ᔮᓐᓄᐊᓕ 2016
ᖁᐊᐃᑦᑐᑦ, ᓈᑦᑐᑦ, ᐊᒻᒪ ᑲᑕᒃᑐᑦ

ᐅᑭᐅᖑᔪᖅ ᓄᖅᑲᖅᑎᑦᑐᓐᓇᖅᑕᓯ ᐱᕐᕈᓗᙱᓐᓂᖅᓴᐅᓗᓯ

ᐅᑭᐅᖅᑕᖅᑐᒥᐅᑕᐅᑎᓪᓗᑕ, ᓱᖏᐅᙵᒐᑦᑕ ᐃᓅᔭᕆᐊᒃᓴᖅ ᓂᓚᖃᕐᓂᕐᒥᒃ ᐊᒻᒪ ᐊᐳᑎᖃᕐᓂᕐᒥᒃ, ᐃᒪᓐᓇᐅᒐᔪᒃᖢᓂᓗ, ᐅᑭᐅᖑᑎᓪᓗᒍ ᓂᒡᓚᓱᒐᔪᒃᐳᖅ ᑖᕋᔪᒃᖢᓂᓗ. ᐃᒪᓐᓇᐅᙱᖦᖢᓂᓗ, ᓱᖏᐅᙵᓂᕆᔭᕗᑦ ᓂᒡᓚᓱᒃᑐᒧᑦ ᑖᖅᑐᒧᓪᓗ ᖁᐊᐃᑦᑐᑦ, ᓈᑦᑐᑦ ᑲᑕᒃᑐᑦ ᐅᓄᕈᓐᓃᖅᐹᓪᓕᖅᐸᙱᒻᒪᑕ.

ᖃᐅᔨᓴᖅᑕᐅᓯᒪᔪᒃᑯᑦ ᓇᓗᓇᐃᖅᑕᐅᓯᒪᒐᓗᐊᖅᑎᓪᓗᒍ ᐅᑭᐅᖑᓕᕌᖓᑦ ᐱᕐᕈᓗᒃᐸᒃᑐᑦ ᐅᓄᕐᓂᖅᓴᐅᓲᖑᓂᖏᓐᓂᒃ, ᖁᐊᐃᑦᑐᓂᒃ, ᓈᑦᑐᓂᒃ, ᐊᒻᒪ ᑲᑕᒃᑐᓂᒃ ᐱᕐᕈᓗᑐᐃᓐᓇᓲᖑᙱᒻᒪᑕ ᐅᑭᐅᖑᓂᖓ ᐱᔾᔪᑕᐅᓪᓗᓂ ᓲᕐᓗ ᐱᓱᒡᕖᑦ ᓂᓚᒃᓯᒪᓂᖏᓐᓄᑦ ᐊᐱᓯᒪᓂᖏᓐᓄᓪᓘᓐᓃᑦ. ᐱᕐᕈᓗᓲᖑᖕᒥᖕᒪᑕ, ᐋᓐᓂᕋᔪᖕᓂᖅᐹᖑᓪᓗᑎᒡᓗ, ᐃᖅᑲᓇᐃᔭᕐᕕᖕᒥᓂᒃ.

ᐅᕝᕙᐅᑯᐊ 2015-ᒥ ᐃᓚᖏᑦ ᖃᐅᔨᔭᐅᖃᑦᑕᖅᓯᒪᔪᑦ ᐃᓱᒪᒃᓴᖅᓯᐅᕈᑎᒋᔪᓐᓇᖅᑕᓯ:
  • 2015-ᒥ, ᐱᓇᔫᑕᐅᔪᑦ ᑕᓪᓕᒪᐅᒃᐸᑕ ᐊᑕᐅᓯᖅ ᐱᓇᔪᓚᐅᖅᐳᖅ ᖁᐊᐃᓐᓂᕐᓗᓂ, ᓈᓐᓂᕐᓗᓂ, ᐅᕝᕙᓘᓐᓃᑦ ᑲᑕᖕᓂᕐᓗᓂ (20.7%-ᒦᓚᐅᖅᑐᑦ).
  • ᐃᒪᓐᓇᐅᒐᔪᒃᖢᓂ, ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᐱᕙᒃᖢᑎᒃ 1.92 ᖁᐊᐃᑦᑐᓂᒃ, ᓈᑦᑐᓂᒃ, ᐊᒻᒪ ᑲᑕᒃᑐᓂᒃ ᐱᓇᔪᒃᑕᐅᔪᓂᒃ ᖃᐅᑕᒫᑦ.
  • ᑎᒥᒃᑯᑦ ᐋᓐᓂᕐᓂᖅᐹᖑᖃᑦᑕᖅᑐᑦ ᖁᐊᐃᑦᑐᓂᒃ, ᓈᑦᑐᓂᒃ, ᐊᒻᒪ ᑲᑕᒃᑐᓂᒃ? ᓰᖅᑯᖏᑦ.
  • ᐅᑐᐱᕆᐅᑎᓪᓗᒍ ᐅᓄᕐᓂᖅᐹᖑᓚᐅᖅᐳᑦ ᖁᐊᐃᑦᑐᑦ, ᓈᑦᑐᑦ, ᐊᒻᒪ ᑲᑕᒃᑐᑦ 2015-ᒥ.
  • ᐊᕐᕌᒍᑦ ᑕᓪᓕᒪᑦ ᐊᓂᒍᖅᓯᒪᓕᖅᑐᓂᒃ, ᖁᐊᐃᑦᑐᑦ, ᓈᑦᑐᑦ, ᐊᒻᒪ ᑲᑕᒃᑐᑦ ᐱᓇᔪᓚᐅᖅᑐᑦ ᐊᑭᖃᖅᑎᒋᓚᐅᖅᐳᖅ $5,785.95-ᒥᒃ.
  • ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᐊᑭᓖᓚᐅᖅᐳᑦ $4,866,870-ᐸᓗᖕᓂ 798-ᓄᑦ ᖁᐊᐃᓚᐅᖅᑐᓄᑦ, ᓈᖦᖢᑎᒃ ᐋᓐᓂᓚᐅᖅᑐᓄᑦ, ᐊᒻᒪ ᑲᑕᓚᐅᖅᑐᓄᑦ 2015-ᒥ.
ᖁᐊᐃᑦᑐᑦ, ᓈᑦᑐᑦ, ᐊᒻᒪ ᑲᑕᒃᑐᑦ ᐊᑦᑕᕐᓇᖅᑐᒻᒪᕆᐊᓗᐃᑦ ᐊᑭᑐᓪᓗᑎᒡᓗ, ᑭᓯᐊᓂ ᓄᖅᑲᐅᑎᒋᔭᕆᐊᖃᙱᑕᑦ ᖃᐅᑕᒫᑦ ᐱᓕᕆᐊᕆᕙᒃᑕᕐᓄᑦ. ᐱᒻᒪᕆᐅᖕᒪᑦ ᖃᐅᔨᒪᔭᕆᐊᒃᓴᖅ ᖁᐊᐃᑦᑐᑦ, ᓈᑦᑐᑦ, ᐊᒻᒪ ᑲᑕᒃᑐᑦ ᓄᖅᑲᖅᑎᒐᒃᓴᐅᓂᖏᓐᓂᒃ. ᑐᐊᕕᓗᙱᓪᓗᑎᑦ, ᐱᓱᒡᕕᒋᔭᐃᑦ ᖃᐅᔨᒪᑦᑎᐊᕆᐊᕐᓗᒍ, ᓴᓇᔪᖅᓯᐅᑏᖕᓂ ᑲᒫᓗᒃᓯᒪᓗᑎᑦ, ᐃᒡᓗᒥᒡᓗ ᓴᓗᒻᒪᖅᓴᐃᑎᓪᓗᑎᑦ ᐅᔾᔨᖅᓱᑦᑎᐊᖅᐸᒡᓗᑎᑦ ᓴᓇᕝᕕᖕᓂ ᐊᒻᒪ ᐊᐃᓯᒪᓗᑎᑦ, ᖁᐊᐃᓐᓇᖅᑐᑦ, ᓈᓐᓇᖅᑐᑦ, ᐊᒻᒪ ᑲᑕᖕᓇᖅᑐᑦ ᐱᑕᖃᙱᓐᓂᖅᓴᐅᔪᓐᓇᖅᑐᑦ.

