑳᓕᐅᕈᑕᐅᔪᓐᓇᕐᓗᓂ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑕᐃᓕᒪᔪᓕᕆᔨᒃᑯᓐᓄᑦ.

ᓱᓕᒐᓗᐊᕐᑎᓪᓗᒍ ᑭᒃᑯᑐᐃᓐᓇᕐᓄᑦ ᑕᒪᓐᓇ ᐱᔨᑦᑎᕋᕈᑎ ᐊᑐᐃᓐᓇᐅᔪᓐᓇᕐᓗᓂ - ᐊᒻᒪᓗ ᐊᑎᖃᕆᐊᑐᖏᑦᑐᖅ - ᐳᐃᒍᖅᑐᐃᓕᒋᑦ ᐃᖅᑲᓇᐃᔭᕐᑎᐅᑎᓪᓗᑎᑦ, ᓯᕗᓪᓕᖅᐹᖅ ᑲᒪᒋᔭᒃᓴᕆᔭᐃᑦ ᖃᐅᔨᑐᐊᕈᕕᑦ ᐊᑦᑕᕐᓇᕐᑐᖅ ᐱᓕᕆᐊᒥᒃ ᐅᐊᔅᓯᔨᒋᔭᕐᓄᑦ ᐅᓂᒃᑳᓕᐊᕆᓗᒍ ᖃᓄᐃᓕᖓᓂᖓ. ᑕᒪᒃᑭ, ᐃᕝᕕᑦ ᐅᐊᔅᓯᔨᒋᔭᐃᓪᓗ ᐊᑐᐃᓐᓇᖃᕈᓐᓇᕐᐳᓯᒃ ᐊᑦᑕᕐᓇᕐᑐᖃᕐᑐᒧᑦ ᐊᒻᒪᓗ ᐋᖅᑭᒋᐊᖅᑕᐅᔪᓐᓇᖏᑉᐸᑦ, ᑭᖑᓪᓕᒃᑯᑦ ᖃᓄᐃᓕᐅᕆᐊᖃᓕᕐᓗᓯᒃ ᐅᓂᒃᑳᓕᐊᕆᓕᕐᒥᓗᒍ ᐅᓂᒃᑳᓕᐅᕐᓂᖅ ᐊᑦᑕᕐᓇᕐᑐᖅ ᐱᓕᕆᐊᒥᒃ ᐃᑭᐊᖅᑭᕕᒃᑯᑦ-ᐱᔨᑦᑎᕋᕈᑎᑎᒍᑦ.

