Ársskýrsla OECD um þróunarsamvinnu
Mikið verk óunnið fram til ársins 2015 - breytingar boðaðar á DAC | 
OECD hefur gefið út ársskýrslu um þróunarsamvinnu - Development Co-operation Report 2010 - sem er árlegt höfuðrit tölfræði og greiningar á alþjóðlegri þróunarsamvinnu. Í formála ritsins er áhersla lögð á þau miklu verk sem óunnin eru á þeim fimm árum sem þjóðir heims hafa til að ná þúsaldarmarmiðunum. Þar segir að verkefnið hafi orðið enn erfiðara en ella í ljósi efnahagskreppu, hækkunar á verði matvæla og loftslagsbreytinga. Í skýrslunni er því lýst hvernig DAC (þróunarsamvinnunefnd OECD) hefur brugðist við í snatri og sett þessi alvarlegu mál á dagskrá. Jafnframt hafi veitendur þróunaraðstoðar verið hvattir til að halda vöku sinni og hvika ekki frá settum vilyrðum um framlög ásamt því að veita fjármagni til þróunarsamvinnu með skilvirkari hætti.
Í skýrslunni segir Echard Deutscher framkvæmdastjóri DAC að leiðin framundan kalli á breytingar: hefðbundið þróunarstarf sé ekki lengur valkostur. Í inngangi skýrslunnar varar hann við því að fylgt sé varfærnislegri leið í þróunarmálum því þannig náist þúsaldarmarkmiðin ekki. "Á undanförnum árum hefur það orðið æ ljósara að alþjóðlegir þættir, óskyldir þróunaraðstoð, hafa gríðarmikil áhrif á þróun," segir hann og boðar miklar breytingar á starfsháttum DAC.
DAC greiningar sýna að þróunaraðstoð náði sögulegu hámarki í Bandaríkjadölum talið árið 2008: 121.5 milljarður. Minni hagvöxtur á því ári og efnahagslegur samdráttur á árinu 2009 hafa lækkað virði fyrirheita sem samþykkt voru árið 2005 á leiðtogafundinum í Gleneagles en engu að síður vantar mikið upp á að staðið sé við gefin fyrirheit. Upplýsingar sem DAC hefur aflað sýna að flest framlagsríki ætla að halda áfram að auka framlög til þróunarsamvinnu. Miðað við þær upplýsingar sem nú liggja fyrir telur DAC að opinber þróunarsamvinna á árinu 2010 verði í framlögum talið 107 milljarðar dala.
Í skýrslunni segir að miklvægt sé fyrir framlagsríki að sýna almenningi að þróunarsamvinna beri árangur. Til þess að auka stuðning við þróunarsamvinnu - sérstaklega á tímum efnahagsþrenginga - sé það grundvallaratriði. "Bæði almenningur í framlagsríkum og viðtökuríkjum vill fá tryggingu fyrir því að peningarnir nýtist og þeir séu ekki misnotaðir af spilltum stjórnv0ldum," segir í skýrslunni.
|
Verkefnið Táknin tala í Nambíu:
Táknmálið hefur fært heyrnarlausum stolt og sjálfsvirðingu | 
"Það er margt komið af stað og áhrif starfsins sjást út um allt land en það er veikburða ennþá. Heyrnarlaust fók í Namibíu er ennþá mjög valdalaust og skilningur er takmarkaður á þörfum þeirra. Auðvitað hefði verið betra að geta stutt þróunina aðeins lengur," segir Valgerður Stefánsdóttir framkvæmdastjóri Samskiptamiðstöðvar heyrnarlausra og heyrnarskertra en sú stofnun er helsti samstarfsaðili Þróunarsamvinnustofnunar við verkefnið "Táknin tala" í Namibíu sem lýkur um áramót eins og annarri starfsemi ÞSSÍ í landinu.
"Hins vegar má segja að enginn getur tekið frá heyrnarlausum táknmálsnemendum okkar þekkinguna sem þeir hafa fengið um málið sitt og sjálfsvirðinguna sem fylgir því að geta verið stoltur af málinu og sjálfum sér. Sú þekking á örugglega eftir að styrkja heyrnarlausa Namibíumenn í áframhaldandi vinnu og baráttu," segir Valgerður.
|
| Þúsaldarmarkmiðin í augsýn annars staðar en í sunnanverðri Afríku | 
Sunnanverð Afríka er eini heimshlutinn sem ekki er líklegur til að uppfylla fyrsta þúsaldarmarkmiðið, að draga úr sárafátækt um helming fyrir árið 2015 miðað við árið 1990, að því er fram kemur í nýrri skýrslu Alþjóðabankans - World Development Indicators 2010 - sem kom út í síðustu viku. Í skýrslunni er metnar framfarir í þróunarríkjum með tilliti til þúsaldarmarkmiðanna átta.
Fram kemur í skýrslunni að fimmtíu þjóðir víðs vegar í heiminum hafi þegar náð markmiðinu um að öll börn njóti grunnskólamenntunar.
