ᔪᓚᐃ 2016
ᓱᓇᐃᑦ ᓄᑖᖑᕙᑦ
ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᓪᓗ ᖃᐅᔨᓴᖅᑏᑦ ᐅᖃᓕᒫᒐᐃᑦ ᓇᓗᓇᐃᖅᑕᐅᓂᖏᑦ

ᐊᑦᑕᖅᓇᖅᑐᑦ: ᐃᔪᒃᑲᕐᓂᖅ

ᑕᖅᑭᕆᔪᔭᑦᑎᓐᓂᑦ, ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᓪᓗ ᖃᐅᔨᓴᖅᑏᑦ ᓴᖅᑭᑎᑦᓯᓚᐅᖅᑐᑦ Hazard Alert ᐅᔾᔨᖅᓱᖁᔨᑦᓱᑎᒃ ᐅᑭᐅᖅᑕᖅᑐᒥᐅᓂᑦ ᐊᑐᖁᔨᑦᓱᑎᒃ ᓈᒻᒪᑦᑐᓂᑦ ᐅᑭᐊᑦᓵᒃᑯᑦ ᓴᐳᔾᔨᔾᔪᑎᓂᑦ ᐃᖅᑲᓇᐃᔭᖅᑎᓪᓗᒋᑦ ᐳᖅᑐᔪᓂᑦ, ᐃᖅᑲᓇᐃᔭᖅᑎᒥᑦ ᐃᔪᒃᑲᖅᑐᖃᓚᐅᖅᑎᓪᓗᒍ ᖁᓛᓃᑦᑐᒥᑦ ᐊᒻᒪᓂᓕᒻᒥᑦ ᓴᓇᕕᐅᔪᒥᑦ ᔭᓗᓇᐃᕝᒥᑦ.

ᐃᖅᑲᓇᐃᔭᖅᑎ ᐊᑐᓚᐅᖏᒻᒪᑦ ᐅᑭᐊᑦᓵᒃᑯᑦ ᓴᐳᔾᔨᔾᔪᑎᓂᑦ ᐃᔪᒃᑲᖅᓱᓂᓗ ᐅᖓᑖᓄᑦ 3 ᒥᑕᐃᑦ ᑕᑭᓂᓕᒻᒥᑦ, ᓂᐊᖅᑯᐊᖅᓱᓂ ᑐᐃᖓᓗ ᖁᐊᖅᑎᑦᑕᒐᕐᒧᑦ ᑐᑦᓱᓂ ᐊᑖᓂᑦ. ᐃᖅᑲᓇᐃᔭᖅᑎ ᓂᐊᖁᖓᒍᑦ ᐋᓐᓂᓚᐅᖅᑐᖅ ᐱᔾᔪᑎᒋᑦᓱᒍ.

ᐱᒻᒪᕆᐅᕗᖅ ᐃᖅᑲᓇᐃᔭᖅᑎᓕᒫᑦ ᐅᑭᐅᖅᑕᖅᑐᓕᒫᒥᑦ ᐃᖅᑲᓇᐃᔭᖃᑦᑕᖅᑐᓄᑦ ᐳᖅᑐᓂᓕᓐᓂᑦ 3 ᒦᑕᒥᑦ ᐅᖓᑖᓄᓐᓘᓐᓃᑦ ᓴᐃᒍᐊᖃᖏᑦᑐᒥᑦ ᐊᑐᖅᑕᐅᖃᑦᑕᖅᑐᓂᑦ CSA−ᑯᓐᓂᑦ ᐊᖏᖅᑕᐅᓯᒪᔪᓂᑦ ᐅᑭᐊᑦᓵᒃᑯᑦ ᓴᐳᑎᓂᕐᒧᑦ ᐱᖁᑎᓂᑦ.

ᐃᔪᒃᑲᕐᓂᐅᔪᑦ ᐳᖅᑐᔪᓂᑦ ᓄᖅᑲᖓᑎᑕᐅᔪᓐᓇᕐᒪᑕ. ᐃᑉᐱᒍᓱᑦᓯᐊᕆᑦ ᐊᕙᑎᓐᓂᑦ, ᐊᑐᕐᓗᑎᑦ ᓈᒻᒪᑦᑐᓂᑦ ᓇᒻᒥᓂᖅ ᓴᐳᑎᓂᕐᒧᑦ ᐱᖁᑎᓂᑦ (PPE), ᓇᓗᓇᐃᖅᓯᓂᕐᒥᓪᓗ ᐃᖅᑲᓇᐃᔭᖃᑎᑎᑦ ᐅᔾᔨᕈᓱᒻᒪᖔᑕ ᓇᑎᐅᑉ ᐊᒻᒪᓂᖏᓐᓂᑦ ᓇᓗᓇᐃᖅᓯᒪᓗᒋᑦ ᐅᔾᔨᖅᓱᖁᔨᓂᕐᒥᑦ ᓂᐱᑦᑕᔫᒥᓪᓘᓐᓃᑦ ᐅᐸᒋᐊᖃᖏᓐᓂᕋᐃᔪᒥᑦ. ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒋᐊᕐᓗᒍ ᐃᑭᐊᖅᑭᕕᕗᑦ Hazard Alerts
.

