|
|
 |
Heimsljós
veftímarit um þróunarmál
|
|
6. árg. 202. tbl.
|
5. júní 2013
|
|
Tólf ný þróunarmarkmið taki við af þúsaldarmarkmiðunum:
Fátækt úr sögunni... ekki síðar en árið 2030
 | | Justice 2015: President Ellen Johnson Sirleaf on the UN's post-2015 Development Agenda |
Þjóðarleiðtogarnir sem Sameinuðu þjóðirnar fólu að leggja drög að nýjum alþjóðlegum þróunarmarkmiðum í baráttunni gegn fátækt birtu á föstudaginn var langþráða skýrslu sína - A New Global Partnership: Eradicate Poverty and Transform Economies Through Sustainable Development. Ljóst er að tillögurnar kalla á flóknar samningaviðræður á næstunni um framhaldið þar sem tekist verður á um ýmsa hagsmuni enda mikið í húfi og niðurstaðan mun að miklu leyti móta framkvæmd þróunarsamvinnu á næstu árum. Nýju þróunarmarkmiðin eru tólf, í stað átta þúsaldarmarkmiða, og eiga að vera uppfyllt árið 2030. Þar ber hæst að útrýma á fátækt í heiminum fyrir árið 2030. Ekki að draga úr eða minnka - útrýma!
Sögulegt tækifæri
Ban Ki-moon framkvæmdastjóri Sameinuðu þjóðanna sagði í ávarpi þegar skýrslan var kynnt í höfuðstöðvum SÞ í New York að þjóðarleiðtogar hafi nú sögulegt tækifæri til að útrýma fátækt og tryggja sjálfbærni og jafnrétti allra jarðarbúa með nýjum þróunarmarkmiðum. Þau gæfu fyrirheit í alþjóðlegri þróunarsamvinnu um nýja tíma þar sem fátækt heyrði sögunni til í heimi framfara, sjálfbærni, jafnréttis þar sem allir gætu borð höfuðið hátt.
Ágætis byrjun, segir fréttaveitan Devex um fyrstu viðbrögð fulltrúa alþjóðasamtaka í þróunar- og mannúðarmálum.
 | |
UN Development Goals: Michael Anderson
|
Rammaáætlunin sem fyrir liggur með afhendingu skýrslunnar felur í sér að mati fréttaskýrenda að þúsaldarmarkmiðin eiga að nást, bæði með því að bæta við tímann og bæta við markmiðum, fylla upp í eyður sem voru í þeim markmiðum með nýjum áhersluatriðum, m.a. hvað atvinnumál, umhverfismál og stjórnarhætti áhrærir. Meðal markmiðanna er að útrýma fátækt að fullu, tryggja að allir hafi aðgang að mat og vatni og menntun og draga úr barna- og mæðradauða, svo dæmi séu nefnd. Yfirmarkmiðin eru tólf en undirmarkmiðin 54 og þar eru áhugaverð atriði eins og að útrýma barnabrúðkaupum, efla tjáningarfrelsið, verja eignarétt, auka gagnsæi í stjórnsýslu og byggja stofnanir sem stuðli að frelsi og framförum í samfélögum.
Skýrslan var afhent Ban Ki-moon framkvæmdastjóra við hátíðlega athöfn að viðstöddum þjóðarleiðtogunum þremur sem hafa leitt undirbúningsferlið, þeim Susilo Bambang Yudhonyono forseta Indónesíu, Ellen Johnson Sirleaf forseta Líberíu og David Cameron forsætisráðherra Breta.
Sneak peek of the post-2015 global development agenda/ Devex
The world's next great leap forward: Towards the end of poverty/ TheEconomist
The Economist explains: How did the global poverty rate halve in 20 years?/ TheEconomist
UN panel calls for end to extreme poverty by 2030 in roadmap for world's top challenges/ WashingtonPost
Why aid transparency matters in the post-2015 framework/ Devex
We're not there yet - why we must keep current MDGs in sight/ Reuters
UN panel's post-2015 goals: 'Promising start' or 'lacking a roadmap'?