ᐃᖅᑲᓇᐃᔭᕐᕕᑉᐱᑦ ᓯᓚᑖᓃᓕᕌᖓᕕᑦ, ᑕᐃᒪᐃᒃᑲᓗᐊᕐᑎᓪᓗᒍ, ᐅᕙᑦᑎᓐᓄᑦ ᐅᓂᒃᑳᓕᐅᕈᓐᓇᕐᐳᑎᑦ ᐊᑦᑕᕐᓇᕐᑐᖅ ᐱᓕᕆᐊᒥᒃ ᖃᖓᑐᐃᓐᓇᓕᒫᒃᑯᑦ ᐊᖅᑯᓵᕐᓯᓐᓂᕈᕕᑦ ᖃᐅᔨᖃᑕᐅᓐᓂᕈᕕᓪᓘᓐᓃᑦ ᐊᑦᑕᕐᓇᕐᑐᖅ ᖃᓄᐃᓕᖓᓂᐅᔪᒧᑦ ᓄᓇᓕᒋᔭᔅᓯᓐᓂ. ᐱᓕᕆᐊᒃᓴᕆᒐᑦᑎᒍᑦ ᑭᒃᑯᓕᒫᑦ ᐊᑦᑕᕐᓇᖅᑐᒦᖁᓇᒋᑦ. ᑕᑯᓐᓂᕈᕕᑦ ᐊᑦᑕᕐᓇᕐᑐᒥᒃ ᖃᓄᐃᓕᐅᕐᑕᐅᓂᒃᑯᑦ ᖃᓄᐃᓕᖓᓂᐅᔪᒃᑯᓪᓘᓐᓃᑦ ᐅᕝᕙᓗ ᐃᖅᑲᓇᐃᔭᕐᕕᐅᔪᒥ ᐊᑦᑕᕐᓇᕐᑐᑦ, ᐅᓂᒃᑳᓕᐊᕆᓗᒍ. ᑕᑯᕖᑦ ᐃᒡᓘᑉ ᖄᖓᓂ ᐃᖅᑲᓇᐃᔭᖅᑎ ᐊᑦᑕᑎᔾᔪᑎᖃᖏᑦᑐᖅ? ᐅᓂᒃᑳᓕᐊᕆᓗᒍ. ᐅᔾᔨᕆᒍᕕᐅᓪᓗ ᐃᓄᑐᐊᖑᓪᓗᓂ ᐃᖅᑲᓇᐃᔭᖅᑎ ᐲᔭᐃᔪᖅ ᓇᐹᖅᑐᒐᓚᖕᓂᒃ ᐆᒻᒪᖅᑯᑎᓄᑦ ᐅᐊᔭᓂᑦ ᑕᓕᖅᐱᖓᓂ ᐃᖅᑲᓇᐃᔭᖅᑎᖃᑎᖃᕐᑎᓐᓇᒍ ᐅᐊᔅᓯᖃᖏᑉᐸᓪᓘᓐᓃᑦ ᖃᓂᒋᔭᖓᓂ? ᐅᓂᒃᑳᓕᐊᕆᓗᒍ.

ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓕᕆᔨᒃᑯᑦ ᑐᓴᖅᑎᑕᐅᕙᒃᐳᑦ ᐅᓂᒃᑳᓕᐅᕐᓂᖅ ᐊᑦᑕᕐᓇᕐᑐᖅ ᐱᓕᕆᐊᒥᒃ ᑐᓂᔭᐅᓯᒪᓕᕐᑎᓪᓗᒍ, ᐊᒻᒪᓗ ᓇᓗᓇᐃᖅᓯᓕᕋᔭᕐᑐᑦ ᖃᓄᐃᓕᐅᒃᑲᓐᓂᕆᐊᖃᕋᔭᕐᒪᖔᑕ ᑐᑭᓯᒋᐊᕈᑎᒃᓴᖃᕐᑎᑕᐅᓂᖓᑦ ᑐᙵᓂᖓᒍᑦ. ᑐᓂᓯᒍᕕᑦ ᐅᓂᒃᑳᓕᐅᕐᓂᒃ ᐊᑦᑕᕐᓇᕐᑐᖅ ᐱᓕᕆᐊᒥᒃ ᐊᑎᖃᖅᑎᖏᓪᓗᒍ, ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓕᕆᔨᒃᑯᑦ ᐃᓕᖕᓄᑦ ᖃᐅᔨᒋᐊᔾᔮᖏᑦᑐᑦ. ᕿᒥᕐᕈᔪᓐᓇᕋᔭᖅᑕᐃᑦ ᓱᓕ ᖃᓄᐃᓕᖓᓕᕐᓂᖓ ᐅᓂᒃᑳᓕᐊᖅ ᓇᓗᓇᐃᖅᑕᐅᓂᖓᒍᑦ ᓈᓴᐅᑎᖃᕐᑎᑕᐅᓂᖓᒍᑦ, ᐊᑐᐃᓐᓇᕆᔪᓐᓇᕐᐸᑦ WSCC Connect ᐊᒻᒪᓗ ᓇᕿᓪᓗᒍ "ᕿᒥᕐᕈᓗᒋᑦ ᐊᑦᑕᕐᓇᕐᑐᑦ ᐱᓕᕆᐊᓄᑦ ᐅᓂᒃᑳᓕᐊᑦ." ᓇᓗᓇᐃᔭᑦᑎᐊᒃᑲᓐᓂᕐᓯᒪᔪᑦ ᓲᕐᓗ ᐊᑏᑦ ᑐᕌᕈᑎᖏᓪᓗ ᐲᖅᑕᐅᓕᒑᔪᑦ ᓇᓗᓇᐃᔭᕐᓯᒪᔪᒥ ᑕᑯᒃᓴᕈᖅᑎᑕᐅᓚᐅᖏᓐᓂᖓᓂ WSCC Connect.

