QIQAIYAQLUAQVIA 2016
UYARAKHIURVIKMI ANNAUTJIUYUT AKIMANAHUARUT PIFFAARAHUALIQQA!

SAALUTIMI, JUNE 11 YALUNAIMI

Tautugumavakpit ayuittiaqtunik uyarakhiurvikmi annautjiuyut havaqatigiinginnik tautuktipkaigumi qanuriliurutingit takulugillu piliurhimayut atuqpagainni uyarakhiuqtiuyut atuqpagait ubluq tamaat? Yalunaimiitkuvit Saaluti, June 11mi, qun'ngiariaqtudjavutit uumunnga 59th Annual Mine Rescue Competition, uumani pinahuat Multiplex/Fieldhouse akhaluutiqarvingani 8mit ublaami 3mungaqtumut ubluumaamut.

Una ilagiiktunut aliahuut tuniniaqtut qun'ngiaqtunut qun'ngiariamikni akiniarahuat tamainnit Nunatsiamit Nunavunmillu naunaipkairiamikni uyarakhiurvikmi aaniqtailiniqmut qanuriliurutingit aadlatqiini uuktuutinik akimanahuaqtut qun'ngiaqtittillutik. Uumani ukiumi, 6nguyut ilagiiktut tallimanit uyarakhiurvikmit uukturahuat Tamainnit Qaangani unalu Tamainnit Nunap Ataanit Taktakhat:

Qaangani ilagiiktut
  • Ekati Diamond Uyarakhiurvik - Dominion Diamond Kuapuriisinga
  • Gahcho Kué Diamond Uyarakhiurvik - De Beers Canada Havakvinga.
  • Meadowbank Gold Uyarakhiurvik - Agnico Eagle Uyarakhiurvikmiit Havakvinga.
Nunap ataani ilagiiktut
  • Diavik Diamond Uyarakhiurvikmi - Rio Tinto
  • Ekati Diamond Uyarakhiurvikmi - Dominion Diamond Kuapuriisinga
  • Hope Bay Gold Uyarakhiurvikmi - TMAC Resources Havakvinga.
Nunatsiaqmi Nunavunmilu Katimavinga Uyarakhiurvikmi  atauhiqmi ukiumi Uyarakhiuqtiit Niripkainahuat, akiittumik uunnahuat niuqarakhainniklu tamainnut.

HUUQTAUQ UYARAKHIURVIKMI ANNAUTJIUYUT AKIMANAHUAQTUT AKHUURUTAUVA?

Pipkaidjutigiamilu aliahuktumik akimanahuaqniq pipkaidjutiplunilu uyarakhiurvikmi annautjiuyut ilagiiktut atauttimuuriamikni ukiumi, uyarakhiurvikmi annautjiuyut akimanahuaqtut akhuurutauyut taimaa uyarakhiuviit atauttikuuriamikni naunaiyariami qanuritaakhaaniklu naunairiami nakuuyunik qanuritaakhaaniklu  uyarakhiurvikmi annautjiuyut ayuirhainiq pinahuarutit. Uyarakhiurvikmi annautjiuyut akimanahuaqtut pipkaidjutiyuq ilagiiktut ayuiriamikni aadlamit, aadlanullu pipkailugit nakuutqiaq atuqtamiknik nutaaqlu havakvium tamayanginnik, taimannami ikayuqniaqtuq havaktivut aaniqnaittumik. Taimaa aaniqtuqaryuaqqat, ayuittiaqtut uyarakhiurvikmi annautjiuyut ilagiiktut tamaita inuit nakuutqiamik pipkaidjutikhaa aaniqnaittumik inugiamilu.

NAITTUQ UNIPKAANGA UYARAKHIURVIKMI ANNAUTJIUYUT

Ihuarhaqhimayuq uyarakhiurvikmi annautjiuyut hamani itpaktut taimaa 20nik ukiunik uyarakhiurvikmi taimaa aulapkaihimayuq. Uumani Unipkaanga Nunatsiap Nunavullu Uyarakhiurvikmi Annautjiuyut Pinahuarut,  Yalunaimi qangaraaluknitanik ihivriuqtiuyuq Ryan Silke aadlanut pipkaidjutigiyaa tamna hivulliqpaanga uyarakhiurvikmi annautjiuyut ayuirhaivinga angmaqtuq England-mi uumannga W.E. Garforth 1904mi, Kaanatamittauq uumannga Dominion Uyarauyanik Havakvinga 1907mi 1908miluuniit -Sydney, Nova Scotia-mi.