The High Level Panel's After 2015 Report: Solid--and that is OK, eftir Lawrence Haddad/ IDS
The UN to monitor Canadian development from 2015?/ OttawaCitizen
The (Old) Panel and the MDGs: Post-2015 Development, eftir Charles Kenny/ CGD
Will the Post-2015 report make a difference? Depends what happens next, eftir Duncan Green og Stephen Hale/ Oxfamblogg
|
|
Ný nálgun á teikniborðinu fyrir fullorðinsfræðslu í Mósambík:
Áform um að útrýma ólæsi í tilteknum héruðum fyrir 2015
 | |
Ólæsi er útbreitt í Mósambík - meðalskólaganga aðeins rúmt eitt ár. Ljósmynd: gunnisal.
|
Samþykkt hefur verið að hefja undirbúning að nýjum fasa í fullorðinsfræðsluverkefninu í Mósambík þar sem ekki verður ráðist á garðinn þar sem hann er lægstur. Áformað er að styðja áætlanir fullorðinsfræðsludeildar Menntamálaráðuneytisins um útrýmingu ólæsis í tilgreindum héruðum fyrir árið 2015. "Undirbúningsferlið sem nú er nýhafið snýr að því að gera nákvæma greiningu á læsi fullorðinna, meðal annars með tilliti til aldurshópa og kyns í tveimur héruðum í Inhambane fylki, Jangamó og Vilankulos, og í framhaldinu gera tillögur um hvernig megi ráðast í þetta stóra átaksverkefni, að fara alla leið að 96% læsi í þessum héruðum með öllum tiltækum ráðum," segir Ágústa Gísladóttir umdæmisstjóri Þróunarsamvinnustofnunar Íslands í Mapútó. Hún bætir við að samsvarandi átaksverkefni hafi verið keyrð áfram í löndum Suður Ameríku og í Indlandi.
Flestir illa læsir eða ólæsir
Þróunarsamvinnustofnun Íslands hefur stutt fullorðinsfræðsluáætlun mósambískra stjórnvalda síðan 2008. Fyrstu tvö árin var lögð sérstök áhersla á læsi og færni í gegnum sérstök hagnýt námskeið (e. lifeskills) í Jangamó héraði í Inhambane sýslu. Að sögn Ágústu reyndist þó ekki mjög árangursríkt að keyra sérstakt verkefni við hlið hins hefðbundna fræðslukerfis stjórnvalda. Á árunum 2010 til 2013 var blaðinu því snúið við og áhersla lögð á að styrkja og bæta námsefni og fullorðinsfræðslukerfi á þremur stjórnsýslustigum - ráðuneyti, fylki og héraði - og þar með styðja við það megin markmiði stjórnvalda í Mósambík að auka læsi í 70% á landsvísu. Talið er að ennþá sé mikill meirihluti fullorðins fólks í landinu illa læs eða ólæs, sérstaklega konur á landsbyggðinni.
"Þetta lélega læsi markast meðal annars af óvenjulega stuttri skólagöngu landsmanna sem er áætluð að meðaltali einungis 1,2 ár og mælist hvergi minni í heiminum," segir Ágústa. "Það þarf vart að taka fram að ólæsi hefur mjög hamlandi áhrif á þátttöku fólks í samfélaginu og aðgengi þeirra að upplýsingum, enda er litið á læsi sem grundvallarmannréttindi. Samkvæmt alþjóðlegum viðmiðum telst þjóð læs ef 96% fullorðinna er læs og skrifandi. Það er því ljóst að verulega þarf að herða róðurinn eigi almennt læsi að nást," segir hún.
Læsi eitt mikilvægasta þróunarverkefnið
Að sögn Ágústu er mikill áhugi hjá stjórnvöldum í Mósambík að ráðast í þetta samstarfsverkefni, Margir háttsettir einstaklingar innan stjórnkerfisins hafa lýst yfir því að læsi sé eitt mikilvægasta þróunarmálefni landsins. "Ljóst er að nauðsynlegt verður að byggja á stuðningi og þátttöku fjölmargra aðila til þess að þessi markmið geti náðst. Það er því líklegt að umtalsverð nýsköpun muni eiga sér stað í útfærslu fullorðinsfræðslu í þessum héruðum og ef vel tekst til getur verkefnið leitt af sér lærdóm og nálganir sem útfæra má víðar í Mósambík," segir Ágústa Gísladóttir í Mósambík.
|
|
Fyrstu þúsund dagar barnsins mikilvægastir:
Næringarskortur barna hefur mikil áhrif á námsgetu
 | |
Forsíða skýrslunnar frá Save The Children.
|
Þrátt fyrir mikinn árangur á síðustu tveimur áratugum í baráttunni við að draga úr barnadauða í fátækum ríkjum deyja enn nítján þúsund börn á hverjum degi af læknanlegum sjúkdómum. Segi og skrifa: 19.000 börn daglega! Samtökin Save The Children draga þessa tölu fram í dagsljósið í árlegri skýrslu sinni um vannæringu og vannærð börn. Í inngangsorðum er vakin athygli á stórkostlegum framförum á liðnum áratugum í málefnum barna en aldrei í sögunni hefur tekist að draga jafn hratt úr barnadauða en frá 1990 til 2011, úr tólf milljónum barna á ári niður í tæplega sjö milljónir. Ennfremur vekja samtökin athygli á því að börnum hafi fjölgað um 40 milljónir í grunnskólum.