ᐊᑐᐃᓐᓇᕆᓗᒍ ᐅᓂᒃᑳᓕᐅᕐᓂᖅ ᐊᑦᑕᕐᓇᕐᑐᖅ ᐱᓕᕆᐊᒥᒃ ᐃᑭᐊᖅᑭᕕᒃ-ᐱᔨᑦᑎᕋᕈᑎᖓᒍᑦ, ᕿᒥᕐᕈᔪᓐᓇᕐᐸᑦ wscc.nt.ca ᐅᕝᕙᓘᓐᓃᑦ wscc.nu.ca ᐊᒻᒪᓗ ᓇᕿᓪᓗᒍ ᐅᓇ  Report Unsafe Work ᐊᑎᖓᒎᕐᓗᒍ "I Want To..." ᐊᐱᖅᑯᑕᐅᒐᔪᒃᑐᑦ ᑎᑎᕋᖅᓯᒪᔪᖁᑎᖏᓐᓂ. ᓇᓕᕌᕈᓐᓇᕐᓂᖓᒍᑦ, ᐅᕗᕈᓐᓇᕆᕗᑎᑦ WSCC Connect ᐊᒻᒪᓗ ᓇᕿᓪᓗᒍ ᐅᓂᒃᑳᓕᐅᕐᓂᖅ ᐊᑦᑕᕐᓇᕐᑐᖅ ᐱᓕᕆᐊᑉ ᓇᓗᓇᐃᒃᑯᑕᓐᖑᐊᖓ ᐊᑎᐊᒎᕐᓗᑎᑦ OHS e-Services.
ᐊᑐᐊᒐᐃᑦ ᐊᓯᔾᔨᖅᑕᐅᓂᖏᑦ

ᐊᐅᓚᑦᑎᔩᑦ ᑲᑎᒪᔨᕐᔪᐊᖏᑦ ᕿᒥᕐᕈᓯᒪᕗᑦ ᑲᔪᓯᑎᑦᑎᓪᓗᑎᓪᓗ ᓇᓕᖅᑲᖏᓐᓃᑦᑐᑦ ᐊᑐᐊᒐᓂᒃ ᑎᓯᐱᕆ 2016 ᑲᑎᒪᓂᕆᔭᖓᓂ:
  • ᐊᑐᐊᒐᖅ 00.01, ᐊᑐᐊᒐᓕᐅᕐᓂᖅ ᐋᖅᑭᒋᐊᕆᓂᕐᓗ
  • ᐊᑐᐊᒐᖅ 00.03, ᐱᔪᓐᓇᕐᓂᖃᐅᕐᕕᖃᑎᒌᑦ ᐊᖏᖃᑎᒌᒍᑎᖓᑦ
  • ᐊᑐᐊᒐᖅ 00.07, ᐱᖃᑕᐅᓯᒪᔪᓄᑦ ᐱᔨᑦᑎᕋᕈᑎᑦ
  • ᐊᑐᐊᒐᖅ 02.03, ᐃᒻᒥᒧᑦ ᓇᓖᕌᕐᓂᒃᑯᑦ ᐊᑭᓕᖅᑕᐅᓂᖅ
ᖃᐅᔨᒋᐊᕐᕕᒋᔪᓐᓇᕐᐸᑦ WSCC ᐊᑐᐊᒐᒧᑦ ᒪᓕᒐᖅ ᕿᒥᕐᕈᓂᐊᕐᓗᒋᑦ ᑕᒪᕐᒥᒃ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓕᕆᔨᒃᑯᑦ ᐊᑐᐊᒐᓕᒫᖏᑦ.
ᖁᕕᐊᓱᕝᕕᐅᑎᓪᓗᒍ ᐃᖅᑲᐃᑎᑦᓯᔾᔪᑎ
ᖁᕕᐊᓱᕝᕕᐅᑎᓪᓗᒍ ᐊᒡᓚᕝᕕᒻᒥ ᒪᑐᓯᒪᓂᕆᓂᐊᖅᑕᖏᑦ