ᖁᐊᐃᑦᑐᑦ, ᓈᑦᑐᑦ, ᑲᑕᒃᑐᑦ... ᖃᓄᖅ ᐊᔾᔨᒌᙱᑎᒋᕙᑦ?

ᖁᐊᐃᑦᑐᖅ ᐱᓱᒃᑐᖅ ᐃᓯᒐᖏᑦ ᓯᐊᕐᕆᑉᐸᑕ ᐅᕐᕈᓇᔭᕐᒪᑦ. ᖁᐊᐃᓲᖑᕗᒍᑦ ᐃᓯᒐᕗᑦ ᖁᐊᐃᒃᑳᖓᑕ ᐱᓱᒡᕕᒋᔭᐃᑦ ᖁᐊᐃᑦᑖᕐᓇᕌᖓᑦ.

ᐊᑖᓂ ᑎᑎᕋᖅᓯᒪᔪᑦ ᓇᓕᐊᑐᐃᓐᓇᖅ ᐊᑕᖏᕐᓗᒋᓪᓘᓐᓃᑦ ᖁᐊᐃᔾᔪᑎᒋᔪᓐᓇᖅᑕᕗᑦ:
  • ᓯᓚᓗᐊᓪᓚᓚᐅᖅᑎᓪᓗᒍ (ᓂᓚᒃᑳᖓᑦ, ᒪᖁᒃᑳᖓᑦ, ᐅᕝᕙᓘᓐᓃᑦ ᖃᓐᓂᕋᖓᑦ);
  • ᐅᓯᕋᖅᑐᖃᕌᖓᑦ;
  • ᐃᓯᒐᐅᔭᕐᓘᑎᓂᒃ ᐊᑐᕌᖓᑦᑕ, ᐃᓚᒋᔭᐅᓪᓗᑎᒃ ᐃᓯᒐᐅᔭᕐᓘᑎᑦ ᐊᓗᖏᒃ ᐳᔾᔪᖅᓯᒪᔪᑦ;
  • ᓄᒃᑕᖅᑎᓪᓗᑕ/ᓴᓗᐊᒪᔪᒃᑰᕌᓪᓚᓚᐅᖅᖢᑕ ᓴᕋᑦᑐᒧᐊᕌᖓᑦᑕ;
  • ᐱᓱᒡᕖᑦ ᒪᓴᐅᒃᐸᑕ, ᐅᖅᓱᐊᕿᒃᐸᑕ, ᐅᕝᕙᓘᓐᓃᑦ ᓱᕈᖅᓯᒪᒃᐸᑕ;
  • ᓇᑎᕐᓘᑎᒃᑯᑦ ᐱᓱᒃᑯᑦᑕ; ᐊᒻᒪ
  • ᓇᑎᕌᓗᐃᑦ ᐅᕝᕙᓘᓐᓃᑦ ᐊᓗᕐᓗᐃᔭᐅᑎᑦ ᐋᖅᑭᑦᑎᐊᖅᓯᒪᙱᒃᑳᖓᑕ.
ᓈᑦᑐᑦ ᐃᓯᒐᖏᑦ ᓇᒃᑎᒃᑳᖓᑕ, ᑭᓱᒧᒃᑭᐊᖅ, ᓈᑦᑐᓐᓇᖅᐳᒍᑦ ᐃᓯᒐᕗᑦ ᑭᓱᒧᒃᑭᐊᖅ ᓇᑦᑎᒃᑳᖓᑦ, ᓇᖏᕈᓐᓃᕐᓗᑕ ᐹᓪᓚᒡᓗᑕᓗ.