Skert lífsgæði
"Vannæring barna ógnar þessum áhrifamiklu framförum," segja skýrsluhöfundar og staðhæfa að dauðsföll 2,3 milljóna barna á ári megi rekja til vannæringar. Ennfremur benda þeir á að vannæring hafi beinar óafturkræfar afleiðingar fyrir þroska barna, ekki síst vitsmunalegan, sem leiði til skertra lífsgæða og kosti samfélög tugi milljarða árlega.
Fram kemur í skýrslunni að framfarir í málefnum barna sem tengjast þúsaldarmarkmiðunum hafi verið miklar á undanförnum árum, 32% í menntun og 23% í heilsu, en á sama tíma hafi framfarir í næringarmálum barna aðeins orðið 13%. Samtökin hvetja þjóðarleiðtoga heims, sem koma saman í þessum mánuði, til þess að grípa einstakt tækifæri og bregðast við þessum vanda og bjarga þannig milljónum barna frá því að verða vannæringu að bráð. "Í þessari skýrslu sýnum við fram á að fjárfesting í næringu barna er ekki aðeins rétta skrefið heldur ávísun á velmegun í framtíðinni," segja höfundar skýrslunnar. Þar vísa þeir í ný gögn sem sýna að fyrstu þúsund dagarnir eru mikilvægastir, frá getnaði fram að öðrum afmælisdegi barnsins. Sé tryggt að barn fái viðhlítandi næringu á þessum tíma eru góðar líkur á því að barnið þroskist og dafni.
Langvarandi afleiðingar vannæringar barna á heilsu og ónæmiskerfi líkamans er vel þekkt en í nýju skýrslunni er nýjar sannanir úr svokallaðri "The Young Life" rannókn á vegum samtakanna sem sýna fram í fyrsta sinn áhrif vannæringar á ólíka námsþætti í ýmsum heimshlutum. Í rannsókninni er fylgst með þrjú þúsund börnum í fjórum löndum gegnum berskuárin, börnum frá Eþíópíu, Indlandi, Perú og Víetnam. Ný greining á svörum úr þessari rannsókn sýna að börn sem frá fæðingu eru vannærð standa námslega mjög illa borið saman við jafnfaldra sína sem fá næringarríkan mat.
Vannærðu börnin eru 7% verri í stærðfræði, þau eru 19% ólíklegri til að lesa einfaldar setningar við átta ára aldur, þau eru 12% ólíklegri til að skrifa einfaldar setningar og 13% ólíklegri til að ná því að sitja í bekk með jafnöldrum.
Malnutrition hits school performance, warns Save the Children/ BBC
Child Malnutrition Costs Global Economy Billions Yearly - Report
End malnutrition now/ FAO
|
Börn með fatlanir í brennidepli stöðuskýrslu UNICEF:
Oft utanveltu, falin og gleymd
 | | The State of the World's Children 2013: Children with Disabilities (ISL) |
Ár hvert kortleggur UNICEF stöðu barna á heimsvísu með útgáfu skýrslunnar State of the World's Children. Í ár var áhersla lögð á börn með fötlun og samkvæmt skýrslunni eru þau börn oft utanveltu, falin og gleymd. UNICEF hvetur til breyttra viðhorfa í þessum efnum enda sé það til hagsbóta fyrir alla.
Í skýrslunni kemur fram að meta þurfi börn með fötlun að verðleikum og meðtaka þau sem mikilvæga þátttakendur í samfélaginu frekar en að einblína á takmarkanir þeirra og sjá þau sem þiggjendur. Breytt viðhorf eru til hagsbóta fyrir alla.
Möguleikum, getu og hæfileikum barna með fatlanir eru oft takmörk sett vegna viðtekinna viðhorfa í samfélaginu, segir í skýrslunni. Oft er einblínt á hvað börnin geta ekki gert frekar en að horfa til þess hvers þau eru megnug. Í skýrslu UNICEF er undirstrikað að börnin sjálf og samfélagið allt nyti góðs af því ef þetta breyttist. "Öll börn eiga ófrávíkjanleg réttindi og fötluð börn eru þar ekki undanskilin. Skapa verður samfélag þar sem allir hafa möguleika á að taka virkan þátt," segja skýrsluhöfundar.
