Nanminiqaqqit, ikayuqtiqaqqit, aulapkaiyiuvit titiraqhimayumik, inmikkulluunniit havaaqaqqit?  Taimaitpat, WSCC-kunnit ikayuqtauyuittutit havaatigut.  WSCC-kunnit ikayuqtauyaami, titiraqtughauyutit uuktuutinut taapkuninnga Inmikkut Akiliqtaghanik Qutangnaitjutinik, aajjikkutainik ikayuutilgit havakvingnit aanniaqtuqarniqqat aanniqtuqarniqqallu. 

Uuktuinnarialiuyutit ikayuutighanut atauhiqmut tatqiqhiutimik, ukiuqmut atauhiqmulluuniit.  Nutaannguqtaghat akiligaghat ukiuq tamaat, nutaannguqtiqtughat December 31, 2014-mi.  Naunaittiarumaguffi, naqillugu una ihivriuriami titiqqat Inmikkut Akiliqtaghanik Qutangnaitjutinik. 

Titirariami taapkuninnga Inmikkut Akiliqtaghanik Qutangnaitjutinik naqillugu una, qaritauyakkulluuniit titiraqlutit Havaktit Ikayuutainut Nunattiami Nunavunmiluuniit naunaittiarumaguffi. 

Ihuaqnighakkut havaaghat apqutauyuq havakvingnut.  Ihuaqnikkut parnaiyainiq akihaqtuqnaqtuq havakvingnut akihaqtuutiplutik, ihumaliuriami qanuriliyaaghaq qanurilittailiplunilu, huliyaitalu ihuaqtughat tamangnut havakviit Ihumayainut, Havaaghainut, Ikpigiyainullu.  WSCC-kunnit, ihuaqnikkut havaaghavut aulavaktuq pingahunik ukiunik talvanilu 2015-mi, nutaamik havauhiqarahuaqtugut.  Hapkua havaaghat iniqhimaliqtainit havaghimmaaqpaktut havauhiqnit kinguanit ilitarivaghutiklu ikayuutit WSCC-kut aulattiarutainut itqaumagiplugit ihuaqhaqtaghat.  Atauttikkut, atuqhugu taamna Kuapuriissat Havaaghait, ilittuqhitivaktuq irinigiyainik inirumayainiklu ilauyunut.  Havakvingnit, aulaniqmut ihuaqutauvaktuq parnaiyaiplutik havakviit atataplutik talvunga Ihumagiyainut Aanniaqtailiniqmut Aanniqtailiniqmullu Havakvingnit. 

Pingahut irininaqtut ingilratjutauniat WSCC-kut havaaghainik atuqtughanit pingahut ukiunik: hivumuuqtittiniqmik aanniqtailiniqmut ilitquhinik; ikayuutittianik ikayurahuaqhutik qanuriliyaaghainullu havaktit; aulapkaiplutiklu Havaktit Amiqnaitjutait Tutquumavianik. 2015-2017-milu Ihuaqnighakkut Havaaghait taamnalu 2015-mi Kuapuriissat Havaaghaillu angiqtauhimayut Ataniqtuqtuiyut Katimayiinit takupkaqtittiyaamilu naahurittiaqtugut ilauyunut.  Qaritauyakkuurutinit takunnaqniaqtut 2015 atulihaaqqat.

Ukiuq tamaat, Skills Canada Nunattiami katimapkaiyuktut malrungnik uplunik Grade 8-mi ilihaqtunik, ilitturipkaiplugit aallatqiingnik hanayinik ilihaqtaghaniklu.

Ukiumi atuqtumi, WSCC-kut katimapkaihimayut 24-nik inulramminik talvunga Hakugighaqlutit! Huliyunut.  Ilauyut ilitaqhiyaami munaqhiyaamilu amiqnaqtunik, imaalu amiqnaiyaqniqmik, qauhimaniq havaktit pilaarutainik, hiutinullu aanniqtailitjutinik, qanuqlu atuttiariami qaptiriyinik alruyaqtuqtunik atuqhutik.

Tautughimayunaqhiyugut hivunighaptingnit Aanniqtailiniqmut Titiraqtighanik hulitilluta! Takulugu Skills Canada NWT taamnalu Skills Canada Nunavut ilitturivalliayaami huliyaghait Skills Canada Akihaqtuutigumik May 2015-mi.  

Ataniqtuqtuiyit Katimayiit angiqhimayait ihuaqhautit taapkununnga maligaghainit December 2014-mi katimahimagamik:

• 03.11, Manighait Ikayuutighallu Aanniqluaqhimayunut;
• 04.02, Akiliqtaghat Aanniqtunik Munaqhiniqmut Ikayuutinullu (hivuani atiliugaluaq, Akiliqtaghat Munaqhiniqmut);
• 04.06, Aanniaqtuliqiyinit Havautiturniq;
• 04.07, Aanniaqtuliqiyinit Ihivriuqtauniq
• 04.08, Aanniaqtuliqiyinit Ingilrutit; taapkualu
• 06.03, Kitittinniq Aulayughanik Ikayuutinik

WSCC-kut Maligaghanut Kuapuriissanullu Naunaiqhitiniq tuharumayut ilauyunit.  Havakvikput ihumagiyaqaqqat uqauhinikluuniit maligaghanut havauhinullu tuharumayugut. 

