ᒫᑦᓯ 2016
ᐊᒧᒃᓯᕆᔪ/ᓄᓱᒃᓯᕆᔪᖅ

ᓄᑭᒃᑯᑦ ᐋᓐᓂᕈᑕᐅᓂᖅᐸᐅᖃᑦᑕᖅᑐᖅ

ᐅᓇ ᑕᑯᓐᓇᓐᖑᐊᑲᐃᓐᓇᕈᒃ: ᓅᑎᕆᖁᔭᐅᒐᕕᑦ ᐊᔾᔭᖅᑐᕐᓗᑎᑦ ᐃᑦᑎᕐᕕᓂᑦ ᓇᑎᕐᒦᑦᑐᓂᑦ ᐃᓕᔾᔨᕕᒻᒧᑦ ᐃᕕᑦ ᓵᑦᑎᐊᖓᓃᑦᑐᒧᑦ. ᖁᓕᐅᓪᓗᑎᑦ ᐃᑦᑎᕐᕖᑦ, 20 ᐅᕙᓗ 25 ᐸᐅᓂᑦ ᐅᖁᒪᐃᓐᓂᓕᒡᒍᑏᑦ. ᐊᑐᓂᒃ ᐃᕕᑦ ᓴᐅᒥᖓᓐᓄᑦ ᐃᓕᕙᑦᑐᒋᑦ, ᐅᑯᓗᑎᑦ ᓇᑎᕐᒦᑦᑐᑦ ᑎᒍᓗᒋᑦ ᐊᒡᒐᐅᑏᒃᑭᑦ ᓇᑎᕐᓂᒧᑦ ᑎᑭᖃᑦᑕᖅᑑᒃ, ᑭᕕᑦᑎᓪᓗᑎᑦ ᐃᑦᑎᕐᕕᒻᒥᑦ, ᒪᑭᓪᓗᑎᑦ, ᓵᓐᓄᑦ ᐃᓕᓪᓗᒍ ᖁᒻᒧᑦ ᐃᓕᔾᔨᕕᒧᑦ ᑐᐃᓐᓂᒃ ᐳᕐᑐᓂᔅᓴᒐᓛᖑᓪᓗᓂ ᐃᓕᔾᔨᕕᒃ ᑕᓪᓗᕕᑦ ᓇᓕᒧᐸᓗᐊᓂᑦ. ᑖᒃᑯᐊ ᖁᓖᑦ ᐃᓕᐅᖅᑲᖅᑕᐃᓐᓇᕆᒐᕕᒋᑦ ᓄᖅᑲᖓᑲᐃᓐᓇᓚᐅᓐᖏᓪᓗᑎᑦ; ᐊᖓᔪᖅᑳᑦ ᑕᐃᒪ ᐱᔭᔅᓴᖃᖅᑎᑦᑎᖃᐅᒥᒻᒪᑦ ᐊᓯᖏᓐᓂᒃ ᑖᒃᑯᐊ ᐱᔭᕇᕈᕕᒋᑦ ᐊᒻᒪ ᐱᔭᕇᔭᖅᑕᐃᓐᓇᕆᔪᒪᓪᓗᒋᑦ.

ᐅᓐᓄᖓᓐᓂᒃ ᐊᖏᕐᕋᕕᑦ, ᓴᓂᕌᒃᑭᒃ ᓴᓐᓂᓕᖅᑐᑎᒃ, ᐊᒡᒐᐅᑏᒃᑭᒃ, ᑕᓖᒃᑭᒃ, ᑐᐃᒃᑭᓪᓗ ᐋᓐᓂᐊᓕᖅᑐᑎᒃ, ᑐᓄᒃᑯᓪᓗ ᐋᓐᓂᓚᑦᑎᕋᓕᖅᑐᑎᑦ. ᑕᐃᒪᐃᑎᓪᓗᑎᑦ ᑕᕝᕙ ᐊᒧᒃᓯᕆᕗᑎᑦ− ᑭᕕᑦᑎᖃᑦᑕᓂᕐᒧᑦ − ᑭᕕᑦᑎᖃᑦᑕᐃᓐᓇᐸᒃᑯᕕᑦ ᐃᖅᑲᓇᐃᔮᓐᓂᒃ, ᑕᒪᓐᓇ ᓄᑭᓪᓗᓕᕈᑕᐅᓲᖑᒻᒪᑦ ᐊᒡᒐᐅᑎᒃᑯᑦ ᖁᖓᓯᑯᓪᓗ ᐊᒻᒪ ᑐᐃᒃᑯᑦ.

ᐊᒧᒃᓯᕆᓂᖅ ᐊᓐᓂᕈᑕᐅᓂᖅᐸᐅᕙᑦᑐᖅ ᓄᑭᒃᑯᑦ  ᓄᓇᑦᓯᐊᕐᒥᑦ ᓄᓇᕗᒻᒥᓗ: 2015ᖑᑎᓪᓗᒍ ᐊᒧᒃᓯᕆᓂᖅ ᑭᕕᑦᑎᖃᑦᑕᑐᓄᑦ 18.43% ᐋᓐᓂᖅᓯᒪᔪᓄᑦ ᓄᑭᒃᑯᑦ. ᐊᒧᒃᓯᕆᓂᖅ ᐊᔅᓱᕉᓴᓗᐊᖅᑎᓪᓗᑕ ᐱᓕᕆᑎᓪᓗᑕ ᐋᓐᓂᕈᑕᐅᕙᐳᖅ, ᐅᕙᓗ ᐊᑐᕋᔪᑉᐸᖏᑦᑕᒃᑯᑦ ᐅᕙᓗ ᑕᐃᒫᔅᓴᐃᓐᓇᐅᓗᐊᖅᑐᖅ ᐱᓕᕆᑎᓪᓗᑕ ᑎᒥᑦᑎᒍᑦ. ᐅᑯᒐᓚᓗᐊᓂᕐᒧᑦ ᕿᑎᒃᑯᑦ (ᓰᖅᑯᖏᒃ ᐊᑐᓐᖏᖔᖅᑐᒋᒃ), ᐅᖁᒪᐃᒋᓗᐊᖅᑕᓐᓂᒃ ᑭᕕᑦᑎᖃᑦᑕᕈᕕᑦ, ᐅᕙᓗ ᑎᑭᑦᑎᓇᓱᐊᕐᓂᕈᕕᑦ ᑎᑭᒐᕐᓂᖏᑦᑐᓂᑦ− ᑖᐃᒪᐃᓕᐅᕐᓃᑦ ᐊᒧᒃᓯᒍᑕᐅᕙᒻᒪᑕ ᓄᑭᒃᑯᑦ ᐋᓐᓂᖅᓯᒪᓚᕿᒍᑕᐅᕙᑦᑐᑦ.