Fram kemur að á heimsvísu hafi börn með fötlun margfalt minna aðgengi að menntun en önnur börn. Almennt eru fátæk börn á meðal þeirra ólíklegustu til að sitja á skólabekk. Bláfátæk börn með fötlun eru enn ólíklegri til að fara í skóla.
"Að einblína á fötlun barns í stað þess að beina sjónum að manneskjunni sjálfri er ekki einungis rangt gagnvart barninu sem um ræðir heldur fer samfélagið um leið á mis við allt sem barnið hefur fram að færa," segir Anthony Lake, framkvæmdastjóri UNICEF.
Don't marginalise children with disabilities, Unicef urges/ TheGuardian
Inclusion of children with disabilities benefits society as a whole/ UNRIC
Where is the best country to be a child?/ TheGuardian
|
|
|
|
Grunnskólanemendur taka á sprett
 | |
Ejaz dreymir um menntun - UNICEF hreyfingin 2013
|
Grunnskólabörn eru þessa dagana víða um land að taka þátt í áheitahlaupi fyrir Barnahjálp Sameinuðu þjóðanna - UNICEF. Markmið verkefnisins er að fræða íslensk börn um þróunarstarf og líf jafnaldra sinna í fátækari löndum og á sama tíma efla skilning þeirra á samhygð og gildi þess að leggja sitt af mörkum til mannúðarstarfa. Eins og segir í lögum um grunnskóla er eitt af hlutverkum hans að stuðla að víðsýni hjá nemendum og efla skilning þeirra á högum fólks og á skyldum einstaklingsins við samfélagið, umhverfið og umheiminn.
|
|
|
|
Ísland fremst í flokki í samningi um alþjóðleg vopnaviðskipti
Rauði krossinn á Íslandi telur að starfsmenn utanríkisráðuneytisins eigi hrós skilið fyrir vasklega framgöngu í samningi um alþjóðleg vopnaviðskipti og vonar að samningurinn verði fullgiltur og innleiddur fljótlega. "Íslenska" ákvæðið um ofbeldi gegn konum og börnum sé nokkuð sem Íslendingar geti verið stoltir af.
Í frétt segir að Rauði krossinn á Íslandi fagni því að íslensk stjórnvöld skuli vera í hópi fyrstu ríkja sem undirrita alþjóðlegan vopnaviðskiptasamning Sameinuðu þjóðanna í New York. Um tímamótasamning er að ræða þar sem í fyrsta sinn er kveðið á um bann við sölu eða flutningi vopna og skotfæra ef minnsti grunur er leikur á að þeim verði beitt til að fremja stríðsglæpi.
"Rauði krossinn fagnar því einnig að íslensk stjórnvöld skuli ekki einungis hafa stutt gerð þessa samnings með ráðum og dáð þegar hann var samþykktur á allsherjarþingi Sameinuðu þjóðanna í apríl, heldur að auki haft frumkvæði um að í honum væri mikilvægt ákvæði sem bannar ríkjum að selja eða miðla vopnum sem verði beitt til að fremja kynbundið ofbeldi eða brot gegn börnum, þar sem slíkt er skýlaust brot á alþjóðlegum mannúðar- og mannréttindalögum. Þetta er í fyrsta sinn sem tengslin milli vopnaviðskipta og kynbundins ofbeldi er viðurkennt í alþjóðasamningi," segir í fréttinni.
Nánar
Alþjóðasamningur um vopnaviðskipti undirritaður hjá SÞ/ Utanríkisráðuneytið
|
|
|
|
-
-
-
-
-
-
-
-
-
-
-
-
-
|
|
|
|
Fréttir og fréttaskýringar
|
|
-
-
-
-
-
-
-
-
-
-
-
-
-
-
-
-
-
-
-
-
-
|
|
|
|
|
|
|
|
|
|
Nemendur Jafnréttisskólans kynntu lokaverkefni
Nemendur Jafnréttisskóla Háskóla Sameinuðu þjóðanna kynntu lokaverkefni sín þann 29. maí sl. í Háskóla Íslands. Lokaverkefni þeirra tókust á við margskonar viðfangsefni, s.s. heimilisofbeldi, foreldrajafnrétti og konur og smálánakerfi. Útskrift nemanna fór fram tveimur dögum síðar en þá luki átta nemar frá Malaví, Mósambík, Palestínu og Úganda námi.
