ᐋᒡᒌᓯ 2016
ᓇᒻᒥᓂᕆᔭᐅᔪᓂ ᒥᑭᓗᐊᖅᑐᖃᙱᓚᖅ ᐊᑦᑕᕐᓇᖅᑕᐃᓕᒪᓂᕐᒧᑦ

ᐋᖅᑭᒃᓱᐃᓂᕐᒥᑦ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐃᕝᕕᑦ ᓇᒻᒥᓂᖁᑎᖓᓂ ᐅᐸᓗᖓᐃᔭᐅᑎᓕᐅᕐᓂᕐᒥᑦ

ᐊᒃᓱᕈᖃᑦᑕᕋᕕᑦ ᒪᑭᒪᑎᑦᑎᓂᕐᒥᑦ ᐃᕝᕕᑦ ᓇᒻᒥᓂᖁᑎᒋᔭᖓᓂ, ᐱᒋᐊᕐᖓᕐᓂᖓᓂ ᒪᑭᒪᑎᑦᑎᓂᕐᒥᑦ. ᑮᓇᐅᔭᖁᑎᒋᔭᕐᓂ ᐃᑲᕐᕋᖁᑎᒋᔭᕐᓂᓪᓗ ᐊᑐᖃᑦᑕᕋᕕᑦ; ᓇᒻᒥᓂᕆᔭᕐᓄᑦ ᐱᕙᒌᔭᐅᑎᖃᖅᑐᑎ (ᐋᒡᒐᓘᓐᓃᒃ); ᐱᓕᕆᐊᕆᔭᐃᓪᓗ ᖃᐅᔨᒪᓪᓗᒍ. ᐃᖅᑲᓇᐃᔭᕐᕕᖃᖅᑐᑎ, ᐱᖁᑎᖃᖅᑐᑎ, ᐃᖅᑲᓇᐃᔭᖅᑎᖁᑎᖃᖅᑐᑎᓗ, ᑕᐃᒪᐃᓐᓂᖓᓄᑦ ᐊᑎᓕᐅᖅᓯᒪᔪᑎᑦ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᓐᓂ. ᑭᓱᓕᒫᑦ ᐊᑐᐃᓐᓇᐅᔭᕆᐊᓖᑦ ᓇᒻᒥᓂᖃᕐᓂᕐᒧᑦ ᐋᖅᑭᒃᓱᖅᓯᒪᔪᑦ... ᐅᕝᕙᓘᓐᓃᑦ ᐋᒃᑲ? ᓇᒻᒥᓂᖁᑎᒋᔭᐃᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐅᐸᓗᖓᐃᔭᐅᑎᒥᒃ ᐊᑐᐃᓐᓇᖃᖅᐸ?

ᓇᒻᒥᓂᕆᔭᐅᔪᑦ ᒥᑭᓐᓂᖅᓴᐅᔪᑦ ᓄᓇᑦᓯᐊᕐᒥ ᓄᓇᕗᒻᒥᓪᓗ ᐋᖅᑭᒃᓱᐃᔭᕆᐊᑐᓗᐊᙱᒃᑲᓗᐊᖅᑎᓪᓗᒋᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐅᐸᓗᖓᐃᔭᐅᑎᒥ, ᐊᑦᑕᕐᓇᙱᑦᑐᒥᑦ ᐃᖅᑲᓇᐃᔭᕐᕕᖃᖅᑎᑦᑎᔭᕆᐊᓖᑦ ᐊᐅᓚᔾᔪᓯᖏᓪᓗ ᒪᓕᑦᑎᐊᕆᐊᓖᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᖁᔭᕐᒥ ᐊᒻᒪ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᒪᓕᒋᐊᓕᓐᓂᒃ. ᑕᒪᓐᓇ ᐃᓚᖃᖅᐳᖅ ᐋᖅᑭᒃᓱᐃᓂᕐᒥᑦ ᐊᑐᓕᖅᑎᑦᑎᓂᕐᒥᓪᓗ ᐊᑦᑕᕐᓇᙱᑦᑐᒃᑯᑦ ᐱᓕᕆᔾᔪᓯᕐᓂ ᐊᒻᒪ ᐃᓕᓐᓂᐊᖅᑎᑦᑎᓂᕐᒥᑦ ᐃᖅᑲᓇᐃᔭᖅᑎᐅᔪᓂ.

ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᓇᓗᓇᐃᕆᕗᑦ ᓇᒻᒥᓂᕆᔭᐅᔪᖅ ᒥᑭᓐᓂᖅᓴᖅ ᐊᐅᓚᓂᖃᖅᑐᖅ 20 ᑐᖔᓂ ᐃᖅᑲᓇᐃᔭᖅᑎᖁᑎᓕᒻᒥ. ᓇᒻᒥᓂᕆᔭᐅᔪᖅ ᒥᑭᓗᐊᙱᓚᖅ ᐋᖅᑭᒃᓱᐃᓂᕐᒧᑦ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐅᐸᓗᖓᐃᔭᐅᑎᒥ. ᐃᖅᑲᓇᐃᔭᖅᑎᖁᑎᑎᑦ ᖃᐅᔨᒪᑦᑎᐊᕆᐊᓖᑦ ᖃᓄᐃᓕᐅᕆᐊᖃᕋᔭᕐᒪᖔᑦ ᐱᕐᕈᓗᐊᕿᔪᖃᕐᓂᖅᐸᑦ, ᐃᕝᕕᓪᓗ ᐋᖅᑭᒃᓱᐃᓯᒪᑦᑎᐊᕆᐊᖃᖅᑐᑎᑦ ᐱᕙᒌᔭᐅᑎᓂᒃ ᒪᓕᑦᑕᐅᔭᕆᐊᓕᓐᓂᓪᓗ ᐊᑦᑕᕐᓇᖅᑐᒦᖁᓇᒋᑦ.  ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐅᐸᓗᖓᐃᔭᐅᑎᖃᕐᓗᓂ ᐃᑲᔫᑎᓕᒃ  ᓇᒻᒥᓂᖁᑎᒋᔭᐃᑦ ᖃᐅᑕᒫᑦ ᐊᐅᓚᓂᖃᑦᑎᐊᕐᓂᐊᕐᒪᑦ ᐊᑦᑕᕐᓇᙱᑦᑐᒃᑯᑦ.

