| Bylgja framfara í málefnum heyrnarlausra í Namibíu verður ekki stöðvuð
- vel heppnaðri ráðstefna um menntun heyrnarlausra nýlokið |
Vilhjálmur Wiium umdæmisstjóri ÞSSÍ í Namibíu og og Alfred Ilukena ráðuneytisstjóri menntamála í Namibíu. |
"Samstarfsverkefni undanfarinna ára hefur komið af stað þvílíkri bylgju framfara í málefnum heyrnarlausra að hún verður vart stöðvuð. Þegar er ábyrgð margra þátta verkefnisins komin í hendur namibískra stofnana og samtaka," sagði Vilhjálmur Wiium umdæmisstjóri Þróunarsamvinnustofnunar Íslands í lok tveggja daga ráðstefnu í Namibíu um menntun og atvinnumál heyrnarlausra. Hann hafði þá verið inntur eftir því hvort framfarir í málefnum heyrnarlausra myndu stöðvast þegar þróunarsamvinnu Íslendinga og Namibíumanna lýkur um næstu áramót.
Ráðstefnan var hluti af samstarfsverkefni ÞSSÍ og menntamálaráðuneytis Namibíu. Verkefninu, sem staðið hefur yfir frá 2007, lýkur í árslok og á ráðstefnunni var meðal annars litið yfir farinn veg og metið hversu vel hefði tekist að ná þeim markmiðum sem upphaflega voru sett. Megintilgangurinn var þó að ræða atvinnumál heyrnarlausra í landinu og leggja fram tillögur um hvernig auka mætti atvinnutækifæri þeirra.
Vilhjálmur ávarpaði ráðstefnugesti, tæplega 100 talsins, og gerði grein fyrir helstu áföngum sem náðst hafa á undanförnum árum. "Ég nefndi sem dæmi að heyrnarlausum framhaldsskólanemum nú veitt túlkaþjónusta í almennum framhaldsskóla, en áður fyrr höfðu heyrnarlausir ekki tækifæri á að ljúka stúdentsprófi," segir Vilhjálmur. "Heyrnleysingjaskólar landsins bjóða nefnilega ekki upp á síðustu tvö ár náms til stúdentsprófs. Einnig eru um 40 kennaranemar skráðir á táknmálssvið í sínu kennaranámi. Þegar þeir fyrstu úr þeim hópi fara að kenna árið 2012 verða vatnaskil í menntun heyrnarlausra. Það verður í fyrsta sinn í Namibíu sem kennarar heyrnarlausra hafa menntun í táknmálsfræðum áður en þeir hefja kennslustörf."
|
Leiðin út úr fátækt er að draga úr barneignum:
Barnafjöld njörvar fólk niður í fátækt |
Barnsfæðingum hefur fækkað lítið í Afríku - konur í Úganda eiga að meðaltali 6.7 börn. Ljósmynd: gunnisal |
Sérfræðingar telja að draga muni úr mannfjölgun í heiminum árið 2080. Engu að síður er þegar ljóst að barnsfæðingum hefur fækkað á síðustu áratugum. Fyrir fjörutíu árum eignaðist hver kona í heiminum að meðaltali 4,7 börn en þessi tala er í dag komin niður í 2,6 börn. Fækkun barneigna er mest í Asíu og Suður-Ameríku en afrískar mæður hlaða enn niður börnum í miklum mæli.
Politiken í Danmörku greinir frá þessu og vísar í nýja skýrslu SÞ. Blaðið segir að á leiðtogafundinum um þúsaldarmarkmiðin - sem haldinn verður í New York síðar í mánuðinum - verði barneignir ofarlega á dagskrá því barnafjöld njörvi fólk niður í fátækt.
Blaðið hefur eftir Siri Teller mannfjöldafræðingi að sex af sjö milljörðum jarðarbúa búi í löndum þar sem fæðingartíðni er svo lág að hún stuðlar að því að draga úr fátækt. Nú sé aðeins síðasti milljarðurinn eftir.
"Á áttunda áratugnum trúðu menn því að fátækir myndu ekki draga úr barneignum fyrr en þeir yrðu ríkir. Kenningin stóðst ekki því konur í löndum eins og Bangadesh og Nepal drógu verulega úr barneignum þegar þær voru sárafátæktar. Aðrir héldu því fram að heppilegast væri að senda B52 sprengiflugvélar og kasta niður smokkum til þeirra þjóða þar sem fæðingartíðnin var mest. Nú vitum við að þetta er samspil margra þátta," hefur blaðið eftir henni.