 | |
Gender Equality Studies and Training Programme - Fellows 2013
|
Tveir nemar fengu Vigdísarverðlaunin fyrir framúrskarandi lokaverkefni, þau Alberto Cumbi frá Mósambík og Chikondi Manyungwa frá Malaví. Vigdís Finnbogadóttir afhenti verðlaunin en hún hefur verið verndari Jafnréttisskólans frá stofnun hans árið 2009. Þetta var fimmta útskrift Jafnréttisskólans en sú fyrsta síðan að hann varð opinberlega hluti af Háskóla Sameinuðu þjóðanna. Jafnréttisskólinn á von á næsta hóp nemenda í janúar 2014 og verða þeir um 15 talsins. Hér til hliðar er kynningarmyndband um Jafnréttisskóla Háskóla Sameinuðu þjóðanna sem einn af nemendum skólans, Abrar Jaber, gerði fyrir skömmu. Skólinn er sem kunnugt er einn fjögurra skóla Háskóla Sameinuðu þjóðanna sem starfræktur er hér á landi. Hinir skólarnir eru Jarðhitaskólinn, Sjávarútvegsskólinn og Landgræðsluskólinn.
|
|
|
Alið á tortryggni og efasemdum um gildi þróunarsamvinnu í skólum
- eftir Gunnar Salvarsson útgáfu- og kynningarstjóra Þróunarsamvinnustofnunar Íslands
 | |
Ljósmynd frá Úganda: gunnisal.
|
Hvaða kröfur er réttmætt að gera til námsefnis í skólum? Ætti ekki lágmarkskrafan að vera sú að námsefnið sé sett fram á tiltölulega hlutlausan upplýsandi hátt þar sem ólíkum sjónarmiðum er komið á framfæri öfgalaust? Eigum við, segjum bara sem foreldrar, að láta bjóða börnum okkar neikvæðan einhæfan áróður í námsbókum?
Tilefni þessara hugleiðinga er þetta: Á fjörur mínar rak leshefti úr einum af framhaldsskólum landsins fyrir námsáfangann ALÞ102, tekið saman af kennurum í alþjóðafræði við skólann. Mér sýnist að í heftinu sé ýmiss konar samtíningur úr öðrum ritum - án heimildaskrár eða efnisyfirlits - um hnattvæðingu, alþjóðastofnanir, þróunarlönd og iðnríki svo dæmi séu nefnd. Og þarna er kafli um þróunarsamvinnu þar sem tönnlast er á orðinu "gagnrýni" á hverri blaðsíðu - alið á tortryggni í garð þróunarsamvinnu og sáð efasemdum um gildi hennar. Er það í þessum anda sem við sem þjóð viljum uppfræða unga fólkið um veröldina sem við lifum í og þátt okkar ríku þjóðanna í baráttunni gegn fátækt og ójöfnuði?
Gagnrýni, gagnrýni, gagnrýni...
Kaflinn sem um ræðir er tekinn upp úr bókinni Ríkar þjóðir og snauðar efnir Hannes Í. Ólafsson og yfirskrift hans er: Gagnrýni á þróunarsamvinnu. Eftir inngangskafla sem heitir Upphaf þróunarsamvinnu koma eftirfarandi undirkaflar: Almenn gagnrýni á þróunarsamvinnu; Gagnrýni nútímavæðingarsinna; Gagnrýni átakasinna; Gagnrýni populista; Dæmi um misheppnaða aðstoð með rammakaflanum Hvítir fílar, sem eins og fram kemur í textanum táknar "gjöf sem erfitt er að afþakka, lítið gagn er að henni og sem hugsanlega reynist þiggjanda mikill baggi," eins og segir orðrétt.
Ekkert gagn
Fyrir utan margar staðhæfingar í textanum sem orka tvímælis er ljóst að hann er löngu úreltur. Rúmlega tíu ár eru liðin frá því hann var skrifaður og framfarir í þróunarríkjunum hafa einmitt verið miklar síðasta áratuginn, ekki síst vegna alþjóðlegrar þróunarsamvinnu. Allar tölfræðilegar upplýsingar eru breyttar og hugtakanotkun hefur breyst, svo og aðferðir og nálganir í þróunarsamvinnu. Bókin er auðvitað barn síns tíma, en það breytir því að höfundurinn leitast ekki við að skapa samkennd með fólki í þróunarríkjunum, forðast er að ræða um aðstæður fólks, ólæsi, skort á hreinu vatni, sjúkdóma og annað sem einkennir samfélög þar sem unnið er að þróunarsamvinnu. Höfundurinn leggur áherslu á kenningar fræðimanna um fátækt, hvað er ólíkt með ríkjum í norðri og suðri, en niðurstaðan sem nemandinn á að komast að er skýr: þróunarsamvinna gerir ekkert gagn.
