|
Kæri lesandi
Um leið og beðist er velvirðingar á því að útgáfa Veftímaritsins í þessari viku hefur dregist um tvo daga er rétt að benda á skýringuna: tólf síðna upplýsingarit um þróunarmál sem fylgir Fréttblaðinu í dag og kallast einfaldlega ÞRÓUNARMÁL. Í ritinu er höfuðáherslan lögð á viðtakendur í samstarfslöndum Íslendinga og árangur þróunarsamvinnu . Efni þessa Veftímarits er að mestu tilvísanir í greinar og fréttir sem birtast þar. - Ritstj. |
Össur Skarphéðinsson utanríkisráðherra:
Engin þjóð hefur rétt til
að halda að sér höndum | 
"Hnitmiðuð þróunarsamvinna er hluti af einbeittri viðleitni okkar til að byggja upp traust á Íslandi á nýjan leik og sýna í verki, að við látum okkur varða um hag þeirra verst settu í heiminum," segir Össur Skarphéðinsson utanríkis-ráðherra í grein í upplýsingariti Þróunarsamvinnustofnunar sem fylgdi Fréttablaðinu í morgun.
Grein untanríkisráðherra heitir "Réttum hjálpandi hönd" og hefst á þessum orðum:
"Í miðri kreppunni eru Íslendingar eðlilega uppteknir af þeim efnahagslegu hamförum sem skelltu bankakerfinu og lögðu í einu vetfangi fjötra skulda á þúsundir fjölskyldna. Annars staðar í heiminum ganga þó á sama tíma yfir hljóðlátar hamfarir örbirgðar sem á degi hverjum leggja í valinn þúsundir barna. Kastljós fjölmiðla leikur ekki um þá nöturlegu staðreynd að hvern einasta dag deyja um 24 þúsund börn yngri en fimm ára af völdum sjúkdóma og fátæktar víðs vegar um heiminn. Á tveggja vikna fresti sviptir skortur og örbirgð því fast að 350 þúsund lítil börn lífinu, eða fleiri en alla íbúa Íslands.
Engin þjóð, ekki heldur þjóð í tímabundinni kreppu, hefur siðferðilegan rétt til að halda að sér höndum. Öllum ber skylda til að reyna af fremsta megni að rétta þeim hjálparhönd, sem ekki geta borið hönd fyrir höfuð sér, og njóta ekki einu sinni þess sjálfsagða réttar að fá að byrja lífið sem þeim þó var gefið í vöggugjöf. Þess vegna tekur Ísland þátt í alþjóðlegri mannúðarhjálp og þróunarstarfi - jafnvel þó að við glímum við efnahagskreppu."
Þróunarmál - bls. 12 |
| Búið að bora síðustu sjö vatnsbólin í þágu Ovahimba | 
Boraðar hafa verið sjö síðustu holurnar fyrir Ovahimba, hirðingaþjóðflokkinn í Norður-Namibíu, sem fær frá Íslendingum 33 vatnsból áður en Þróunarsamvinnustofnun kveður landið eftir tuttugu ára samvinnu. Síðustu vatnsbólin verða afhent síðar á árinu. Gunnar Salvarsson kynningarstjóri ÞSSÍ fór með Davíð Bjarnasyni verkefnastjóra í Namibíu á fund Himbanna, eins og þeir kallast í daglegu tali, og hitti m.a. Kanjokatungu Tjiumbua sem er starfandi vatnsnefndarformaður í Etara.
"Vatnsbólin hafa breytt miklu fyrir okkur," segir hún á máli Ovahimba sem kallast otjihimba. "Áður fyrr þurftum við konurnar að ganga langa leið eftir vatni og karlarnir að fara um langan veg með búpeninginn eftir vatni. Við erum því afar þakklát fyrir vatnsbólið."