ᑭᒃᑯᓕᒫᑦ ᐋᓐᓂᑐᐃᓐᓇᕆᐊᓖᑦ − ᐃᓪᓗᓕᐅᖅᑏᑦ, ᓂᐅᕕᕐᕕᓐᓂᑦ ᓴᖅᑭᐊᑦᑎᕆᔩᑦ, ᐊᓪᓚᕕᓐᓂᑦ ᐃᖅᑲᓇᐃᔭᖅᑏᑦ − ᐃᖅᑲᓇᐃᔮᖅ ᖃᓄᐃᑦᑑᒐᓗᐊᖅᑲᑦ, ᐊᐅᓚᔾᔭᓐᓃᑦ ᐊᑐᓕᒪᓐᖏᑦᑕᑎᑦ, ᐅᕙᓗ ᑕᐃᒫᔅᓴᐃᓐᓇᐅᑉᐸᑦ, ᐊᒻᒪ ᑎᒥᓐᓄᑦ ᖃᓄᐃᓕᒍᑎᒋᑐᐃᓐᓇᕆᐊᓖᑦ ᐅᖓᑖᓄᓗᐊᖅ ᐱᓕᕆᒍᕕᑦ.

ᓱᒻᒪᑦ ᐊᒧᒃᓯᕆᕙᑉᐸᑦ?

ᑕᑯᓐᓇᓐᖑᐊᑎᑦᑎᖅᑲᐅᒐᑦᑕ ᑕᐃᒫᑦᑎᐊᖑᓐᖏᑦᑐᖅ ᐱᓕᕆᔪᒥᒃ, ᑭᓯᐊᓂ ᐊᒥᓱᐊᓘᒻᒪᑕ ᐊᔾᔨᒌᓐᖏᑦᑐᑦ ᐋᓐᓂᕈᑕᐅᔪᓐᓇᖅᑐᑦ ᐊᒧᒃᓯᒍᓗᑎᑦ. ᐃᖅᑲᓇᐃᔭᕐᕕᒻᒥᑦ ᐊᒧᒃᓯᓂᖅ ᐊᑑᑎᔪᓐᓇᖅᑐᖅ ᑎᒥᓐᓄᑦ ᐊᔅᓱᕈᓗᐊᕈᕕᑦ ᐱᓕᕆᓗᑎᑦ, ᐊᒻᒪ ᐃᒫᒃ ᑎᒥᒃᑯᑦ ᐊᐅᓚᓃᑦ ᑕᐃᒪᐃᓕᔾᔪᑕᐅᔪᓐᓇᖅᑐᖅ:
  • ᑭᕕᑦᑎᓂᖅ
  • ᓴᓂᒧᑦ ᓵᓐᓂᒃ
  • ᐅᑯᓗᓂ
  • ᐊᔾᔭᖅᓯᓂᖅ
  • ᐊᔭᔅᓯᓂᖅ
  • ᐊᒧᓯᓂᖅ
ᓱᓕᒃᑲᓐᓂᖅ, ᒪᑯᓂᖓ ᐋᓐᓂᕈᑎᖃᕈᓐᓇᖅᑐᒍᑦ ᐱᓕᕆᑎᓪᓗᑕ, ᐃᒪᐃᑦᑐᓂᑦ:
  • ᐃᖅᑲᓇᐃᔮᒥᑦ ᑖᔅᓱᒥᖓᓴᐃᓐᓇᖅ: ᐱᓕᕆᑎᓪᓗᑕ ᑎᒥᑦᑎᓐᓄᑦ ᑕᐃᒫᔅᓴᐃᓐᓇᖅ ᓄᑮᑦ ᒪᒥᒌᕈᓐᓇᖅᓯᓚᐅᖅᑎᓐᓇᒋᑦ ᐱᒋᐊᓕᖅᑭᑉᐸᑐᓐᓄᑦ.
     
  • ᐊᑲᐅᓐᖏᑦᑐᒥᑦ ᑎᒥᒧᑦ ᐅᕙᓗ ᐋᖅᑭᑦᑎᐊᖅᓯᒪᓐᖏᓗᐊᖅᑐᒥ ᑎᒥᒃᑯᑦ: ᐱᓕᕆᐊᔅᓴᖃᖅᑎᓪᓗᑎ ᐊᑲᐅᓐᖏᓗᐊᖅᑐᒥᓪᓗ ᑎᒥ ᐋᖅᑭᔅᓯᒪᓇᓱᐊᕆᐊᖃᖅᑎᓪᓗᒍ ᓄᑮᑦ ᐃᓕᓐᖓᑎᓐᓇᒋᑦ ᑕᐃᒫᒃ ᐊᑲᐃᓪᓕᐅᕈᑕᐅᔪᓐᓇᖓᑦ ᓄᑭᓄᑦ. ᐅᕿᑦᑐᕈᓘᒐᓗᐊᑦ ᐊᔾᔭᕆᐊᓖᑦ ᐋᓐᓂᕈᑕᐅᑲᓪᓚᒍᓐᓇᖅᑐᑦ.
     
  • ᓂᓪᓚᓱᑦᑐᒥᑦ: ᐱᓕᕆᒍᕕᑦ ᓂᓪᓚᓱᑦᑐᒥᑦ, ᐊᐅᑦ ᓱᒃᑲᐃᓂᖅᓴᐅᒻᒪᑦ ᐃᖏᕐᕋᓂᖓ ᓄᑭᒃᑯᑦ ᑕᐃᒪᐃᓐᓂᖓᓄᑦ ᐊᒧᒃᓯᕆᒍᑎᒋᑐᐃᓐᓇᕆᐊᖃᕐᒥᔭᑎᑦ.
     
  • ᑕᖃᓯᒪᓗᐊᕐᓂᖅ: ᑎᒦᑦ ᑕᖃᓯᒪᑎᓪᓗᒍ, ᐱᓕᕆᐊᔅᓴᒐᓗᐊᑎᑦ ᑎᒥᕕ ᐊᖅᑐᕆᓕᑐᓂᒋᑦ ᐅᖓᑎᓗᐊᕌᓗᐊᓄᑦ ᐱᓕᕆᑎᓕᖅᑐᒍ. ᐊᒧᒃᓯᕆᓂᕙᒻᒥᔪᑦ ᑎᒥ ᐊᔅᓱᕈᖅᑎᑕᐅᓗᐊᖅᑎᓪᓗᒍ ᐱᔪᓐᓇᖅᑕᖓᑕ ᐅᖓᑎᓗᐊᖓᓄᑦ.
     
  • ᐃᓕᓐᓂᐊᖅᑎᑕᐅᓯᒪᑦᑎᐊᖏᓐᓂᖅ: ᐃᖅᑲᓇᐃᔭᖅᑏᑦ ᐃᓕᓐᓂᐊᖅᑎᑕᐅᓯᒪᑦᑎᐊᓐᖏᓗᐊᖅᑎᓪᓗᒋᑦ, ᐊᒧᒃᓯᕆᑐᐃᓐᓇᕆᐊᓖᑦ ᐃᖅᑲᓇᐃᔭᖅᑎᓪᓗᒋᑦ ᖃᐅᔨᒪᑦᑎᐊᖏᓐᓂᑯᖏᓐᓄᑦ ᖃᓄᑎᒋ ᐊᑕᕐᓇᖅᑐᐃᓐᓇᕆᐊᖃᕐᓂᖓ ᑎᒥᖓᓐᓄᑦ.
     
