ᔫᓂ 2016
ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᓂᕐᒧᑦ ᐱᒡᒍᓴᐅᑎᓂᖅ ᐅᑎᖅᐳᖅ!

ᓯᕙᑖᕐᕕᒃ, ᔫᓂ 11 ᔭᓗᓇᐃᒥ

ᑕᐅᑐᒍᒪᓚᐅᖅᓯᒪᕕᑦ ᐱᓕᒪᔪᓂᒃ ᐱᖏᖕᓇᖅᑐᓕᔨᓂᑦ ᑕᐅᑐᒃᑎᑦᑎᓗᒋᑦ ᐊᑐᕈᓯᕐᓂᑦ ᐱᖏᖕᓇᖅᑐᓕᕆᙳᐊᕐᓗᑎᒡᓗ ᐊᒃᓱᕉᑕᐅᕙᒃᑐᓂᑦ ᐅᔭᕋᖕᓂᐊᕐᕕᖕᓂ ᖃᐅᑕᒫᖅᓯᐅᑎᒥᖕᓂᑦ? ᔭᓗᓇᐃᒦᒃᑯᕕᑦ ᓯᕙᑖᕐᕕᒃ, ᔫᓂ 11-ᒥ, ᐃᓚᐅᖃᑕᐅᓛᖅᐳᑎᑦ  59-ᖓᑦ ᐊᕐᕌᒍᑕᒫᖅ ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᓂᕐᒧᑦ ᐱᒡᒍᓴᐅᑎᓂᕐᒥᑦ, Multiplex-ᒥᑦ/Fieldhouse ᓄᓇᓯᐅᑎᖃᕐᕕᖓᓂ 8-ᒥᑦ ᐅᓪᓛᒃᑯᑦ 3-ᒧ ᐅᓐᓄᒃᓴᒃᑯᑦ.

ᑖᓐᓇ ᐃᓚᒌᓄ ᑐᙵᓇᖅᑐᖅ ᖁᙱᐊᖅᑐᓂᑦ ᑕᐅᑐᒃᑎᑦᑎᔪᓐᓇᕐᓂᐊᖅᑐᑦ ᓄᓇᑦᓯᐊᕐᒥᐅᓂᒃ ᓄᓇᕗᒻᒥᐅᓂᒡᓗ ᐅᔭᕋᖕᓂᐊᕐᕕᖕᒥ ᐊᑦᑕᕐᓇᖅᑕᐃᓕᒪᓂᕐᒧᑦ ᐊᑐᕈᓯᖏᓐᓂᒃ ᖃᓄᑯᓘᔭᖅ ᖃᐅᔨᓴᖅᑕᐅᓂᕐᒧᑦ ᐱᒡᒍᓴᐅᑎᓗᑎᒃ ᐅᓪᓗᓕᒫᖅ. ᑕᒪᑐᒪᓂ ᐊᕐᕌᒎᔪᖅ, ᐊᕐᕕᓂᓕᐅᔪᑦ ᐱᙳᐊᖅᑎᐅᖃᑎᒌᑦ ᑕᓪᓕᒪᑦ ᐅᔭᕋᖕᓂᐊᕐᕕᖕᓂᙶᖅᑐᑦ ᐱᒡᒍᓴᐅᑎᓂᐊᖅᑐᑦ ᓄᓇᐅᑉ ᖄᖓᓂ ᓄᓇᐅᓪᓗ ᐊᑖᓂ ᓵᓚᒃᓴᐅᓯᐊᒃᓴᒧᑦ:

ᓄᓇᐅᑉ ᖄᖓᓂ ᐱᙳᐊᖅᑎᐅᖃᑎᒌᖑᔪᑦ
  • ᐃᑳᑎ ᑕᐃᒪᓐ ᐅᔭᕋᖕᓂᐊᕐᕕᒃ - ᑕᒥᓂᐊᓐ ᑕᐃᒪᒃ ᑯᐊᐳᕇᓴ
  • ᒑᓲ ᑭᐅ ᑕᐃᒪᓐ ᐅᔭᕋᖕᓂᐊᕐᕕᒃ - ᑎ ᐱᐅᔅ ᑲᓇᑕᒃᑯᑦ
  • ᒥᐊᑐᐹᓐ ᒎᓗ ᐅᔭᕋᖕᓂᐊᕐᕕᒃ - ᐋᒡᓃᑰ ᐄᒍᓪ ᐅᔭᕋᖕᓂᐊᕐᕕᒃ
ᓄᓇᐅᑉ ᐊᑖᓂ ᑲᑐᔾᔨᖃᑎᒌᖑᔪᑦ
  • ᑕᐃᐊᕕᒃ ᑕᐃᒪᓐ ᐅᔭᕋᖕᓂᐊᕐᕕᒃ - ᕇᐆ ᑎᓐᑑ
  • ᐃᑳᑎ ᑕᐃᒪᓐ ᐅᔭᕋᖕᓂᐊᕐᕕᒃ - ᑕᒥᓂᐊᓐ ᑕᐃᒪᓐ ᑯᐊᐳᕇᓴ
  • ᕼᐆᑉ ᐸᐃ ᒎᓗ ᐅᔭᕋᖕᓂᐊᕐᕕᒃ - TMAC ᐅᔭᕋᖕᓂᐊᕐᕕᒃ
ᓄᓇᑦᓯᐊᕐᒥ ᓄᓇᕗᒻᒥᓗ ᐅᔭᕋᖕᓂᐊᖅᑐᓕᕆᓂᕐᒧᑦ ᑲᑐᔾᔨᖃᑎᒌᖏᑦ ᐊᕐᕌᒍᑕᒫᖅᓯᐅᑎᒥᖕᓂ ᐅᔭᕋᖕᓂᐊᖅᑎᓄᑦ ᓂᕆᑎᑦᑎᓂᐊᕐᒥᔪᑦ, ᐊᑭᖃᙱᑦᑐᒥᑦ ᓂᕆᑎᑕᐅᓗᑎᒃ ᓂᐅᖅᑲᓗᒃᑎᑕᐅᓗᑎᒡᓗ.

ᖃᓄᐃᒻᒪ ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᓂᕐᒧᑦ ᐱᒡᒍᓴᐅᑎᓂᖅ ᐱᒻᒪᕆᐅᕙ?

ᐃᓚᒃᑲᓐᓂᕐᓗᒍᑦ ᐱᒡᒍᓴᐅᑎᑦᑎᐊᕐᓂᐅᔪᖅ ᐊᔪᙱᑎᑦᑎᓂᕐᓗ ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᔨᖏᓐᓂ ᑲᑎᑎᑦᑎᓂᖅ ᐊᕐᕌᒍᑕᒫᖅ, ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᓂᕐᒧᑦ ᐱᒡᒍᓴᐅᑎᓂᖅ ᐱᒻᒪᕆᐅᕗᖅ ᐱᔾᔪᑎᖃᖅᖢᓂ ᐅᔭᕋᖕᓂᐊᕐᕖᑦ ᑲᑎᓪᓗᑎᒃ ᕿᒥᕐᕈᔪᓐᓇᕐᓂᖏᓐᓄᑦ ᖃᐅᔨᓴᕐᓗᑎᒡᓗ ᐊᑑᑎᑦᑎᐊᕐᓂᕆᔭᖏᓐᓂᑦ ᖃᓄᖅ ᐱᐅᑎᒋᓂᖏᓐᓂᒡᓗ ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᓂᕐᒧᑦ ᐱᓕᒻᒪᒃᓴᐅᑎᖏᓐᓂᒃ. ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᓂᕐᒧᑦ ᐱᒡᒍᓴᐅᑎᓂᖅ ᐃᓕᓐᓂᐊᖃᑎᒌᒍᑕᐅᖃᑦᑕᖅᐳᖅ, ᖃᐅᔨᑎᑦᑎᕙᒃᖢᑎᒃ ᐊᑐᕈᓯᑦᑎᐊᕙᐅᓛᕐᓂᑦ ᓄᑖᕐᓂᒡᓗ ᐊᑐᒐᒃᓴᑦᑎᐊᕙᐅᓛᕐᓂᑦ, ᐊᑯᓂᐅᔪᒧᓪᓗ ᐃᖅᑲᓇᐃᔭᖅᑎᓂᒃ ᐊᑦᑕᕐᓇᖅᑐᒦᙱᑎᑦᑎᔪᓐᓇᖅᖢᓂ.