ᖁᕕᐊᓱᕝᕕᐅᑎᓪᓗᒍ, ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓕᕆᔨᒃᑯᑦ ᐊᒡᓚᕝᕕᖏᑦ ᒪᑐᓂᐊᕐᑐᑦ 5:00 ᐅᓐᓄᒃᑯᑦ ᓄᓇᓕᖓᑕ ᐃᑲᕐᕋᖓᒍᑦ ᐱᖓᔪᐊᑦ, ᑎᓯᐱᕆ 21, 2016, ᐊᒻᒪᓗ ᒪᑐᐃᒃᑲᓐᓂᕐᓗᑎᒃ 8:30 ᐅᓪᓛᒃᑯᑦ ᐊᐃᑉᐹ, ᔮᓄᐊᕆ 3, 2017.

ᐅᓂᒃᑳᓕᐊᕆᓂᐊᕐᓗᒍ ᐱᒻᒪᕆᐅᔪᖅ ᐃᖅᑲᓇᐃᔭᕐᕕᒻᒥ ᐋᓐᓂᕐᓂᐅᔪᖅ ᐱᕐᕈᓗᐊᕿᓂᐅᔪᕐᓘᓐᓃᑦ, ᐅᖄᓚᕕᒋᓗᒍ 1-800-661-0792. ᐅᓂᒃᑳᓕᐊᕆᓂᐊᕐᓗᒍ ᐊᑦᑕᕐᓇᕐᑐᖅ ᐱᓕᕆᐊᖅ, ᐊᑐᕈᓐᓇᕐᐸᑦ ᐅᓂᒃᑳᓕᐅᕐᓂᖅ ᐊᑦᑕᕐᓇᕐᑐᖅ ᐱᓕᕆᐊᒥᒃ-Report Unsafe Work ᐃᑭᐊᖅᑭᕕᒃᑯᑦ ᐱᔨᑦᑎᕋᕈᑎᖓᒍᑦ ᐊᑐᐃᓐᓇᐅᕗᖅ ᐅᕘᓇ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓕᕆᔨᒃᑯᑦ ᐱᑐᒃᓯᒪᕝᕕᖓᒍᑦ-WSCC Connect.

ᐅᕙᑦᑎᓐᓂᓕᒫᖅ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᕐᑐᓕᕆᔨᒃᑯᓐᓂ, ᐃᓕᔅᓯᓐᓂᒃ ᐊᑦᑕᕐᓇᖏᑦᑐᒃᑯᑦ ᐊᒻᒪᓗ ᖁᕕᐊᓇᕐᑐᒃᑯᑦ ᖁᕕᐊᓱᕝᕕᒃᓯᐅᑦᑎᐊᖁᔨᕗᒍᑦ, ᐊᒻᒪᓗ ᓂᕆᐅᒃᐳᒍᑦ ᐃᓕᖕᓂᒃ ᐱᓕᕆᖃᑎᖃᕈᓐᓇᕐᓂᐊᕐᓗᑕ 2017-ᒥ.
wscc.nt.ca   /  1.800.661.0792   *   wscc.nu.ca  /  1.877.404.4407