  • ᐃᖅᑲᓇᐃᔭᕐᕕᒻᒥᑦ ᑐᓴᐅᒪᑎᑕᐅᓯᒪᓐᖏᓐᓂᖅ ᐋᖅᑭᔅᓯᒪᓂᐅᔪᓂᒃ: ᐱᓕᕆᐊᔅᓴᐃᑦ ᐋᖅᑭᔅᓯᒪᓂᕆᒋᐊᓕᖏᑦ ᐊᑐᖅᑎᑕᐅᑎᓐᓇᒋᑦ, ᐃᖅᑲᓇᐃᔭᖅᑏᑦ ᐊᒧᒃᓯᕆᔾᔪᑎᖃᑐᐃᓐᓇᕆᐊᓖᑦ ᐋᓐᓂᕈᑎᒋᓗᒍᓗ ᑎᒥᖓᒍᑦ.
ᖃᐅᔨᒪᕖᑦ ᐊᒧᒃᓯᕆᔪᓐᓇᕐᒥᒐᕕᑦ ᐃᖅᑲᓇᐃᔭᕐᕕᓐᓂᑦ ᐊᐅᓚᔭᖃᑦᑕᖏᒃᑯᕕᑦ? ᐃᔅᓯᕚᖏᓐᓇᖃᑦᑕᕈᕕᑦ ᓇᔪᖅᑕᐃᓪᓗ ᐊᐅᓚᔾᔭᑲᓪᓚᑦᑖᓇᖅᑲᑦ − ᐊᖁᑏᑦ ᐊᑯᓂ ᐃᖏᕐᕋᔪᑦ ᑕᐃᒪᐃᑉᐸᒻᒪᑕ − ᑕᐃᒪᐃᑦᑐᒦᒃᑯᕕᑦ ᑕᕙ ᑎᒦᑦ ᐋᖅᑭᑦᑎᐊᖅᓯᒪᓐᖏᑦᑐᒦᑉᐳᖅ ᓄᑭᑎᑦ ᓱᑲᖓᑎᓪᓗᒋᑦ ᐊᐅᓚᓐᓇᕈᓘᔭᕐᓂᖓᓄᑦ ᓇᔪᖅᑕᕕᑦ.

ᖃᓄᐃᖃᑦᑕᖅᑲᑦ ᐊᒧᒃᓯᕆᓯᒪᔪᑦ?

ᐊᒧᒃᓯᕆᓂᖅ ᑐᓄᒃᑯᑦ ᑭᐊᓯᑯᓪᓗ ᐋᓐᓂᖅᓯᒪᒍᑕᐅᒐᔪᑉᐸᑦᑐᖅ, ᐊᒻᒪᓗ ᐊᓯᐊᒍᑦ ᑎᒥᒃᑯᑦ ᓄᑭᖏᑎᒍᑦ ᐋᓐᓂᕈᑕᐅᔪᓐᓇᕆᓪᓗᓂ. ᓇᐅᒃᑯᑐᐃᓐᓇᖅ ᑎᒥᒃᑯᑦ ᓄᑭᖏᑦᒍᑦ ᓴᐅᓂᖏᑎᒍᓪᓘᓐᓃᑦ ᐋᖅᑭᑦᑎᐊᖅᓯᒪᒍᓐᓃᕈᑕᐅᔪᓐᓇᖅᑐᖅ ᐊᒧᒃᓯᕆᓂᖅ. ᐅᖃᐅᓯᐅᖅᑲᐅᒻᒥᔪᖅ ᓄᑭᓪᓗᓕᕈᑕᐅᔪᓐᓇᕐᒥᔪᖅ ᐊᒡᒐᐅᑎᖏᑎᒍᑦ, ᐅᕙᓗ ᐊᒡᒐᐅᑎᖏᑦ ᐋᓐᓂᐊᖃᑦᑕᓕᕈᓐᓇᖅᑐᑦ, ᑐᐃᖏᑎᒍᑦ ᓄᑭᓪᓗᓕᕐᓗᓂ, ᕿᑎᕐᓗᓕᕈᑕᐅᓗᓂ. ᑕᒪᒃᑯᐊ ᐊᒧᒃᓯᕆᕕᒋᕙᑦᑕᖏᑦᑕ ᓇᐅᒃᑯᑐᐃᓐᓇ ᑎᒥ ᐋᓐᓂᐊᒋᔭᖃᖃᑦᑕᓂᐊᖅᑐᖅ, ᐳᕕᓪᓗᓂ ᐊᒻᒪ ᒪᐃᓪᓗᓂ.

ᑭᒃᑯᑐᐃᓐᓇᐃᑦ ᓇᒥᑐᐃᓐᓇᖅ ᑭᕕᑦᑎᒐᔪᑉᐸᒻᒪᑕ ᐱᔪᓐᓇᓂᖅᓴᐅᓱᒋᓪᓗᑎᑦ ᑭᕕᒍᓐᓇᖅᑕᖏᓐᓂᒃ, ᖃᐅᔨᒪᒋᐊᖃᖅᑐᒍᑦ ᐃᓄᐃᑦ ᐊᑐᓂᒃ ᐊᔾᔨᒌᓐᖏᒻᒪᑕ ᑭᕕᒍᓐᓇᖅᑕᖏᑦ, ᐱᒻᒪᕆᐅᒋᕗᖅ ᖃᐅᔨᒪᓗᒍ ᐃᓄᐃᑦ ᐊᑐᓂᒃ ᐊᒧᒃᓯᕆᔪᓐᓇᕐᖓᑕ ᖃᖓᑐᐃᓐᓇᒃᑯᑦ ᐊᔾᔨᒌᖏᓐᓇᐅᖏᒻᒪᑕ ᐱᔪᓐᓇᕐᓂᖏᑦ. ᑐᑭᑖᕋᓱᐊᕐᓂᖅ ᓇᓗᓇᖅᑑᒻᒪᑦ ᖃᓄᑎᒋ ᐱᓗᐊᕐᒪᖔᖅ ᐅᕙᓗ ᐊᔅᓱᓗᐊᕌᓗᒃ ᐱᓕᕆᓕᕐᒪᖔᖅ ᐃᓄᒃ ᑕᐃᒪᐃᓐᓂᖓᓄᒃ ᐊᒧᒃᓯᕆᓂᖅ ᐃᖅᑲᓇᐃᔮᔅᓴᖃᑎᑦᑎᔨᓄᑦ, ᑐᑭᓯᒋᐊᒃᑲᓐᓂᖔᕐᓗᒍ ᓱᒻᒪᑦ ᐊᒧᒃᓯᕆᔪᖃᓲᖑᒻᒪᖔᖅ ᐱᔭᕆᐊᒃᑭᓐᓂᖅᓴ ᐃᓕᓐᓂᐊᕈᑎᒋᖔᕐᓗᒍ ᖃᓄ ᑕᐃᒪᐃᓐᖏᓂᖅᓴᐅᔪᓐᓇᕐᒪᖔᑕ, ᐃᖅᑲᓇᐃᔭᖅᑏᑦ ᐊᒻᒪ ᐃᖅᑲᓇᐃᔮᖃᖅᑎᑦᑎᔪᑦ ᐊᑕᕐᓇᑕᐃᓕᒪᓂᕐᒥᑦ ᐊᒻᒪ ᐋᓐᓂᖅᑕᐃᓕᒪᓂᕐᒥᑦ ᐅᔾᔨᖅᑐᕈᓐᓇᖅᑐᑦ.