Ukiuqtaqtumi, humaangittuq qaffiuyut uyarakhiurvikmi aaniqtuqaqtuq tuqutauyullu qangaraaluknitamit, ilitariyauyuq uyarakhiurvikmi annautjiuyut pinahuarut pingittuq taimaa kihimi Anguyakyuangani II, taimaa Nunatsiaq Aaniqtailiniqmut Katimayiingit katimayiungurmata 1947mi. Una Aaniqtailiniqmut Katimayiit niuviqtaat hivulliqpaaq uyarakhiurvikmi annautjiuyut tamayangit titiraqtallu hivulliqpaaq Nunatsiaqmi Uyarakhiurvikmi Aaniqtailiniqmut Maligaq 1947-48, ihuarhaiplugit tamaita aulapkaidjutingit ukiuqtaqtumi uyarakhiuvinginnut.

QANGA UYARAKHIURVIKMI ANNAUTJIUYUT AKIMANAHUAQTUT PILIHAALIQQAT?

Nunatsiaq Aaniqtailiniqmut Katimayiingit qilamiuqhutik piyut. 1950nguqmat, iniqtiqtait hivulliqpaaq uyarakhiurvikmi annautjiuyut nayuganga Yalunaimi. 1951ngumat, ilihaivikhat uumunnga uyarakhiurvikmi annautjiuyut Qilamiuqtuqaliqqat Aaniqtumik Aniqhaalimaittumitluuniit Ikayurniq ayuirhaipkaliqtaa, angmaumapluni tamainnut uyarakhiurvikmi havaktinginnut. Kihimi, 1955nguqmat taimaa uyarakhiurvikmiit ihuarhaliqtait ilagiiktut  Qilamiuqtuqaliqqat Aaniqtumik Aniqhaalimaittumitluuniit Ikayurniq akimanahuaqtut. Hapkuat Qilamiuqtuqaliqqat Aaniqtumik Aniqhaalimaittumitluuniit Ikayurniq akimanahuaqtut ilaliutiyut ukununnga uyarakhiurvikmi annautjiuyut akimanahuaqtut, pipkaidjutiyuq hivulliqpaaq ilitariyauyuq uyarakhiurvikmi annautjiuyut akimanahuarut 1957mi.

Talvannga Giant Gold Uyarakhiurviup akimaninnga hivulliqpaami uyarakhiurvikmi annautjiuyut akimanahuarniq 1957mi, uyarakhiurviit tamainnit Ukiuqtaqtumit tuyuqtut ilagiiktut uukturiami ukiunnguraangat uyarakhiurvikmi annautjiuyut akimanahuarniq. Ilaugguitti 59mik ukiungit Saaluti, June 11mi naunairiami kitkut angilraqniaqtut taktakhanginnik 2016mi!

Naunairyuumirumaguvit quviahuutikhamut, pulaarlugu Mine Rescue Competition pulaarvinga. Takuyumayaffi quviahuutigiyauliqqat.
OHS MALIGANGIT NUNAVUNMI

Tamna nutaaq Havakvikmi Aaniaqtailiniq Aaniqtailiniqmullu Maligaq maliganguqtut Nunavunmi.

Itqaumalugu ilihimagiami kangirhigiamilu hapkuat nutaat Maligakhat ikayuutikhat, taimaa nanminit angiyukpat mikkaukpatluuniit. Hapkuat Maligakhat piyut tamainnut nanminiqaqtunut aulapkaiyut Nunavunmi, kihimi tahapkuat kaanatami maligaliuqtauyut, taimaa ilikniinaq munariyakhaungittatit - maliktakhaungmat.

Hamani ittugut ikayuriaqni kangirhigiaqni hapkuat aadlangurninngit ittut iliknut. Ihariagiguvit aadlanik naunaitkutinik, uqaqatigiluta uumani OHSRegs@wscc.nu.ca.

Nutaaq Maligakhaq aadjikutaliunginnarialik uumani OHSRegs.ca.
NAOSH: QUANA

Quanaqpiaq tamainnut ilauyut uumani ikayuqtullu NAOSH-mi Quviahuutiuyut tamainni Nunatsiaqmi Nunavunmilu. Quviahuktugut uqariamni angiyumik pikmat!