ᐊᑦᑕᕐᓇᖅᑐᒦᑦᑕᐃᓕᒪᓂᕐᒧᑦ ᑐᓴᕋᑦᓴᖅ: ᐊᑦᑐᓈᖑᔭᖅ ᑭᕕᔅᓯᑎᒧᑦ

ᖃᐅᔨᒪᕖᓐ ᐊᑦᑐᓈᖑᔭᖅ ᑭᕕᔅᓯᑏᑦ ᖃᐅᔨᓴᖅᑕᐅᒐᔪᒋᐊᖃᕐᒪᑕ ᖃᐅᔨᓴᖅᑕᐅᑦᓯᐊᕐᓗᑎᓪᓗ, ᐱᓗᐊᖅᑐᒥᑦ ᐊᑐᑦᑕᐅᒐᔪᑉᐸᑕ ᓯᓚᓯᒥᑦ? ᐊᑦᑐᓈᖑᔭᖅ ᑭᕕᔅᓯᑏᑦ − ᐊᖁᒪᐃᖏᑦᑐᑦ ᐅᕿᑦᑑᓪᓗᑎᑦ ᐊᒻᒪ ᕿᑐᒪᔫᓪᓗᑎᑦ ᓴᑦᑐᔮᑦ ᓴᓇᔭᐅᓯᒪᒐᓱᐸᑦᑐᑦ ᖃᓪᓗᓈᖅᑕᓂᑦ ᑕᓯᔭᖅᑐᓂᑦ ᐊᐅᒪᒌᖅᑕᕈᓐᓇᕋᑎᓪᓘᓐᓃᑦ - ᐊᑐᖅᑕᐅᒐᔪᑦᑐᑦ ᓴᐳᔾᔨᒍᑕᐅᒐᔪᑦᑐᑦ ᐱᔭᕇᖅᓯᒪᔪᓂᑦ ᐊᑦᑕᕐᓇᖅᑐᓄᓪᓘᓐᓃᑦ ᐱᖁᑎᓄᑦ. ᐱᔾᔪᑕᐅᓗᐊᕋᔪᖅᑐᖅ ᐱᑐᖃᐅᓗᐊᓕᕐᓂᖏᓐᓄᑦ, ᐃᑉᐱᒋᔭᐅᑦᓯᐊᕆᐊᓖᑦ ᐊᓯᔾᔨᖅᑕᐅᓗᑎᓪᓗ ᓈᒐᐃᑉᐸᑕ ᐊᕐᕌᒎᒃ ᒪᕐᕉᒃ ᓯᑕᒪᓄᑦ ᐊᕐᕌᒍᓐᓄᑦ. ᑐᑭᓯᒋᐊᒃᑲᓐᓂᕈᒪᒍᕕᑦ, ᐃᓚᒋᔭᐅᓗᑎᒃ ᖃᓄᖅ ᓇᓗᓇᐃᖅᓯᒍᓐᓇᓂᕐᒥᑦ ᐊᑦᑐᓈᖑᔭᖅ ᑭᕕᔅᓯᑏᑦ ᐊᑐᕈᓐᓃᖅᑎᑕᐅᒋᐊᖃᖅᑎᓪᓗᒋᑦ ᐱᔨᑦᓯᕋᕐᓂᕐᒧᑦ, ᖃᐅᔨᒋᐊᕐᕕᒋᔪᓐᓇᖅᑕᐃᑦ ᓄᑖᖅ ᖃᐅᔨᒋᐊᕐᕕᑦᓴᖅ Safety Bulletin on Synthetic Web Slings.

ᓇᕿᓪᓗᒍ here ᐱᔪᓐᓇᕐᓂᐊᕐᓗᑎᑦ ᐊᓯᖏᓐᓂᑦ ᐊᑦᑕᕐᓇᖅᑐᒦᑦᑕᐃᓕᒪᓂᕐᒧᑦ ᑐᓴᕋᑦᓴᓂᑦ.

ᐊᖏᕐᕋᖃᖅᑐᓄᑦ ᐅᔾᔨᕈᓱᒋᐊᖃᕐᓂᖅ

ᐊᖏᕐᕋᒥᑦ ᓄᑖᕈᕆᐊᕆᓂᕐᒧᑦ ᓯᓚᒥᓪᓗ ᐱᓕᕆᐊᓄᑦ ᐱᒋᐊᖅᐸᓪᓕᐊᓕᖅᑐᑦ ᐅᐱᕐᖔᖅ. ᐸᐃᕆᑦᓯᔨᖃᕈᕕᑦ, ᓴᓗᒻᒪᖅᓴᐃᔨᖃᕈᕕᑦ, ᓴᓇᔨᓂᑦ ᐃᖅᑲᓇᐃᔭᖅᑎᖃᕈᕕᑦ, ᑳᓐᑐᕌᑦᑎᓂᑦ ᐊᓯᖏᓐᓂᓪᓘᓐᓃᑦ ᐃᖅᑲᓇᐃᔭᐃᓐᓇᖅᑐᓂᑦ ᐃᖅᑲᓇᐃᔭᑲᐃᓐᓇᖃᑦᑕᖅᑐᓂᓪᓘᓐᓃᑦ ᐊᖏᕐᕋᕐᓂᑦ, ᐅᖃᖃᑎᖃᕆᑦ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᓪᓗ ᖃᐅᔨᓴᖅᑎᓂᑦ ᐃᖅᑲᓇᐃᔭᖅᑎᓄᑦ ᐃᑲᔫᑎᓕᕆᓂᕐᒧᑦ ᐱᖁᔭᕐᓂᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐱᖁᔭᕐᓂᑦ ᖃᐅᔨᒋᐊᕐᓗᑎᑦ ᐊᑖᓃᒍᓐᓇᕐᒪᖔᖅᐱᑦ ᐃᖅᑲᓇᐃᔭᖅᑎᑦᓯᔨᓄᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ, ᑕᑯᓂᐊᕈᓐᓇᖅᑐᑎᑦ Homeowners' Responsibilities brochure, ᐅᖄᓚᓗᑎᓪᓗ ᐅᕙᑦᑎᓐᓄᑦ ᐅᕗᖓ 1-800-661-0792 ᐊᐱᖅᑐᑎᑦᓴᖃᕈᕕᑦ.
ᐊᑦᑕᕐᓇᖏᓐᓂᕐᒧᑦ
ᐱᔭᕆᐊᑭᓐᓂᖅ ᐃᓕᓐᓄᑦ