ᐱᔾᔭᐃᖅᓯᒪᓂᖅ: ᖃᓄᐃᓕᐅᕈᓐᓇᖅᑭᑦ?

ᐃᖅᑲᓇᐃᔭᖅᑎᐅᓗᑎᑦ:
  1. ᐃᖅᑲᓇᐃᔮᑦ ᕿᒥᕐᕈᓗᒍ. ᑎᒥᒃᑯᑦ ᐊᔅᓱᕈᕆᐊᖃᖅᐸ? ᐄᖑᑉᐸᑦ, ᐃᖅᑲᓇᐃᔭᖃᑎᔅᓴᖃᖅᑭᑦ ᐱᓕᕆᔪᓂᑦ ᑖᔅᓱᒥᖓᔅᓴᐃᓐᓇᖅ, ᐃᓄᒻᒥᒃ ᑎᒥᒃᑯᑦ ᐊᐅᓚᔭᒋᐊᓕᒻᒥᑦ ᐃᑲᔪᖅᑎᔅᓴᖃᖅᑭᑦ? ᐅᕙᓗ ᐃᖅᑲᓇᐃᔭᕈᑎᔅᓴᒥᑦ ᐊᐅᓚᐅᑎᓕᒻᒥᑦ ᐊᑐᕋᔅᓴᖃᖅᑭᑦ?
     
  2. ᐅᖃᖃᑎᖃᕐᓗᑎᑦ ᐃᖅᑲᓇᐃᔭᑎᑦᑎᔨᓐᓂᒃ. ᐃᖅᑯᓪᓕᕈᓐᓇᕆᐊᖃᖅᑐᑎᑦ ᐃᓕᓐᓂᐊᖅᓯᒪᑦᑎᐊᖏᒃᑯᕕᑦ ᐊᑦᑕᓇᖅᑕᐃᓕᒪᓂᕐᒥᑦ ᐃᖅᑲᓇᐃᔮᓐᓂᑦ, ᐅᕙᓗ ᐃᑲᔪᖅᑕᐅᔪᒪᓗᑎᑦ ᐃᖅᑲᓇᐃᔭᖃᑎᓐᓂᑦ ᐊᐅᓚᑎᓕᒻᒥᑦ ᐊᑐᕆᐊᖃᕈᕕᑦ.
     
  3. ᐃᖅᑲᓇᐃᔮᕕᕕᑦ ᐋᖅᑭᔅᓯᒪᓂᖓ ᕿᒥᕐᕈᔪᒪᓗᒍ. ᐊᓪᓚᕕᒻᒥᑦ ᐃᖅᑲᓇᐃᔭᕈᕕᑦ, ᑕᕙᑦᑕᐅᖅ ᐊᑲᐅᓐᖏᑦᑐᒥᑦ ᑎᒥᒃᑯᑦ ᐋᖅᑭᑦᑎᐊᖅᓯᒪᓐᖏᓗᐊᖅᑐᒥᑦ ᐊᑯᓂᐅᓗᐊᖅᑐᒥᑦ. ᐃᔅᓯᕙᐅᑕᕕᑦ ᑕᑭᓂᖓ, ᖃᕋᓴᐅᔭᕕᑦ ᐳᖅᑐᓂᖓ, ᓇᖅᑭᑦᑕᐅᑎᕕᑦ, ᐊᒻᒪᓗ ᓅᑦᑎᔾᔪᑎᖓ, ᐋᖅᑭᓱᖅᓯᑦᑎᐊᕐᓂᖅ ᑎᒥᒃᑯᑦ ᓄᑭᖏᑎᒍᑦ ᐊᑦᑐᐃᓂᖓ ᓯᕗᓂᕐᒧᑦ ᐊᑯᑦᑐᔪᒧᑦ ᐊᑑᑎᖃᕈᓐᓇᖅᑐᖅ ᐱᐅᔪᒥᑦ.
     
  4. ᐃᖃᐃᓕᓴᖃᑦᑕᕐᓗᑎᑦ. ᐅᓪᓚᓐᓂᐊᕈᕕᑦ ᐅᕙᓗ ᐱᓐᖑᐊᕐᓂᐊᕈᕕᑦ ᐱᒋᐊᓚᐅᓐᖏᓂᕐᓂᑦ ᐃᖃᐃᓕᓴᖅᑳᓱᖑᒐᕕᑦ ᑕᐃᒫᑦᑕᐅᖅ ᐱᔭᕆᐊᖃᕐᒥᔪᖅ ᐱᓕᕆᐊᕆᓂᐊᖅᑕᐃᑦ ᑎᒥᒃᑯᑦ ᐊᐅᓚᔭᓐᓇᖅᑑᑉᐸᑦ. ᓄᑭᑎᑦ ᐊᑐᐃᓐᓇᕈᖅᓴᖅᓯᒪᓗᒋᑦ ᐊᐅᕕᑦ ᐃᖏᕐᕋᓂᖓ ᑲᑦᑐᖓᐃᖓᓕᖅᑎᓪᓗᒍ ᖃᓄᐃᒍᑎᖃᕐᓇᖏᓐᓂᖅᓴᖅ ᑎᒥᐅᑉ ᓄᑭᖏᓐᓄᑦ.
     
  5. ᐅᖁᒪᐃᓐᓂᖓ ᐃᓱᖃᖅᑎᖃᑦᑕᕐᓗᒍ. ᐊᐅᓚᔾᔭᒋᐊᓕᕕᑦ ᐅᖁᒪᐃᓐᓂᖓ ᖃᐅᓯᖄᕐᓗᒍ, ᐅᕿᓪᓕᑎᒋᐊᕐᓗᒍ ᑭᕕᒋᐊᓖᑦ, ᐊᔾᔭᓂᐊᖅᑕᐃᑦ, ᐊᔭᓐᓂᐊᖅᑕᐃ, ᐅᕙᓗ ᓄᓱᐊᕆᐊᓖᑦ. ᐊᑕᐅᑦᑎᒃᑯᐊᓗᒃ ᐅᖁᒪᐃᓗᐊᖅᑐᒥᑦ ᐱᓇᓱᐊᖃᑦᑕᖏᓪᓗᑎᑦ.
     