ᒪᑯᓄᖓ ᓈᑦᑐᓐᓇᖅᑐᒍᑦ:
  • ᑕᓚᕖᓴᐃᑦ ᐅᖃᓘᑎᓪᓗ ᓴᕕᒐᐅᔭᖏᓐᓄᑦ;
  • ᐊᐳᒻᒧᑦ ᐅᕝᕙᓘᓐᓃᑦ ᓂᓚᒐᓛᒃᓯᒪᔪᒧᑦ;
  • ᐱᓱᒡᕕᒃ ᓇᓕᒧᒌᙱᑉᐸᑦ, ᒪᔪᕋᐅᑎᑦ, ᐱᓱᒡᕖᑦ, ᐅᕝᕙᓘᓐᓃᑦ ᐃᓯᕆᐊᕐᕖᑦ;
  • ᓇᑎᕌᓗᐃᑦ ᐊᓗᕐᓗᐃᔭᐅᑏᓪᓘᓐᓃᑦ ᐃᒧᕈᓘᔭᖅᓯᒪᒃᐸᑕ;
  • ᓇᑎᕐᒥᐅᑕᖃᖅᐸᑦ (ᕿᔪᖕᒥ, ᓱᓪᓗᓕᖕᒥ, ᐊᓐᓄᕌᓂᒃ, ᐅᖃᓕᒫᒐᕐᓂᒃ, ᓇᑎᕐᒧᑦ ᐅᐊᓴᕐᕕᖕᓂ, ᐸᐃᑉᐹᓂᒃ, ᓴᓇᕐᕈᑎᓂᒃ); ᐊᒻᒪ
  • ᓴᓇᕝᕕᖕᒥ ᐊᒧᔭᖅᑐᐃᑦ ᐃᖅᐸᖓᑎᓪᓗᒋᑦ.
ᑲᑕᒃᑐᖅ ᓇᓃᓚᐅᕋᓗᐊᕐᓗᓂ ᑲᑕᒃᐸᑦ ᑲᑕᓲᖑᕗᒍᑦ, ᐃᓄᒃ ᑲᑕᒃᑐᖅ ᒪᓂᖅᑲᒧᑦ ᑐᒃᑯᓂ ᑲᑕᒐᔭᖅᐳᖅ. ᑲᑕᒍᓐᓇᖅᐳᒍᑦ ᑐᖕᒪᕐᕕᒋᔭᖅ ᑐᙵᕕᐅᔪᓐᓃᖅᐸᑦ ᖃᓄᒥᐊᖅ ᐳᖅᑐᔪᒦᒃᑲᓗᐊᖅᐸᑦ, ᖁᓛᓂ ᑎᑎᕋᖅᓯᒪᔪᑦ ᑕᑯᓗᒋᑦ, ᖁᐊᐃᖦᖢᓂ ᓈᖦᖢᓂᓗ ᐅᕐᕈᔾᔪᑕᐅᒐᔪᖕᒪᑕ. ᐃᓄᒃ ᑲᑕᒃᐸᑦ ᖃᓄᑐᐃᓐᓇᖅ ᐳᖅᑐᑎᒋᔪᒥᒃ ᑐᒃᑯᓂ ᑐᕝᕕᒋᔭᒥᓄᑦ ᐋᓐᓂᕐᔪᐊᕈᓐᓇᕐᒪᑦ.

ᑲᑕᓲᖑᕗᒍᑦ/ᐅᕐᕈᓲᖑᕗᒍᑦ ᐃᒪᐃᑦᑐᒃᑰᕌᖓᑦᑕ:
  • ᐃᓗᑐᔪᕐᒧᑦ ᑐᑎᑳᓪᓚᒃᑳᖓᑦᑕ;
  • ᐅᔾᔨᖅᓱᑦᑎᐊᙱᖦᖢᑕ ᐊᖅᑲᖅᑎᕆᐊᕌᖓᑦᑕ ᓇᑭᑐᐃᓐᓇᖅ ᑐᙵᕕᖕᒥᓪᓘᓐᓃᑦ;
  • ᒪᔪᕋᐅᑎᒥᒃ ᐃᑯᕐᕋᕐᒥᒡᓘᓐᓃᑦ ᑐᙵᑦᑎᐊᙱᑦᑐᒥᒃ ᒪᔪᕋᕋᓱᒃᑳᖓᑦᑕ; ᐅᕝᕙᓘᓐᓃᑦ
  • ᒪᔪᕋᐅᑎᒃᑯᑦ ᑐᙵᕕᒃᑯᓪᓘᓐᓃᑦ ᐃᓄᖅᑕᑦᑎᓐᓂ ᑎᒍᓯᓇᓱᒃᑎᓪᓗᑕ.
ᐱᕐᕈᓗᙱᑦᑐᓐᓇᕋᓗᐊᖅᖢᑕ? ᐄᑦᑎᐊᒻᒪᕆᒃ.

ᑐᓴᒐᒃᓴᑦᑎᐊᕙᒃᑕᖃᖅᑐᖅ ᐃᒪᓐᓇ: ᓄᓇᕐᔪᐊᕐᒥ ᓱᓕᔪᓂᒃ ᐅᖃᖅᑐᖃᖃᑦᑕᖅᓯᒪᖕᒪᑦ ᐱᕐᕈᓗᙱᑦᑐᓐᓇᕐᓂᑦᑎᓐᓂᒃ ᖁᐊᐃᓪᓗᑕ, ᓈᓗᑕ, ᐊᒻᒪ ᑲᑕᒡᓗᑕ. ᐱᖓᓱᓄᑦ ᓇᐃᒡᓕᒋᐊᖅᖢᑎᒍᑦ ᐃᓕᔅᓯᓐᓄᑦ ᑐᓴᖅᑕᐅᔪᒃᓴᙳᖅᑎᑕᕗᑦ:
  1. ᑐᐊᕕᙱᓪᓗᑎᑦ. ᖃᓄᕈᓘᔮᓗᒃ ᐱᓕᕆᔭᕆᐊᖃᕋᓗᐊᕈᕕᑦ, ᑐᐊᕕᙱᓪᓗᑎᑦ. ᐱᕙᒌᔭᖅᐸᒡᓗᑎᑦ ᐊᔪᕐᓇᙱᑐᐊᕌᖓᑦ. ᕿᓚᒥᒻᒪᕆᐊᓗᒃ ᐱᕙᒌᔭᖅᐸᒌᕐᓗᓂ ᓄᖅᑲᕈᑎᒋᔪᓐᓇᖅᐸᕗᑦ ᐅᓪᓗᕐᓂᒃ, ᐱᓇᓱᐊᕈᓯᕐᓂᒃ, ᐅᕝᕙᓘᓐᓃᑦ ᑕᖅᑭᕐᓂᒃ ᖃᓄᐃᑦᑐᓐᓃᕋᓱᔅᓲᔭᕐᓂᕐᒧᑦ, ᐃᖅᑲᓇᐃᔭᓚᐅᕋᓗᐊᕐᓗᑎᓪᓗ ᐃᖅᑲᓇᐃᔭᕆᐊᖃᕈᓐᓃᑳᓪᓚᖕᓂᕈᕕᑦ ᐋᓐᓂᓚᐅᖅᑎᓪᓗᑎᑦ.
     
