ᑭᓇᓗᒃᑖᖅ ᐱᔭᒃᓴᐅᑎᖃᖅᑐᖅ ᓇᖕᒥᓂᖅ ᐊᑦᑕᓇᖅᑐᒦᖏᓐᓂᕐᒧᑦ, ᐊᒪᓗ ᐱᓕᕆᖃᑎᒋᔭᖏᑦ.  ᐱᓕᕆᔩᑦ ᐱᓕᕆᑎᑦᑎᔨᓪᓗ ᑕᑯᒃᓴᐅᑎᑦᑎᔪᑦ ᑕᒪᑐᒥᙵᑦ ᐱᓕᕆᕝᕕᖕᒥᑦ ᐱᔭᒃᓴᐅᑎᖃᕐᓂᕐᒧᑦ ᐋᕿᐅᒪᔪᑎᒍᑦ:  ᐊᑐᖅᑕᐅᔭᕆᐊᓕᒃ ᑭᓇᓗᒃᑖᖅ ᐱᓕᕆᕝᕕᖕᒦᑐᖅ, ᑕᒪᕐᒥᒃ ᐱᓕᕆᑎᑦᑎᔪᑦ ᐊᒪᓗ ᐱᓕᕆᔩᑦ, ᐱᔭᒃᓴᐅᑎᖃᖅᑐᑦ ᐊᑦᑕᓇᖅᑐᒦᖏᓐᓂᕐᒧᑦ ᐱᓕᕆᕝᕕᖕᒥᑦ, ᐃᖕᒥᖕᓄᑦ ᐱᓕᕆᖃᑎᒋᔭᖏᓐᓄᓪᓗ.  ᐋᕿᒃᓯᔪᖅ ᐱᓕᕆᔨ-ᐱᓕᕆᑎᑦᑎᔪᖅ ᐱᓕᕆᖃᑎᒌᖕᓂᕐᒥᒃ ᐊᑦᑕᓇᖅᑐᖃᙱᑦᑐᒥᑦ ᐊᒪᓗ ᐊᓐᓂᐊᕐᓂᖃᕐᓇᙱᑦᑐᒥᑦ ᐱᓕᕆᕝᕕᖕᓂᑦ.

ᐃᓱᒪᑕᖅ ᐊᑦᑕᓇᖅᑐᒦᖏᓐᓂᕐᒧᑦ ᐃᓕᓐᓂᐊᖅᑎᑦᑎᓂᕐᒧᑦ ᑐᕌᖓᔪᓂᑦ ᖃᐅᔨᒪᓕᕐᓂᖃᕆᐊᖃᖅᑐᖅ ᐃᓱᑕᒪᐃᑦ ᐊᑦᑕᓇᖅᑐᒦᖏᓐᓂᕐᒧᑦ ᒪᓕᒐᖃᖅᑐᓂᒃ, ᐱᓗᐊᖅᑐᒥᑦ ᐊᑦᑕᓇᖅᑐᒦᖏᓐᓂᕐᒧᑦ ᐱᖁᔭᖅ ᐊᒪᓗ ᒪᓕᒐᕋᓛᑦ.  ᐃᓕᓐᓂᐊᖅᑎᑦᑎᓂᕐᒧᑦ ᑐᕌᖓᔪᖅ ᑐᓂᓯᔭᕆᐊᖃᖅᑐᖅ ᐱᐅᓛᒃᑯᑦ ᐊᑐᖅᑕᐅᖃᑦᑕᖅᑐᓂᒃ ᐃᓕᑕᖅᓯᓂᕐᒧᑦ ᐊᒪᓗ ᐊᐅᓚᑦᑎᓂᕐᒧᑦ ᐅᓗᕆᐊᓇᖅᑐᓂᒃ, ᐃᓚᐅᑉᓗᑎᒃ ᖃᓄᐃᓕᐅᖁᔨᓃᑦ ᑳᓐᑐᕌᖃᖅᑐᓄᑦ ᐊᑦᑕᓇᖅᑐᖃᙱᑦᑐᒥᑦ ᐊᐅᓚᑦᑎᓂᕐᒥᒃ.  ᓈᒻᒪᒋᔭᐅᔪᖅ ᐃᓱᒪᑕᕐᒧᑦ ᐊᑦᑕᓇᖅᑐᒦᖏᓐᓂᕐᒧᑦ ᖃᐅᔨᒪᓕᕈᑎ ᑐᕌᖓᔪᕐᒥᑦ ᐃᓚᐅᔭᕆᐊᖃᖅᑐᑦ, ᑭᓯᐊᓂ ᑭᒡᓕᒋᙱᖢᓂᐅᒃ, ᐅᑯᓂᙵᑦ ᐱᔾᔪᑎᓖᑦ:

• ᒪᓕᒐᖅ
•   ᓄᓇᑦᑎᐊᕐᒥᑦ ᐊᒪᓗ ᓄᓇᕗᒻᒥᑦ ᐊᑦᑕᓇᖅᑐᒦᖏᓐᓂᕐᒧᑦ ᐱᖁᔭᐃᑦ
•   ᓄᓇᑦᑎᐊᕐᒥᑦ ᐱᓕᕆᕝᕕᖕᒥᑦ ᐋᓐᓂᐊᖃᖅᑕᐃᓕᒪᓂᖅ ᐊᒪᓗ ᐊᑦᑕᓇᖅᑐᒦᖏᓐᓂᕐᒧᑦ ᒪᓕᒐᕋᓛᑦ (ᓄᓇᕗᒻᒧᑦ ᐱᓕᕆᐊᖑᔪᒪᔪᖅ) 
•   ᓇᓗᓇᐃᑯᑏᑦ ᐊᑐᖅᑕᐅᖃᑦᑕᖅᑐᓄᑦ
• ᑲᑎᕐᒪᔪᑦ ᐱᓕᕆᕝᕕᖕᒥᑦ ᐋᓐᓂᐊᖃᖅᑕᐃᓕᒪᓂᖅ ᐊᒪᓗ ᐊᑦᑕᓇᖅᑐᒦᖏᓐᓂᕐᒧᑦ ᒪᓕᒐᕋᓛᑦ ᑲᑎᒪᔨᕋᓛᑦ
• ᐱᓕᕆᕝᕕᖕᒥᑦ ᐋᓐᓂᐊᖃᖅᑕᐃᓕᒪᓂᖅ ᐊᒪᓗ ᐊᑦᑕᓇᖅᑐᒦᖏᓐᓂᕐᒧᑦ ᑐᕌᖓᔪᑦ
• ᐱᓕᕆᕝᕕᖕᒥᑦ ᐱᔭᒃᓴᐅᑎᖃᕐᓂᕐᒧᑦ ᐋᕿᐅᒪᔪᖅ
• ᐱᓕᕆᔩᑦ ᐱᔪᖕᓇᐅᑎᖏᑦ
• ᐱᕋᔭᖕᓃᑦ ᐊᒪᓗ ᐊᑭᓕᖅᑎᑕᐅᓃᑦ
• ᐱᓕᕆᑎᑦᑎᔪᑦ ᐱᔭᒃᓴᐅᑎᖏᑦ
• ᐃᓱᒪᑕᐅᑉ ᐱᔭᒃᓴᐅᑎᖏᑦ
• ᐱᓕᕆᔨᐅᑉ ᐱᔭᒃᓴᐅᑎᖏᑦ
• ᐅᓗᕆᐊᓇᖅᑐᓂᒃ ᐅᓗᕆᐊᓇᖅᑐᒦᓐᓂᕐᒧᓪᓗ ᐊᐅᓚᑦᑎᓂᖅ
•  ᐅᓗᕆᐊᓇᖅᑐᒥᒃ ᖃᐅᔨᓴᐃᓂᖅ
•  ᐅᓗᕆᐊᓇᖅᑐᒥᒃ ᐃᓕᑕᖅᓯᓂᕐᒧᑦ ᐊᑐᖅᑕᐅᔪᑦ
•  ᐅᓗᕆᐊᓇᖅᑐᖅᑕᖃᖅᑕᐃᓕᒪᑎᑦᑎᓂᖅ
•  ᖃᐅᔨᒋᐊᖃᑦᑕᕐᓂᖅ ᐊᒪᓗ ᐅᓂᑉᑳᓕᐅᕆᓂᖅ