  6. ᑭᕕᑦᑎᓃᑦ ᑕᐃᒫᑦᑎᐊᖅ ᐊᑐᕐᓗᒍ. ᑭᕕᓐᓂᐊᖅᑕᐃᑦ ᑎᒥᓐᓄᑦ ᖃᓂᑦᑎᒋᐊᕐᓗᒍ ᖃᓂᒍᓐᓇᕐᓂᓕᒫᖓᓄᑦ ᑎᑭᓐᓇᓱᓗᐊᕆᐊᑐᓂᐊᖏᒻᒪᑦ. ᑎᒥᕕᑦ ᐋᖅᑭᔅᓯᒪᓂᖓ ᑐᑭᓕᐊᑎᑦᑎᐊᕋᓱᐊᖃᑕᕐᓗᒍ ᓵᓪᓗᐊᖓᓄᑦ ᑐᓄᐃᓪᓗ ᐃᕿᖓᔭᐃᕐᓯᒪᓗᒍ, ᓰᖅᑯᒃᑭᑦ ᐊᑐᕐᓗᒋᒃ ᑭᕕᓪᓗᒍ ᐅᑯᑐᐃᓐᓇᖏᓪᓗᑎᑦ ᕿᑎᒃᑯᑦ. ᑎᒥᓕᒫᑦ ᓵᑦᑎᓪᓗᒍ ᕿᑎᒃᑰᖏᑦᑐᖅ. ᐊᔾᔭᖅᑕᑎᑦ ᓴᕝᕕᕕᑦ ᖁᓛᓃᑦᑕᐃᓕᖃᑦᑕᕐᓗᒋᑦ.
     
  7. ᑕᖃᐃᖅᓯᖃᑦᑕᕐᓗᑎᑦ ᓄᑭᑎᓪᓗᒍ ᐅᑎᕐᔫᒥᑎᖃᑦᑕᕐᓗᒋᑦ. ᓄᖅᑲᑲᐃᓐᓇᖃᑦᑕᖅᑐᓂ ᐃᖅᑲᓇᐃᔭᖅᑎᓪᓗᑎᑦ ᑕᐃᒫᔅᓴᐃᓐᓇᓕᖓᓗᐊᖅᑐᒥᑦ ᐱᔭᔅᓴᖃᕈᕕᑦ ᓄᑭᑎᑦ ᑕᖃᐃᖅᓯᖅᑎᑲᐃᓐᓇᖃᑦᑕᕐᓗᒋᑦ ᐊᒻᒪ ᐅᑎᕐᔫᒥᑎᑲᐃᓐᓇᖃᑦᑕᕐᓗᒋᑦ, ᐊᓯᖏᓐᓄᓪᓗ ᐱᓕᕆᐊᔅᓴᓐᓄᑦ ᓴᖑᑲᐃᓐᓇᖃᑦᑕᕐᓗᑎᑦ ᓄᑭᑎᑦ ᐊᓯᐊᒍᖔᖅ ᐊᑐᖅᑎᑲᐃᓐᓇᖁᓪᓗᒋᑦ. ᓂᕆᓯᒪᓗᑎᑦ ᐃᒥᕋᓚᖃᑦᑕᕐᓗᑎᓪᓗ ᐅᓪᓗᑕᒫᑦ ᑎᒦᑦ ᐊᒧᒃᓯᕆᖏᔾᔫᒥᔪᓐᓇᖅᑐᖅ ᑕᐃᒫᒃ.
     
  8. ᐃᑲᔪᖅᑕᐅᔪᒪᖃᑦᑕᕆᑦ. ᐱᔭᕆᐊᑐᔪᒥᑦ ᐃᖅᑲᓇᐃᔮᔅᓴᓂᑦᑕᐅᒍᕕᑦ ᑎᒥᓐᓄᓪᓗ ᐊᑲᐅᓐᖏᓗᐊᖅᑲᑦ, ᐃᑲᔪᖅᑕᐅᔪᒪᒋᑦ ᐱᓕᕆᐊᔅᓴᓐᓂᑦ, ᐅᕙᓗ ᖃᓄᑲᓐᓂᖅ ᐱᐅᓂᖅᓴᐅᒐᔭᕐᒪᖔᖅ ᐱᓕᕆᐊᔅᓴᐃᑦ ᑲᒪᒋᓇᓱᐊᕐᓗᒍ ᐃᑲᔪᖅᑕᐅᔪᒪᓗᑎᑦ.
     
  9. ᐊᐅᓚᐅᑎᓅᖅᑐᓂᑦ ᑭᕕᑦᑎᔾᔪᑎᓄᑦ ᐊᓯᖏᓐᓄᓪᓗ ᓱᓇᒃᑯᑖᓄᑦ ᐊᑐᕐᓗᑎᑦ. ᐅᖁᒪᐃᓗᐊᖅᑲᑕ, ᐊᐅᓚᐅᑎᓅᖅᑐᓂ ᐊᑐᕐᓗᑎᑦ, ᓂᑦᑕᐅᑎᓂᑦ, ᑲᐃᓪᓗᐊᕈᑎᓂᑦ, ᑲᑭᐊᓕᓐᓂᑦ, ᐅᕙᓗ ᐊᓯᖏᓐᓂᑦ. ᐃᓕᓐᓂᐊᖅᑎᑕᐅᓚᐅᕐᓗᑎᑦ ᐱᒋᐊᓚᐅᓐᖏᓂᓐᓂᑦ ᑕᒪᒃᑯᓂᖓ.
     
  10. ᓱᓇᒃᑯᑖᑎᑦ ᖃᐅᔨᓴᖃᑦᑕᕐᓗᒋᑦ ᓴᓇᓗᒋᓪᓗ. ᓴᓇᕐᕈᑎ ᐊᑐᖅᑕᑎᑦ ᑕᐃᒪᐃᑦᑐᖅᓯᐅᑕᐅᓗᒋᑦ, ᐊᒻᒪ ᓴᓇᕐᕈᑏᑦ ᑲᒪᒋᑦᑎᐊᕐᓗᒋᑦ ᐊᑐᕇᕈᕕᒋᑦ ᒪᐅᖓᑐᐃᓐᓈᖏᓪᓗᒋᑦ. ᓴᓇᕐᕈᑏᑦ ᑲᒪᒋᑦᑎᐊᖅᑐᒋᑦ ᐃᖅᑲᓇᐃᔭᖅᑎᓂᑦ ᐊᓯᖏᓐᓂᑦ ᐱᔭᕆᐊᑐᓐᖏᓂᖅᓴᐅᔪᓐᓇᖅᑐᑦ ᑲᒪᒋᓯᒪᑦᑎᐊᑐᒋᑦ ᓱᕋᓐᓂᕈᔫᓐᖏᓪᓗᑎᑦ, ᐅᕙᓗ ᐃᖅᑲᓇᐃᔭᖅᑐᔅᓯᐅᑕᑎᓐᓇᒋᑦ.
     