ᐃᓕᓐᓂ ᐃᑲᔪᕈᓐᓇᖅᑐᒍᑦ

ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᓴᖅᑮᓯᒪᔪᑦ ᑖᔅᓱᒥᖓ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐅᐸᓗᖓᐃᔭᐅᑎᓕᐅᕐᓂᕐᒥᑦ ᐅᖃᓕᒫᒐᕋᓛᒥᒃ ᒥᑭᓐᓂᖅᓴᓄᑦ ᓇᒻᒥᓂᕆᔭᐅᔪᓄᑦ. ᑖᓐᓇ ᐊᑐᖅᑕᐅᔪᓐᓇᖅᑐᖅ ᓇᓗᓇᐃᕆᕗᖅ ᑭᓱᓂ ᐱᓯᒪᒋᐊᖃᕐᒪᖔᖅᐱᑦ ᓱᒻᒪᓪᓗ. ᓇᓗᓇᐃᕆᕗᖅ ᖃᓄᖅ ᐋᖅᑭᒃᓱᐃᔪᓐᓇᕐᒪᖔᖅᐱᑦ ᐅᐸᓗᖓᐃᔭᐅᑎᓐᓂ ᐃᓚᖃᕆᓪᓗᓂ ᐆᑦᑑᑎᒃᓴᓂᒃ ᑎᑎᕋᖅᓯᒪᕙᒌᖅᑐᓂᓪᓗ ᐃᕝᕕᑦ ᐋᖅᑭᒋᐊᕈᓐᓇᖅᑕᖏᓐᓂᒃ ᓇᒻᒥᓂᖁᑎᒋᔭᕐᓄᑦ.

ᐃᑲᔫᑎᖃᕈᓐᓇᕐᒥᔪᖅ ᑖᔅᓱᒧᖓ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐅᐸᓗᖓᐃᔭᐅᑎᓕᐅᕐᓂᕐᒥᑦ ᐅᖃᓕᓛᒐᕋᓛᒥᒃ ᒥᑭᓐᓂᖅᓴᓄᑦ ᓇᒻᒥᓂᕆᔭᐅᔪᓄᑦ, ᑖᓐᓇ ᐃᑲᔪᖅᑎᒋᔭᐅᔪᓐᓇᕐᒥᔪᖅ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᖃᐅᔨᒪᔨᑕᕆᔭᐅᔪᖅ. ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᖃᐅᔨᒪᔨᑕᕗᑦ ᐊᑐᐃᓐᓇᐅᔪᖅ ᑭᐅᔪᓐᓇᕐᓂᕐᒥᑦ ᖃᓄᑐᐃᓐᓇᖅ ᐊᐱᖅᑯᑎᒃᓴᖃᕐᓂᕈᕕᑦ. ᐊᔪᕈᑎᖃᖅᐲᑦ ᐱᒋᐊᕐᓂᕐᒥᑦ? ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᖃᐅᔨᒪᔨᑕᖅ ᐃᓕᓐᓂ ᐃᑲᔪᕈᓐᓇᖅᑐᖅ ᑐᑭᓯᐅᒪᓂᕐᒥᑦ ᑖᔅᓱᒥᖓ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᒪᓕᒋᐊᓕᓐᓂᒃ ᐱᓕᕆᖃᑎᒋᓗᓂᑎᓪᓗ ᐋᖅᑭᒃᓱᐃᓂᕐᒥᑦ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐅᐸᓗᖓᐃᔭᐅᑎᒥ ᑐᕌᖓᓗᓂ ᐃᕝᕕᑦ ᓇᒻᒥᓂᕆᔭᖓᓄᑦ. ᐋᖅᑭᒃᓯᓯᒪᕙᒌᖅᐲ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗᐅᐸᓗᖓᐃᔭᐅᑎᒥ, ᑭᓯᐊᓂ ᖃᐅᔨᔪᒪᕖ ᓇᐅᒃᑯᑦ ᐋᖅᑭᒋᐊᕈᓐᓇᕐᒪᖔ? ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᖃᐅᔨᒪᔨᑕᕗᑦ ᐃᓕᓐᓂ ᕿᒥᕐᕈᐊᖃᑎᖃᕈᓐᓇᖅᑐᖅ ᐃᕝᕕᑦ ᐅᐸᓗᖓᐃᔭᐅᑎᖓᓂ ᓇᓗᓇᐃᖅᓯᓗᓂ ᐊᒥᒐᓗᐊᖅᑐᓂ ᐋᖅᑭᒋᐊᕈᑎᒃᓴᓂᓪᓗ ᐅᖃᐅᔾᔨᒋᐊᕈᓐᓇᖅᑐᓂ.