ᐊᑦᑕᕐᓇᖏᓐᓂᕐᒧᑦ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᓪᓗ ᖃᐅᔨᓴᖅᑏᑦ ᐊᑐᕆᐊᖃᖅᑕᖏᑦ ᐃᖅᑲᓇᐃᔭᖅᑏᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᖃᓄᐃᓕᐅᕈᑕᐅᔪᒪᔪᖅ ᐱᓕᕆᐊᖅ ᐃᖅᑲᓇᐃᔭᖅᑎᓄᑦ ᐊᑭᓖᖃᑦᑕᖅᑐᓄᑦ ᐅᖓᑖᓄᑦ $40,000 ᖃᐅᔨᓴᕐᓂᕐᒧᑦ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᓪᓗ ᖃᐅᔨᓴᖅᑎᓄᑦ ᐊᕐᕌᒍᑕᒫᑦ. ᑖᓐᓇ ᑮᓇᐅᔭᓕᕆᓂᕐᒧᑦ ᖃᓄᐃᓕᐅᕈᑕᐅᔪᒪᔪᖅ ᐱᓕᕆᐊᖅ ᑐᓂᓯᖃᑦᑕᖅᑐᖅ ᐃᖅᑲᓇᐃᔭᖅᑎᓄᑦ ᑕᑯᑦᓴᐅᑎᑦᓯᓂᕐᒥᑦ ᖃᓄᐃᖏᓂᕐᒥᑦ, ᐊᑦᑕᕐᓇᖅᑕᐃᓕᒪᓂᕐᒥᑦ, ᐅᑎᕈᓐᓇᓂᕐᒥᓪᓗ ᐃᖅᑲᓇᐃᔮᒧᑦ/ᓇᓪᓕᐅᒃᑯᒫᑦᓴᓕᕆᓂᕐᒥᑦ ᐊᐅᓚᑦᓯᓂᕐᒥᑦ ᐊᑐᖅᑕᐅᖃᑦᑕᖅᑐᓂᑦ, ᐊᑭᑐᓗᐊᖏᑦᑐᓄᓪᓗ ᓇᓪᓕᐅᒃᑯᒫᑦᓴᓕᕆᓂᕐᒥᑦ ᐊᑭᖏᓐᓂᑦ.

ᐃᖅᑲᓇᐃᔭᖅᑏᑦ ᐱᓕᕆᐊᒧᑦ ᐊᑭᑐᓗᐊᖏᑦᑐᓄᑦ ᓇᓪᓕᐅᒃᑯᒫᑦᓴᓕᕆᓂᕐᒥᑦ ᐊᑭᖏᓐᓂᑦ ᑕᑯᑦᓴᐅᑎᑦᓯᓂᕐᒥᓪᓗ ᐊᐅᓚᑦᓯᓂᕐᒧᑦ ᐊᑐᖅᑕᐅᖃᑦᑕᖅᑐᓂᑦ ᐱᔪᓐᓇᑐᐃᓐᓇᕆᐊᓖᑦ ᐅᑎᕐᕕᐅᓂᕐᒥᑦ ᐃᖅᑲᓇᐃᔭᖅᑏᑦ ᖁᑦᓯᑦᑐᒥᑦ ᓇᓪᓕᐅᒃᑯᒫᑦᓴᓕᕆᓂᕐᒥᑦ ᐊᑭᖏᓐᓂᑦ ᐊᐅᓚᑦᓯᑦᓯᐊᖏᓐᓂᕐᒥᓪᓗ ᐊᑐᖅᑕᐅᖃᑦᑕᖅᑐᓂᑦ ᐊᑭᓖᒋᐊᖃᖅᑎᑕᐅᓕᕋᔭᖅᑐᑦ.

ᐱᒋᐊᕐᓗᓂ ᐱᒋᐊᖓᕐᓂᖓᓂᑦ ᐊᐅᒡᒍᓯᐅᑉ, ᒪᕐᕉᒃ ᐱᑕᖃᕇᖅᑑᒃ ᐊᑦᑕᕐᓇᖏᓐᓂᕐᒧᑦ ᐊᐅᓚᑦᓯᓂᕐᒥᑦ ᐊᑐᖅᑕᐅᖃᑦᑕᖅᑐᓂᑦ ᐊᐱᖅᑯᑏᑦ ᐃᓚᓕᐅᔾᔭᐅᓯᒪᓂᐊᖅᑐᖅ ᐊᑐᐃᓐᓇᐅᓕᕐᓂᕐᓄᑦ.  
ᓄᑖᖅ-ᐃᓚᓕᐅᔾᔭᐅᓯᒪᔪᖅ ᑕᑕᑎᕆᐊᓕᒃ (ᓄᖅᑲᖓᑎᑦᓯᓂᕐᒥᑦ ᐅᑎᕐᓂᕐᒧᓪᓗ ᐃᖅᑲᓇᐃᔮᒧᑦ/ᓇᓪᓕᐅᒃᑯᒫᓕᕆᓂᕐᒥᑦ ᐊᐅᓚᑦᓯᓂᕐᒧᑦ ᑲᑎᙵᔫᒃ) ᐊᑐᐃᓐᓇᐅᑎᑕᐅᓂᐊᖅᑐᖅ ᐅᕙᓂᑦ Safe Advantage page. ᒫᓐᓇᐅᔪᖅ ᐊᑦᑕᕐᓇᖏᓐᓂᕐᒧᑦ ᐃᖅᑲᓇᐃᔭᖅᑏᑦ ᐊᒻᒪ ᐃᖅᑲᓇᐃᔭᖅᑏᓪᓗ ᓄᑖᖑᔪᑦ ᐱᓕᕆᐊᒧᑦ ᖃᐅᔨᒃᑲᖅᑕᐅᓂᐊᖅᑐᑦ ᐃᕐᖐᓐᓇᑦᑕᐅᑎᒃᑯᑦ, ᐊᒻᒪ ᑎᑎᖅᑲᓂᐊᕐᕕᒃᑯᑦ.