  11. ᓯᓂᓪᓗᑎᑦ. ᐅᓪᓗᒃ ᓈᑦᑎᓪᓗᒍ, ᐅᓐᓄᐊᒃᑯᑦ ᓯᓂᑦᑎᐊᖃᑦᑕᖅᑐᓂᑦ ᐊᒧᒃᓯᕆᔭᓐᓇᖏᓐᓂᖅᓴᖅ. ᑕᖃᓯᒪᓗᓂ ᑎᒥᒧᑦ ᓴᓐᖐᓪᓕᓯᒪᓇᕐᖓᑦ ᑕᐃᒫᓪᓗ ᐊᒧᒃᓯᕆᒋᐊᑭᓐᓇᓂᖅᓴᐅᓪᓗᓂ. ᐃᖅᑲᓇᐃᔮᓐᓂᑦ ᐱᓕᕆᐊᔅᓴᓐᓂᑦ ᑲᒪᔪᓐᓇᓂᖅᓴᐅᖃᑦᑕᕐᓗᑎᓪᓗ ᐅᓪᓗᑕᒫᖅ.
     
  12. ᖃᐅᔨᒃᑲᐃᖃᑦᑕᕆ, ᖃᐅᔨᒃᑲᐃᖃᑦᑕᕆᑦ, ᖃᐅᔨᒃᑲᐃᖃᑦᑕᕆᑦ − ᑕᕙᑦᑕᐅᑎᒋᒃ. ᐃᖅᑲᓇᐃᔮᕆᒐᕕᐅᒃ ᐃᓕᓐᓂᑐᐊᖑᓐᖏᑦᑐᖅ ᐊᓯᑎᓪᓗ ᐅᔾᔨᖅᑐᖃᑦᑕᕐᓗᒋᑦ ᖃᓄᐃᑦᑐᖃᖁᓇᒍ. ᖃᐅᔨᒍᕕᑦ ᐊᓯᓐᓂ ᐃᖅᑲᓇᐃᔭᖃᑎᓐᓂᑦ ᑕᖃᑎᓗᐊᓕᖅᑐᓂᑦ ᐋᓐᓂᑐᐃᓐᓇᕆᐊᖃᓕᕐᓂᖏᓐᓂᒃ, ᐅᖃᖃᑎᒋᒃᑭᑦ ᐊᖏᔪᖅᑳᑎᓪᓗ ᖃᓄᖅᑑᖃᑎᒋᓗᒋᑦ ᖃᓄᑲᓐᓂᖅ ᐊᔅᓱᕈᕐᓇᖏᓂᖅᓴᐅᔪᓐᓇᕐᒪᖔᖅ ᐱᓕᕆᐊᔅᓴᖅ. ᐃᓕᓐᓂᑦ ᖃᐅᔨᒍᕕᑦ ᐊᒧᒃᓯᕆᓕᕐᓂᓐᓂᑦ ᐋᓐᓂᖅᓯᒪᓱᒋᓕᕈᕕᑦ, ᖃᐅᔨᒃᑲᐃᒋᑦ ᑕᕙᑦᑕᐅᑎᒋ ᐊᖏᔪᖅᑳᓐᓂᑦ.
     
  13. ᐃᖅᑲᓇᐃᔭᕆᐊᑲᓂᕐᓂᖅ ᐊᒻᒪ ᒪᒥᐸᓪᓕᐊᓯᓐᓈᕐᓗᑎᑦ ᐃᖅᑲᓇᐃᔭᖅᓯᓈᑦ. ᐋᓐᓂᖅᓯᒪᒍᕕᑦ, ᓄᖅᑲᖓᑐᐃᓐᓇᕐᓂᖅ ᐊᑲᐅᓛᖑᖏᒻᒪᑦ. ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᖃᐅᔨᒋᐊᕐᕕᒋᒃᑭᑦ ᐊᒻᒪ ᐊᖏᔪᖅᑳᑦ ᐃᖅᑲᓇᐃᔮᔅᓴᓂᑦ ᐊᓯᖏᓐᓂᒃ ᑲᒪᖔᕈᓐᓇᕐᒪᖔᖅ ᒪᒥᒐᓱᐊᕐᓂᓐᓂᑦ.
ᐃᖅᑲᓇᐃᔭᖅᑎᖁᑎᓕᓐᓄᑦ:
  1. ᖃᓄᐃᒍᑕᐅᔪᓐᓇᖅᑐᑦ ᐃᓕᓴᕆᓗᒋᑦ. ᐃᖅᑲᓇᐃᔭᖅᑎᖁᑎᕕᑦ ᐱᓕᕆᐊᔅᓴᖏᑦ ᑭᓲᓂᖏᑦ ᖃᐅᔨᒪᒋᐊᒃᑭᑦ ᐋᓐᓂᕈᑕᐅᑐᐃᓐᓇᕆᐊᓖᑦ ᑐᐃᒃᑯᑦ, ᑐᓄᒃᑯᑦ, ᐅᕙᓗᑦ ᐊᒧᒃᓯᕆᔾᔪᑕᐅᑐᐃᓐᓇᕆᐊᓖᑦ ᓇᐅᒃᑯᑐᐃᓐᓇᖅ ᑎᒥᒃᑯᑦ. ᐃᖅᑲᓇᐃᔭᕐᕕᐅᑉ ᐊᕙᑖ ᐊᓯᔾᔨᓱᕐᓗᒍ ᐅᕙᓗ ᐃᖅᑲᓇᐃᔭᖅᑎᓪᓗᒋᑦ ᐱᓕᕆᐊᔅᓴᖏᓐᓂᑦ ᐋᖅᑭᒋᐊᕆᓗᑎᑦ ᐊᓯᐊᒍᑦ ᐊᑲᐅᓈᓐᖏᑦᑐᒥᑦ ᑎᒥᒧᑦ ᐋᖅᑭᑦᑎᐊᖅᓯᒪᓇᓐᖏᑦᑐᒥᓪᓗ ᐱᓇᓱᐊᖁᓇᒋᑦ. ᐅᖁᒪᐃᑦᑑᑕᐃᑦ ᐊᑦᑎᓂᕐᓴᒦᑎᓪᓗᒋᑦ ᑎᑭᑦᑎᓇᓱᐊᕆᐊᑐᒐᔭᓐᖏᒻᒪᑕ. ᐃᓕᔾᔨᕕᖁᑎᑦᑎ ᐃᓗᑐᔫᔭᐃᕐᓯᒪᓗᒋᑦ ᐊᒻᒪ ᐊᑐᖅᑕᐅᒐᔪᓐᓂᖏᑦ ᑭᓱᑐᐃᓐᓇᐃᑦ ᐊᑐᐃᓐᓇᐅᑎᔾᔫᒥᓗᒋᑦ ᑭᓕᖓᓂ ᐃᓕᔾᔨᕕᐅᑉ.
     