  2. ᐅᔾᔨᖅᓱᑦᑎᐊᕐᓗᑎᑦ. ᐃᒪᓐᓇᐅᒐᔪᓗᐊᕐᒪᑦ, ᕿᓚᒥᒻᒪᕆᐊᓗᒃ ᐅᔾᔨᖅᓱᑦᑎᐊᙱᑐᐊᕈᑦᑕ ᐅᓚᕕᑕᐅᓚᐅᑲᒃᑯᑦᑕᓘᓐᓃᑦ ᐱᕐᕈᓗᑲᐅᑦᑐᕈᓐᓇᕋᑦᑕ. ᐅᔾᔨᖅᓱᑦᑎᐊᖅᐸᒡᓗᑕ ᐊᕙᑎᑦᑎᓐᓃᑦᑐᓂᒃ ᖃᖓᓕᒫᖅ, ᖃᐅᒻᒪᖅᑯᑎᖃᑦᑎᐊᕐᓗᑕᓗ: ᑕᐅᑐᖕᓂᖅ ᐱᒻᒪᕆᐅᖕᒪᑦ. ᖃᐅᔨᒪᒋᐊᖅᐸᒡᓗᑕᓗ ᓵᑦᑎᐊᑦᑎᓐᓃᑦᑐᑦ ᑕᓕᑕᐅᓯᒪᙱᒃᑲᓗᐊᕐᒪᖔᑕ ᑭᓱᑐᐃᓐᓇᓂᒃ ᐊᒡᔭᖅᓯᓕᕌᖓᑦᑕ.
     
  3. ᐃᒡᓗᒥᒃ ᓴᓗᒻᒪᖅᓴᐃᑎᓪᓗᑕ ᐊᔪᕈᓐᓃᖅᓴᖅᐸᒡᓗᑕ. ᐃᖅᑲᓇᐃᔭᕐᕕᒋᔭᖅ ᓴᓗᒪᒃᐸᑦ ᐊᒡᕕᐊᖅᑐᖃᙱᑉᐸᓪᓗ ᐊᑦᑕᕐᓇᙱᒻᒪᑦ ᐱᓕᕆᕝᕕᑦᑎᐊᕙᐅᓪᓗᓂᓗ. ᑭᓱᑐᐃᓐᓇᑦ ᐊᒡᕕᐊᖅᑐᑦ ᐱᓱᒡᕕᖕᓂ ᐊᒡᕖᖅᐸᒡᓗᒋᑦ, ᐊᒧᔭᖅᑐᐃᓪᓗ ᐱᖁᑎᖃᕐᕖᓪᓗ ᒪᑐᓯᒪᑎᑉᐸᒡᓗᒋᑦ ᓈᑦᑐᖃᖃᑦᑕᔾᔮᙱᒻᒪᑦ. ᐅᓯᕋᖅᑐᖃᕌᖓᑦ ᐃᕐᖐᓐᓇᖅ ᐊᓪᓚᖅᑎᖅᐸᒡᓗᒋᑦ, ᓴᓇᕝᕕᖃᕈᕕᓪᓗ ᖃᐅᓯᕋᔪᒡᓗᓂ ᖁᐊᐃᑦᑖᕐᓇᕋᔪᒡᓗᓂᓗ, ᐃᖅᑲᓇᐃᔭᕐᕕᒋᔭᑦ ᐱᑖᖃᑦᑕᖁᓗᒍ ᖁᐊᐃᑦᑖᕐᓇᙱᑦᑐᓂᒃ ᐊᓗᕐᓗᐃᔭᐅᑎᓂᒃ ᐱᓱᒡᕕᒃᓴᑦᑎᐊᕙᖕᓂ.
ᐃᖅᑲᓇᐃᔭᕐᕕᖕᒥ, ᑭᒃᑯᓕᒫᑦᑎᐊᑦ ᑲᒪᒋᔭᒃᓴᖃᖅᐳᑦ ᖃᐅᔨᒪᓗᑎᒃ ᐊᑦᑕᕐᓇᙱᓪᓗᓂᓗ ᐃᖅᑲᓇᐃᔭᕐᕕᒋᔭᖓ ᖃᖓᓕᒫᖅ. ᑕᒪᕐᒥᒃ ᐃᖅᑲᓇᐃᔭᕐᕕᒋᔭᖅ ᓴᓇᔨᓗ ᐱᓕᕆᔪᓐᓇᖅᑐᐃᓐᓇᐅᕗᑦ ᐱᕐᕈᓗᐊᕿᓐᓇᖅᑐᓂᒃ ᒥᒃᖠᒋᐊᖅᑎᑦᑎᓇᓱᖕᓂᕐᒥᒃ. ᑕᑯᒋᐊᑐᐃᓐᓇᕐᓗᒋᑦ ᐊᑑᑎᖃᑦᑎᐊᖅᑐᑦ ᑎᑎᖅᓱᕆᐊᓖᑦ ᐊᑖᓂ ᑎᑎᕋᖅᓯᒪᔪᑦ.