ᖃᐅᔨᒃᑲᓐᓂᕈᒪᒍᕕᑦ ᐊᑦᑕᕐᓇᖏᓐᓂᕐᒧᑦ ᐱᓕᕆᐊᑦᑎᓐᓂᑦ, ᐊᐱᖅᑯᑎᑦᓴᖃᕈᕕᓪᓘᓐᓃᑦ? ᖃᐅᔨᒃᑲᐅᑎᓗᒍ ᐊᑦᑕᕐᓇᖏᓐᓂᕐᒧᑦ ᖃᐅᔨᒪᔨᑕᕗᑦ ᐅᕗᖓ safeadvantage@wscc.nt.ca ᐅᕝᕙᓘᓐᓃᑦ ᐅᕗᖓ 1-800-661-0792.
ᓄᑖᑦ ᐃᖅᑲᓇᐃᔭᕐᕕᒻᒥᑦ ᖃᓄᐃᖏᑦᓯᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᒪᓕᒋᐊᓖᑦ
ᖃᐅᔨᒪᓗᒋᑦ. ᑐᑭᓯᐊᓗᒋᑦ.

ᓄᑖᖅ ᐃᖅᑲᓇᐃᔭᕐᕕᒻᒥᑦ ᖃᓄᐃᖏᑦᓯᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᒪᓕᒋᐊᓖᑦ ᒪᓕᒐᐅᓕᖅᑐᑦ ᒫᓐᓇ ᓄᓇᑦᓯᐊᕐᒥᑦ ᓄᓇᕗᒻᒥᓪᓗ. ᓄᑖᖅ ᐃᖅᑲᓇᐃᔭᕐᕕᒻᒥᑦ ᖃᓄᐃᖏᑦᓯᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᒪᓕᒋᐊᓖᑦ ᐱᒋᐊᓚᐅᖅᑐᑦ ᓄᓇᑦᓯᐊᕐᒥᑦ ᔫᓂ, 2015-ᒥ, ᓄᓇᕗᒻᒥᓪᓗ ᒫᑦᓯ, 2016-ᒥ.

ᐃᖅᑲᐅᒪᒋᑦ ᓇᒻᒥᓂᖁᑏᑦ ᐊᖏᔫᑉᐸᑦ ᒥᑭᔫᑉᐸᓘᓐᓃᑦ, ᐃᑲᔫᑎᐅᕗᖅ ᐃᓕᓐᓄᑦ ᖃᐅᔨᒪᒋᐊᖃᕐᓂᕐᓄᑦ ᑖᒃᑯᓇᖓᑦ ᓄᑖᓂᑦ ᒪᓕᒋᐊᓕᓐᓂᑦ. ᑖᒃᑯᐊ ᒪᓕᒋᐊᓖᑦ ᐊᑑᑎᖃᖅᑐᑦ ᐃᓘᓐᓇᖏᓐᓄᑦ ᓇᒻᒥᓂᖁᑎᓕᓐᓄᑦ ᐊᐅᓚᓂᖏᓐᓂᑦ ᐅᑭᐅᖅᑕᖅᑐᒥᑦ, ᑕᐃᒃᑯᓄᖓ ᐱᖏᓪᓗᒋᑦ ᒐᕙᒪᒃᑯᓐᓄᑦ ᐊᐅᓚᑕᐅᔪᑦ, ᑕᐃᒪᐃᒻᒪᑦ ᑲᒪᒋᒋᐊᖃᖏᑦᑕᐃᑦ - ᒪᓕᒐᐅᒻᒪᑦ.

ᑕᒪᓃᖏᓐᓇᖅᑐᒍᑦ ᐃᑲᔪᕐᓂᐊᕋᑦᑕ ᐃᓕᓐᓂᑦ ᑐᑭᓯᐅᒪᑎᑦᓯᓂᕐᒥᑦ ᑖᒃᑯᓇᖓᑦ ᐊᓯᔾᔨᕐᓂᐊᔪᓂᑦ. ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒃᑲᐃᒍᓐᓇᖅᑐᑎᑦ ᐅᕙᑦᑎᓐᓂᑦ ᐅᕗᖓ OHSRegs@wscc.nt.ca ᐅᕝᕙᓘᓐᓃᑦ OHSRegs@wscc.nu.ca.
 
ᓄᑖᑦ ᒪᓕᒋᐊᓖᑦ ᐊᑐᐃᓐᓇᐃᑦ ᒥᓇᕈᓐᓇᖅᑕᐃᑦ ᐅᕙᓂ OHSRegs.ca.
ᐊᑦᑕᕐᓇᖅᑕᐃᓕᒪᖃᑎᒌᓐᓂᖅ
ᓄᑖᖅ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᓪᓗ ᖃᐅᔨᓴᖅᑏᑦ ᐱᓕᕆᔾᔪᑎᖓ ᐃᖅᑲᓇᐃᔭᖅᑎᓄᑦ

ᖃᐅᔨᒋᐊᕈᒪᓚᐅᖅᓯᒪᕖᑦ ᐊᓯᖏᓐᓂᑦ ᐃᖅᑲᓇᐃᔭᖅᑎᓂᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐊᑐᖃᑦᑕᖅᑕᖏᓐᓂᑦ ᐱᓕᕆᐊᖏᓐᓂᓪᓗ? ᐊᑦᑕᕐᓇᖅᑕᐃᓕᒪᖃᑎᒌᓐᓂᖅ ᓄᑖᒥᑦ ᖃᕆᑕᐅᔭᒃᑯᑦ ᑲᑎᒪᓂᕐᒥᑦ ᐃᖅᑲᓇᐃᔭᖅᑏᑦ ᖃᐅᔨᒪᖃᑎᒌᓐᓂᕐᒧᑦ ᑐᑭᓯᔾᔪᑎᓂᑦ, ᐊᐱᖅᓱᖃᑦᑕᓂᕐᒥᑦ, ᐱᓕᕆᖃᑎᒌᓐᓂᕐᒥᑦ, ᐱᔪᓐᓇᕐᓂᕐᒥᓪᓗ ᐱᔭᕆᐊᑭᑦᑐᒥᑦ ᐱᒻᒪᕆᐅᔪᓂᑦ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᓪᓗ ᖃᐅᔨᓴᖅᑏᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᑐᑭᓯᔾᔪᑎᖏᓐᓂᑦ.
 