ᒪᓕᖕᓂᐊᕐᓗᒋᑦ ᒫᓐᓇᐅᔪᖅ ᐱᓕᕆᕝᕕᖕᒥᑦ ᐋᓐᓂᐊᖃᖅᑕᐃᓕᒪᓂᖅ ᐊᒪᓗ ᐊᑦᑕᓇᖅᑐᒦᖏᓐᓂᕐᒧᑦ ᒪᓕᒐᕋᓛᑦ, ᐃᓱᒪᑕᕆᔭᐅᔪᑦ ᐃᓕᓐᓂᐊᖅᓯᒫᓂᖕᓂᖃᕆᐊᖃᖅᑐᑦ ᐃᓱᒪᑕᕐᒧᑦ ᐊᑦᑕᓇᖅᑐᒦᖏᓐᓂᕐᒧᑦ ᖃᐅᔨᒪᓕᕈᑎ-ᒥᒃ WSCC-ᑯᑦ ᐊᖓᔪᖅᑳᕆᔭᐅᔪᖅ ᐊᑦᑕᓇᖅᑐᖃᙱᑦᑐᓕᕆᔨᒃᑯᓐᓄᑦ.  ᐃᓱᒪᑕᐅᔪᑦ ᐱᐊᓂᒃᑐᑦ ᐃᓕᓐᓂᐊᕐᓂᕐᒥᒃ ᑖᑉᓱᒥᙵᑦ ᑐᕌᖓᔪᒥᑦ ᒪᓕᒋᐊᖃᖅᑐᑦ ᓄᓇᑦᑎᐊᕐᒥᑦ ᐱᓕᕆᕝᕕᖕᒥᑦ ᐋᓐᓂᐊᖃᖅᑕᐃᓕᒪᓂᖅ ᐊᒪᓗ ᐊᑦᑕᓇᖅᑐᒦᖏᓐᓂᕐᒧᑦ ᒪᓕᒐᕋᓛᑦ-ᖏᓐᓂᑦ (ᒫᓐᓇᐅᔪᖅ ᓄᓇᕗᒻᒧᑦ ᐱᓕᕆᐊᖑᔪᒪᔪᖅ). 

ᓈᒻᒪᒋᔭᐅᔪᑦ ᐃᓕᓐᓂᐊᕈᑏᑦ ᐅᑉᓗᒥᒧᑦ ᑎᑭᖦᖢᒍ ᑎᑭᐅᑎᓯᒪᔪᑦ ᒪᓕᒐᕐᓂᑦ ᐱᔭᕆᐊᖃᕐᓂᐅᔪᓂᒃ ᐅᑯᐊᖑᔪᑦ:

• ᓯᕗᓕᐅᖅᑎ ᐊᑦᑕᓇᖅᑐᖃᙱᓐᓂᕐᒧᑦ ᓈᒻᒪᒃᓯᑦᑎᐊᕐᓂᕐᒧᑦ ᐃᓕᓐᓂᐊᕐᓂᖅ, ᐊᒪᓗ ᒪᓕᒐᐃᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᐊᒪᓗ ᐊᑦᑕᓇᖅᑐᖃᙱᓐᓂᕐᒧᑦ ᐊᐅᓚᑦᑎᓂᕐᒧᑦ ᐃᓕᓐᓂᐊᕐᓂᖅ, ᒪᓂᒪᔪᑦ ᐅᑭᐅᖅᑕᖅᑐᒥᑦ ᐊᑦᑕᓇᖅᑐᖃᙱᓐᓂᕐᒧᑦ ᑲᑐᔾᔨᖃᑎᒌᑦ-ᑯᑎᒍᑦ.
• ᐃᓱᒪᑕᖅ ᐊᑦᑕᓇᖅᑐᖃᙱᓐᓂᕐᒧᑦ ᐊᔪᕈᖕᓃᖅᓴᐃᓂᕐᒧᑦ ᐃᓕᓐᓂᐊᕐᓂᖅ, ᒪᓂᒪᔪᖅ ᐅᑭᐅᖅᑕᖅᑐᒥᑦ ᐊᕕᒃᑐᖅᓯᒪᔪᓂᑦ ᑲᑐᔾᔨᖃᑎᒌᑦ ᐱᓕᕆᔨᓄᑦ.
   

ᑐᑭᓯᐅᒪᔾᔪᑎᒃᑲᓐᓂᕐᓂᒃ ᐱᔪᒪᒍᕕᑦ ᓄᓇᑦᑎᐊᕐᒥᑦ ᐊᒪᓗ ᓄᓇᕗᒻᒥᑦ ᓈᒻᒪᒋᔭᐅᔪᓂᒃ ᑐᓂᓯᖃᑦᑕᖅᑐᑦ ᒥᒃᓵᓄᑦ, ᖃᕆᑕᐅᔭᒃᑯᑦ ᑕᑯᔭᐅᒋᐊᖅᑕᕐᕕᖕᒧᐊᕐᓗᑎᑦ WSCC-ᑯᑦ ᒫᓐᓇᐅᔪᖅ ᑎᑎᕋᖅᓯᒪᔭᖏᓐᓂᑦ ᐱᓂᐊᕐᓗᑎᑦ, ᐅᑉᓗᒥᒨᓕᖅᑐᖅᑕᐅᓚᐅᖅᑐᑦ ᓈᒻᒪᒋᒐᑉᑎᒍᑦ ᐃᓕᓐᓂᐊᕈᑎᒃᑲᓐᓃᑦ ᐃᓗᓕᖏᑦ.  ᓇᓗᒍᕕᑦ ᓱᓕ ᓇᓕᖏᓐᓂᒃ ᐃᓕᓐᓂᐊᕈᑎᓂᒃ ᐅᕙᓘᓃᑦ ᒪᓕᒃᑲᓗᐊᕐᒪᖔᖅᐲᑦ, ᖃᕆᑕᐅᔭᒃᑯᑦ ᑎᑎᖅᑲᑎᒍᑦ ᑎᑎᕋᕐᕕᒋᓗᒋᑦ ᐅᕗᖓ OHSRegs@wscc.nt.ca -ᒧᑦ. 

ᐃᓱᒪᑕᐅᔪᖅ ᐱᓕᕆᐊᒥᑦ 

16. (1)ᐱᓕᕆᑎᑦᑎᔪᖅ ᐃᒪᓐᓇᐃᓐᓂᐊᖅᐳᖅ, ᐱᓕᕆᕝᕕᐅᔪᒥᑦ,

a)    ᐱᓕᕆᐊᒃᓴᖃᑦᑎᐊᕐᓂᖓᓄᑦ ᐊᒪᓗ ᖃᐅᔨᓴᖅᑕᐅᑦᑎᐊᕐᓂᖓᓄᑦ;

b)    ᐃᓱᒪᑕᐃᑦ ᖃᐅᔨᒪᓂᖃᑦᑎᐊᕐᓂᖏᓐᓄᑦ ᐅᑯᓂᙵᑦ:

(i) ᐱᓕᕆᕝᕕᖕᒥᑦ ᐋᓐᓂᐊᖃᖅᑕᐃᓕᒪᓂᖅ ᐊᒪᓗ ᐊᑦᑕᓇᖅᑐᒦᖏᓐᓂᕐᒧᑦ ᑐᕌᖓᔪᓂᑦ ᐱᓕᕆᔨᓅᖓᔪᑦ ᖃᐅᔨᓴᖅᑕᐅᑉᓗᑎᒃ ᐱᓕᕆᕝᕕᖕᒥᑦ,