ᐊᑐᒐᓛᖕᓂᑯᑦ ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᓂᕐᒥᑦ

ᐋᖅᑭᒃᓱᖅᓯᒪᔪᒃᑯᑦ ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᓂᖅ ᐱᑕᖃᖅᓯᒪᔪᖅ ᐊᑯᓂᐅᑎᒋᔪᖅ 1900-ᖏᓐᓂ ᐅᔭᕋᖕᓂᐊᕐᕕᐅᕙᓚᐅᖅᑐᓂᒃ. ᑭᖑᓂᖓᓂ ᓄᓇᑦᓯᐊᕐᒥ ᓄᓇᕗᒻᒥᓗ ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᓂᐅᑉ, ᔭᓗᓇᐃᕝ ᐃᑦᑕᕐᓂᓴᓕᕆᔨᖓ ᕋᐃᐊᓐ ᓯᐅᓪᒃ ᐅᖃᖅᓯᒪᔪᖅ ᓯᕗᓪᓕᖅᐹᖅ ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᓂᕐᒧᑦ ᐱᓕᒻᒪᒃᓴᕐᕕᒃ ᐅᒃᑯᐃᓚᐅᖅᑐᖅ ᑯᐃᓐ ᓄᓇᖓᓂ W.E. ᒐᐅᕗᐊᑦ 1904-ᖑᑎᓪᓗᒍᑦ, ᑲᓇᑕᒥᓗ ᑕᒥᓂᐊᓐ ᑰᓪ ᑲᒻᐸᓂᐅᑉ 1907-ᒥᓪᓘᓐᓃᑦ 1908-ᒥᓪᓘᓐᓃᑦ- ᓯᑦᓂ, ᓅᕙ ᓯᑰᓴᒥᑦ.

ᐅᑭᐅᖅᑕᖅᑐᒥᑦ, ᐊᒥᓱᐃᖅᓱᕋᓗᐊ ᐅᔭᕋᖕᓂᐊᕐᕕᖕᒥ ᐋᓐᓂᕈᑕᐅᔪᑦ ᐃᓅᔪᓐᓃᕈᑕᐅᔪᓪᓗ ᐱᒋᐊᓵᖅᑎᓪᓗᒋᑦ, ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᓪᓚᕆᒃᐸᓚᐅᙱᑦᑐᑦ ᑭᓯᐊᓂ ᓄᓇᕐᔪᐊᕐᒥ ᐅᓇᑕᕕᒡᔪᐊᕐᓂᐅᑉ ᑐᒡᓕᐊ ᐱᒋᐊᖅᑎᓪᓗᓂᑦ, ᓄᓇᑦᓯᐊᕐᒥ ᐊᑦᑕᕐᓇᖅᑕᐃᓕᒪᓂᕐᒧᑦ ᑲᑎᒪᔩᑦ ᓴᖅᑭᑕᐅᑎᓪᓗᒋᑦ 1947-ᒥᑦ. ᑖᓐᓇ ᐊᑦᑕᕐᓇᖅᑕᐃᓕᒪᓂᕐᒧᑦ ᑲᑎᒪᔩᑦ ᓂᐅᕕᓚᐅᖅᑐᑦ ᓯᕗᓪᓕᖓᓂ ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᔾᔪᑎᓂᒃ ᑎᑎᕋᙵᖅᖢᑎᒡᓗ ᓄᓇᑦᓯᐊᕐᒧ ᐅᔭᕋᖕᓂᐊᕐᕕᖕᒥ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᖁᔭᕐᒥᑦ 1947-48-ᒥᑦ, ᐊᑐᕈᓯᓕᐅᖅᖢᑎᒃ ᐃᖏᕐᕋᓂᐅᔪᓄᑦ ᐅᑭᐅᖅᑕᖅᑐᒥ ᐅᔭᕋᖕᓂᐊᕐᕕᓕᒫᓄᑦ.

ᖃᖓ ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᓂᕐᒧᑦ ᐱᒡᒍᓴᐅᑎᖃᑦᑕᓕᓚᐅᖅᐸᑦ?