ᐊᑦᑕᕐᓇᖅᑕᐃᓕᒪᖃᑎᒌᓐᓂᖅ ᐃᑲᔪᖅᑐᖅᑐᖅ ᐅᖃᖃᑎᒌᓐᓂᕐᒥᑦ ᑕᒪᒃᑮᓐᓂᑦ ᖃᓪᓗᓈᑎᑐᑦ ᐅᐃᕖᑎᑐᓪᓗ. ᑲᑎᙵᐅᖅᓱᑎᒃ ᐅᖃᖃᑎᒌᓐᓂᖅ ᐱᖓᓲᔪᖅᑐᓂᑦ ᐊᕕᑦᑐᖅᓯᒪᔪᓂᑦ ᐃᑲᔪᕐᓂᕐᒥᑦ ᐃᖅᑲᓇᐃᔭᖅᑎᓂᑦ ᐱᔭᕆᐊᑭᑦᑐᒥᑦ ᓇᓗᓇᐃᖅᓯᓂᕐᒥᑦ ᐱᓕᕆᐊᓂᑦ ᐱᔭᐅᔪᒪᔪᓂᑦ. ᐊᕕᑦᑐᖅᓯᒪᔪᑦ ᐅᑯᐊ: ᐱᒻᒪᕆᐅᓂᖓᓄᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᖃᐅᔨᑎᑦᓯᔾᔪᑎᓂᑦ, ᐊᑦᑕᕐᓇᖅᑕᐃᓕᒪᓂᕐᒧᑦ ᐃᑲᔫᑎᓂᑦ, ᐊᑐᖅᑕᐅᖃᑦᑕᖅᑐᓂᑦ ᑐᓴᐅᒪᖃᑦᑕᐅᑎᓂᕐᒥᑦ, ᕿᓂᕐᓂᕐᒥᑦ ᐃᑲᔪᖅᑕᐅᒍᒪᓂᕐᒥᑦ, ᐱᕙᓪᓕᐊᔪᓂᑦ, ᐅᖃᖃᑎᒌᓐᓂᕐᒥᓪᓗ. ᐅᖃᖃᑎᒌᖃᑕᕐᓂᕐᒥᑦ; ᓴᖅᑭᔮᖅᑎᑦᓯᓂᕐᒥᑦ ᐊᔾᔨᓂᑦ ᖃᓱᕐᕕᓐᓂᓪᓘᓐᓃᑦ; ᓴᖅᑭᔮᖅᑎᑦᓯᓂᕐᒥᑦ ᐅᖃᐅᓯᑦᓴᕐᓂᑦ; ᐊᑐᕐᓂᕐᒥᓪᓗ ᐱᒻᒪᕆᐅᔪᓂᑦ ᑭᐅᔭᐅᒍᓐᓇᓂᕐᒥᑦ ᐊᐱᖅᑯᑎᓄᑦ ᑭᐅᔭᐅᔾᔪᑎᓄᑦ ᐋᖅᑭᑦᓯᒪᒌᖅᑐᓄᑦ.

ᐊᑦᑕᕐᓇᖅᑕᐃᓕᒪᖃᑎᒌᓐᓂᖅ ᐱᔭᐅᔪᓐᓇᖅᑐᖅ ᐊᖅᑯᑎᒋᓗᒍ WSCC website ᓇᕿᑐᐃᓐᓇᕐᓗᒍ ᐊᑦᑕᕐᓇᖅᑕᐃᓕᒪᖃᑎᒌᓐᓂᖅ ᐊᑐᐃᓐᓇᐅᑎᑦᓯᔪᖅ ᐅᕙᓂ ᒪᑉᐱᖅᑐᒐᐅᑉ ᖁᓛᓂ) ᐅᕝᕙᓘᓐᓃᑦ ᐅᕙᓂ www.safetyshare.wscc.nt.ca.
ᐃᖅᑲᓇᐃᔮᒧᑦ ᐅᑎᕐᓂᖅ
ᐃᖃᐃᓕᓯᖏᓐᓇᕐᓂᖅ ᐃᑲᔪᒻᒪᕆᑦᑐᖅ

ᐱᓕᕆᐊᖃᖏᓐᓇᖃᑦᑕᕋᓗᐊᖅᑎᓪᓗᑕ ᐃᓕᓐᓂᐊᑎᑦᓯᓂᕐᒥᑦ ᐃᖅᑲᓇᐃᔭᖅᑎᑦᓯᔨᓂᑦ ᐃᖅᑲᓇᐃᔭᖅᑎᓂᓪᓗ ᐱᒻᒪᕆᐅᕗᖅ ᐃᖅᑲᓇᐃᔭᕐᕕᒻᒥᑦ ᐊᑦᑕᕐᓇᖅᑕᐃᓕᒪᑎᑦᓯᓂᕐᒥᑦ ᓄᖅᑲᖓᑎᑦᓯᓂᕐᒥᓪᓗ, ᐱᕐᕈᓗᐊᕿᓂᖅᑕᖃᖃᑦᑕᖅᑐᖅ ᐃᓛᓐᓂᒃᑯᑦ. ᐃᖅᑲᐅᒪᒋᑦ, ᑭᓯᐊᓂ, ᐃᖅᑲᓇᐃᔭᕐᕕᒻᒥᑦ ᐋᓐᓂᕐᓂᖅ ᐊᓯᐅᔨᖏᓐᓇᕈᑕᐅᒍᓐᓇᖏᓪᓚᖅ ᐃᖅᑲᓇᐃᔭᕐᓂᕐᒥᑦ.