ᐃᖅᑲᓇᐃᔭᕐᕕᒋᔭᐅᔪᒥ ᑎᑎᖅᓯᕕᒃ:
  • ᓴᓇᕝᕕᑦᑎᓐᓂ ᐊᑐᐊᒐᖁᑎᖃᖅᐸᒌᖅᐳᖓ ᐊᑦᑕᕐᓇᙱᑦᑐᒃᑰᕐᓗᓂ ᐊᔪᕈᓐᓃᖅᓴᖅᑕᐅᒋᐊᓕᖕᓂᒃ ᓴᖅᑭᔮᖅᑎᑦᑎᔪᓂᒃ ᖁᐊᐃᓐᓇᖅᑐᓂᒃ, ᓈᓐᓇᖅᑐᓂᒃ, ᐊᒻᒪ ᑲᑕᖕᓇᖅᑐᓂᒃ? ᑖᒃᑯᓂᖓ ᐸᐸᑦᑎᕗᖓ ᐊᒻᒪ ᓄᑖᙳᕆᐊᖅᑎᒐᔪᒃᐸᒃᑲ ᐊᑐᐊᒐᑦ?
  • ᐱᒋᐊᖅᑎᑦᑎᓯᒪᕗᖓ ᐱᓕᕆᐊᒥᒃ ᓴᓇᕝᕕᑦᑎᓐᓂ ᐊᑦᑕᕐᓇᖅᑕᐃᓕᒪᔾᔪᑕᐅᔪᓐᓇᖅᑐᓂᒃ, ᒪᓕᒐᒃᓴᖁᑎᖃᖅᐳᖓᓗ ᐱᕐᕈᓗᒃᑐᖃᖅᑎᓪᓗᒍ ᐅᓂᒃᑲᐅᓯᐅᔭᕆᐊᖃᖅᑐᓂᒃ?
  • ᐃᖅᑲᓇᐃᔭᖅᑎᒃᑲ ᐱᖃᖅᑎᓲᕆᕙᒃᑲ ᓈᒻᒪᒃᑐᓂᒃ ᐊᒻᒪ ᐱᓕᒻᒪᒃᓴᖅᑎᒐᔪᒃᐸᒃᑲ ᐊᔪᕈᓐᓃᖅᓴᖅᑎᒐᔪᒃᐸᒃᑲᓗ?
  • ᐃᖅᑲᓇᐃᔭᖅᑎᒃᑲ ᐱᖃᖅᑎᓲᕆᕙᒃᑲ ᐊᑦᑕᕐᓇᙱᑦᑐᓂᒃ ᐊᐅᓚᑦᑕᕆᐊᓕᖕᓂᒃ ᐱᓕᕆᔾᔪᓯᕐᓂᒃ ᐱᔾᔪᑎᓕᖕᓂᒃ ᐱᓕᕆᐊᕆᔭᐅᔭᕆᐊᖃᖅᑐᓂᒃ ᐊᒻᒪ ᐃᖏᕐᕋᔾᔪᑎᓕᕆᔪᓂᒃ?
  • ᐃᖅᑲᓇᐃᔭᖅᑎᒃᑲ ᐱᖃᖅᑎᓲᕆᕙᒃᑲᑕ ᐃᖅᑲᓇᐃᔭᕐᕕᖕᓂᒃ ᐃᑲᔫᑎᒃᓴᓂᒃ ᖁᐊᐃᓐᓇᙱᑦᑐᓂᒃ, ᓈᓐᓇᙱᑦᑐᓂᒃ, ᑲᑕᖕᓇᙱᑦᑐᓂᒡᓗ? ᒪᑯᐊ ᐃᓚᓕᐅᑎᓗᒋᑦ ᓇᑲᓲᔭᑦ, ᒪᔪᕋᐅᑎᑦ, ᓇᑎᕐᒧᑦ ᐅᐊᓴᕈᑎᑦ, ᓇᑎᕐᒧᑦ ᐅᐊᓴᕐᕕᑦ, ᐳᐊᕐᕆᑎᑦ, ᑕᕆᐅᖅ, ᖁᐊᐃᑦᑖᕐᓇᙱᑦᑐᑦ ᐊᓗᕐᓗᐃᔭᐅᑎᑦ, ᐊᒻᒪ ᓇᑎᖅ ᖃᐅᓯᕐᓂᖓᓂᒃ ᓇᓗᓇᐃᒃᑯᑕᕐᒥᒃ.
  • ᐱᔭᒃᓴᖃᖅᑎᑦᑎᕗᖓ ᐃᒡᓗᒥᒃ ᓴᓗᒻᒪᖅᓴᐃᔨᓄᑦ ᑲᒪᒋᔭᐅᔭᕆᐊᓕᖕᓂᒃ ᑕᐃᒪᐃᑦᑕᕆᐊᖃᖅᑐᓄᑦ?
  • ᖃᐅᔨᓴᖅᑕᐅᑎᑦᑎᒐᔪᒃᐳᖓ ᖁᐊᐃᓐᓇᖅᑐᓂᒃ, ᓈᓐᓇᖅᑐᓂᒃ, ᐊᒻᒪ ᑲᑕᖕᓇᖅᑐᓂᒃ?
  • ᖃᐅᔨᒪᓇᓱᖃᑦᑕᖅᐳᖓ ᐊᑦᑕᕐᓇᙱᑦᑐᓂᒃ ᐃᖅᑲᓇᐃᔭᕐᕕᑦᑎᓐᓂ ᓯᓚᑖᓂᓪᓗ? ᐃᓚᓕᐅᑎᓂᐊᖅᑐᑦ ᖃᐅᒻᒪᖅᑯᑎᑦ ᖄᖅᓯᒪᔪᑦ ᐊᓯᔾᔨᖅᓱᕐᓗᒋᑦ, ᐃᖅᑲᓇᐃᔭᖅᑎᑦ ᓄᓇᓯᐅᑎᖏᑦᑕ ᓄᖅᑲᖅᑕᕐᕕᖏᑦ ᐱᓱᒡᕕᖏᓪᓗ ᐋᖅᑭᑦᑎᐊᖅᓯᒪᑏᓪᓇᕐᓗᒋᑦ, ᐊᒻᒪ ᐊᐱᓯᒪᔭᕌᖓᑦ ᓂᓚᒃᓯᒪᔭᕌᖓᓪᓘᓐᓃᑦ, ᓴᓕᒍᖅᑕᐅᑎᑉᐸᒡᓗᒋᑦ ᑲᒪᒋᔭᐅᑎᑉᐸᒡᓗᒋᓪᓗ ᐊᐱᓯᒪᓂᐅᔪᑦ ᓂᓚᒃᓯᒪᓂᐅᔪᓪᓗ.
  • ᐋᓐᓂᖅᑐᖃᕐᓂᖅᐸᑦ, ᒪᓕᒐᒃᓴᓂᒃ ᐋᖅᑭᒃᓯᓯᒪᕗᖓ ᖃᐅᔨᓴᖅᑕᐅᔾᔪᑎᒃᓴᓄᑦ ᐱᕐᕈᓗᒍᑕᐅᓚᐅᖅᑐᒥᒃ ᐱᔾᔪᑕᐅᔪᕐᓗ ᐱᑕᖃᕈᓐᓃᖅᑎᑦᑐᓐᓇᖅᐸᕋ?
