Í frétt utanríkisráðneytis segir:

 
"Við ræddum ýmis mál sem eru ofarlega á baugi í málaflokknum og norræna samvinnu í tengslum við þau, svo sem vinnu við mótun nýrra þróunarmarkmiða Sameinuðu þjóðanna, fjármögnun þróunarsamvinnu og viðskiptamiðaða þróunarsamvinnu. Greindi ég frá að í þeim samningaviðræðum sem framundan eru um ný þróunarmarkmið muni Ísland áfram leggja áherslu á landgræðslu, málefni hafsins, endurnýjanlega orku og jafnrétti kynjanna. Auk þess greindi ég frá þingsályktun um framfarir í lækningu sjúkdóma og skaða á taugakerfinu," segir Gunnar Bragi.

Ráðherrarnir lögðu áherslu á mikilvægi þess að í nýjum þróunarmarkmiðum verði skýrt kveðið á um jafnrétti kynjanna og valdeflingu kvenna og að Norðurlöndin héldu áfram að vinna að þessu í sameiningu. Þá ræddu þeir einnig viðbrögð Norðurlandanna við ebólufaraldrinum og lögðu áherslu á að byggja þurfi upp heilsugæslu í fátækustu ríkjum heims, svo þau séu í stakk búin til að takast á við neyð sem þessa. Faraldurinn sem nú hefur brotist út veldur miklu álagi á heilbrigðiskerfin í viðkomandi löndum, sem fyrir eru veikbyggð og hafa vart bolmagn til að sinna grunnþjónustu.

Ákvörðun Guy Scott að reka leiðtoga stjórnarflokksins úr embætti hefur skapað óróa meðal almennings/ AFP

Fjölmargir íbúar Sambíu hafa staðið í biðröð síðustu daga til að kveðja forseta landsins, Micael Sata, hinstu kveðju en lík hans liggur á viðhafnarbörum í Mulungushi ráðstefnuhöllinni í höfuðborginni Lusaka. Hann lést í London í síðustu viku, 77 ára að aldri, en hann var í læknismeðferð í Bretlandi. Þjóðinni gefst vikulangur tími til að kveðja forsetann en hann verður jarðsettur þriðjudaginn 11. nóvember í sérstökum grafreit fyrir þjóðhöfðingja landsins.

Eftir skyndilegt fráfall forsetans tók varaforsetinn við völdum, Guy Scott, en hann er fyrsti hvíti forsetinn í Afríku í tuttugu ár. Scott er af skosku bergi brotinn og sú staðreynd leiðir sjálfkrafa til þess að hann getur ekki boðið sig fram til forseta í komandi kosningum, sem eiga að fara fram innan þriggja mánaða. Ákvörðun hans á mánudag að víkja formanni stjórnarflokksins úr embætti hefur hins vegar skapað ólgu í landinu og almenningur hefur mótmælt á götum úti síðasta sólarhringinn.

Sata er annar forsetinn á fáeinum árum sem deyr í embætti. Levy Mwanawasa forseti lést árið 2008 eftir að hafa fengið heilablóðfall.

Zambians pay respects to late president Sata/ AFP 

Another Zambian president dies in office. What happens now? WashingtonPost 

Zambia's new president may be white, but that's not what makes him interesting/ WashingtonPost 

Zambia: Scott's Decision Can Send Zambia in Flames, Warns Kambwili/ AllAfrica 

Zambia president Michael Sata dies in London/ TheTelegraph 

The Death of Zambia's 'King Cobra'/ TheAtlantic 

A new white ruler in Zambia, eftir Elias Munshya/ NAIForum 

Ljósmynd:GettyImages

Vopnaútflutningur Norðmanna til ríkisstjórna víða um heim er harðlega gagnrýndur í nýrri skýrslu frá samtökunum Changemaker. Því er haldið fram að sala Norðmanna á hergögnum til ríkisstjórna sem stýra með valdboði auki á kúgun fólks í viðkomandi ríkjum og fari á svig við fyrirætlanir Stórþingsins um útflutning á vopnum.