Hún segir að hreina vatnið hafi líka breytt miklu um heilbrigði fólks, sérstaklega meðal barna. "Áður urðum við að drekka yfirborðsvatn á regntímanum en nú getum við sótt hreint vatn í vatnsbólið og það breytir miklu," segir hún og bætir við að hún fari þrisvar á dag að sækja vatn, að morgni, um miðjan dag og síðdegis.
Gjaldkerar hafa verið skipaðir við vatnsbólin og Kanjokatunga Tjiumbuasegir að þeir greiði sem hafi efni á því. Hún segir að gjaldkerinn geymi peningana en stefnt sé að því að stofna reikning um vatnsskattinn.
Frásögnin "Á ferð um Himbahéruð í leit að vatni" birtist í upplýsingariti Þróunarsamvinnustofnunar sem fylgdi Fréttablaðinu í morgun og myndin er Kanjokatungu með ungan son á bakinu.
|
| Höfðinginn vill koma til Íslands og þakka fyrir sig | 
"Fólkið hér nýtur nú betri heilsu en nokkru sinni fyrr vegna hreins og ómengaðs vatns og betrumbættra hreinlætisvenja og aðstöðu. Ólæsi er að þurrkast út vegna skólanna sem hafa verið byggðir og börnin okkar njóta nú menntunar. ÞSSÍ hefur byggt sjúkrahús og heilsugæslustöðvar og fólk fær þar aðhlynningu. Mannslífum er bjargað. Svo við sjáum árangurinn afar greinilega. Það er þess vegna sem ég vil ekki fyrir nokkra muni að ÞSSÍ yfirgefi okkur," segir Welemu Masina, höfðingjann af Nankumba í viðtali við Levi Soko, aðstoðarverkefnisstjóra ÞSSÍ í Malaví.
Höfðinginn lýsir því í viðtalinu að hann vilji koma til Íslands og þakka fyrir sig, fyrir hönd íbúanna í Nankumba sem eru vel á annað hundrað þúsund.
|
|
Auður í Afríku - og systur hennar: Setja ætti skilyrði um þátttöku kvenna í öllum verkefnum | 
"Þar sem rík áhersla er nú lögð á eignarhald heimamanna á öllu þróunarstarfi má færa gild rök fyrir því að setja þurfi skilyrði um þátttöku kvenna í öllum þróunarverkefnum og á öllum stigum þróunarstarfsins," segja þær Þórdís Sigurðardóttir og Ágústa Gísladóttir í grein í ÞRÓUNARMÁl, upplýsingariti Þróunarsamvinnustofnunar sem fylgdi Fréttablaðinu í morgun.
Þórdís og Ágústa starfa báðar á aðalskrifstofu ÞSSÍ og hafa langa reynslu af þróunarmálum. "Sjónarhóll kvenna er í mörgum tilvikum annar en karla, þær hafa reynslu og þekkingu sem kemur úr annarri átt. Þær geta varið hagsmuni sína, lagt mat á hvað stendur í vegi fyrir sanngjörnum ávinningi þeirra af einstökum verkefnum og komið með lausnir," segir m.a. í greininni sem ber yfirskriftina "Auður í Afríku - og systur hennar".
|
|
Stefán Jón Hafstein skrifar frá Malaví: Svona er að búa í fátæku landi | 
Stefán Jón Hafstein umdæmisstjóri ÞSSÍ í Malaví dregur upp mynd af landinu þar sem hann býr í grein í upplýsingariti Þróunarsamvinnustofnunar sem fylgdi Fréttablaðinu í morgun. "Svona er að búa í fátæku landi" heitir greinin og hefst á þessa leið:
"Hvernig birtist fátækt í daglegu lífi í landi eins og Malaví? Götur höfuðborgarinnar eru skörðóttar og holóttar, þar eru gangstéttar fátíðar og götulýsing næstum engin. Byggðir eru dreifðar og mest kofar á mismunandi stigum, þótt sæmileg millistéttarhverfi birtist inni á milli. Símkerfi virkar illa, rafmagnsskortur setur svip á daglegt líf, enda er heildarframleiðsla í 13 milljóna manna landi minni en nemur hálfri Kárahnjúkavirkjun; sex prósent íbúa hafa aðgang að rafmagni.