Tuhaqtauyumaguffi maligaghaliuqniqmut, titiraqluhi qaritauyakkut  policy@wscc.nt.ca

2014 nuungutiqtulirman, tamna WSCC-kut upalungaiyailiktun aulatitiyaangat nuutaamik pingahunik ukiunik hanaqidjutikharnik upalungaiyairutikharnik.  Tuniyaangat havaktitiunik ikayuutikharnik piqaqtukharnik, hivayaqhimaaliktugut apiriligiplugit inungnik apiriquplugit

Talvuuna Ubluqtugirviami Idjirurvianilu, WSCC-kut ilaqatigiitunik ilauyunik Mike Filipowitsch hivayaqniaqtait pulaaqniaqtait havaktitiut tamaini Nunatsiaqmi Nunavunmilu.  Pukukniaqhimayuq akhuqnaqtunik naunairutikharnik talvuuna havakviat qanuq aulavaktuq WSCC-kutlu, hunaniklu ikayuutikharnik piumayut uvaptingnin, qanuqlu havaqatiginiaqtugut hivumuugiangat akhuqnaqtumik Ukiuktaqtuniituniklu qayangnaitkutikharnik pitquhiliqinikkut.

Naunairutikhaq Mike pukukhimayait ikayuutauniaqtun hanaqidjutikharnik piumaluaqtainik Pivalliahimaaqlutik Ihuaqtunik Ikayuutikharnik Hanaqidjutikharniklu Havakttiunik Havaktunutlu.  Angiyuqamlu Afisiani atuqniaqtait naunairutikhat ihumaliugiangat atuqtakharnik naunaiyaiyaangat ikayuutikhavut upautihimayut pidjutikhavut.

Hivayaqtaungitkuvin pullaaqtaungitkuvinluuniit?  Ihumaluguiqlutin.  Nuitiqtitiniaqtavut apiqutivut qaritauyaliqivingmun taima havaktitiut ilauhimaagianganik.  Tigumidjutiqaqtun ilaulukaakniq akhuqnaqtuq uvaptingnun, atautimiitilunun, nutqaqtitigiaqaqtugut havakvingni aanniarutingnik aanniqtaudjutingniklu.

Naunaiqyumirumaguvit, hivayaqlugu Dave Grundy, Angiyuqaanguyuq Nunalaani Aulapkaiyilu unaluuniit Melanie Walters, Angiyukhiq Uqaudjiyi.   

Quayaqittut, Napatkaqtut, Iukkaqtullu 

Havangnaitillugu, naunaittuq hangulukaarnaqtuq: niuvvagiaqhutik, puuqhiyunik aittuutinik, niriyaqtuqhutik quviahughutik, amihullu.  Ilitturinnaqtuq taimaa avatitit hugihuirnaqhivaktut.  Ukiuraangat hila amirnaqhivaktuq, nuna hikugaangat, maharaangata apittaat, taaktitkaangat niptairaangallu.  Ilangi hapkua ihuaqtut ilihimayaghat qauyaqittailiniqmut, napatkaqtailiniqmut, iukkaqtailiniqmullu:

• Qilanaaqtaililutit - kayumiiqlutit
• Naittunik apluraqlutit; haatittilugit ittikkatit anmut pihuttiariami.
• Naammagiyaqnik aannuraaqlutit, kamittiaqhimalutillu havaaghanut.
• Qilamiuqlutit allaqtiqlugit kuviyut imaqniklu.
• Qaarnik atuqniaruvit, nipittaqtuuyughat ingutaaqtailiplugit.
• Algakpit aippaa hailihimalugu ayapiqtuutighat iukkaqnighaguvit.
• Qipliqpallaaqqata natiit minguklugit  hiuraqmik avulungmik
• Aimaviit kighiumanahuaqlugu.

Naunaittiarumaguffi, naqillugu una naunaitkutavut takuyaami Quayaqittunut, Napatkaqtunut, Iukkaqtunullu. 

Havangnaillaktillugu, WSCC-kut havakviit umighimanahuat Inungnik Ikayuqtinut pitquyauhimayutut 5-munngaqqat nunallaat upluqhiutaigut Tuesday-mi, December 23, 2014-mi, angmatqiklutik 8:30-mi uplaami Monday, January 5, 2015-mi..

Ilittuqhitinahuaruffi havakvingnit huliyuqaqqat hunaniklu irininaqtunik ihumaaluutiqaruvit, hivayaqlugu 24-nik ikaaqninik angmaumainnaqtut Huliyuqarniqqat Akiittukkut talvani 1-800-661-0792. 

Ihumannaqqat hapkua unipkaaghat, naunaittiarumaguvilluuniit? Takulugu qaritauyakkuurutit, titiraqlutaluuniit qaritauyakkut! Tuhaqvigiyumayaffi!