  • ᐋᖅᑭᒃᓯᓯᒪᕗᖓ ᐃᖅᑲᓇᐃᔮᒧᑦ ᐅᑎᕈᓐᓇᕈᑎᒥᒃ ᖃᐅᔨᒪᔾᔪᑎᒃᓴᓂᒃ ᐃᖅᑲᓇᐃᔭᖅᑎᒃᑲ ᐊᓯᖔᖏᓐᓂᒃ ᐱᓕᕆᐊᒃᓴᖃᖅᑎᓪᓗᒋᑦ ᐃᓱᒪᒋᔭᒃᓴᓂᒃ ᖃᐅᔨᒪᑎᑉᐸᒃᑲ?
ᐃᖅᑲᓇᐃᔭᖅᑎᒧᑦ ᑎᑎᖅᓯᕕᒃ:
  • ᓴᓇᕝᕕᖕᒥ ᐱᓕᕆᐊᒃᓴᑦ ᒪᓕᒡᓗᒋᑦ ᓈᒻᒪᒃᑐᓂᒃ ᑲᒫᓗᒃᓯᒪᕙᒡᓗᑕ. ᑲᒫᓗᐃᑦ ᓈᒻᒪᒃᑲᓗᐊᕐᒪᖔᑕ ᖃᐅᔨᓇᓱᒡᓗᒋᑦ, ᐊᓗᑦᑎᐊᕆᒃᑲᓗᐊᕐᒪᖔᑕᓗ  - ᐳᔾᔪᖅᓯᒪᙱᓪᓗᑎᒃ ᖁᐊᐃᑦᑖᕐᓇᕈᓐᓃᕐᓗᑎᒡᓗ.
  • ᓂᓚᖕᒧᑦ ᖁᐊᐃᔾᔭᐃᒃᑯᑎᓂᒃ ᐊᑐᖅᐸᒡᓗᑕ ᐊᖅᑯᑎᑦ ᖁᐊᐃᑦᑖᕐᓇᕌᖓᑕ.
  • ᓄᖅᑲᖓᓚᐅᑲᒃᐸᒡᓗᑕ ᐅᔾᔨᖅᓱᑦᑎᐊᖏᓐᓇᖅᐸᒡᓗᑕᓗ. ᑕᖃᓯᒪᓗᐊᕈᑦᑕ ᐅᔾᔨᖅᓱᑦᑎᐊᙱᓕᕈᓐᓇᕋᑦᑕ, ᐅᔾᔨᖅᓱᑦᑎᐊᙱᒃᑯᑦᑕᓗ ᐱᕐᕈᓗᒍᓐᓇᕋᑦᑕ.
  • ᐅᔾᔨᖅᓱᑦᑎᐊᖅᐸᒡᓗᑕ ᖃᐅᔨᓴᑦᑎᐊᖅᐸᒡᓗᑕᓗ: ᓴᓇᕝᕕᕗᑦ ᖃᐅᔨᓴᑦᑎᐊᖏᓐᓇᖅᐸᒡᓗᑎᒍᑦ ᖃᓄᑐᐃᓐᓇᖅ ᐊᑦᑕᕐᓇᓕᕈᑕᐅᓐᓇᖅᑐᓂᒃ, ᐅᖃᐅᓯᕆᕙᒡᓗᒋᓪᓗ ᖃᓄᑐᐃᓐᓇᖅ ᐊᑦᑕᕐᓇᑐᐃᓐᓇᕆᐊᓖᑦ ᑕᑯᔭᕗᑦ ᐊᖓᔪᖅᑳᑦᑎᓐᓄᑦ.
  • ᐊᓪᓗᖅᑕᕐᔪᐊᙱᓐᓂᖅᓴᐅᓗᑕ ᓴᖅᐱᖓᒐᓚᒡᓗᑕᓗ ᒪᑭᑕᑦᑎᐊᕈᓐᓇᕐᓂᖅᓴᐅᔪᓐᓇᖅᑐᒍᑦ.
  • ᐅᕐᕈᑦᑕᐃᓕᒪᓗᑕ ᐅᕝᕙᓘᓐᓃᑦ ᑲᑕᒃᑕᐃᓕᒪᓗᑕ ᐊᒡᒐᑦᑕ ᐃᒡᓗᐊ ᐊᔭᑉᐸᑐᐃᓐᓇᕆᐊᖃᖅᑎᓪᓗᒍ, ᒪᔪᕋᐅᑎᒃᑰᕈᑦᑕᓗ, ᖃᖓᓕᒫᖅ ᐱᖓᓱᐃᓕᖓᔪᒥᒃ ᐅᔾᔨᖅᓱᑦᑎᐊᖏᓐᓇᖅᐸᒡᓗᑕ.
  • ᐊᒡᒐᕗᑦ ᐊᑐᕐᓗᒋᑦ ᐱᖓᓱᐃᓕᖓᔪᒥᒃ ᐅᔾᔨᖅᓱᖅᑎᓪᓗᑕ ᓄᓇᓯᐅᑎᓄᑦ ᐃᑭᓂᐊᓕᕌᖓᑦᑕ ᓂᐅᓂᐊᓕᕌᖓᑦᑕᓗ, ᑭᓲᓪᓗᑭᐊᖅ ᖄᖓᓃᒃᑯᑦᑕ ᐅᕝᕙᓘᓐᓃᑦ ᒪᔪᕋᐅᑎᒃᑯᑦ ᒪᔪᕋᕈᑦᑕ/ᐊᖅᑲᖅᑎᕈᑦᑕᓘᓐᓃᑦ.
  • ᑲᑕᔾᔭᐃᒃᑯᑎᒥᒃ ᐊᓄᓯᒪᕙᒡᓗᑕ ᐅᕝᕙᓘᓐᓃᑦ ᐊᑦᑕᕐᓇᖅᑐᒥᒃ ᓴᓇᕝᕕᖃᕈᑦᑕ ᑎᒥᒧᑦ ᓴᐳᔾᔨᔾᔪᑎᓂᒃ ᐊᑐᖅᐸᒡᓗᑕ 1.2 ᒦᑕᓂᒃ ᖁᕝᕙᓯᒃᑐᒥ ᐱᓕᕆᑎᓪᓗᑕ ᑎᒍᓕᖃᙱᑉᐸᑦ.
  • ᒪᔪᕋᐅᑏᖕᓂ ᐅᕝᕙᓘᓐᓃᑦ ᐃᑯᕐᕋᕐᒥ ᐊᑐᐃᓐᓇᐅᔭᕐᓗᑕ ᖁᓕᕈᐊᑦ ᐳᖅᑐᔪᒦᒃᑳᖓᑕ (ᐃᒃᓯᕙᐅᑕᕐᒥ ᕿᔪᖁᑎᒥᒡᓘᓐᓃᑦ ᐃᑯᕐᕋᖃᖅᐸᙱᓪᓗᑕ ᖃᖓᓕᒫᖅ).
  • ᐳᖅᑐᔪᒦᑦᑐᑦ ᐊᔭᑉᐸᒡᕕᖃᖅᑎᑉᐸᒡᓗᒋᑦ ᐃᒡᓗᒃᑐᑦ ᑲᑕᖕᓇᖅᐸᑕ ᓯᓈᒍᓪᓗ ᑲᑕᖕᓇᖅᐸᑦ, ᐳᖅᑐᔪᓪᓛᓗᖕᒦᑦᑐᓪᓗ ᓇᓗᓇᐃᒃᑯᑦᑎᖅᓯᒪᕙᒡᓗᒋᑦ ᑲᑕᖕᓇᕐᓂᖏᓐᓂᒃ.
