Sameinuðu þjóðirnar hafa í undirbúningi fyrir ný þróunarmarkmið sem taka eiga við af þúsaldarmarkmiðunum eftir árið 2015 sett á laggirnar ýmiss konar vinnuhópa, meðal annars hóp sérfræðinga sem birti á dögunum aðgerðaráætlun fyrir sjálfbæra þróun á tímabilinu 2015 til 2030 í samnefndri skýrslu -  An Action Agenda for Sustainable Development. 

Þetta sérfræðingateymi - The Sustaintable Development Solutions Network (SDSN) - er skipað vísindamönnum, tæknifræðingum, viðskiptafræðingum og þróunarfræðingum frá ríkum þjóðum og snauðum og hefur starfað síðustu misserin undir forystu hagfræðingsins heimskunna, Jeffrey D. Sachs.

Í aðgerðaráætluninni eru tilgreind tíu sjálfbær þróunarmarkmið í þeim fjórum meginvíddum sem flokkast undir sjálfbæra þróun en þær eru: hagvöxtur og uppræting fátæktar, félagsleg aðlögun, sjálfbærni í umhverfismálum og vandaðir stjórnarhættir.

Áhersluatriðin tíu eru þessi:

• Uppræta fátækt og hungur
• Tryggja þroska og hagsæld fyrir alla án umhverfisspjalla
• Tryggja menntun allra barna og unglinga
• Tryggja jafnrétti og draga úr ójöfnuði
• Góð heilsa og vellíðan allra aldurshópa
• Auka landbúnaðarframleiðslu á umhverfisvænan sjálfbæran hátt til að tryggja fæðuöryggi og hagsæld í strjálbýli
• Auka framleiðslu í borgum og umhverfisvæna sjálfbærni þeirra
• Draga úr áhrifum loftslagsbreytinga af mannavöldum með sjálfbærri orku
• Vernda vistkerfi og tryggja trausta stjórnun náttúruauðlinda
• Bæta stjórnarhætti og samræma viðskiptahætti að öllum markmiðunum

Að mati fulltrúa SDSN geta þessi tíu forgangsatriði myndað grundvöll að sjálfbærum þróunarmarkmiðum fram til 2030.

Eina leiðin til að halda uppi hagvexti og þróun til framtíðar

Á síðustu árum hefur hugtakið grænn hagvöxtur verið áberandi í orðræðunni um þróunarmál. Efnahags- og framfarastofnun Evrópu (OECD) gaf út á dögunum fræðirit um grænan hagvöxt sem heitir "Putting Green Growth at the Heart of Development". Í bókinni er hugtakið útskýrt og hvers vegna þörf sé á grænum hagvexti ásamt rökstuðningi fyrir mikilvægi þess að efla grænan hagvöxt til að tryggja sjálfbærari framtíð í þróunarríkjunum. Fjölmörg dæmi frá 37 löndunum um grænan hagvöxt eru dregin fram í dagsljósið og staðhæft að vaxandi áhugi sé í þróunarríkjunum fyrir slíkum vexti. Einnig er svarað áleitnum spurningum sem brenna á stjórnvöldum í þróunarríkjum.

Í bókinni er ennfremur staðhæft að grænn hagvöxtur sé í raun eina leiðin til að halda uppi hagvexti og þróun til lengri tíma þróunarríkjunum. Bent er á að þróunarríkin komi til með að greiða það háu verði mistakist þeim að bregðast við afleiðingum loftslagsbreytinga á umhverfið því þau séu háðari náttúruauðlindum en aðrar þjóðir.

Höfundar bókarinnar segja að stóra áskorunin sem heimurinn standi frammi fyrir sé að tryggja orku, mat og vatn fyrir níu milljarða jarðarbúa árið 2050 en jafnframt að tryggja að þeir búi við hreint og heilsusamlegt umhverfi.

Tónlistarmenn troða upp í aðdraganda G8 fundarins

Elvis Costello, U2, Will.i.am og Green Day eru meðal þeirra tónlistarmanna og hljómsveita sem slá tóninn í baráttunni gegn fátækt um helgina í aðdraganda leiðtogafundar helstu stórvelda heims, G8 fundarins sem hefst á mánudag í næstu viku í Loch Erne í Belfast á Norður-Írlandi. Tónleikarnir - sem verða í beinni útsendingu á Netinu - eru skipulagðir af ONE samtökunum og kallast: agit8. Samkvæmt frétt The Guardians krefjast tónlistarmennirnir aðgerða gegn hungri og spillingu og á efnisskránni verða klassískir mótmælasöngvar. Til átaka hefur komið í London síðasta sólarhringinn vegna leiðtogafundarins milli mótmælenda og lögreglu og tæplega sextíu hafa verið handteknir. Miklar öryggisráðstafanir eru eins og vænta má á Norður-Írlandi.

Nánar 

-

A good start, but G8 must try harder on accountability/ Devex 

-

ODI On... The G8 at Lough Erne/ ODI 

Rúmlega tíu milljónir barna eru í barnaþrælkun á heimilum utan fjölskyldunnar. Í nýrri skýrslu Alþjóðavinnumálastofnunarinnar - ILO - segir að börnin séu ekkert annað en heimilisþrælar. Alþjóðlegur baráttudagur gegn barnaþrælkun er í dag, 12. júní. Fram kemur í skýrslunni um þrældóm barna á einkaheimilum að þrjú af hverjum fjórum börnum séu stúlkubörn, langflest á aldrinum sex til fjórtán ára eða 6.5 milljónir. Að mati ILO eru börn í barnaþrælkun á einkaheimilum um 5% allra vinnandi ungmenna í heiminum.

Millions of "nowhere children" entrapped in labour across Asia - World Vision calls for urgent action/ Reuters 

-

Over 10 million children 'work in slave-like conditions'/ BBC 

Gsal