Þjóðir sunnan Sahara í Afríku eiga langt í land hvað öll þúsaldarmarkmiðin áhrærir. Að mati Eric Swanson verkefnisstjóra hjá Alþjóðabankanum eru borgarastyrjaldir og lélegir stjórnarhættir meðal þeirra hindrana sem hafa komið í veg fyrir að fátækt fólk hafi notið hagvaxtarsveiflunnar í þessum heimshluta á síðustu árum.
Í annarri nýrri skýrslu Alþjóðabankans - Global Monitoring Report 2010: The MDGs after the Crisis - er fjallað um þúsaldarmarkmiðin í ljósi efnahagsþrenginga síðustu missera.
|
| Alþjóðlegi malaríudagurinn:
Mikill árangur á fáeinum árum og tíföldun framlaga | 
Það fór lítið fyrir alþjóðlega malaríudeginum í íslenskum fjölmiðlum en þessi alþjóðlegi baráttudagur gegn sjúkdómnum var víða áberandi á sunnudaginn, 25. apríl, ekki síst meðal þjóða í sunnanverðri Afríku. Í þeim heimshluta deyja flestir úr malaríu og löngum hefur verið staðhæft að á þrjátíu sekúndna fresti deyi barn úr malaríu í Afríku. Þetta er sem betur fer ekki lengur satt. Mikill árangur hefur náðst á síðustu árum og nú er talið að nær væri að tala um 40-45 sekúndur. Um árabil létust árlega um ein milljón manna úr sjúkdómnum, nú er talið að 860 þúsund hafi látist árið 2008. Það eru verulegar framfarir.
Samkvæmt nýrri skýrslu UNICEF og Roll Back Malaria hafa framlög til malaríuvarna tífaldast á fáeinum árum, útbreiðsla malaríuneta hefur fimmfaldast og lyfjaskammtar af ACT hafa þrítugfaldast.
Malaríudagurinn - World Malaria Day
World Malaria Day - A Day To Act
Roll Back Malaria - Progress & Impact Series - World Malaria Day 2010: Africa Update (Unicef/Path)
On World Malaria Day 2010, Africa Charts Progress in Counting Malaria out - but Major Efforts Still Needed to Reach Global Targets
The winning formula to beat malaria - (Red Cross)
US Effort To FIght Malaria Focuses On Women (Reuters)
Because We Cara (ONE) Malawi: World Malaria Day (Reuters)
Rationally and Effectively Combating Malaria Through Diagnostics (Brookings)
|
Málefni frumbyggja rædd í New York:
Mikilvægi þekkingar þeirra á náttúruvernd hafið yfir vafa | 
Viðurkenning á þekkingu og lífsháttum 370 milljóna frumbyggja í 90 löndum er sífellt að aukast ekki síst í ljósi mikilvægis þess að vernda náttúruna en einnig í baráttunni gegn loftslagsbreytingum og aðlögun að þem breytingum.
UNPFII er vettvangur umræðu um málefni frumbyggja á vegum Sameinuðu þjóðanna og stendur þessa dagana fyrir tvegja vikna málþingi um stöðu frumbyggja. Yfirskrift málþingsins er "Development with Culture and Identity".
Þrátt fyrir fyrrnefnda viðurkenningu hafa menningarheimar frumbyggja að mati UNPFII hlotið skaða af stefnu í þróunarmálum sem horfir framhjá hefðbundinni þekkingaröflun frumbyggja og menningarlegum áherslum auk þess sem dæmi er um að eignaréttindi séu virt að vettugi.
Ban Ki-moon framkvæmdastjóri Sameinuðu þjóðanna ávarpaði tvö þúsund gesti málþingsins, m.a. fulltrúa frumbyggja, fulltrúa ríkja og frjálsra félagasamtaka. Hann sagði m.a. að mannkynið yrði allt fátækara þegar óbætanlegur menningararfur eða aðferðir í listrænni tjáningu glatast. Í máli hans kom fram að frumbyggjar eru 5% jarðarbúa en þriðjungur þeirra fátækustu í heiminum. "Hægt en örugglega er fólki að skiljast að velferð og sjálfbærni frumbyggja er málefni sem varða okkur öll. Fjölbreytileiki er styrkur - í menningu og tungumálum - alveg eins og í vistkerfum," sagði hann.
Ki-mmon benti ennfremur á að samkvæmt núverandi spám gætu 90% allra tungumála horfið á næstu eitt hundrað árum. Glötuðust tungumálin hyrfi mikilvægur þáttur sjálfsmyndarinnar einnig.
UNPFII var sett á laggirnar árið 2000 til að veita sérfræðiráðgjöf og gera tillögur um málefni frumbyggja innan stofnana Sameinuðu þjóðanna til þess að auka skilning og stuðla að samþættingu og samræmingu á viðkomandi starfsemi innan samtakanna.
|
| Alþjóðabankinn réttir hlut þróunarríkja... lítillega? |
Á fundi Alþjóðabankans á dögunum féllust fulltrúar Bandaríkjanna og Japans á það að gefa eftir hluta af atkvæðisrétti sínum til þess að rétt hlut þróunarríkja við ákvarðanatökur. Álitamál er hvort breytingin telst mikil eða ekki en í prósentum talið eykst atkvæðisréttur þróunarríkja úr 44% upp í 47% og Kínverjar verða þriðju áhrifamestu fulltrúar Bankans, á eftir Bandaríkjunum og Japan. Mörgum fulltrúum, t.d. frá Suður-Afríku og Brasilíu finnst of skammt gengið í valdadreifingu innan þessarar öflugu alþjóðlegu fjármálastofnunar.