Yalunaimi, avatqumayuq 15nguyut aadlatqiit havaktiuyut atiliuqtut ilaugiamikni Aaniqtailiniqmut Kaapituqarvik, havaakhariaqaqtitaatigut talvani. Piqaqhuta kaapinik niriyakhaniklu, Aaniqtailiniqmut Havaktivut uqaqtut Ukiakhami Hapumminiq; Iluani Munariniqmut Pipkaidjutingit;  Quuyaqittut, Napatkarumi Iukaqtullu; Utiffaaqtuq Havaaminut; Piliurninngalu. Tamainni, uqaqatigiugut avatqumayuq 400 havaktiuyut atauhiqmi Santimi. Quanaqquhi pipkaidjutigigapta aaniqtailiniq iliknut!

Havaktit Atan'nguyangillu Inuuvikmi pipkaidjutiyut aaniqtailiniqmut ihumagilluaqtut tupauttaqtunik. Tamna quviahuut naunaipkaqtittauyuq naunaipkainiqmik aaniqtailiniqmut uqaqatigiikniq naunaiktutaniklu nutaamut Havakvikmi Aaniaqtailiniq Aaniqtailiniqlu (OHS) Maliktakhat.

Iqalukmi havakvikput niripkaiyut uumani Francophone Katimaviani quviahuutigiami NAOSH-mik! Taktakhat tuniyauyut, aaniqtailinirmut naunaitkutingit aadlanut uqaqtauyut, quviahukpiaqhutiklu tamainnit ilauyunit ayuirhaqtullu nutaamik OHS Maliktakhanik.

Quanaqpiaq Ukiuqtaqtuni Katimayiuyut Havaanut (NTFL) ikayuqtaativut quviahupkaitilluta tuniplutik niqinik niuqaqtakhaniklu quviahuutipkaitilluta.
NUTAAQ INUKTITUT QARITAUYAKKUT PULAARVIK

ILIHIMAVIT?

Tamna WSCC ukpiriyut ilitariyauyunut uqauhinginnik ihariagiyanginnik nunaptikni, akhuuqtut ikayuriami inuinnait pitquhingit uqauhingillu pittaarupta, una Inuktitut version of our website angmaqtauyuq una ukiuq atulihaaliqtillugu.

Tamna Inuktitut titiraqninnga qaritauyakkut pulaarvinga takuinnariali ukunuuna wscc.nu.ca uumaniluuniit wscc.nt.ca. Naqillugu Inuktitut uqauhinga naqitarvinganut ittuq qaangani taliqpiami; takuniaqat haniani Qablunaatitut Uiviititlu naqitarvingani. Taimaatut, naqitarlugu titiraqninnga una www.wscc.nu.ca/iu qinirhiayarnut.

Ilaliutihimayuq una nutaaq pipkaidjutinga, ihumagiugut pihimmaaqniaqtat uqariiyaqtaptiknik angikliyuumiriami ilihimaniq kangirhimaniqlu WSCC-kut ikayuutingit ihuarhigiamilu tigumiaqatigiyut piinarialaqiluni tahapkununnga ikayuutinut. Piliurninnga inuinnaqtumik qaritauyaqqut pulaarvinganut havaktauliqtuq.
NAUNAITKUTAQ: AADLANGUQTUQ TITIRAQARVIKPUT

INUUVIKMI HAVAKVINGIT NUUTTUT!

Tunigiami nakuutqiamik ikayuutikhamik tigumiaqatigiiktunut, WSCC-kut Inuuvikmi havakvinga nutaamut nuuttut. Naunaiqlugu nutaaq Inuuvikmi nayugaa:

Blackstone Igluqpangani, Iglu 87
85 Kingmingya Road
Inuvik, NT  X0E 0T0

Uqaqatigiafikni nampangit aadlangungittut huli; hamani ittugut kiugiami apirhuutiqaruvit. Uqaqatigiluta uumani 867-678-2301 uumaniluuniit 867-678-2311. Uqarumaguvit havakvikmi aaniqtuqaqqat qanuriliurutikpatluuniit, hivayaqhimmaaqpaklugu akiittuq hivayautikput uumani 1-800-661-0792.
APIQHUUTIQAQQIHI? 

Apiqhuutiqaguffi ihumagiyainiklu uvaptingnun, tuyuqlutin uvaptingnun qaritauyakkut uvani info@wscc.nt.ca uvaniiluuniit info@wscc.nu.ca.
wscc.nt.ca   /  1.800.661.0792   *   wscc.nu.ca  /  1.877.404.4407