ᐊᐃᑉᐱᐅᓕᖅᑲᑦ, ᓯᑎᐱᕆ 6, ᑖᓐᓇ ᐅᖃᓕᒫᒐᕋᓛᖅ ᐊᑐᐃᓐᓇᐅᓛᖅᑐᖅ ᒥᓇᑕᐅᔪᓐᓇᕐᓗᑎ ᐃᑭᐊᖅᑭᕕᑦᑎᓐᓂ   ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᒪᑉᐱᖅᑐᒐᖁᑎᑦᑎᓐᓂ (OHS Program page). ᖃᐅᔨᒋᐊᕐᕕᒋᔪᒪᒍᕕᐅ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᖃᐅᔨᒪᔨᑕᕆᔭᕗᑦ, ᐃᕐᖐᓐᓈᖅᑕᐅᑎᒃᑯᑦ ᑎᑎᕋᕐᓗᑎ ᐅᕗᖓ ohsregs@wscc.nt.ca, ᐊᑭᖃᙱᑦᑐᒧᓪᓘᓐᓃᑦ ᐅᖄᓚᕕᐅᑕ ᐅᕗᖓ 1-800-661-0792.

ᐃᓕᔭᐅᓚᐅᙱᓐᓂᖓᓂ, ᑕᕝᕙ ᑕᑯᒋᐊᖅᑕᐅᔪᓐᓇᖅᑐᖅ ᑕᐃᑲᙵ ᐅᖃᓕᒫᒐᕋᓛᒥᑦ, ᐃᑲᔫᑎᒃᓴᐃᓪᓗ ᖃᓄᖅ ᐋᖅᑭᒃᓱᐃᔪᓐᓇᕐᒪᖔᖅᐱᑦ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐅᐸᓗᖓᐃᔭᐅᑎᒥ.

ᑭᓱᒥ ᐱᒋᐊᕈᑎᖃᕆᐊᖃᕋᕕᑦ?

ᑎᓴᒪᓕᖅᑲᖓᔪᑦ ᒪᓕᑦᑕᐅᔭᕆᐊᖃᓪᓗᐊᑕᖅᑐᑦ ᐊᐅᓚᑦᑎᑦᓯᐊᓂᕐᒥᑦ ᐋᓐᓂᐊᖃᖅᑕᐃᓕᒪᑎᑦᓯᓂᕐᒧᑦ ᐊᑦᑕᕐᓇᖅᑐᒦᑎᑦᓯᑦᑕᐃᓕᒪᓂᕐᒧᓪᓗ ᐃᕝᕕᑦ ᓇᒻᒥᓂᖁᑎᖓᓄᑦ:

ᓇᓗᓇᐃᕐᓗᒋᑦ ᐱᔭᒃᓴᕆᔭᐅᔪᑦ ᐊᒻᒪ ᑎᓕᓯᓗᑎ ᑲᒪᒋᔭᒃᓴᕆᔭᐅᓂᐊᖅᑐᓂ ᐊᑦᑕᕐᓇᙱᑦᑐᒃᑯᑦ ᐃᖅᑲᓇᐃᔭᕐᓂᕐᒧᑦ. ᐊᑦᑕᕐᓇᙱᑦᑐᒥᑦ ᐃᖅᑲᓇᐃᔭᕐᕕᖃᖅᑎᑦᑎᓂᕐᒥᑦ, ᖄᒃᑲᓐᓂᐊᒍᑦ ᐃᓄᓕᒫᑦ ᖃᐅᔨᒪᑦᑎᐊᕆᐊᓖᑦ ᐱᔭᒃᓴᕆᔭᒥᓂᒃ ᐃᕝᕕᑦ ᐱᓕᕆᕝᕕᖓᓂ. ᐊᑦᑕᕐᓇᖅᑐᒦᑦᑕᐃᓕᒪᓂᖅ ᑕᒪᐃᓐᓄᑦ ᑲᒪᒋᔭᐅᔭᕆᐊᓕᒃ: ᐊᖓᔪᖅᑳᕆᔭᐅᔪᑦ ᖃᐅᔨᒪᑦᑎᐊᕆᐊᓖᑦ ᐅᓗᕆᐊᓇᕈᑕᐅᑐᐃᓐᓇᕆᐊᓕᓐᓂᒃ ᐅᖃᐅᓯᕆᓗᓂᒋᓪᓗ ᐃᕝᕕᑦ ᐃᖅᑲᓇᐃᔭᖅᑎᖁᑎᖏᓐᓄᑦ. ᐃᖅᑲᓇᐃᔭᖅᑎᖁᑎᑎᑦ ᖃᐅᔨᒪᔭᕆᐊᓖᑦ ᐅᖃᐅᓯᖃᕈᓐᓇᕐᓂᖏᓐᓂ ᐊᒻᒪ ᐅᖃᐅᓯᖃᕆᐊᖃᕐᓂᖏᓐᓂ ᓄᑖᓂ ᐅᓗᕆᐊᓇᕈᑎᓂᒃ ᓴᖅᑭᐸᓪᓕᐊᔪᓂ.