ᑭᓪᓕᓯᓂᐊᖅᑕᐅᓂᖏᑦ ᑕᑯᑎᑦᓯᓯᒪᔪᖅ ᖃᓄᐃᒍᓐᓃᐸᓪᓕᐊᓂᕐᒧᑦ ᐱᓕᕆᐊᖃᕐᓂᕐᒥᑦ ᐃᖅᑲᓇᐃᔭᖅᑎᒧᑦ ᐊᖏᕐᕋᖅᓯᒪᑐᐃᓐᓇᖏᓪᓗᓂ. ᑕᖃᐃᖅᓯᕐᓗᓂ ᖃᓄᐃᒍᓐᓃᐸᓪᓕᐊᓂᕐᒧᓪᓗ ᐃᑲᔫᑎᖃᖅᑐᖅ, ᐊᖏᕐᕋᖅᓯᒪᐃᓐᓇᕐᓂᖅ ᐃᓛᓐᓂᒃᑯᑦ ᓱᕋᒍᑕᐅᔪᓐᓇᖅᑐᖅ ᖃᓄᐃᓐᓂᕐᓄᑦ. ᖃᓄᐃᖏᓪᓗᓂ ᐃᖅᑲᓇᐃᔭᕐᕕᒻᒧᑦ ᐅᑎᕐᓂᖅ ᐃᖃᐃᓕᓴᖏᓐᓇᓂᕐᒥᓪᓗ ᑕᑯᑎᑦᓯᓯᒪᔪᖅ ᐅᓄᖅᑐᒥᑦ ᐱᐅᓯᕚᓪᓕᑎᑦᓯᓂᕐᒥᑦ ᖃᓄᐃᒍᓐᓃᐸᓪᓕᐊᓂᕐᒧᑦ ᒪᒥᓴᕐᓂᕐᒥᓪᓗ.

ᑕᐃᒪᓕ ᐃᖅᑲᓇᐃᔮᒧᑦ ᐅᑎᕐᓂᖅ ᐱᓕᕆᐊᖅ ᐱᒋᐊᖅᑯᖅ. ᐊᑦᑕᕐᓇᖏᑦᑐᒥᑦ ᐱᕕᖃᑦᓯᐊᕐᓗᓂᓗ ᐃᖅᑲᓇᐃᔮᒧᑦ ᐅᑎᕐᓂᖅ (RTW) ᐃᑲᔪᖃᑦᑕᖅᑐᖅ ᑕᒪᒃᑮᓐᓂᑦ ᐋᓐᓂᖅᓯᒪᔪᓂᑦ ᐃᖅᑲᓇᐃᔭᖅᑎᓂᑦ ᐃᖅᑲᓇᐃᔭᖅᑎᑦᓯᔨᖏᓪᓗ, ᐱᔾᔪᑎᒋᑦᓱᒍ ᐊᑯᓂᐅᓂᖅᓴᖅ ᐋᓐᓂᖅᓯᒪᔪᑦ ᐃᖅᑲᓇᐃᔭᖅᑏᑦ ᐃᖅᑲᓇᐃᔭᖅᕕᒻᒦᑎᓐᓇᒋᑦ, ᐱᔭᕆᐊᑐᓂᖅᓴᐅᖃᑦᑕᖅᑐᖅ ᐅᑎᕐᓂᕐᒧᑦ ᐃᖅᑲᓇᐃᔮᒧᑦ.

ᐃᖅᑲᓇᐃᔮᒧᑦ ᐅᑎᕐᓂᖅ ᐱᕙᓪᓕᐊᓂᐅᕗᖅ ᐃᑲᔪᖅᓱᓂ ᐋᓐᓂᖅᓯᒪᔪᓂᑦ ᐃᖅᑲᓇᐃᔭᖅᑎᓂᑦ ᐃᖅᑲᓇᐃᔭᕐᕕᒻᒦᖏᓐᓇᕐᓂᐊᖅᑎᓪᓗᒋᑦ ᐅᑎᕐᓂᕐᒧᓪᓘᓐᓃᑦ ᓈᒻᒪᑦᑐᒧᑦ ᐃᖅᑲᓇᐃᔮᒧᑦ ᐊᑦᑕᕐᓇᖏᑦᑐᒥᑦ ᑎᒦᓪᓗ ᖃᓄᐃᖏᑦᓯᐊᓕᖅᐸᑦ. ᐃᓚᒋᔭᖃᕈᓐᓇᖅᑐᖅ ᐃᖅᑲᓇᐃᔮᖃᕐᓂᕐᒥᑦ ᐋᖅᑭᑦᓯᒪᔪᒥᑦ, ᐊᓯᖏᓐᓂᓪᓗ ᐃᖅᑲᓇᐃᔮᖃᕐᓂᕐᒥᑦ, ᐃᑲᕐᕋᖏᓐᓂᓪᓘᓐᓃᑦ ᐃᓚᔭᐅᕙᓪᓕᐊᔪᓂᑦ ᖃᓄᐃᒍᓐᓃᐸᓪᓕᐊᓗᓂ. ᑕᕌᒐᖃᓗᐊᕐᓂᖅ ᐋᓐᓂᖅᓯᒪᔪᓂᑦ ᐃᖅᑲᓇᐃᔭᖅᑎᓂᑦ ᐅᑎᖅᑎᑦᓯᕙᓪᓕᐊᓂᕐᒧᑦ ᐋᓐᓂᖅᓯᒪᒍᓐᓃᕐᓂᕐᒧᑦ ᖃᓄᐃᖏᓂᕐᒧᑦ ᐃᖅᑲᓇᐃᔮᖏᓐᓂᓪᓗ ᐅᑎᕐᓂᕐᒧᑦ.

ᐃᖅᑲᓇᐃᔮᒧᑦ ᐅᑎᕐᓂᖅ ᐱᕙᓪᓕᐊᓂᐅᕗᖅ ᐃᓚᒋᔭᖃᖅᓱᓂ ᑲᒪᒋᔭᖃᕆᐊᖃᕐᓂᕐᒥᑦ ᐋᓐᓂᖅᓯᒪᔪᓂᑦ ᐃᖅᑲᓇᐃᔭᖅᑎᓂᑦ, ᐃᖅᑲᓇᐃᔭᖅᑎᑦᓯᔨᖏᓐᓂᑦ, ᐋᓐᓂᐊᖅᑐᓕᕆᔨᒻᒪᕆᓐᓂᑦ, ᐃᖅᑲᓇᐃᔭᖅᑎᓄᓪᓗ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᓪᓗ ᖃᐅᔨᓴᖅᑏᑦ. ᐱᓕᕆᖃᑎᒌᖃᑦᑕᖅᑐᑦ ᑲᑐᔾᔨᑦᓱᑎᒃ ᐃᓱᒪᓕᐅᕆᓂᕐᒥᑦ ᐱᐅᓂᖅᐹᒃᑯᑦ ᓂᕈᐊᕐᓂᕐᒥᑦ ᐃᖅᑲᓇᐃᔭᖅᑎᓄᑦ ᖃᓄᐃᒍᓐᓃᐸᓪᓕᐊᓂᖏᓐᓄᑦ.