  2. ᐃᖅᑲᓇᐃᔮᔅᓴᖏᑦ ᓇᓗᓇᐃᖅᑐᖅᓯᒪᑦᑎᐊᕐᓗᒋᑦ. ᓄᑖᓂᑦ ᐃᖅᑲᓇᐃᔭᖅᑎᑖᕈᕕᑦ, ᖃᐅᔨᒃᑲᖃᑦᑕᕐᓗᒋᑦ ᑯᕕᑦᑎᖃᑦᑕᕆᐊᖃᕐᒪᖔᖅ ᐅᕙᓗ ᓂᒪᔭᒋᐊᖃᖃᑦᑕᕋᔭᕐᒪᖔᖅ ᐃᖅᑲᓇᐃᔭᖅᑎᓪᓗᒍ.
     
  3. ᐊᐅᓚᑎᓅᖅᑐᓂᑦ ᐃᖅᑲᓇᐃᔭᕈᑎᓂᑦ ᐊᑐᐃᓐᓇᐅᑎᑦᑎᓪᓗᑎᑦ, ᑭᓯᐊᓂ ᐃᓕᓐᓂᐊᖅᑎᑦᑎᖃᑦᑕᕐᓗᑎᑦ. ᐃᖅᑲᓇᐃᔭᖅᑎᖁᑎᑎᑦ ᐊᑐᕋᔅᓴᖃᑦᑎᐊᕋᓗᐊᕐᒪᖔᑕ ᐃᓱᒫᓗᒋᖃᑦᑕᒃᑭᑦ ᑎᒥᒧᑦ ᐊᔅᓱᕈᕐᓇᓗᐊᖅᑐᓂᑦ ᐱᓕᕆᐊᔅᓴᖃᕋᐃᑉᐸᑕ. ᐊᐅᓚᐅᑎᓖᓐᓅᖅᑐᑦ ᑲᐃᓪᓗᐊᕈᑏᑦ, ᐊᐅᓚᐅᑎᖃᓐᖏᑦᑐᑦ ᑲᐃᓪᓗᐊᕈᑏᑦ, ᑲᑭᐊᓕᓐᓄᑦ, ᐊᐅᓚᑎᓖᑦ ᑭᕕᔅᓯᑏᑦ ᐅᕙᓗ ᐅᓯᑲᖅᑕᐅᑏᑦ ᑕᒪᒃᑯᐊ ᐃᖅᑲᓇᐃᔭᖅᑎᓄᑦ ᐊᑐᖅᑕᐅᔪᓐᓇᖅᑐᑦ ᐱᔭᕆᐊᑭᓪᓕᕈᑕᐅᔪᓐᓇᖅᑐᑦ ᐅᖁᒪᐃᑦᑐᓕᕆᑎᓪᓗᒋᑦ. ᑭᓯᐊᓂ ᑕᒪᒃᑯᓂᖓ ᐊᑐᕆᐊᖃᖃᑦᑕᖅᑎᓪᓗᒋᑦ ᐃᓕᓐᓂᐊᖅᑎᑕᐅᓯᒪᑦᑎᐊᕆᐊᓖᑦ.
     
  4. ᐊᑦᑕᕐᓇᖅᑕᐃᓕᒪᓂᕐᒦᑎᑦᑎᓂᖅ. ᐃᖅᑲᓇᐃᔭᖅᑎᑦᑎ ᐅᖁᒪᐃᑦᑐᓕᕆᑎᖃᑦᑕᖏᓪᓗᒋᑦ ᑭᕕᔅᓯᒋᐊᖃᖃᑕ ᐊᔾᔭᖅᓯᒪᒋᐊᖃᖃᑕᓗ ᐅᖁᒪᐃᓐᓂᓖᑦ 50 ᐸᐅᓐ ᐅᖓᑖᓄᑦ. ᑭᕕᔅᓯᑎᓂᑦ ᐊᑐᖔᖃᑦᑕᖁᓗᒋᑦ.
     
  5. ᐋᖅᑭᔅᓱᐃᓯᒪᔪᓐᓇᖅᑐᑎᑦ ᓄᖅᑲᖓᑲᐃᓐᓇᖃᑦᑕᓇᕐᒥᑦ ᐅᓪᓘ ᐃᓗᐊᓂ. ᐃᖅᑲᓇᐃᔭᖅᑎᑦᑎ ᓄᖃᖓᑲᐃᓐᓇᒐᓚᑦᑎᖃᑦᑕᕈᕕᒋ ᐅᓪᓗᓗᑦᑖᒥᑦ ᐃᖅᑲᓇᐃᔭᕐᓇᐅᑎᓪᓗᒍ, ᑕᐃᒪᐃᑉᐸᑕ ᑕᖃᒪᓐᖏᓂᖅᓴᐅᖃᑦᑕᕈᓐᓇᖅᑐᑦ ᐊᒻᒪ ᐊᒧᒃᓯᕆᓂᐅᓴᓐᖏᓂᖅᓴᐅᓗᑎᒃ, ᐊᒪ ᐃᖅᑲᓇᐃᔮᕆᒋᐊᓕᖏᓐᓂᒃ ᐱᔭᕇᖅᓯᓯᒪᖃᑦᑕᓂᖅᓴᐅᓗᑎᒃ.
     
  6. ᖃᐅᔨᒃᑲᐃᓴᕋᐃᖃᑦᑕᖁᓗᒋᑦ. ᖃᐅᔨᒃᑲᐃᑦᑕᐅᑎᒋᖃᑦᑕᑎᓪᓗᒋᑦ ᐃᖅᑲᓇᐃᔭᖅᑎᓪᓗᒋᑦ ᐊᒧᒃᓯᕆᓂᕐᒧᑦ ᐋᓐᓂᐊᖅᑐᖃᑎᓪᓗᒍ ᐃᖅᑲᓇᐃᔮᔅᓴᖓᓂ ᐋᖅᑭᒋᐊᕆᔪᓐᓇᖅᑐᓯᒃ ᐋᓐᓂᖅᓯᒪᔭᖏᑦ ᐱᓗᐊᓕᓚᐅᓐᖏᓐᓂᖓᓂᒃ ᐅᕙᓗ ᐊᕗᖓᒃᑰᔨᓯᒪᓂᐊᓐᖏᒻᒪᑦ.
     