U-landene får mer makt i Verdensbanken (NTB)
China Gains Clout In World Bank Vote Shift (Reuters) |
|
|
|
|
| Íslensk reiknistofa í veðurfræði með veðurspá fyrir Viktoríuvatn |  |
Belgingur, íslensk reiknistofa í veðurfræði, birtir á vefsíðu sinni m.a. veðurspákort fyrir Viktoríuvatn í Austur-Afríku. Að sögn Ólafs Rögnvaldssonar framkvæmdastjóra er spáin fyrir vatnið hluti af verkefni sem unnið er að í samvinnu við fjölmarga aðila og hefur það langtímamarkmið að fækka slysum á vatninu. Talið er að um 5000 fiskimenn drukkni við veiðar árlega og þeir hafa takmarkaðan aðgang að veðurfarslegum upplýsingum. Ólafur nefnir að í samvinnu sænska farsímafyrirtækið Ericsson sé verið að tengja saman veðurmælingar og farsímakerfi með það í huga að geta sent viðvaranir til fiskimanna ef veður eru válynd. Einnig hefur verið unnið að því að byggja upp björgunarsveitir sjálfboðaliða við vatnið, settir hafa verið upp gámar sem björgunarskýli og útvegaðir björgunarbátar.
|
| Fréttir og fréttaskýringar | |
|
| Veftímaritið er á... | 
Kíktu í heimsókn |
| EthicalCargo.org - barátta gegn smygli á vopnum og eiturlyfjum | |
Mörg dæmi eru þess að flugvélar sem fljúga með vistir og varning á vegum mannúðarsamtaka til stríðshrjáðra svæða eða landa þar sem spilling er mikil flytji einnig vopn eða eiturlyf. Sænska friðarstofnunin, SIPRI (Stockholm International Research Institute), hefur opnað vefgátt í því skyni að stemma stigu við því að vopnum og eiturlyfjum sé smyglað með vistum til nauðstaddra. Vefgáttin - EthicalCargo.org - var kynnt á dögunum. Samkvæmt frétt Dagens Nyheter hafa næstum öll flugfélög í farmflutningum á vopnasmyglslista Sameinuðu þjóðanna eða Evrópusambandsins líka tekið að sér flutninga fyrir hjálpar- og mannúðarstofnanir til Afríku, Afganistans og Íraks á árunum 2004 til 2009.
|
Danir yfirgefa Níkaragva
| |
"Ríkisstjórn Danmerkur hefur tekið þá erfiðu ákvörðun að hætta danskri þróunarsamvinnu við Níkargva á næstu þremur árum," segir í opinberri yfirlýsingu frá sendiráði Dana í Managua. Þar segir ennfremur að með ákvörðuninni sé bundinni endi á tvíhliða samstarf þjóðanna sem hefur staðið frá árinu 1981.
Samstarfinu lýkur árið 2012 og sendiráðinu verður lokað árið 2013.
Norrænu þjóðirnar hafa hver á fætur annarri tilkynnt um endalok þróunarsamvinnu við stjórnvöld í Níkaragva á síðustu árum. Eftir að Danir fara frá landinu eru Norðmenn þeir einu sem starfa áfram í landinu.
|
| Nýr sjóður gegn hungri og fátækt | |
Hópur ríkra þjóða ásamt sjóði hjónanna Bill og Melindu Gates hefur náð samkomulagi um að setja á laggirnar sjóð til þess að berjast gegn hungri og fátækt í heiminum. Sjóðurinn ber hetið Global Agriculture and Food Security Program. Tilkynnt var um stofnun sjóðsins í síðustu viku og þegar hafa fulltrúar Kanada, Spánar, Suður-Kóreu og Bandríkjanna tilkynnt um framlög til sjóðsins upp á tæpar 900 milljónir Bandríkjadala.
|
| Um Veftímaritið |  |
Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu ÞSSÍ.
Skráið ykkur í áskrift á heimasíðunni, www.iceida.is og látið vinsamlegast aðra með áhuga á þróunarmálum vita af tilvist veftímaritsins. Allar ábendingar um efni eru vel þegnar.
Þeir sem vilja afskrá sig af netfangalista, eða senda okkur ábendingu um efni, eru vinsamlegast beðnir um að senda slík erindi á netfangið iceida@iceida.is. Ritstjóri er Gunnar Salvarsson, gsal@iceida.is.
Við biðjumst velvirðingar á því að geta ekki notað íslenskar gæsalappír í viðtölum en bandarískt sniðmót Veftímaritsins leyfir ekki notkun þeirra.
Bestu kveðjur,
Útgáfu- og kynningardeild ÞSSÍ |
|
|