ᓇᓗᓇᐃᕐᓗᒋᑦ ᐊᒻᒪ ᑐᓴᐅᒪᑎᓪᓗᒋᑦ ᐃᖅᑲᓇᐃᔭᖅᑎᖁᑎᑎᑦ ᐅᓗᕆᐊᓇᖅᑐᓕᒫᓂᒃ ᐃᖅᑲᓇᐃᔭᕐᕕᓐᓂ ᐊᒻᒪᓗ ᐅᓗᕆᐊᓇᖅᑐᓂ ᑲᒪᒋᔭᖃᕐᓂᕐᒥᑦ. ᐃᖅᑲᓇᐃᔭᖅᑎᖁᑎᑎᑦ ᐱᔪᓐᓇᕐᓂᓖᑦ ᖃᐅᔨᒪᔭᕆᐊᖃᕐᓂᕐᒥᑦ ᐃᖅᑲᓇᐃᔭᕐᕕᒋᔭᖏᑦ ᐅᓗᕆᐊᓇᕈᓐᓇᕐᒪᖔᑦ ᐋᓐᓂᐊᖅᑕᐅᓕᒪᒋᐊᖃᕐᓂᖏᓐᓄᑦ. ᐃᕝᕕᑦ ᐃᖅᑲᓇᐃᔭᖅᑎᑦᑎᔨᐅᓪᓗᑎ ᑲᒪᒋᔭᒃᓴᖃᖅᑐᑎᑦ ᐃᖅᑲᓇᐃᔭᕐᕕᐅᓪᓗᑎ ᑐᓴᐅᒪᑎᑦᑎᓗᑎ ᖃᓄᑐᐃᓐᓇᖅ ᐅᓗᕆᐊᓇᖅᑐᒦᑳᓪᓚᕈᓐᓇᕐᓂᖏᓐᓂ. ᐃᖅᑲᓇᐃᔭᖅᑎᑎ ᓄᑦᑎᕈᕕᒋᑦ ᐊᓯᐊᓄᑦ ᐃᖅᑲᓇᐃᔭᕐᕕᖕᒧᑦ, ᐅᕝᕙᓘᓐᓃᑦ ᓄᑖᓂ ᐊᐅᓚᐅᑎᓂ/ᐱᖁᑎᓂ ᐱᑖᕈᕕᑦ, ᑐᓴᐅᒪᑎᑦᑎᔭᕆᐊᖃᖅᑐᑎ ᐅᓗᕆᐊᓇᕈᓐᓇᖅᑐᓕᒫᓂᑦ ᐊᒻᒪ ᐃᖅᑲᓇᐃᔭᖅᑎᑎ ᐱᓕᒻᒪᒃᓴᖅᑎᓪᓗᒋ ᖃᓄᖅ ᑲᒪᒋᔭᖃᕆᐊᖃᕐᒪᖔᑦ ᐊᑦᑕᕐᓇᙱᑦᑐᒃᑯᑦ.

ᐃᓕᓐᓂᐊᖅᑎᓪᓗᒋᑦ ᐊᒻᒪ ᐱᓕᒻᒪᒃᓴᖅᑎᓪᓗᒋᑦ ᐃᖅᑲᓇᐃᔭᖅᑎᖁᑎᑎ ᐊᑦᑕᕐᓇᙱᑦᑐᒃᑯᑦ ᐱᓕᕆᔾᔪᓯᕐᓂ ᐊᒻᒪᓗ ᒪᓕᑦᑕᐅᔭᕆᐊᓕᓐᓂᒃ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᒪᓕᒋᐊᓕᓐᓂᒃ. ᐃᖅᑲᓇᐃᔭᖅᑎᖁᑎᑎ ᖃᐅᔨᒪᑎᑐᐃᓐᓇᕆᐊᖃᙱᑦᑕᑎᑦ ᐅᓗᕆᐊᓇᕈᑕᐅᔪᓐᓇᖅᑐᓂ ᐃᖅᑲᓇᐃᔭᕐᕕᒋᔭᖏᓐᓂ; ᐱᔭᒃᓴᖃᖅᑐᑎᑦ ᑐᑭᓯᐅᒪᑎᑦᑎᓂᕐᒥᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐱᔭᒃᓴᕆᔭᖏᓐᓂᒃ ᑲᒪᒋᔭᕆᐊᖃᖅᑕᖏᓐᓂᓪᓗ. ᐱᓕᒻᒪᒃᓴᖅᑎᑦᑎᐊᕐᓗᒋ ᖃᐅᔨᒪᑦᑎᐊᕐᓂᐊᕐᒪᑕ ᐊᑦᑕᕐᓇᙱᑦᑐᒃᑯᑦ ᐃᖅᑲᓇᐃᔭᕐᓂᕐᒥᑦ, ᑕᐃᒃᑯᐊᓗ ᐃᖅᑲᓇᐃᔭᖅᑏᑦ ᐅᓗᕆᐊᓇᖅᑐᓂ ᑲᒪᒋᔭᖃᓲᑦ ᐃᓕᓐᓂᐊᖅᓯᒪᑦᑎᐊᕐᓗᑎ WHMIS-ᒥ (ᐃᖅᑲᓇᐃᔭᕐᕕᖕᒥ ᐊᑦᑕᕐᓇᖅᑐᓂ ᑲᒪᒋᔭᖃᕐᓂᕐᒥᑦ).

ᑎᑎᕐᓗᒋᑦ ᐱᓯᒪᑦᑎᓗᑎᓗ ᑎᑎᖅᓯᒪᔪᓂ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᖃᓄᐃᓕᐅᕈᑕᐅᔪᓂᑎᑎᖅᑲᖁᑎᖃᕐᓂᖅ ᓴᖅᑭᔮᖅᑎᑦᑎᔪᖅ ᐃᕝᕕᑦ ᒪᓕᒋᐊᖃᓪᓚᕆᑦᑕᖏᓐᓂ. ᑎᑎᖅᑲᖁᑎᖃᕐᓂᖅ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᖃᓄᐃᓕᐅᕈᑕᐅᓯᒪᔪᓂ ᐃᑲᔫᑎᓕᒃ ᐃᕝᕕᑦ ᓇᒻᒥᓂᕆᔭᖓᓂ ᑎᑭᐅᒪᑦᑎᐊᓂᕐᒧᑦ ᒪᓕᒋᐊᓕᖏᓐᓂᒃ ᑖᒃᑯᐊ ᒪᓕᓪᓗᒋᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᖁᔭᕐᒥ ᐊᒻᒪ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᒪᓕᒋᐊᓕᓐᓂ.