(ii)  ᐊᑦᑕᓇᖅᑐᖃᙱᑦᑐᒥᑦ ᐱᓕᕆᐊᖑᓂᖅ, ᐊᑐᖅᑕᐅᓂᖅ, ᑐᖅᑯᖅᑕᐅᓂᖏᑦ, ᐊᒪᓗ ᐱᕙᓪᓕᐊᓂᖏᑦ ᐃᒋᑕᐅᓂᖏᓪᓗ ᐅᓗᕆᐊᓇᖅᑐᖅᑕᓖᑦ,

(iii)  ᐱᔭᕆᐊᖃᕐᓂᖅ, ᐊᒪᓗ ᐊᑦᑕᓇᖅᑐᖃᙱᑦᑐᒃᑯᑦ ᐊᑐᖅᑕᐅᓂᖏᑦ, ᐃᓄᖕᒥᑦ ᒥᐊᓂᖅᓯᔾᔪᑏᑦ ᐊᑐᖅᑕᐅᔪᑦ,

(iv)  ᑐᐅᕕᓇᖅᑐᓕᕆᓂᕐᒧᑦ ᐊᑐᖅᑕᐅᔪᑦ ᐱᔭᕆᐊᖃᕐᓂᒃᑯᑦ ᑖᑉᑯᓅᓇ ᒪᓕᒐᕋᓛᑎᒍᑦ,

(v)  ᐊᓯᖏᑦ ᓱᓇᑐᐃᓐᓇᒥᒃ ᐱᔾᔪᑎᖃᖅᑐᑦ ᐱᔭᕆᐊᖃᖅᑐᑦ ᐋᓐᓂᐊᖃᖅᑎᑦᑕᐃᓕᒪᓂᖏᓐᓄᑦ ᐊᒪᓗ ᐊᑦᑕᓇᖅᑐᒦᑎᖏᓐᓂᕐᒧᑦ ᐱᓕᕆᔩᑦ;

 c) ᐃᓱᒪᑕᐃᑦ ᐱᐊᓂᖕᒪᑕ ᓈᒻᒪᒋᔭᐅᔪᒥᒃ ᒪᓕᒐᓂᒃ ᖃᐅᔨᒪᓕᕐᓂᒧᑦ ᑐᕌᖓᔪᒥᒃ; ᐊᒪᓗ

 d)  ᐃᓱᒪᑕᐃᑦ ᒪᓕᖕᒪᑕ ᐱᖁᔭᒥᒃ ᑖᑉᑯᓂᙵᓪᓗ ᒪᓕᒐᕋᓛᓂᒃ.

(2) ᐃᓱᒪᑕᖅ ᐱᓕᕆᔩᑦ ᒪᓕᑦᑎᐊᕋᓗᐊᕐᓂᖏᓐᓄᑦ ᒪᓕᒐᒥᒃ ᐊᒪᓗ ᑖᑉᑯᓂᙵᑦ ᒪᓕᒐᕋᓛᓂᑦ ᐊᑐᕆᐊᖃᕌᖓᑕ ᐱᓕᕆᕝᕕᐅᑉ ᐃᓂᖓᓂᑦ.

ᒪᓕᒐᓕᕆᓂᕐᒧᑦ ᑲᑎᒪᔩᑦ ᕿᒥᕐᕈᓚᐅᖅᑕᖓᑦ ᓈᒻᒪᒋᑉᓗᒋᓪᓗ ᐅᑯᐊ ᐊᑐᐊᒐᐃᑦ ᔫᓂ 2015-ᒥᑦ ᑲᑎᒪᑎᓪᓗᒋᑦ:

• ᐊᑐᐊᒐᖅ 00.04, ᐅᑭᐅᑉ ᐊᖏᓛᒃᑯᑦ ᓇᓪᓕᐅᑯᒫᓕᐊᖑᔪᖕᓇᖅᑐᑦ ᐊᑭᓕᐅᑏᑦ 

• ᐊᑐᐊᒐᖅ 00.05, ᖃᐅᔨᓂᖅ ᓇᓃᓐᓂᖓᑕ ᐃᓄᐃᑦ ᒪᓕᒃᖢᒋᑦ ᐱᓕᕆᔩᑦ ᐊᑭᓕᖅᑕᐅᓂᖏᓐᓄᑦ ᐱᖁᔭᐃᑦ:  ᒪᓕᒐᐃᑦ (ᖃᐅᔨᓂᕐᒧᑦ ᐱᓕᕆᑎᑦᑎᔪᖅ ᐊᒪᓗ ᐱᓕᕆᔨᐅᑉ ᓇᓃᓐᓂᕆᔭᖏᑦ)

• ᐊᑐᐊᒐᖅ 00.05.01, ᖃᐅᔨᓂᖅ ᓇᓃᓐᓂᖓᑕ ᐃᓄᐃᑦ ᒪᓕᒃᖢᒋᑦ ᐱᓕᕆᔩᑦ ᐊᑭᓕᖅᑕᐅᓂᖏᓐᓄᑦ ᐱᖁᔭᐃᑦ:  ᐱᓕᕆᑎᑦᑎᔪᐃᑦ

• ᐊᑐᐊᒐᖅ 00.05.02, ᖃᐅᔨᓂᖅ ᓇᓃᓐᓂᖓᑕ ᐃᓄᐃᑦ ᒪᓕᒃᖢᒋᑦ ᐱᓕᕆᔩᑦ ᐊᑭᓕᖅᑕᐅᓂᖏᓐᓄᑦ ᐱᖁᔭᐃᑦ:  ᐱᓕᕆᔩᑦ 

• ᐊᑐᐊᒐᖅ 02.11, ᐃᓇᖐᔪᖅ ᐊᒪᓗ ᑕᒪᒃᑯᓄᙵ ᐱᓕᕆᑎᑦᑎᔩᑦ

• ᐊᑐᐊᒐᖅ 02.12, ᐱᓕᕆᑎᑦᑎᔪᐃᑦ ᐱᐊᓂᒃᑎᑦᑎᓂᖏᑦ ᓴᓇᔪᖕᓃᕐᓂᕐᒧᑦ

WSCC-ᑯᑦ ᐊᒃᓱᕈᖃᑦᑕᖅᑐᑦ ᓄᑖᓂᒃ ᐊᒪᓗ ᑐᑭᓯᐅᒪᔾᔪᑎᖃᑦᑎᐊᖅᑐᓂᒃ ᐃᓗᓕᓕᖕᓂᑦ ᐅᖃᓕᒫᒐᓕᐊᓗᒃᑖᑉᑎᖕᓂᑦ.  ᓴᖅᑭᖃᑦᑕᐃᓐᓇᖅᑐᖅ ᐃᓚᒋᔭᐅᔪᖅ ᑕᑯᒃᓴᐅᑎᑦᑎᔪᖅ ᐅᑉᓗᒥᒨᓕᖅᑐᖅᑕᐅᓵᖅᓯᒪᔪᓂᒃ ᐊᒪᓗ ᓄᑖᓂᒃ ᐊᑦᑕᓇᖅᑐᖃᖅᑕᐃᓕᒪᓂᕐᒧᑦ ᐊᑐᖅᑕᐅᔪᓂᒃ ᐊᑐᕈᖕᓇᕐᓂᐊᖅᑕᖕᓂᑦ!