ᑭᒃᑯᑐᐃᓐᓇᓕᒫᓄᑦ ᐃᑲᔫᑎᖃᓲᖅ ᐊᑦᑕᓇᖏᓐᓂᕐᒥᑦ ᐱᕕᖃᑦᓯᐊᕐᓗᓂᓗ ᐅᑎᕐᓂᕐᒧᑦ ᐃᖅᑲᓇᐃᔮᒧᑦ. ᐃᖅᑲᓇᐃᔭᖅᑎᑦᓯᔩᑦ ᐱᓯᒪᑦᓯᖏᓐᓇᖃᖅᑕᖅᑐᑦ ᐊᔪᖏᓐᓂᓕᓐᓂᑦ ᐃᖅᑲᓇᐃᔭᖅᑎᓂᑦ, ᒥᑭᓪᓕᕚᓪᓕᑎᑦᓯᓂᕐᒥᑦ ᐃᖅᑲᓇᐃᔭᖅᑎᑖᑲᓐᓂᕐᓂᕐᒥᑦ ᐃᓕᓐᓂᐊᑎᑦᓯᑲᓐᓂᕐᓂᕐᒧᓪᓗ ᐊᑭᖏᓐᓂᑦ, ᐅᔾᔨᕈᓱᑦᑎᑦᓯᓂᕐᒥᓪᓗ ᓴᖏᔪᒥᑦ ᐊᑦᑕᕐᓇᖏᑦᑐᒥᑦ ᐃᓕᖅᑯᓯᕐᒥᑦ. ᐃᖅᑲᓇᐃᔭᖅᑏᑦ ᐱᓯᒪᑦᓯᖃᑦᑕᖅᑐᑦ ᑮᓇᐅᔭᓕᕆᓂᕐᒧᑦ ᐃᑲᔫᑎᓂᑦ (ᐃᓐᓇᖅᓯᐅᑎᓂᑦ, ᐃᖅᑲᓇᐃᔮᒧᑦ ᓇᓪᓕᐅᒃᑯᒫᓂᑦ, ᐋᓐᓂᐊᕐᓂᕐᒧᑦ ᑭᒍᑎᓕᕆᔭᐅᓂᕐᒧᓪᓗ ᐱᕙᒌᔭᐅᑎᓂᑦ, ᐋᓐᓂᓚᐅᖏᓪᓗᓂ ᑮᓇᐅᔭᓕᐊᒥᓂᖏᓐᓂᑦ, ᐊᓯᖏᓪᓗ.), ᐅᓄᖅᓯᑎᑦᓯᓂᕐᒥᑦ ᐃᓘᓐᓇᒍᑦ ᐃᒻᒥᓂᒃ ᐱᒃᑯᒋᓂᖏᓐᓂᒃ, ᑲᓲᒪᑎᑦᓯᖏᓐᓇᓂᕐᒥᑦ ᐃᖅᑲᓇᐃᔭᕐᕕᒻᒧᑦ, ᓴᐳᔾᔨᓂᕐᒥᓪᓗ ᐃᖅᑲᓇᐃᔭᕈᓐᓇᕐᓂᖏᓐᓂᑦ. ᐱᐅᓂᖅᐹᖅ, ᐃᑲᔪᖃᑦᑕᖅᑐᖅ ᖃᓄᐃᒍᓐᓃᐸᓪᓕᐊᓂᕐᒥᑦ ᒪᒥᓴᕐᓂᕐᒥᓪᓗ, ᓄᖅᑲᖓᑎᑦᓯᓂᕐᒥᑦ ᑎᒥᒥᒍᑦ ᐊᔪᕈᑎᖃᕐᓂᕐᒥᑦ.

ᖃᐅᔨᒋᐊᕈᒃ Return to Work ᒪᑉᐱᖅᑐᒐᖅ ᖃᐅᔨᓇᓱᐊᕐᓂᕐᒥᑦ ᓂᕈᐊᕐᕕᒋᒍᓐᓇᖅᑕᓐᓂᑦ ᐃᑲᔪᖅᓗᑕᓗ ᐃᓕᓐᓂᑦ ᖃᓄᐃᒍᓐᓃᐸᓪᓕᐊᓂᕐᓄᑦ. ᕿᒥᕐᕈᒃᑭᑦ ᐃᑲᔫᑎᕗᑦ ᐃᖅᑲᓇᐃᔭᖅᑎᓄᑦ, ᐃᖅᑲᓇᐃᔭᖅᑎᑦᓯᔨᓄᑦ, ᐊᒻᒪᓗ ᐋᓐᓂᐊᖃᕐᓇᖏᑦᑐᓕᕆᔩᑦ. ᐃᓕᓐᓂᐊᑲᓐᓂᕈᒪᒍᕕᑦ, ᐊᐱᖅᑯᑎᑦᓴᖃᕈᕕᓪᓘᓐᓃᑦ, ᐃᖅᑲᓇᐃᔮᒧᑦ ᐅᑎᕐᓂᕐᒧᑦ ᖃᐅᔨᒪᔪᒻᒪᕆᑦᑕᓕᒃ ᐊᑐᐃᓐᓇᐅᑎᑦᓯᒍᓐᓇᖅᑐᒥᑦ ᐅᖃᐅᔾᔨᒋᐊᕐᓂᕐᒥᑦ ᐃᑲᔪᕐᓂᕐᒥᓪᓘᓐᓃᑦ ᐱᕙᓪᓕᐊᑎᑦᓯᓂᕐᒥᑦ ᐊᑐᓕᖅᑎᑦᓯᓂᕐᒥᓪᓗ ᐃᖅᑲᓇᐃᔮᒧᑦ ᐅᑎᕐᓂᕐᒧᑦ ᐱᕙᓪᓕᐊᔪᓂᑦ ᐃᖅᑲᓇᐃᔭᕐᕕᓐᓄᑦ. ᐅᖄᓚᒍᓐᓇᖅᑐᑎᑦ ᐅᖄᓚᒋᑦ ᐅᕙᑦᑎᓐᓄᑦ ᐅᕗᖓ 1-800-661-0792 or email us.