Sá ákjósanlegi jarðvegur sem þarf til að skapa áhuga, samkennd og vitund um annað fólk í veröldinni, kynnast kjörum fólks í fjarlægum löndum, lífsháttum, menningu, mannréttindum og svo framvegis verður að byggja á öðru en áróðskenndri andúð á þróunarsamvinnu eins og birtist í þessari kennslubók, sem vel að merkja, virðist vera það námsgagn sem flest íslensk ungmenni fá í hendur og eiga að tileinka sér. Ef þetta er veganestið sem ungt fólk á Íslandi fer með út í lífið eftir er auðvitað ekki að undra að eitthvað skorti á stuðning við þróunarsamvinnu hér á landi.
|
|
|
|
|
|
Afríka kallar: Þrjár stöður starfsnema auglýstar
 Þróunarsamvinnustofnun Íslands auglýsir eftir ungu háskólafólki sem hefur áhuga á 4 mánaða starfsþjálfun í tengslum við verkefni á sviði þróunarsamvinnu í þremur samstarfslöndum stofnunarinnar. Starfstími á vettvangi er frá 16. ágúst til 15. desember, með möguleika á framlengingu í allt að einn mánuð á heimaskrifstofu stofnunarinnar í Reykjavík. Hæfniskröfur: Umsækjendur skulu hafa lokið grunnnámi í háskóla (BA, BSc eða sambærilegri gráðu) og ekki vera eldri en 33 ára. Mjög góð enskukunnátta er skilyrði, þar á meðal geta til að skrifa góðan texta, góð tölvukunnátta og undirstöðuþekking í aðferðafræði. Gerð er krafa um sjálfstæð vinnubrögð, ábyrgð, áreiðanleika og lipurð í mannlegum samskiptum. Þekking á þróunarmálum, þróunarstarfi og afrískri menningu er ákjósanleg. Verkefni starfsnema í Malaví: Tilfallandi verkefni á skrifstofu eða fyrir þróunarverkefni stofnunarinnar. Meðal helstu verkefna er upplýsingaöflun í tengslum við áætlanagerð, greining og úrvinnsla gagna og aðstoð við tölfræðilegan samanburð á grunnskólum. Verkefni starfsnema í Mósambík: Tilfallandi verkefni á skrifstofu eða fyrir þróunarverkefni stofnunarinnar. Meðal helstu verkefna er upplýsingaöflun í tengslum við áætlanagerð, greining og úrvinnsla gagna og aðstoð við undirbúning menntaverkefna. Kunnátta í portúgölsku eða spænsku er nauðsynleg. Verkefni starfsnema í Úganda: Tilfallandi verkefni á skrifstofu eða fyrir þróunarverkefni stofnunarinnar. Meðal helstu verkefna er upplýsingaöflun í tengslum við áætlanagerð, greining og úrvinnsla gagna og aðstoð við undirbúning og skipulag. Umsóknir skulu hafa borist skrifstofu Þróunarsamvinnustofnunar Íslands fyrir 6. júní nk. Rauðarárstíg 27, 105 Reykjavík, s. 5458980, iceida@iceida.is |
 |
|
|
 |
UM HEIMSLJÓS
Heimsljós - veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu ÞSSÍ. Skráið ykkur í áskrift á heimasíðunni, www.iceida.is og látið vinsamlegast aðra með áhuga á þróunarmálum vita af tilvist veftímaritsins. Allar ábendingar um efni eru vel þegnar. Þeir sem vilja senda okkur ábendingu um efni eða afskrá sig af netfangalista eru vinsamlegast beðnir um að senda slík erindi á netfangið iceida@iceida.is. Ritstjóri er Gunnar Salvarsson, gsal@iceida.is . Við biðjumst velvirðingar á því að geta ekki notað íslenskar gæsalappír í viðtölum en bandarískt sniðmót Veftímaritsins leyfir ekki notkun þeirra. Bestu kveðjur, Útgáfu- og kynningardeild ÞSSÍ
| | ISSN 1670-8105 |
|
|