ᐱᓕᕆᕝᕕᖕᒧᑦ ᐅᑎᕐᓂᕐᒧᑦ ᐱᕝᕕᐅᔪᖕᓇᖅᑐᑦ:

ᐅᖃᓕᒫᒐᖅ ᖃᓄᐃᑐᖕᓃᓕᕐᓂᕐᒧᑦ:  ᐅᖃᓕᒫᒐᕋᓛᖅ ᐋᓐᓂᖅᓯᒪᔪᓄᑦ ᐱᓕᕆᔨᓄᑦ ᐱᓕᕆᔩᑦ ᐱᔭᕆᐊᖃᖅᑐᑦ ᐋᓐᓂᖅᑕᐃᓕᒪᓕᕆᔨᑦ ᐊᒪᓗ ᐊᑭᓖᔨᒃᑯᓐᓂᑦ (WSCC) ᐃᑲᔫᓯᐊᓂᒃ ᓇᓗᓇᐃᖅᓯᓯᒪᔪᖅ ᑐᒃᓯᕋᐅᓯᐅᖅᐸᓪᓕᐊᓂᕐᒨᖓᔪᓂᒃ, ᐃᓚᐅᑉᓗᓂ ᐅᑎᖅᑐᖅ ᐱᓕᕆᕝᕕᖕᒧᑦ ᐊᒪᓗ ᐱᔭᒃᓴᐅᑎᖏᑦ ᐱᓕᕆᔩᑦ ᐋᓐᓂᖅᑕᐃᓕᒪᓕᕆᔨᑦ ᐊᒪᓗ ᐊᑭᓖᔨᒃᑯᑦ (WSCC), ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᑦ, ᐱᓕᕆᑎᑦᑎᔨ, ᐊᒪᓗ ᐋᓐᓂᖅᓯᒪᔪᖅ ᐱᓕᕆᔨ. 

ᖃᓄᐃᑐᖕᓃᖅᐸᓪᓕᐊᓂᖅ:  ᐃᑲᔪᐃᓂᖃᖅᑐᖅ ᐊᑐᖅᑕᐅᔪᖕᓇᖅᑐᖅ ᑕᒪᐃᓄᑦ ᐋᓐᓂᖅᓯᒪᔪᓄᑦ ᐊᒪᓗ ᐱᓕᕆᑎᑦᑎᔨᓄᑦ, ᑕᑯᒃᓴᐅᑎᑦᑎᔪᖅ ᐊᔾᔨᒌᖏᑦᑐᑦ ᐊᑐᖅᑕᐅᔪᖕᓇᖅᑐᑦ ᐱᓕᕆᕝᕕᖕᒧᑦ ᐅᑎᕐᓂᐊᕐᓗᓂ ᐅᕙᓘᓃᑦ ᐱᓕᕆᕝᕕᖕᒦᖏᓐᓇᕐᓂᐊᕐᓗᓂ. 

 
ᐅᑎᖅᑐᖅ ᐱᓕᕆᕝᕕᖕᒧᑦ ᐋᓐᓂᖅᓯᒪᔪᓄᑦ ᐅᖃᓕᒫᒐᕋᓛᖅ:  ᐅᖃᓕᒫᒐᕋᓛᖅ ᑐᓂᓯᔪᖅ ᐃᑲᔫᑕᐅᔪᖕᓇᖅᑐᓂᒃ ᐱᓕᕆᕝᕕᖕᒧᑦ ᐅᑎᖅᑐᓄᑦ, ᐱᕙᓪᓕᐊᓂᖓ, ᐊᒪᓗ ᐱᒻᒪᕆᐅᔪᑦ ᖃᐅᔨᒋᐊᕐᕕᐅᔪᖕᓇᖅᑐᑦ. 