ᐃᖅᑲᐅᒪᒋᑦ, ᐊᖏᕐᕋᑐᐊᕐᒥᑦ ᖃᓄᐃᒍᓐᓃᐸᓪᓕᐊᓇᖏᑦᑐᖅ.
ᐊᑐᐊᒐᕐᓄᑦ ᐊᓯᔾᔨᕐᓂᐊᔪᑦ

ᐊᐅᓚᑦᓯᔩᑦ ᑲᑎᒪᔨᖏᑦ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᓪᓗ ᖃᐅᔨᓴᖅᑏᑦ ᓄᓇᑦᓯᐊᕐᒥᑦ ᓄᓇᕗᒻᒥᓪᓗ ᐊᖏᖅᓯᒪᔪᑦ ᐋᖅᑭᒋᐊᕆᓂᕐᒥᑦ ᓯᑕᒪᓂᑦ ᐊᑐᐊᒐᕐᓂᑦ ᒪᕐᕉᓐᓂᓪᓗ ᐊᐅᓚᑦᓯᔩᑦ ᑲᑎᒪᔨᖏᓐᓄᑦ ᑎᓕᓯᔾᔪᑕᐅᔪᑦ ᔫᓂ 2016 ᑲᑎᒪᓂᕐᒥᑦ:
  • ᐊᑐᐊᒐᖅ 00.02, ᐃᓱᒪᒋᔭᖃᑲᓐᓂᕐᓂᕐᒥᑦ ᐃᓱᒪᓕᐅᕈᑕᐅᔪᒥᑦ
  • ᐊᑐᐊᒐᖅ 00.09, ᑲᑐᔾᔨᖃᑎᒌᓐᓂᕐᒥᑦ
  • ᐊᑐᐊᒐᖅ 08.01, ᕿᒥᕐᕈᓂᖅ ᐊᔪᐃᓐᓇᑲᓐᓂᕐᓂᕐᒥᓪᓗ ᐃᓱᒪᓕᐅᕈᑕᐅᔪᒥᑦ
  • ᐊᑐᐊᒐᖅ 08.02, ᓈᓚᒃᑲᓐᓂᕐᓂᕐᒥᑦ ᐊᔪᓐᓇᑲᓐᓂᕐᓂᕐᒥᑦ
  • ᐊᐅᓚᑦᓯᔩᑦ ᑲᑎᒪᔨᖏᑦᑕ ᑎᓕᓯᔾᔪᑎᖏᑦ B-009, ᐊᔪᐃᓐᓇᑲᓐᓂᕐᓂᕐᒥᑦ ᑲᑎᒪᔨᖏᑦᑕᑐᓴᖅᑕᐅᒃᑲᓐᓂᕆᐊᓕᖕᓄᑦ ᐊᑭᓕᐅᑎᖏᑦ ᐊᒻᒪ ᖃᖓᑦᑕᐅᑎᖏᑦ
  • ᐊᐅᓚᑦᓯᔩᑦ ᑲᑎᒪᔨᖏᑦᑕ ᑎᓕᓯᔾᔪᑎᖏᑦ B-011, ᐊᔪᐃᓐᓇᑲᓐᓂᕐᓂᕐᒥᑦ ᑲᑎᒪᔨᖏᑦᑕ ᐱᓇᔫᑎᖏᑦ
ᖃᐅᔨᒋᐊᕐᕕᒋᒍᒃ WSCC Policy Manual ᕿᒥᕐᕈᓂᐊᕐᓗᒋᑦ ᐃᓘᓐᓇᖏᓐᓂᑦ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᓪᓗ ᖃᐅᔨᓴᖅᑏᑦ ᐊᑐᐊᒐᖏᑦ ᐊᒻᒪᓗ Governance Council Directives Manual ᕿᒥᕐᕈᓗᒋᑦ ᐃᓘᓐᓇᑎᒃ ᐊᐅᓚᑦᓯᔩᑦ ᑲᑎᒪᔨᖏᑦᑕ ᑎᓕᓯᔾᔪᑎᖏᑦ.
ᐊᓪᓚᕝᕕᐅᑉ ᒪᑐᒪᓂᕆᕙᑦᑕᖏᑦ
ᑭᓇᑐᐃᓐᓇᕐᓄᑦ ᓄᖅᑲᖓᓐᓇᖅ

ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᓪᓗ ᖃᐅᔨᓴᖅᑏᑦ ᐊᓪᓚᕝᕕᖓ ᒪᑐᒪᓂᐊᖅᑐᖅ ᑭᒃᑯᑐᐃᓐᓇᕐᓄᑦ ᓄᖅᑲᖓᓐᓇᕐᒥᑦ ᓇᒡᒐᔾᔭᐅᒥᑦ, ᐊᐅᒡᒍᓯ 1-ᒥ ᒪᑐᐃᑲᓐᓂᓛᖅᓱᓂᓗ 8:30 ᐅᓪᓛᒃᑯᑦ ᐊᐃᑉᐱᕐᒥᑦ, ᐊᐅᒡᒍᓯ 2-ᒥ.

ᖃᐅᔨᒃᑲᐃᓂᕐᒥᑦ ᐱᒻᒪᕆᐅᔪᒥᑦ ᐃᖅᑲᓇᐃᔭᕐᕕᒻᒥᑦ ᐋᓐᓂᕐᓂᕐᒥᑦ ᖃᓄᐃᓐᓂᐅᔪᒥᓪᓘᓐᓃᑦ ᐅᖄᓚᒋᑦ 1-800-661-0792.
wscc.nt.ca   /  1.800.661.0792  |  wscc.nu.ca  /  1.877.404.4407