ᓄᓇᑦᓯᐊᕐᒥ ᐊᑦᑕᕐᓇᖅᑕᐃᓕᒪᓂᕐᒧᑦ ᑲᑎᒪᔨᖏᑦ ᐱᒋᐊᑲᐅᑎᒋᓚᐅᖅᑐᑦ. 1950-ᒥᑦ, ᐱᔭᕇᖅᓯᑦᑎᐊᓚᐅᖅᑐᑦ ᓯᕗᓪᓕᖅᐹᖓᓂ ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᕝᕕᖕᒥ ᔭᓗᓇᐃᒥ. 1951-ᒥᑦ, ᐱᓕᒻᒪᒃᓴᐃᕙᓕᓚᐅᖅᑐᑦ ᐅᔭᕋᖕᓂᐊᕐᕕᖕᒥᑦ ᐱᖏᖕᓇᖅᑐᓕᕆᓂᕐᒧᑦ ᐋᓐᓂᖅᑐᓂᒡᓗ ᑲᒪᒋᔭᖃᕐᓂᕐᒧᑦ, ᐅᒃᑯᐃᖓᓪᓗᓂᓗ ᐅᔭᕋᖕᓂᐊᕐᕕᖕᒥ ᐃᖅᑲᓇᐃᔭᖅᑎᓕᒫᓄᑦ. ᑭᓯᐊᓂᓕ, 1955-ᖑᓕᖅᑎᓪᓗᒍᑦ ᐅᔭᕋᖕᓂᐊᕐᕖᑦ ᐋᖅᑭᒃᓱᐃᕙᓕᑕᐃᓐᓇᓚᐅᖅᑐᑦ ᐱᙳᐊᖅᑎᐅᖃᑎᒌᓂᒃ ᐋᓐᓂᖅᑐᓂᒃ ᑲᒪᒋᔭᖃᕐᓂᕐᒧᑦ ᐱᒡᒍᓴᐅᑎᓂᕐᒧᑦ.  ᑕᒪᒃᑯᐊ ᐋᓐᓂᖅᑐᓂᒃ ᑲᒪᒋᔭᖃᕐᓂᕐᒧᑦ ᐱᒡᒍᓴᐅᑎᓃᑦ ᑲᑎᖃᑎᖃᓕᓚᐅᖅᑐᑦ ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᓂᕐᒧᑦ ᐱᒡᒍᓴᐅᑎᓂᕐᒥᑦ, ᓯᕗᓪᓕᖅᐹᖓ ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᓂᕐᒧᑦ ᐱᒡᒍᓴᐅᑎᓪᓚᑦᑖᖅᖢᑎᒃ 1957-ᒥᑦ.

ᑕᐃᒪᙵ ᔭᐃᐊᓐ ᒎᓗ ᐅᔭᕋᖕᓂᐊᕐᕕᐅᑉ ᓵᓚᖃᓚᐅᑎᓪᓗᒋᑦ ᓯᕗᓪᓕᖅᐹᒥᑦ ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᓂᕐᒧᑦ ᐱᒡᒍᓴᐅᑎᓂᕐᒥᑦ 1957-ᖑᑎᓪᓗᒍᑦ, ᐅᔭᕋᖕᓂᐊᕐᕖᑦ ᐅᑭᐅᖅᑕᖅᑐᒥ ᑲᑐᔾᔨᖃᑎᒌᖏᓐᓂᑦ ᐱᒡᒍᓴᐅᑎᑎᑦᑎᔭᖅᑐᖃᑦᑕᓕᓚᐅᖅᑐᑦ ᐊᕐᕌᒍᑕᒫᖅ. ᐃᓚᐅᒋᑦ 59-ᖓ ᐊᕐᕌᒍᑕᒫᖅᓯᐅᒻᒥ ᓯᕙᑖᕐᕕᒃ, ᔫᓂ 11-ᒥᑦ ᖃᐅᔨᓗᑎᓗ ᑭᓇ ᐊᖏᕐᕋᐅᔾᔨᓂᐊᕐᒪᖔᑦ ᓵᓚᒃᓴᐅᓯᐊᕐᒥᑦ 2016-ᒧᑦ!