  • ᐃᒃᐱᐊᕐᔪᖕᒥᐅᑕᖅ ᐅᖃᓘᑎᕋᓛᖅ ᐊᑐᙱᓪᓗᒋᑦ! ᐊᖅᑯᑎᒃᑯᑦ ᐃᑳᕐᓂᐊᓕᕌᖓᑦᑕ ᐅᖃᓘᑎᕋᓛᑦ ᐴᕆᐊᖃᓲᖑᖕᒪᑦ ᑕᐃᒪᓐᓇᑐᐃᓐᓇᑦᑎᐊᖅᑕᐅᖅ, ᑕᐃᒪᐃᓐᓂᖓᓄᑦ ᐃᒃᐱᐊᕐᔪᖕᒥᐅᑕᑦ ᐅᖃᓘᑎᕋᓛᑦ ᐱᓯᒪᖃᑦᑕᕆᐊᖃᙱᑉᐸᕗᑦ ᓴᓇᕝᕕᖕᓂ ᓇᕈᓇᒃᑎᓪᓗᑕ.
ᑕᒪᕐᒥᒃ ᓴᓇᕝᕕᒋᔭᐅᔪᖅ ᓴᓇᔩᓪᓗ ᐅᑯᓂᖓ ᐃᒡᓗᓂᒃ ᐋᖅᑭᑦᑎᐊᖅᓯᒪᔾᔪᑎᒃᓴᓂᒃ ᒪᓕᒋᐊᖃᖅᐳᑦ:
  • ᖁᐊᐃᑦᑖᕐᓇᖅᑎᙱᓪᓗᒍ ᓇᑏᑦ ᐊᒥᐊᕐᓗᒋᑦ/ᒥᖑᐊᕐᓗᒋᑦ ᖃᑦᑎᒐᓛᒃᑐᓂᒃ ᐃᓚᓯᒪᔪᓂᒃ.
  • ᐊᓗᕐᓗᐃᔭᐅᑎᓕᖅᓯᓂᐊᕌᖓᑦᑕ, ᓂᐱᐅᑎᕐᔪᐊᒧᑦ ᓂᐱᐅᓯᖅᐸᒡᓗᒋᑦ ᐊᐅᓚᔾᔭᐃᒃᑯᓯᕐᓗᒋᑦ.
  • ᓈᓐᓇᖅᑐᖃᖅᑎᙱᓪᓗᒍ ᑕᓚᕖᓴᐃᓪᓗ ᐅᖃᓘᑎᓪᓗ ᓴᕕᒐᐅᔭᖏᑦ ᐱᓱᒡᕕᖕᒦᑦᑐᑦ ᑕᓕᑎᑉᐸᒡᓗᒋᑦ, ᐅᕝᕙᓘᓐᓃᑦ ᓇᓗᓇᐃᒃᑯᑦᑎᖅᓱᕐᓗᒋᑦ ᓈᓐᓇᖅᑐᖃᑐᐃᓐᓇᕆᐊᓖᑦ ᑕᖅᓵᑦᑎᐊᖅᑐᓂᒃ ᓂᐱᐅᑎᓂᒃ.
  • ᒪᔪᕋᐅᑏᑦ, ᑐᙵᕖᓪᓘᓐᓃᑦ, ᐊᓯᖏᓪᓘᓐᓃᑦ ᐱᖁᑎᑦ ᐊᑐᒐᒃᓴᐅᑦᑎᐊᕋᓗᐊᕐᒪᖔᑕ ᖃᐅᔨᒪᒋᐊᖅᐸᒡᓗᒋᑦ. ᐅᔾᔨᕈᓱᑐᐊᕈᑦᑕ ᑭᓱᑐᐃᓐᓇᑦ ᐊᑐᒐᒃᓴᐅᔪᓐᓃᖅᐸᓪᓕᐊᑎᓪᓗᒋᑦ ᓴᓇᔨᐅᑎᓪᓗᑕ, ᖃᐅᔨᔭᕗᑦ ᐅᖃᐅᓯᕆᑲᐅᑎᒋᕙᒡᓗᒋᑦ ᐊᖓᔪᖅᑳᑦᑎᓐᓄᑦ ᐃᕐᖐᓐᓇᖅ.
  • ᐅᓯᕋᖅᑐᖃᖅᑎᓪᓗᒍ ᐃᕐᖐᓐᓇᖅ ᐊᓪᓚᖅᑎᒐᒃᓴᐅᙱᑉᐸᑦ, ᐅᓯᕋᕐᕕᒋᔭᑦ ᐊᕙᓗᓗᒍ ᓇᑎᕐᒥ ᖃᐅᓯᕐᓂᕋᐃᓯᒪᔪᖅ ᓇᓕᖅᑲᖅ ᖃᓂᒋᔮᓄᑦ ᐃᓕᓗᒍ ᐊᓪᓚᖅᑕᐅᓚᐅᙱᓐᓂᖓᓂ.
ᖁᐊᐃᑦᑐᑦ, ᓈᑦᑐᑦ, ᐊᒻᒪ ᑲᑕᒃᑐᑦ ᓄᖅᑲᖅᑎᑕᒃᓴᐅᔪᑦ. ᓴᓇᕝᕕᐅᒐᓗᐊᕈᕕᑦ ᓴᓇᔨᐅᒐᓗᐊᕈᕕᓪᓘᓐᓃᑦ, ᐳᐃᒍᖅᑕᐃᓕᕙᒡᓗᑎᑦ ᐱᓕᕆᐊᒃᓴᕐᓂᒃ ᐱᓕᕆᒋᐊᒃᓴᖅ ᓴᓇᕝᕕᒃᓯ ᐊᑦᑕᕐᓇᙱᑦᑑᓗᓂ ᓴᓇᕝᕕᒋᔭᐅᖁᓪᓗᒍ ᓴᓇᔨᓕᒫᓄᑦ. ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᕋᓴᐅᔭᒃᑯᑦ ᑐᕌᕈᑎᑦᑎᓐᓄᑦ ᑎᑎᕋᕈᓐᓇᖅᐳᓯ ᐅᑯᓄᖓ ᓇᓕᐊᖕᓄᑐᐃᓐᓇᖅ wscc.nt.ca ᐅᕝᕙᓘᓐᓃᑦ wscc.nu.ca ᐱᓕᕆᐊᑦᑕ ᓇᓗᓇᐃᒃᑯᑕᖏᑦ ᖃᐅᔨᔪᒪᒍᔅᓯᐅᒃ, ᐊᑦᑕᕐᓇᖅᑕᐃᓕᒪᓂᕐᒧᑦ ᑐᓴᒐᒃᓴᖃᕐᕕᖕᓂ, ᐊᑦᑕᕐᓇᖅᑐᓂᒃ ᐅᔾᔨᖅᓱᖁᔨᔾᔪᑎᑦ, ᐊᒻᒪ ᐊᑭᓐᓇᒥᐅᑕᓂᒃ.