Skýrslan ber yfirskriftina "Tillitslaus vopnaútflutningur" (Hensynsløs våpeneksport) og gefur yfirsýn yfir útflutning af hergögnum til tíu landa á tímabilinu 2002 til 2012, meðal annars landa þar sem mannréttindi eru fótum troðin. Fram kemur í frétt norska sjónvarpsins að regluverk sé til staðar í Noregi til að koma í veg fyrir útflutning til stjórnvalda sem brjóti á mannréttindum þegna sinna en ekki sé farið eftir reglunum.

Til valdboðssinnaðra stjórnvalda hafi verið seld vopn á umrædddu tímabili fyrir 1,5 milljarð norskra króna, m.a. til Barein, Egyptalands, Líbíu, Sameinuðu arabísku furstadæmanna, Jórdaníu, Kúveit, Kína, Óman, Katar og Sádí-Arabíu sem var stærsti kaupandinn.

Alls seldu Norðmenn, samkvæmt upplýsingum frá Hagstofu Noregs, vopn fyrir 2,1 milljarð norskra króna á síðasta ári. Í þeirri tölu eru líkast til hríðskotabyssurnar sem keyptar voru hingað til lands fyrir Landhelgisgæslu og lögreglu.

Nánar 

"Irene og Ronald hafa mætt á skrifstofuna hjá okkur á morgnana til að undirbúa sig fyrir samtal við íslensk fermingarbörn og þá hefur okkur gefist tækifæri til að kynnast þeim aðeins. Þau fara í tölvuna og eru á Facebook alveg eins og krakkarnir okkar og þau eru flinkari á öppin en miðaldra skrifstofufólk í henni Reykjavík. Þau eru eldklár og alveg eins og íslenskir krakkar með sína drauma og þrár um góða framtíð," segir í frétt á vef Hjálparstarfsins.

Þar segir ennfremur:

"Heima í Úganda eru aðstæður hins vegar töluvert öðruvísi en hér. Þrír yngri bræður bíða eftir að Irene komi heim en hún er höfuð fjölskyldunnar. Pabbi hennar lést af völdum alnæmis árið 2001 og mamma hennar dó eftir langvarandi veikindi árið 2011. Irene sér um að elda, fara eftir vatni og eldiviði ásamt því að þvo þvotta og þrífa heimili sitt og bræðra sinna. Ronald fer aftur heim til mömmu sinnar sem missti mann sinn úr alnæmi þegar Ronald var lítill strákur. Hann á þrjár systur og bróður. Mamma Ronalds er HIV-smituð og við slæma heilsu. Það hefur því komið í hlut Ronalds og systkina hans að sjá um heimilið á uppvaxtarárunum.

Irene og Ronald hafa lýst því hvernig vatnsskortur tafði fyrir skólagöngu þeirra. Þau eru hins vegar heppin þar sem þau búa á starfssvæðum Hjálparstarfsins. Irene lauk grunnskólanámi í skóla samstarfsaðila okkar og fjölskylda Ronalds fór úr moldarhreysi í múrsteinshús með vatnssöfnunartanki með fjárstuðningi frá íslenskum almenningi.

Tilvonandi fermingarbörn ganga í hús næstu daga og afla fjár til vatnsverkefna okkar í Afríku. Með þínum stuðningi getum við tryggt fleirum aðgang að hreinu vatni."

UNICEF kappkostar að hraða sendingu með lífsnauðsynlegum birgðum til þúsunda barna sem neyðst hafa til að flýja heimili sín í Mið-Afríkulýðveldinu. Samkvæmt frétt á vefsíðu UNICEF á Íslandi hafa brotist út ný átök í norður- og vestur-héruðum landsins, samhliða vaxandi ofbeldi í höfuðborginni Bangui, sem gera ástandið enn alvarlegra. 

"Okkar starf snýst um að vernda börn, sérstaklega þau sem erfiðast er að ná til. Við neitum að láta hræða okkur og hóta á meðan við sinnum starfi okkar," segir Judith Léveillée, fulltrúi UNICEF í Mið-Afríkulýðveldinu. Hún bætir við að gæta verði þess að börnin gleymist ekki. "Við verðum að gera allt sem í okkar valdi stendur til að koma aðstoð til barnanna í Mið-Afríkulýðveldinu. Þau þurfa lífsnauðsynlega á hjálp að halda og mega ekki gleymast í allri ringulreiðinni."

 Nánar