ᑐᑭᓯᒋᐊᒃᑲᓐᓂᕈᒪᒍᕕᑦ ᐱᒡᒍᓴᐅᑎᓂᐅᓂᐊᖅᑑᑉ ᒥᒃᓵᓄᑦ, ᑕᑯᒋᐊᕐᓗᒍᑦ ᐅᔭᕋᖕᓂᐊᕐᕕᖕᒥ ᐱᖏᖕᓇᖅᑐᓕᕆᓂᕐᒧᑦᐱᒡᒍᓴᐅᑎᓂᖅ. ᑕᑯᓂᐊᕈᒪᕙᑦᑎᒋᑦ ᑕᐃᑲᓂ.

ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᓂᕐᒧᑦ ᐊᑦᑕᕐᓇᖅᑕᐃᓕᓂᕐᒧᓪᓗ ᐊᑐᐊᒐᐃᑦ ᓄᓇᕗᒻᒥ

ᓄᑖᖑᔪᖅ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᓂᕐᒧᑦ ᐊᑦᑕᕐᓇᖅᑕᐃᓕᓂᕐᒧᓪᓗ ᐊᑐᐊᒐᐃᑦ ᒪᓕᒐᐅᓕᖅᐳᑦ ᓄᓇᕗᒻᒥ.

ᐃᖅᑲᐅᒪᒋᑦ ᖃᐅᔨᒪᓗᒋᑦ ᑐᑭᓯᐅᒪᓗᒋᓪᓗ ᑕᒪᒃᑯᐊ ᐊᑐᐊᒐᐃᑦ ᐃᓕᖕᓄ ᐃᑲᔫᑎᓂᖓᓂ, ᓇᖕᒥᓂᕆᔭᑦ ᐊᖏᒐᓗᐊᕈᓂ ᒥᑭᒃᑲᓗᐊᕈᓂᓘᓐᓃᑦ. ᑕᒪᒃᑯᐊ ᐊᑐᐊᒐᐃᑦ ᐊᑐᖅᐳᑦ ᓇᖕᒥᓂᕆᔭᐅᔪᓕᒫᓄᑦ ᓄᓇᕗᒻᒥ, ᐱᓇᒋᑦ ᒐᕙᒪᑐᖃᑎᒍᑦ ᐊᑐᐊᒐᖃᖅᑐᑦ, ᐱᓕᕆᐊᒃᓴᕆᑐᐃᓐᓇᙱᑕᑦ-ᒪᓕᒐᐅᔪᖅ.

ᐅᕙᓃᖏᓐᓇᐅᔭᖅᑐᒍᑦ ᐃᓕᖕᓂ ᑐᑭᓯᐅᒪᓕᖅᑎᑦᑎᔪᒪᓪᓗᑕ ᖃᓄᖅ ᑕᒪᒃᑯᐊ ᐊᓯᔾᔨᖅᑐᑦ ᑐᑭᖃᕐᒪᖔᑦ ᐃᓕᖕᓄ. ᖃᓄᑐᐃᓐᓇᖅ ᑐᑭᓯᒋᐊᒃᑲᓐᓂᕆᐊᖃᕈᕕᑦ, ᖃᐅᔨᒋᐊᕐᕕᒋᑎᒍᑦ ᐅᕙᓂ OHSRegs@wscc.nu.ca.

ᓄᑖᖅ ᐊᑐᐊᒐᐃᑦ ᐊᑐᐃᓐᓇᐅᔪᑦ ᐱᔭᒃᓴᐅᓪᓗᑎᒃ ᐅᕙᓂ OHSRegs.ca.
NAOSH: ᖁᔭᓐᓇᒦᒃ

ᖁᔭᓐᓇᒦᒃ ᐃᓚᐅᖃᑕᐅᓚᐅᖅᑐᓕᒫᑦ ᐃᑲᔪᖅᓯᖃᑕᐅᓚᐅᑐᓪᓗ NAOSH ᐱᓇᓱᐊᕈᓯᖓᓂ ᖃᓄᐃᓕᐅᕈᑎᖃᑲᑕᒃᑎᓪᓗᑕ ᓄᓇᑦᓯᐊᕐᒥ ᓄᓇᕗᒻᒥᓗ. ᖁᕕᐊᓱᒃᖢᑕ ᐅᓐᓂᖅᓯᐅᖅᐳᒍᑦ ᐊᑑᑎᑦᑎᐊᓚᐅᕐᓂᖓᓂᑦ!