ᒪᓕᑦᑕᐅᔪᓐᓇᖅᑐᑦ: ᖁᓖᑦ ᐊᐱᖅᑯᑏᑦ

ᑖᓐᓇ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐅᐸᓗᖓᐃᔭᓂᕐᒧᑦ ᐅᖃᓕᒫᒐᖅ ᒥᑭᓐᓂᖅᓴᓄᑦ ᓇᒻᒥᓂᕆᔭᐅᔪᓄᑦ ᐃᑲᔫᑎᖃᕐᓂᐊᖅᑐᖅ ᒪᓕᑦᑕᐅᔪᓐᓇᖅᑐᓂᑦ ᐋᖅᑭᒃᓱᐃᓂᕐᒥᑦ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐅᐸᓗᖓᐃᔭᐅᑎᒥ. ᐃᓕᓐᓂ ᐃᑲᔪᕈᒪᓪᓗᑕ, ᓴᖅᑮᓯᒪᕗᒍᑦ, ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐅᐸᓗᖓᐃᔭᐅᑎᓕᐅᓂᕐᒧᑦ ᐃᕝᕕᑦ ᒪᓕᒍᓐᓇᖅᑕᖓᓂ. ᖁᓕᓂᑦ ᐊᐱᖅᑯᑎᓕᒃ:
  1. ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐊᑕᐅᒐᖃᖅᐱ?
     
  2. ᐃᕝᕕᓘᓐᓃᑦ, ᐊᖓᔪᖅᑳᖁᑎᑎᓪᓘᓐᓃᑦ, ᐊᒻᒪ ᐃᖅᑲᓇᐃᔭᖅᑎᖁᑎᑎᑦ ᖃᐅᔨᒪᒐᓗᐊᖅᐹ ᑐᑭᓯᐅᒪᒐᓗᐊᖅᐸᓪᓗ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐱᔭᒃᓴᕆᔭᖏᓐᓂ?
     
  3. ᓇᓗᓇᐃᕆᓯᒪᕖ ᐃᖅᑲᓇᐃᔭᕐᕕᓐᓂ ᐅᓗᕆᐊᓇᕈᑕᐅᔪᓐᓇᖅᑐᓂ?
     
  4. ᐅᓗᕆᐊᓇᕈᑕᐅᔪᓐᓇᖅᑐᓂ ᑲᒪᒋᔭᖃᕐᓂᕐᒥᑦ ᐋᖅᑭᒃᓱᐃᓯᒪᕖᑦ?
     
  5. ᐃᖅᑲᓇᐃᔭᖅᑎᖁᑎᑎᑦ ᐃᓕᓐᓂᐊᖅᓯᒪᕚ ᐊᒻᒪ ᐊᖓᔪᖅᑳᖃᖅᐹ ᐱᓕᕆᐊᖃᑦᑎᐊᕈᓐᓇᕐᓂᕐᒥᑦ ᐊᑦᑕᕐᓇᙱᑦᑐᒃᑯᑦ ᐃᖅᑲᓇᐃᔮᕆᔭᒥᓂᒃ?
     
  6. ᐅᖃᐅᓯᕆᒐᔪᖃᑦᑕᖅᐱᒌ ᐃᕝᕕᑦ ᐃᖅᑲᓇᐃᔭᖅᑎᖏᓐᓄᑦ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐊᑲᐅᙱᓕᐅᕈᑕᐅᔪᑦ?
     
  7. ᖃᐅᔨᓴᑦᑎᐊᖃᑦᑕᕋᓗᐊᖅᐱᒌ, ᐋᖅᑭᒋᐊᖃᑦᑕᕋᓗᐊᖅᐱᒌ, ᑲᒪᒋᑦᑎᐊᖃᑦᑕᕋᓗᐊᖅᐱᒌ ᐃᖅᑲᓇᐃᔭᕐᕕᐅᑉ ᐱᖁᑎᓕᒫᖏᑦ ᓴᓇᕐᕈᑎᓕᒫᖏᓪᓗ?
     
  8. ᒪᑯᐊ ᐊᑐᐃᓐᓇᐅᕚ:
    • ᑐᐊᕕᕐᓇᖅᑐᒥ ᐊᑐᖅᑕᐅᔭᕆᐊᓖᑦ?
    • ᐋᓐᓂᖅᑐᖃᖅᐸᑦ ᐃᓗᐊᖅᓴᐅᑎᓕᕆᔾᔪᑏᑦ?
    • ᐋᓐᓂᖅᑐᖃᖅᐸᑦ ᑎᑎᖅᓯᓂᕐᒧᑦ ᒪᓕᒋᐊᓕᓐᓂᒃ?
       
  9. ᖃᐅᔨᓴᕐᓂᕐᒧᑦ ᒪᓕᒋᐊᓕᓐᓂᒃ ᐋᖅᑭᒃᓯᓯᒪᕕᑦ?
     