ᐱᓕᕆᑎᑦᑎᔨᔩᑦ ᒪᓕᒐᒃᓴᖓᑦ ᐅᑎᖅᑐᖅ ᐱᓕᕆᕝᕕᖕᒧᑦ:  ᐅᑎᖅᑐᖅ ᐱᓕᕆᕝᕕᖕᒧᑦ ᐃᑲᔪᐃᔪᖅ ᐋᓐᓂᖅᓯᒪᔪᓂᒃ ᐱᓕᕆᔩᑦ ᐱᔪᖕᓇᖅᓯᑐᐊᕈᑎᒃ ᐅᑎᕐᓂᕐᒧᑦ ᓈᒻᒪᒋᔭᖓᓐᓄᑦ ᐱᓕᕆᐊᒧᑦ.  ᒪᓕᒃᑕᐅᔪᒃᓴᖅ ᑕᑯᒃᓴᐅᑎᑦᑎᔪᖅ ᖃᓄᖅ ᐱᕙᓪᓕᐊᓂᕐᒥᒃ ᐊᒪᓗ ᐊᑐᓕᖅᑎᓐᓂᕐᒧᑦ ᐅᑎᖅᑐᖅ ᐱᓕᕆᕝᕕᖕᒧᑦ ᑐᕌᖓᔪᖅ ᑲᑐᔾᔨᖃᑎᒌᒋᔭᕐᓄᑦ, ᐃᓚᐅᔪᑦ ᐆᒃᑐᕋᐅᑏᑦ ᐋᕿᐅᒪᔪᑦ ᐊᒪᓗ ᑕᑕᑎᕆᐊᓖᑦ.  ᑕᑕᑎᕆᐊᓖᑦ ᐊᒪᓗ ᐋᕿᐅᒪᔪᑦ ᒪᓂᒪᖕᒥᔪᑦ ᐋᕿᒃᓱᖅᑕᐅᔪᖕᓇᖅᑑᑉᓗᑎᒃ ᑎᑎᖅᑲᑎᒍᑦ ᐋᓐᓂᖅᑕᐃᓕᒪᓕᕆᔨᑦ ᐊᒪᓗ ᐊᑭᓖᔨᒃᑯᓐᓂᑦ WSCC-ᑯᑦ ᖃᕆᑕᐅᔭᒃᑯᑦ ᑕᑯᔭᐅᒋᐊᖅᑕᕐᕕᖓᑦᑎᒍᑦ..
 

ᐱᔪᒪᕕᑦ ᐊᔾᔨᖏᓐᓂᑦ ᐅᖃᓕᒫᒐᐃᑦ?  ᖃᐅᔨᒋᐊᕐᕕᒋᓗᑕ ᑐᒃᓯᕋᕈᒪᔭᕐᓄᑦ, ᖃᑉᓯᓂᒃ ᐊᒪᓗ ᑎᑎᖅᑲᑎᒍᑦ ᑐᕌᕈᑎ, ᐊᒪᓗ ᖁᕕᐊᓱᒃᑐᒍᑦ ᐊᐅᓚᖅᑎᑦᑎᒍᑉᑕ ᐃᓕᖕᓄᑦ!  ᑕᒪᒃᑯᐊ ᒪᓂᒪᔪᑦ ᖃᑉᓗᓈᑎᑐᑦ, ᐅᐃ-ᐅᐃᑎᑐᑦ, ᐃᓄᒃᑎᑐᑦ, ᐊᒪᓗ ᐃᓄᐃᓐᓇᖅᑐᓐ. 

ᑕᒪᒃᑯᓂᙵᑦ ᐱᔪᒪᕕᑦ, ᐅᕙᓘᓃᑦ ᑐᑭᓯᐅᒪᔾᔪᑎᒃᑲᓐᓂᕐᓂᒃ ᐱᔪᒪᕕᑦ?  ᑕᑯᒋᐊᕐᓗᒍ ᖃᕆᑕᐅᔭᒃᑯᑦ ᑕᑯᔭᐅᒋᐊᖅᑕᕐᕕᑉᑎᖕᓄᑦ, ᐅᕙᓘᓃᑦ ᖃᕆᑕᐅᔭᒃᑯᑦ ᑎᑎᕋᕐᕕᒋᓗᑎᒍᑦ (safetynet@wscc.nt.ca)-ᒧᑦ!  ᑐᓴᕐᕕᒋᔪᒪᑦᑎᐊᖅᑕᑉᑎᒋᑦ!