ᔭᓗᓇᐃᒥ, 15 ᐅᖓᑖᓂ ᐃᖅᑲᓇᐃᔭᕐᕖᑦ ᐊᑎᓕᐅᖃᑕᐅᓚᐅᖅᑐᑦ ᐊᑦᑕᕐᓇᖅᑕᐃᓕᒪᔪᓕᕆᓂᕐᒧᑦ ᑳᕕᕐᓇᒥᑦ, ᑕᑖᖏᓐᓇᖅᖢᑕ ᐱᓇᓱᐊᕈᓯᓕᒫᖅ. ᑳᕕᖃᖅᖢᑕ ᑕᒧᓗᒐᒃᓴᖃᖅᖢᑕᓗ, ᐊᑦᑕᕐᓇᖅᑕᐃᓕᑎᑦᑎᔨᕗᑦ ᐅᓂᒃᑲᐅᓯᖃᑲᑕᓚᐅᖅᑐᑦ ᑲᑕᒃᑕᐃᓕᒪᓂᕐᒧᑦ; ᐃᖅᑲᓇᐃᔭᕐᕕᖕᒥ ᑲᒪᒋᔭᐅᔭᕆᐊᖃᖅᐸᒃᑐᓂ; ᓯᐊᕐᕆᓐᓂᖅ, ᐅᕐᕈᓂᖅ ᐅᒃᐱᑲᕐᓂᕐᓗ; ᐃᖅᑲᓇᐃᔮᒧᑦ ᐅᑎᕐᓂᖅ; ᐋᖅᑭᐅᒪᔭᐅᔭᕆᐊᓖᓪᓗ. ᑕᒪᐃᓐᓂ, ᐅᖃᖃᑎᖃᕈᓐᓇᓚᐅᖅᑐᒍᑦ 400 ᐅᖓᑖᓂ ᐃᖅᑲᓇᐃᔭᖅᑎᓂᒃ ᐱᓇᓱᐊᕈᓯᐅᑉ ᐃᓗᐊᓂ. ᖁᔭᓐᓇᒦᒃ ᐃᓕᖕᓄᐊᖅᓯᔪᓐᓇᕋᑦᑕ ᐊᑦᑕᕐᓇᖅᑕᐃᓕᓂᕐᒥᑦ!

ᐃᖅᑲᓇᐃᔭᖅᑏᑦ ᐃᖅᑲᓇᐃᔭᕐᕖᓪᓗ ᐃᓅᕕᖕᒥ ᐊᔾᔨᐅᙱᑦᑐᒥᑦ ᐊᑦᑕᕐᓇᖅᑕᐃᓕᓂᕐᒧᑦ ᐅᓪᓛᕈᒻᒪᓴᖅᑎᑕᐅᓚᐅᖅᑐᑦ. ᑕᒪᑐᒪᓂᐅᔪᖅ ᑐᑭᓯᓇᑦᑎᐊᖅᑐᓂᒃ ᐊᑦᑕᕐᓇᖅᑕᐃᓕᓂᕐᒧᑦ ᐅᖃᖃᑎᒌᓚᐅᖅᑐᑦ ᑐᑭᓯᒋᐊᕈᑎᖃᖅᖢᑎᒡᓗ ᓄᑖᖑᔫᑉ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᓂᕐᒧᑦ ᐊᑦᑕᕐᓇᖅᑕᐃᓕᓂᕐᒧᓪᓗ ᐊᑐᐊᒐᐅᑉ ᒥᒃᓵᓄᑦ.