  10. ᑎᑎᖅᑲᖁᑎᖃᓲᖑᕕᑦ ᐊᒻᒪ ᐅᐸᓗᖓᐃᔭᐅᑏᑦ ᕿᒥᕐᕈᖃᑦᑕᖅᐱᐅ?
ᑖᒃᑯᐊ ᖁᓖᑦ ᐊᐱᖅᑯᑏᑦ ᐃᓱᒪᒥᐅᑕᕆᓗᒋᑦ ᑕᕝᕗᖓ ᐅᑎᕐᓗᑎ ᐃᖅᑲᓇᐃᔭᕐᕖᑦ ᑎᑭᐅᒪᑦᑎᐊᕋᓗᐊᕐᒪᖔᖅ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᒪᓕᒋᐊᓕᓐᓂᒃ.

ᑖᒃᑯᐊᓕᑭᐊ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ? ᖃᓄᕐᓕ ᑲᒪᒋᔭᖃᓲᖑᕕᑕ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ?

ᑖᒃᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᓇᒻᒥᓂᕋᓛᕆᔭᐅᖏᑦᑎᐊᖅᑐᖅ, ᖁᓛᓃᑦᑐᑦ ᐅᕙᑦᑎᓐᓄᑦ ᑐᕌᖓᒻᒥᔪᖅ. ᓯᕗᓕᖅᑎᐅᓪᓗᑕ ᐊᑦᑕᕐᓇᖅᑐᒦᑎᑦᑎᑕᐃᓕᒪᓂᕐᒧᑦ ᐃᖅᑲᓇᐃᔭᕐᕕᓐᓂ, ᐅᕙᒍᑦᑕᐅ ᓴᙱᔪᒥ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐅᐸᓗᖓᐃᔭᐅᑎᖃᕆᐊᖃᕐᒥᔪᒍᑦ.

ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᑲᑎᒪᔨᕋᓛᖃᖅᑐᑦ, ᐃᓚᖃᖅᑐᑎ ᐃᔾᔨᒌᙱᑦᑐᓂ ᐃᖅᑲᓇᐃᔭᕐᕕᑦᑎᓐᓂ, ᑭᒡᒐᖅᑐᐃᔨᖃᑦᑎᐊᖅᑐᑕ ᓇᓕᒧᒃᑐᓂ ᐃᖅᑲᓇᐃᔭᖅᑎᓂᑦ ᐊᐅᓚᑦᑎᔨᓂᓪᓗ. ᑖᒃᑯᐊ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᑲᑎᒪᔨᕋᓛᑦ ᑲᑎᖃᑦᑕᖅᑐᑦ ᑕᖅᑭᑕᒫᑦ ᑎᓴᒪᐃᖅᓱᖅᑐᑎ ᐊᕐᕌᒍᑕᒫᑦ ᖃᐅᔨᓴᓲᖑᓪᓗᑎ ᐊᓪᓚᕝᕕᓂ, ᐊᑐᓂ ᐃᖅᑲᓇᐃᔭᖅᑎ ᐊᐱᕆᔭᐅᓲᖅ ᐊᑦᑕᕐᓇᖅᑐᓂ ᖃᐅᔨᓯᒪᒻᒪᖔᑦ ᐊᓪᓚᕝᕕᖏᓐᓂ. ᑖᒃᑯᐊ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᑲᑎᒪᔨᕋᓛᑦ ᐱᔭᒃᓴᕆᔭᖓ ᑎᑎᖅᓯᓂᕐᒥᑦ ᐊᑦᑕᕐᓇᕈᑕᐅᔪᓂ ᐃᓱᒫᓘᑎᒋᔭᐅᔪᓂ, ᐋᖅᑭᒋᐊᖅᓯᖁᔨᓗᑎ ᑖᒃᑯᐊ ᖃᐅᔨᒋᐊᕐᕕᐅᒃᑲᓐᓂᕐᓗᑎᓗ ᐊᖓᔪᖅᑲᐅᑎᐅᒃᑲᓐᓂᖅᑐᓄᑦ, ᐊᒻᒪ ᖃᐅᔨᒋᐊᒃᑲᓐᓂᕐᓗᑎ ᐃᖅᑲᓇᐃᔭᖅᑎᑦᑎᔨᐅᔪᖅ ᑲᒪᒋᔭᖃᑦᑎᐊᕐᓂᕋᓗᐊᕐᒪᖔᖅ.

ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᑲᑎᒪᔨᕋᓛᑦ ᓂᐱᖃᖅᑎᑦᑎᔨᐅᕗᑦ ᐃᖅᑲᓇᐃᔭᖅᑎᓂᑦ - ᐃᖅᑲᐃᑎᑦᑎᔨᐅᔪᑦ ᐃᖅᑲᓇᐃᔭᖅᑏᑦ ᓂᐱᖃᕈᓐᓇᕐᓂᖏᓐᓂ - ᐃᑲᔪᓯᓐᓈᑦ ᐃᖅᑲᓇᐃᔭᖅᑎᑦᑎᔨᒥ ᑎᑭᐅᒪᑦᑎᐊᕋᓗᐊᕐᒪᖔᖅ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐱᔭᒃᓴᕆᔭᖏᓐᓂ ᒪᓕᒋᐊᓕᓐᓂ. ᑲᑎᒪᔨᕋᓛᑦ ᑕᒻᒪᖅᓯᒪᔪᖅᓯᐅᑕᐅᕗᖅ ᐃᖅᑲᓇᐃᔭᕐᕕᖕᒥ, ᖃᐅᔨᓴᑦᑎᐊᓲᖅ ᐃᖅᑲᓇᐃᔭᕐᕕᖕᒥ ᐱᕈᓗᕐᔪᐊᖅᑕᐃᓕᒪᑎᑦᑎᓂᕐᒧᑦ.

ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᑲᑎᒪᔨᕋᓛᓯᑦ ᖃᓄᖅ ᐊᐅᓚᓲᖑᒻᒪᖔᑦ ᐱᔾᔪᑎᓕ ᐃᕝᕕᑦ ᓇᒻᒥᓂᕆᔭᖓᓂ ᐊᒻᒪᓗ ᒪᓕᒋᐊᓕᓐᓂ. ᓇᒻᒥᓂᕆᔭᐃᑦ ᐱᒋᐊᓕᖏᓐᓂ ᒪᓕᓪᓗᑎ, ᐃᖅᑲᓇᐃᔭᖅᑎᑎᑦ ᖃᐅᔨᒋᐊᕐᕕᒋᔪᓐᓇᖅᑕᑎᑦ ᖃᐅᑕᒫᑦ, ᐱᓇᓱᐊᕈᓯᑕᒫᑦ, ᑕᖅᑭᑕᒫᑦ, ᐅᕝᕙᓘᓐᓃᑦ ᑎᓴᒪᐃᖅᓱᕐᓗᑎ ᐊᕐᕌᒍ ᐃᓗᐊᓂ. ᐊᒥᓱᑦ ᐃᓪᓗᐊᓗᓐᓂ ᓴᓇᔨᕐᔪᐊᑦ ᖃᐅᑕᒫᑦ ᐅᓪᓛᒃᑯᑦ ᑲᑎᖃᑎᖃᓲᑦ, ᑕᐃᒎᓯᓖᑦ ᓴᓇᔪᓕᕆᓂᕐᒧᑦ ᐅᖃᖃᑎᖃᕐᓂᖅ, ᑕᐃᑲᓂ ᐊᖓᔪᖅᑳᕆᔭᐅᓚᐅᑲᒃᑐᖅ ᐅᕝᕙᓘᓐᓃᑦ ᐊᐅᓚᑦᑎᔨᐅᔪᖅ ᐅᖃᖃᑎᖃᓲᖅ 10-ᓂ 15-ᓄᑦ ᒥᓂᑦᓯᓄᑦ ᐃᖅᑲᓇᐃᔭᖅᑎᖁᑎᖏᑦ ᖃᓄᐃᑦᑐᑐᐃᓐᓇᕐᓂ ᐊᑦᑕᕐᓇᖅᑕᐃᓕᒪᔾᔪᑎᓂᑦ, ᐅᕝᕙᓘᓐᓃᑦ ᑐᓴᐅᒪᑎᑦᑎᓂᕐᒧᑦ ᓄᑖᓂ ᐊᐅᓚᑦᑎᓂᕐᒥᑦ ᐊᑦᑕᕐᓇᙱᑦᑐᒃᑯᑦ ᐱᓕᕆᔾᔪᓯᕐᓂ (SOPs) - ᖃᐅᔨᒪᔭᐅᒻᒥᔪᖅ ᐊᑦᑕᕐᓇᙱᑦᑐᒃᑯᑦ ᐃᖅᑲᓇᐃᔭᕐᓂᕐᒧᑦ ᐱᓕᕆᔾᔪᓯᕐᓂ. (ᑐᑭᓯᒋᐊᕐᓂᕐᒧᑦ ᑖᔅᓱᒧᖓ ᓴᓇᔪᓕᕆᓂᕐᒧᑦ ᐅᖃᖃᑎᖃᕐᓂᕐᒥᑦ, ᑕᑯᒋᐊᕐᓗᒍ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᑕᕐᕆᔮᒃᓴᖓ!)

ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᑲᒪᒋᔭᐅᔪᓐᓇᖅᑐᖅ

ᓇᒻᒥᓂᕆᔭᐃᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐅᐸᓗᖓᐃᔭᐅᑎᖃᕋᓗᐊᕐᒪᖔᖅ ᑲᒪᒋᔭᖃᖅᐳᖅ ᐃᕝᕕᑦ ᓇᒻᒥᓂᕆᔭᖓᓂ. ᑖᓐᓇ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐅᐸᓗᖓᐃᔭᐅᑎᓄ ᐅᖃᓕᒫᒐᕋᓛᖅ ᒥᑭᓐᓂᖅᓴᓄᑦ ᓇᒻᒥᓂᕆᔭᐅᔪᓄᑦ ᐃᓕᓐᓂ ᐃᑲᔪᕐᓂᐊᖅᑐᖅ ᐅᐸᓗᖓᐃᔭᐅᑏᑦ ᑲᔪᓯᑎᓐᓂᐊᕋᕕᐅ - ᐃᖅᑲᓇᐃᔭᖅᑎᖁᑎᑎᑦ ᖃᓄᐃᓐᓂᕆᔭᖏᑦ - ᐊᐅᓚᑦᑎᓂᕐᒥᑦ ᐃᕝᕕᑦ ᓇᒻᒥᓂᕆᔭᖓᓂ.

ᑖᒃᑯᐊ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᒪᓕᒋᐊᓖᑦ ᐊᒃᓱᕈᕐᓴᓗᐊᖅᑰᔨᑐᐃᓐᓇᕆᐊᓖᑦ ᓄᑖᒧᑦ ᓇᒻᒥᓂᕆᔭᐅᔪᒧᑦ, ᑭᓯᐊᓂ ᐃᑲᔪᕈᓐᓇᖅᑐᒍᑦ. ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᖃᐅᔨᒪᔨᑕᕗᑦ ᐊᒻᒪ ᐅᖃᓕᒫᒐᕋᓛᕗᑦ ᐃᓕᓐᓂ ᐃᑲᔪᕈᓐᓇᖅᑐᑦ ᓇᒻᒥᓂᕆᔭᐃᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐱᕙᒌᔭᐅᑎᖃᑦᑎᐊᕋᓗᐊᕐᒪᖔᖅ.