Siri segir í viðtalinu í Politiken að heilsa skiptir miklu máli í þessu sambandi. Dæmin frá Bangladesh og Nepal sýni að þegar fleiri börn komast á legg fækki barneignum. "Það skiptir líka miklu máli að konurnar fái menntun og tækifæri til að ákveða sjálfar hversu mörg börn þær vilja eignast."
|
| Helmingur auðæva milljarða-mæringa til góðargerðarmála |
Auður auðkýfinga gæti breytt miklu í fátækustu löndum heims. Ljósmynd: gunnisal |
Enn sem komið virðast auðkýfingar annarra þjóða en Bandaríkjanna verið lítt hrifnir af þeirri hugmynd Warren Buffets og Bill Gates að gefa helming auðæva sinna til mannúðarmála. Fjörutíu bandarískir auðkýfingar hafa tekið áskorun þessara tveggja auðjöfra (sem eru í 2. og 3. sæti á lista Forbes yfir ríkustu menn heims) en þeir hófu í sumar herferð undir yfirskriftinni "The Given Pledge" þar sem bandarískir milljarðamæringar voru hvattir til þess að skuldbinda sig til að láta að minnsta kosti helming auðæva renna til góðgerðarmála.
"Á líkklæðum eru engir vasar," segir gamalt íslenskt orðtak og víst eru það eru gömul og ný sannindi að menn fæðast og deyja allslausir. Um miklar fjárhæðir er að tefla í vösum auðkýfinganna bandarísku því samkvæmt Forbes tímaritinu sem sló tölu á auð fjörutíu ríkustu einstaklinganna vestanhafs nemur fjárhæðin 1200 milljörðum. Til góðgerðarmála gætu því runnið um 600 milljarðar dala og margt hægt að láta gott af sér leiða fyrir slíka fjármuni.
Við bíðum eftir yfirlýsingum íslenskra auðmanna. Hver ætlar að verða fyrstur...?
|
| Mikil umræða um þúsaldar-markmiðin í aðdraganda leiðtogafundarins í New York |
Leiðin að þúsaldarmarkmiðunum styttist en hvort þeim verði náð eftir fimm ár er spurningin sem fjallað verður um á leiðtogafundinum síðar í mánuðinum. Ljósmynd: gunnisal |
Leiðtogafundur um stöðu þúsaldarmarkmiðanna verður haldinn í New York dagana 22. til 25. september en nú eru rétt tíu ár liðin frá því Þúsaldaryfirlýsingin var samþykkt. Jafnframt eru aðeins rúm fimm ár til stefnu til að uppfylla markmiðin og ljóst að örðugt mun reynast að ná þeim öllum. Á sumum sviðum hefur mikill árangur náðst, t.d. í því að tryggja menntun grunnskólabarna og á ýmsum sviðum í heilbrigðismálum, m.a. í baráttunni gegn alnæmi, malaríu og barnadauða. Hins vegar skortir mikið á að þúsaldarmarkmiðin sem tengjast mæðrum og jafnréttisbaráttu séu á réttri leið.
Mikil umræða fer nú fram í aðdraganda leiðtogafundarins um þúsaldarmarkmiðin eins og sjá má á meðfylgjandi krækjum.
The Millennium Development Goals Report 2010
Umræðuvefur um þúsaldarmarkmiðin (UN og Devex) UN Summit focuses on mothers and babies CELEBRATE, INNOVATE AND SUSTAIN: Toward 2015 and Beyond -The United States' Strategy for Meeting the illennium Development Goals
Jeffrey Sachs Charts the Way Forward for MDGs Ahead of UN Summit (TheCommonwealth) World leaders urged to `hold the line' (Sydney Morning Herald)
Mothers, babies need help: UN summit (Sydney Morning Herald) |
| Stjórnarandstaðan í Svíþjóð kynnir stefnu í þróunarmálum |
Útrýming fátæktar efst á blaði hjá stjórnarandstöuðunni í Svíþjóð. Ljósmynd: gunnisal |
Svíar ganga til kosninga 19. september næstkomandi og samkvæmt skoðanakönnunum er lítill munur á fylgi stjórnarflokkanna og stjórnarandstöðunnar. Rauðgræna bandalagið er í stjórnarandstöðu og þar er Jafnaðarmannaflokkinn fremstur meðal jafninga. Bandalagið hefur gefið út og samþykkt stefnu í þróunarmálum: "Rauðgræn þróunarstefna - Réttlátur heimur er mögulegur". Samkvæmt stefnunni hyggst Rauðgræna bandalagið leggja áherslu á eftirfarandi atriði komist það til valda:
- Útrýming fátæktar í forgang
- Verkefni tengd þúsaldarmarkmiðunum í forgang
- Tryggja að amk 1% af vergum þjóðartekjum fari til þróunarmála
- Tryggja að fjármunir til þróunarmála fari raunverulega til þróunarmála
|
|
 Um Veftímaritið
Veftímarit um þróunarmál er gefið út af Þróunarsamvinnu-stofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu ÞSSÍ.
Skráið ykkur í áskrift á heimasíðunni, www.iceida.is og látið vinsamlegast aðra með áhuga á þróunarmálum vita af tilvist veftímaritsins. Allar ábendingar um efni eru vel þegnar.
Þeir sem vilja senda okkur ábendingu um efni eða afskrá sig af netfangalista eru vinsamlegast beðnir um að senda slík erindi á netfangið iceida@iceida.is. Ritstjóri er Gunnar Salvarsson, gsal@iceida.is.