ᐃᖃᓗᖕᓂ ᑎᑎᕋᕐᕕᒃᐳᑦ ᓂᕆᑎᑦᑎᓚᐅᖅᑐᑦ ᐅᐃᕖᑦ ᑐᑦᑕᕐᕕᖓᓂ ᖁᕕᐊᓲᑎᖃᖅᖢᑎᒡᓗ NAOSH-ᒥᑦ! ᑐᓐᓂᖅᑯᓯᐊᖅᓯᑲᑕᓚᐅᖅᑐᑦ, ᐊᑦᑕᕐᓇᖅᑕᐃᓕᓂᕐᒧᑦ ᑐᑭᓯᒋᐊᖅᑎᑦᑎᓚᐅᖅᑐᑦ, ᐊᓕᐊᓇᐃᑦᑐᓕᕿᓚᐅᕐᒥᔪᑦ ᐅᐸᒃᑐᓕᒫᑦ ᐃᓕᓐᓂᐊᖅᖢᑎᒡᓗ ᓄᑖᙳᔫᑉ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᓂᕐᒧᑦ ᐊᑦᑕᕐᓇᖅᑕᐃᓕᓂᕐᒧᓪᓗ ᐊᑐᐊᒐᐅᑉ ᒥᒃᓵᓄᑦ.

ᖁᔭᓐᓇᒦᒃ ᐅᑭᐅᖅᑕᖅᑐᒥ ᓴᓇᔪᓕᕆᓂᕐᒧᑦ ᑲᑐᔾᔨᖃᑎᒌᖏᑦ (NTFL) ᐅᕙᑦᑎᓐᓂᒃ ᐃᑲᔪᓚᐅᖅᑐᑦ ᐱᓇᓱᐊᕈᓯᓕᒫᖅ ᓂᕿᒧᑦ ᓂᐅᖅᑲᒐᒃᓴᓄᓪᓗ ᖃᓄᐃᓕᐅᕈᑕᐅᔪᓕᒫᓄᑦ.
ᓄᑖᖅ ᐃᓄᒃᑑᖓᔪᖅ ᐃᑭᐊᖅᑭᕕᒃ

ᐅᔾᔨᕆᕕᐅᒃ?

ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᒡᓗ ᖃᐅᔨᓴᖅᑏᑦ ᐅᒃᐱᕈᓱᒃᐳᑦ ᐃᓕᑕᕆᔭᐅᓯᒪᔪᑦ ᐅᖃᐅᓯᕐᓂᑦ ᐊᑐᖅᑕᐅᔭᕆᐊᓕᖕᓂ ᐅᑭᐅᖅᑕᖅᑐᒥ, ᐃᑲᔪᖅᓯᕈᒪᓪᓗᒍᓗ ᐃᓄᐃᑦ ᐃᓕᖅᑯᓯᖓ ᐅᖃᐅᓯᖓᓗ ᐊᔪᙱᑕᑦᑎᒍᑦ. ᐱᔨᑦᑎᑦᑎᐊᕈᒪᓪᓗᒍᑦ ᐱᔭᕆᐊᓕᖕᓄᑦ, ᐃᓄᒃᑑᖓᔪᖅ ᐃᑭᐊᖅᑭᔾᔪᑎᕗᑦ ᓴᖅᑭᑕᐅᓚᐅᖅᑐᖅ ᑕᒪᑐᒪᓂ ᐊᕐᕌᒎᔪᒥ.

ᐃᓄᒃᑑᖓᔪᖅ ᐃᑭᐊᖅᑭᔾᔪᑎ ᐊᑐᐃᓐᓇᐅᔪᖅ ᐅᕙᓂ wscc.nu.ca ᐅᕙᓂᓘᓐᓃᑦ wscc.nt.ca. ᓇᕿᓪᓗᒍᑦ ᐃᓄᒃᑎᑐᑦ-ᓚᓯᒪᔪᖅ ᖁᓛᑕ ᑕᓕᖅᐱᐊᓂ; ᓇᓂᓂᐊᖅᑕᑦ English ᐊᒻᒪ French-ᓚᓯᒪᔫᑉ ᖃᓂᒋᔮᓂ. ᐅᕝᕙᓘᓐᓃᑦ, ᑎᑎᕋᑐᐃᓐᓇᕐᓗᒍᑦ www.wscc.nu.ca/iu ᐃᑭᐊᖅᑭᔾᔪᑎᖕᓂᑦ.