ᑖᓐᓇ ᐅᖃᓕᒫᒐᕋᓛᖅ ᑐᕌᖓᓂᖅᓴᐅᒐᓗᐊᖅᑎᓪᓗᒍ ᒥᑭᓐᓂᖅᓴᓄ ᓇᒻᒥᓂᕆᔭᐅᔪᓄᑦ, ᐱᒻᒪᕆᐅᕗᖅ ᖃᐅᔨᒪᓂᕐᒥᑦ ᓇᒻᒥᓂᕆᔭᐅᔪᓕᒫᑦ ᕿᒥᕐᕈᖃᑦᑕᕆᐊᓖᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐅᐸᓗᖓᐃᔭᐅᑎᖏᓐᓂ. ᖃᐅᔨᒋᐊᕆᑦ ᐅᐸᓗᖓᐃᔭᐅᑎᓯ ᒪᓕᑦᑎᐊᕋᓗᐊᕐᒪᖔᖅ ᒪᓕᒋᐊᓕᓐᓂ.

ᐊᐱᖅᑯᑎᒃᓴᖃᒃᑲᓐᓂᕈᕕᑦ ᐊᒻᒪ ᐋᖅᑭᒃᓱᐃᔪᒪᒍᕕᑦ ᐊᑐᓕᖅᑎᑦᑎᔪᒪᒍᕕᓪᓗ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᐅᐸᓗᖓᐃᔭᐅᑎᒥ ᐃᕝᕕᑦ ᓇᒻᒥᓂᕆᔭᖓᓄ, ᑕᑯᒋᐊᕐᓗᒍ ᐅᖃᓕᒫᒐᕋᓛᖅ, ᖃᐅᔨᒋᐊᕐᕕᐅᑕᓗ ᐅᖃᖃᑎᒋᔪᒪᓗᒍ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᓐᓂᖅᑕᐃᓕᒪᓂᕐᒧᓪᓗ ᖃᐅᔨᒪᔨᑕᕗᑦ. ᖃᐅᔨᒪᔨᑕᖁᑎᑉᐳᑦ ᐊᑐᐃᓐᓇᐅᒻᒥᔪᖅ ᖃᕋᓴᐅᔭᕐᑯᑦ ᐃᓕᓐᓂᐊᖅᑎᑦᑎᔪᓐᓇᖅᑐᖅ ᐊᒻᒪ ᐃᓕᓐᓂᐊᖅᑎᑦᑎᔪᓐᓇᕐᒥᔪᖅ. ᖃᐅᔨᒋᐊᕐᕕᐅᑕ ᑐᑭᓯᒋᐊᕈᑎᒃᓴᒃᑲᓐᓂᕐᓄᑦ.
ᐊᓪᓚᕝᕕᐅᑉ ᒪᑐᓯᒪᓂᖓ
ᐃᖅᑲᓇᐃᔭᖅᑏᑦ ᓄᖅᑲᖓᕐᕕᖓ

ᓇᓪᓕᐅᒃᑯᒫᓕᕆᔨᒃᑯᑦ ᐊᓪᓚᕝᕕᖓ ᒪᑐᓯᒪᓛᖅᑐᑦ ᓇᒡᒐᔾᔭᐅ, ᓯᑎᐱᕆ 5-ᒥ ᐱᔾᔪᑕᐅᓗᓂ ᐃᖅᑲᓇᐃᔭᖅᑏᑦ ᓄᖅᑲᖓᕐᕕᖓᑕ ᐅᓪᓗᐊ, ᒪᑐᐃᒃᑲᓐᓂᓛᖅᑐᑦ 8:30 ᐅᓪᓛᒃᑯᑦ ᐊᐃᑉᐱᐅᓕᖅᑲ, ᓯᑎᐱᕆ 6.

ᐅᖃᐅᓯᖃᕐᓂᕐᒧᑦ ᐱᕐᕈᓗᐊᕆᕐᔪᐊᖅᑐᒥ ᐃᖅᑲᓇᐃᔭᕐᕕᖕᒥ ᐅᕝᕙᓘᓐᓃᑦ ᖃᓄᐃᓕᕈᑕᐅᔪᒥ, ᐅᖄᓚᕕᒋᓗᒍ 1-800-661-0792.
ᐊᐱᖅᑯᑏᑦ?

ᐊᐱᖅᑯᑎᖃᕈᕕᑦ ᐅᕙᓘᓃᑦ ᐅᖃᐅᓯᒃᓴᓂᒃ ᐅᕙᑉᑎᖕᓄᑦ ᐱᔾᔪᑎᓕᖕᒥᑦ WSCC-ᑯᓐᓄᑦ ᐊᑦᑕᑕᕐᓂᖅ-ᒥᒃ, ᖃᕆᑕᐅᔭᒃᑯᑦ ᑎᑎᕋᕐᕕᒋᓗᑕ ᐅᕗᖓ info@wscc.nt.ca-ᒧᑦ ᐅᕙᓘᓃᑦ info@wscc.nu.ca-ᒧᑦ.
wscc.nt.ca   /  1.800.661.0792   *   wscc.nu.ca  /  1.877.404.4407