2016-ᒥ ᐱᒋᐊᑦᑎᐊᖁᕙᑦᑎᒋᑦ ᐊᑦᑕᕐᓇᖅᑐᒃᑰᙱᓪᓗᓯ.
ᑭᓱᑦ ᓄᑖᖑᕙᑦ

ᐊᑦᑕᕐᓇᖅᑕᐃᓕᒪᓂᕐᒧᑦ ᑐᓴᖅᑕᐅᔭᕆᐊᓖᑦ
(Safety Share)


ᐃᖅᑲᓇᐃᔭᖅᑎᑦ, ᖃᐅᔨᒋᐊᖃᑦᑕᕐᓗᓯᐅᒃ ᐊᑦᑕᕐᓇᖅᑕᐃᓕᒪᓂᕐᒧᑦ ᑐᓴᖅᑕᐅᔭᕆᐊᓖᑦ (Safety Share), ᓄᑖᖑᓪᓗᓂ ᖃᕋᓴᐅᔭᒃᑯᑦ ᐋᖅᑭᒃᓯᒪᔭᑦᑎᓐᓂ. ᐃᖅᑲᓇᐃᔭᖃᑎᒌᒃᓯᒍᑦ ᐊᐱᖅᓱᖃᑦᑕᐅᑎᕙᒡᓗᓯ, ᐱᓕᕆᖃᑎᒌᒃᐸᒡᓗᓯ, ᖃᐅᔨᒪᖃᑦᑕᐅᑎᓗᓯᓗ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᓕᕆᐊᕆᕙᒃᑕᔅᓯᓐᓂᒃ ᐱᓕᕆᑦᑎᐊᖅᓯᒪᔭᓯ ᐅᓂᒃᑲᐅᓯᕆᕙᒡᓗᓯᐅᒃ ᐃᓕᑉᐸᓪᓕᐊᔭᓯᓗ. ᑐᓴᐅᒪᖃᑎᒌᖕᓂᖅ ᐅᕙᓂ ᐱᒋᐊᕐᓗᒍ.

(WSCC)-ᑯᑦ ᓴᖅᑭᑦᑎᕗᑦ ᑕᕐᕆᔭᐅᑎᒃᑯᑦ  ᖃᐅᔨᓴᐅᑕᐅᓂᒃᑯᑦᐊᑭᓕᖅᓲᑕᐅᔫᑉᐊᑭᖓᓂᒃ

ᑐᙵᓱᒋᑦᑎ ᖃᐅᔨᓴᐅᑕᐅᓪᓗᓂ ᐊᑭᓕᖅᓲᑕᐅᔫᑉ ᐊᑭᖏᑦ 101! ᑖᒃᑯᐊ (WSCC)-ᑯᑦ ᓯᕗᓪᓕᖅᐹᖓᑦ ᑕᕐᕆᔭᐅᑎᒃᑯᑦ (YouTube)-ᑯᑦ, ᐃᓚᐅᒋᑦ ᐊᖓᔪᖅᑳᕗᑦ ᐊᒻᒪ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐃᖅᑲᓇᐃᔭᖅᑎᖓᑦ ᑕᐃᕝ ᒍᕋᓐᑎ ᐅᓂᒃᑲᐅᓯᖃᖅᑎᓪᓗᒍ ᖃᐅᔨᓴᖅᑕᐅᓂᒃᑯᑦ ᐊᑭᒋᔭᐅᑎᑕᐅᔪᓂᒃ ᐊᒻᒪᑦᑕᐅᖅ ᑭᐅᔾᔪᑎᖏᑦ ᐊᐱᖅᑯᑎᒋᔭᐅᒐᔪᒃᑐᓄᑦ.
ᐊᐱᖅᑯᑏᑦ?

ᐊᐱᖅᑯᑎᖃᕈᕕᑦ ᐅᕙᓘᓃᑦ ᐅᖃᐅᓯᒃᓴᓂᒃ ᐅᕙᑉᑎᖕᓄᑦ ᐱᔾᔪᑎᓕᖕᒥᑦ WSCC-ᑯᓐᓄᑦ ᐊᑦᑕᑕᕐᓂᖅ-ᒥᒃ, ᖃᕆᑕᐅᔭᒃᑯᑦ ᑎᑎᕋᕐᕕᒋᓗᑕ ᐅᕗᖓ info@wscc.nt.ca-ᒧᑦ ᐅᕙᓘᓃᑦ info@wscc.nu.ca-ᒧᑦ.
wscc.nt.ca   /  1.800.661.0792   *   wscc.nu.ca  /  1.877.404.4407