ᐃᓚᓪᓗᒍᑦ ᑖᓐᓇ ᓄᑖᖑᔪᖅ, ᑲᔪᓯᔪᒪᕗᒍᑦ ᖃᐅᔨᒪᓕᖅᑎᑦᑎᕚᓪᓕᕐᓗᒍᑦ ᑐᑭᓯᐅᒪᓕᖅᑎᑦᑎᕚᓪᓕᕐᓗᒍᓗ ᓇᓪᓕᐅᒃᑯᒫᓕᕆᔩᑦ ᐱᔨᑦᑎᕋᐅᑎᖏᓐᓂᑦ ᐱᕕᖃᓕᖅᑎᑉᐹᓪᓕᕐᓗᒋᓗ ᐱᖃᖅᑎᐅᖃᑕᐅᔪᑦ ᑕᒪᒃᑯᓄᖓ ᐱᔨᑦᑎᕋᐅᑎᓄᑦ. ᐱᕙᓪᓕᐊᑎᑦᑎᔪᑦ ᐃᓄᐃᓐᓇᖅᑑᖓᔪᒥᑦ ᐃᑭᐊᖅᑭᕕᖕᒥ.
ᖃᐅᔨᒃᑲᐃᔾᔪᑦ: ᑐᕌᕈᑎᐅᑉ ᐊᓯᔾᔨᕐᓂᖓᓄ

ᐃᓅᕕᖕᒥ ᑎᑎᕋᕐᕕᒃᐳᑦ ᓅᓯᒪᓕᖅᑐᖅ!

ᐱᔨᑦᑎᕋᑦᑎᐊᒃᑲᓐᓂᕈᒪᓪᓗᒋᑦ ᐱᖃᖅᑎᐅᖃᑕᐅᔪᑦ, ᓇᓪᓕᐅᒃᑯᒫᓕᕆᔨᒃᑯᑦ ᐃᓅᕕᖕᒥ ᑎᑎᕋᕐᕕᖓ ᓄᑖᕐᒥᑦ ᐃᓂᖃᓕᖅᑐᖅ. ᑎᑎᕋᕐᓗᒍᑦ ᓄᑖᖑᔪᖅ ᐃᓅᕕᖕᒥ ᑐᕌᕈᑎᖓ:

The Blackstone Building, Unit 87
85 Kingmingya Road
Inuvik, NT  X0E 0T0

ᐅᖃᓘᑎᕗᑦ ᐊᓯᔾᔨᖅᓯᒪᙱᑦᑐᖅ; ᐅᕙᓃᑦᑐᒍᑦ ᑭᐅᔪᒪᓪᓗᑕ ᖃᓄᑐᐃᓐᓇᖅ ᐊᐱᖅᑯᑎᒃᓴᖃᕈᕕᑦ. ᐅᕙᑦᑎᓐᓄ ᐅᖄᓚᒋᑦ ᐅᕗᖓ 867-678-2301 ᐅᕝᕙᓘᓐᓃᑦ 867-678-2311. ᐃᖅᑲᓇᐃᔭᕐᕕᖕᒥ ᐋᓐᓂᖅᑐᒥᒃ ᖃᓄᐃᑦᑐᖃᕈᑕᐅᑲᓪᓚᒃᑐᒥᓘᓐᓃᑦ ᐅᓂᒃᑲᐅᓯᖃᕈᒪᓗᒍᑦ, ᐅᖄᓚᖃᑦᑕᐃᓐᓇᕆᑦ ᐊᑭᖃᙱᑦᑐᒃᑯᑦ ᐅᕗᖓ 1-800-661-0792.
ᐊᐱᖅᑯᑏᑦ? 

ᐊᐱᖅᑯᑎᖃᕈᕕᑦ ᐅᕙᓘᓃᑦ ᐅᖃᐅᓯᒃᓴᓂᒃ ᐅᕙᑉᑎᖕᓄᑦ ᐱᔾᔪᑎᓕᖕᒥᑦ WSCC-ᑯᓐᓄᑦ ᐊᑦᑕᑕᕐᓂᖅ-ᒥᒃ, ᖃᕆᑕᐅᔭᒃᑯᑦ ᑎᑎᕋᕐᕕᒋᓗᑕ ᐅᕗᖓ info@wscc.nt.ca-ᒧᑦ ᐅᕙᓘᓃᑦ info@wscc.nu.ca-ᒧᑦ.
wscc.nt.ca   /  1.800.661.0792   *   wscc.nu.ca  /  1.877.404.4407