  7. ᐋᖅᑭᔅᓱᐃᓯᒪᓗᑎᑦ ᐃᖅᑲᓇᐃᔭᖅᑎᑦᑎ ᐅᑎᕈᓐᓇᕐᕕᖃᑦᑎᑕᐅᖁᓪᓗᒋᑦᐃᖅᑲᓇᐃᔭᑦᑎᑦᑎ ᐊᑐᐃᓐᓇᖃᕐᕕᒋᒍᕕᒋᑦ ᐊᓯᔾᔨᖅᓯᒪᓗᒋᑦ ᐱᓕᕆᐊᔅᓴᖏᑦ ᐃᖅᑲᓇᐃᔮᖓᑕ ᐅᕙᓗ ᐊᓯᐊᓂᖔᖅ ᐃᖅᑲᓇᐃᔮᔅᓴᒥᑦ ᐊᑐᐃᓐᓇᐅᕕᒋᓗᒋᑦ, ᐊᒻᒪ ᐃᑲᔪᕐᓗᒋᑦ ᒪᒥᑉᐸᓪᓕᐊᓂᖏᓐᓂᑦ. ᐃᑲᔪᖅᑕᐅᒋᐊᒃᑲᓐᓂᕈᒪᒍᕕᑦ ᑕᒪᑐᒪ ᒥᔅᓵᓄᑦ ᐅᖄᓚᔪᓐᓇᖅᑐᑎᑦ 1-800-661-0792 ᐅᖃᖃᑎᖃᕈᒪᓗᑎᑦ ᐃᖅᑲᓇᐃᔭᕆᐊᒃᑲᓐᓂᖅᑐᓕᕆᔨᒥᑦ.
ᐃᖅᑲᓇᐃᔭᕐᕕᓐᓂᑦ ᐋᓂᐸᑦᑐᓂᑦ ᕿᒥᕐᕈᓯᒪᔭᑦᑎᓐᓂᑦ ᐱᕐᕈᓗᐊᕿᑦᑕᐃᓕᓂᕐᒥᑦ ᖃᕋᓴᐅᔭᒃᑰᖅᑐᒥᑦ, ᖃᐅᔨᓯᒪᓕᖅᑐᒍᑦ ᐊᒧᒃᓯᕆᖏᒍᓐᓇᖅᑐᓂᑦ. ᑐᑭᓯᒋᐊᒃᑲᓐᓂᕈᒪᓐᓂᕈᕕᑦ ᖃᕋᓴᐅᔭᒃᑯᑦ ᑕᑯᔪᓐᓇᖅᑕᑎᑦ ᐅᕘᓇ wscc.nt.ca ᐅᕙᓗ wscc.nu.ca for our ᐱᓕᕆᔾᔪᓯᕗᑦ, ᐊᑦᑕᕐᓇᖅᑕᐃᓕᒪᓂᕐᒧᑦ ᑐᑭᓯᒋᐊᕈᑏᑦ, ᖃᐅᔨᒪᔾᔪᑏᑦ ᐊᑕᕐᓇᖅᑐᓂᑦ, ᐊᒻᒪ ᐊᑭᓐᓇᕐᒥᐅᑕᓂᑦ.
ᐃᖅᑲᓇᐃᔭᖅᑎᑦᑎᔩᑦ ᐊᑭᓕᖅᓱᐃᓂᖏᑦ

ᐊᑭᓖᕙᑉᐱᑦ ᐊᐅᑦᑕᔫᓄᑦ ᐊᑭᓕᔅᓴᓂᐅᑎᓐᓄᑦ?

ᐃᖅᑲᓇᐃᔭᖅᑎᑦᑎᔨᓄᑦ, ᐊᑭᓖᑎᓪᓗᓯ ᖃᐅᔨᒪᒋᔅᓯ ᐆᒥᖓ: ᐱᕋᔭᑕᐅᖁᓇᓯ, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᑦ ᐊᒻᒪ ᓇᓪᓕᐅᒃᑯᒫᓂᑦ ᖃᐅᔨᓴᖅᑏᑦ ᐱᓯᒪᑦᑎᖃᑦᑕᔾᔮᔪᓐᓃᕐᖓᑕ ᐊᑭᓕᐅᑎᓯ ᓈᓴᐅᑎᖏᓐᓂᑦ. ᐅᕗᓐᖓᕐᓗᑎᑦ WSCC Connect ᐱᔭᕆᐊᑭᓐᓂᖅᓴᒃᑯᑦ ᐊᒻᒪ ᐃᓱᒫᓗᓇᓐᖏᑦᑐᒃᑯᑦ ᐊᑭᓕᐅᑎᖃᖃᑦᑕᖁᓪᓗᓯ ᐊᑭᓕᔅᓴᓯᓐᓂᒃ. ᐊᐅᑦᑕᔫᑦ ᐊᑭᓕᔅᓴᓂᐅᑏᑦ ᑕᒪᒃᑭᑦ ᐊᑐᖅᑕᐅᔪᓐᓇᖅᑐᑦ ᑕᕘᓇ.

ᐊᐅᑦᑕᔫᒃᑯᑦ ᐊᑭᓖᔪᒪᒍᕕᑦ ᐅᕘᓇ WSCC Connect:
  1. ᐅᕗᓐᖓᕐᓗᑎᑦ wscc.nt.ca or wscc.nu.ca.
     
  2. ᓇᕿᓪᓗᒍ WSCC Connect.
     
  3. ᓇᕿᓪᓗᒍ Make a Payment.
ᖃᕋᓴᐅᔭᒃᑯᑦ ᐊᔪᕈᕕᑦ ᐊᐅᑦᑕᔫᒧᑦ ᐊᑭᓖᔪᒪᒍᕕᑦ ᐅᖄᓚᔪᓐᓇᖅᑐᑎᑦ ᐅᕗᖓ 1-800-661-0792 ᐊᑭᓕᐅᑎᓕᕆᔨᕗᑦ ᐅᖃᖃᑎᒋᔪᒪᓗᒍ. ᒪᑐᐃᖓᖃᑦᑕᖅᑐᒍᑦ ᓇᒡᒐᔾᔭᐅᒥᑦ ᑕᓪᓕᒥᕐᒧᑦ 8:30ᒥᑦ ᐅᓪᓛᒃᑯᑦ 5:00ᒧᑦ ᐅᓐᓄᓴᒃᑯᑦ ᕿᑎᕐᒥᐅᑦ ᓯᕿᓐᖑᔭᖓ ᐊᑐᕐᓗᒍ.

ᑕᒫᓃᑉᐳᒍᑦ ᐊᑭᓕᔅᓴᓐᓂᑦ ᑭᖑᕙᓗᐊᖁᓇᑎᑦ ᐊᑭᓕᔅᓴᓂᒃᑲᓐᓂᑐᐃᓐᓇᖁᓇᑎ. ᐅᕗᖓ ᖃᐅᔨᒋᐊᕆᑦ ᐅᓪᓗᒥ WSCC Connect.
ᐊᐱᖅᑯᑏᑦ?

ᐊᐱᖅᑯᑎᖃᕈᕕᑦ ᐅᕙᓘᓃᑦ ᐅᖃᐅᓯᒃᓴᓂᒃ ᐅᕙᑉᑎᖕᓄᑦ ᐱᔾᔪᑎᓕᖕᒥᑦ WSCC-ᑯᓐᓄᑦ ᐊᑦᑕᑕᕐᓂᖅ-ᒥᒃ, ᖃᕆᑕᐅᔭᒃᑯᑦ ᑎᑎᕋᕐᕕᒋᓗᑕ ᐅᕗᖓ [email protected]-ᒧᑦ ᐅᕙᓘᓃᑦ [email protected]-ᒧᑦ.
wscc.nt.ca   /  1.800.661.0792   *   wscc.nu.ca  /  1.877.404.4407