Vegir eru slæmir, lítill bílafloti heimamanna einkennist af hræjum sem varla eru ökufær og umferðarslys eru með því mesta sem um getur í heiminum. Aðkomumaður tekur strax eftir hve vélvæðing er skammt komin, fólk gengur langar leiðir með byrðar eins og vatn og eldivið, eitt reiðhjól ber fjögurra manna fjölskyldu eða hlaða af kolapokum. Heimili alls þorra fólks eru leirkofar með stráþökum þar sem getur verið langt í næsta vatnsból og hreinlætisaðstaða lítil sem engin. Þótt fólk sé almennt hreinlegt eru fötin slitin og skór þess þættu óvíða boðlegir, enda margir berfættir. Konur klæðast mikið litríkum lendaklæðum en samsetning hjá hinum almenna karlmanni minnir mest á flóamarkað."
|
|
|
|
|
| Auglýst eftir tveimur háskólanemum í starfsþjálfun |  |
Þróunarsamvinnustofnun auglýsir eftir ungu háskólafólki sem hefur áhuga á 4 mánaða starfsþjálfun í tengslum við verkefni á sviði þróunarsamvinnu í tveimur samstarfslöndum í Afríku, Malaví og Mósambík. Starfstími er 16. ágúst til 15. desember.
Umsækjendur skulu hafa lokið grunnnámi í háskóla (BA, BSc eða sambærilegri gráðu), á sviðum þjóðfélagsfræða eða umhverfis- og auðlindamála og ekki vera eldri en 32 ára. Mjög góð enskukunnátta er skilyrði, sem og góð tölvukunnátta og undirstöðuþekking í aðferðafræði. Gerð er krafa um sjálfstæð vinnubrögð, þolinmæði og lipurð í mannlegum samskiptum. Þekking á þróunarmálum, þróunarstarfi og menningu heimshlutans er ákjósanleg.
|
| Veftímaritið er á... | 
Kíktu í heimsókn |
| Dæmdir í fjórtán ára þrælkunarvinnu | |
Tveir samkynhneigðir karlmenn í Malaví voru í vikunni sakfelldir og dæmdir í fjórtán ára þrælkunarvinnu en þeir hafa setið í varðhaldi frá því seint í desember þegar þeir tilkynntu um trúlofun sína. Dómurinn hefur víða í heiminum verið fordæmdur og ýmsir fjölmiðlar draga fram þá staðreynd að 40% af fjárlögum ríkisins kemur erlendis frá sem þróunarfé. Hvíta húsið fordæmi dóminn í gærkvöldi í sérstakri yfirlýsingu.
|
| Um Veftímaritið |  |
Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu ÞSSÍ.
Skráið ykkur í áskrift á heimasíðunni, www.iceida.is og látið vinsamlegast aðra með áhuga á þróunarmálum vita af tilvist veftímaritsins. Allar ábendingar um efni eru vel þegnar.
Þeir sem vilja afskrá sig af netfangalista, eða senda okkur ábendingu um efni, eru vinsamlegast beðnir um að senda slík erindi á netfangið iceida@iceida.is. Ritstjóri er Gunnar Salvarsson, gsal@iceida.is.
Við biðjumst velvirðingar á því að geta ekki notað íslenskar gæsalappír í viðtölum en bandarískt sniðmót Veftímaritsins leyfir ekki notkun þeirra.
ATH! Þetta er síðasta tölublað Veftímaritsins fyrir sumarleyfi. Við tökum aftur upp þráðinn síðsumars.
Bestu kveðjur,
Útgáfu- og kynningardeild ÞSSÍ |
|
|