Við biðjumst velvirðingar á því að geta ekki notað íslenskar gæsalappír í viðtölum en bandarískt sniðmót Veftímaritsins leyfir ekki notkun þeirra.
Bestu kveðjur, Útgáfu- og kynningardeild ÞSSÍ
|
|
|
| Alvarlegar róstur í Mapútó - sex fallnir |  |
Róstur voru í Mapútó höfðuborg Mozambík í morgun þegar herskáir borgarbúar settu upp vegatálma, brenndu dekk, hrópuðu slagorð gegn stjórnvöldum og grýttu lögreglu. Tilefni mótmælanna eru nýtilkomnar verðhækkanir, meðal annars 30% hækkun á rafmagni og 20% hækkun á vatni. Hermt er að sex hafi fallið í átökunum í morgun þar af tvö börn.
Umdæmisskrifstofa ÞSSÍ í Mapútó sem jafnframt er sendiráð Íslands var lokað líkt og öðrum sendiráðum í borginni eftir að götuóeirðirnar hófust á þremur stöðum í borginni.
|
| Gerbreytt stefna Breta í þróunarmálum? |  |
Stjórnvöld í Bretlandi áforma að breyta stefnu í þróunarmálum á þann veg að öll verkefni taki mið af þjóðaröryggismálum Breta að því er fram kemur í trúnaðarskjölum sem láku á Netið og fjölmiðlar í Bretlandi hafa birt. Fulltrúar Verkamannaflokksins gagnrýna harðlega fyrirhugaða breytingu en meðan flokkurinn var í stjórn setti hann á laggirnar Þróunarsamvinnustofnun (Department for International Development, DFID) til að sinna þróunarverkefnum á forsendum viðtökuríkis - ekki á forsendum þjóðaröryggismála Breta.
|
| Starfsmönnum fækkað um 150 hjá SIDA | |
Sænska þróunarsamvinnustofnunin, SIDA, hefur neyst til að segja upp 150 starfsmönnum sökum þess að stofnunin fór stórlega fram úr fjárlagaheimildum á síðasta ári. Charlotte Petri Gornitzka, settur framkvæmdatjóri, tilkynnti um uppsagnirnar á starfsmannafundi á dögunum, en hún tók við daglegri stjórnun SIDA í maí eftir að Gunnilla Carlsson þróunarmálaráðherra vék Anders Nordström framkvæmdastjóra SIDA úr starfi.
Starfsmenn SIDA verða 550 talsins eftir að allar uppsagnirnar hafa tekið gildi um næstu áramót. Allir sviðs- og deildarstjórar koma til með að þurfa að sækja á ný um stöður sínar. Flestar uppsagnirnar ná til starfsmanna á vegum SIDA sem starfa í Svíþjóð en störf á vettvangi verða varin. Einnig kemur fram í fréttum að SIDA muni leggja áherslu á að stýra framkvæmd verkefna en láta öðrum eftir stefnumörkun.
|
| Fréttir og fréttaskýringar | |
|
| Veftímaritið er á... | 
|
Flóðin í Pakistan:
Fjórar milljónir barna og hundrað þúsund konur í bráðri hættu
|  |
Samkvæmt nýjustu áætlunum stjórnvalda í Pakistan hafa um 20 milljónir íbúa orðið fyrir áföllum í kjölfar flóðanna. Af þeim eru yfir átta milljónir barna undir 18 ára aldri, að því er fram kemur á vef UNICEF á Íslandi. Þar segir: "Fjórar milljónir þeirra eru í mikilli hættu á að smitast af vatnsbornum sjúkdómum á borð við blóðkreppusótt, niðurgang og kóleru, auk mislinga og mænusóttar. Hætta er á að ástandið versni enn frekar ef alþjóðasamfélagið eykur ekki stuðning við neyðaraðgerðir." |
| Danir vilja efla háskólarannsóknir í þróunarríkjum | |
Danir hafa ýtt úr vör átaki í því skyni að efla rannsóknir á háskólastigi í þróunarlöndum. Um er að ræða samstarfsverkefni allra danskra háskóla undir yfirskriftinni "Building Stronger Universities" og lýtur fyrst og fremst að rannsóknum í hugvísindum og félagsvísindum. Samkvæmt fjárlögum næsta árs áformar danska ríkisstjórnin að verja til verkefnsins 56 milljónum danskra króna á næstu tveimur árum og 90 milljónum króna næstu tvö ár þar á eftir.
|
|
Skoðanakönnun í Noregi: Þróunarfé í þágu barna |  |
Norðmenn vilja að þróunarfé sé fyrst og fremst nýtt til þess að styðja börn til menntunar í fátækum löndum, að framlögum sé varið til þess að bæta heilsu barna og hjálpa þeim í náttúruhamförum. Þetta kemur fram í nýrri skoðanakönnun í Noregi þar sem leitað var eftir viðhorfum almennings til þess hvernig þróunarfé er varið. Barnaheill í Noregi stóð fyrir könnuninni.
|
|
|
