Þrjátíu nemendur læra táknmál í Kennaraskólanum í Windhoek í Namibíu:
Tækifæri að skapast til að koma táknmálskennslu á háskólastig |  Um þrjátíu nemendur í Kennaraskólanum í Windhoek, höfuðborg Namibíu, hafa valið táknmál sem valgrein í námi sínu við skólann. Boðið var í fyrsta sinn á síðasta ári upp á þennan möguleika í skólanum fyrir áeggjan og stuðning umdæmisskrifstofu ÞSSÍ í landinu en stærsta verkefni ÞSSÍ í Nambíu er á sviði menntunar fyrir heyrnarlausa. Um fimmtán nemendur eru á fyrsta ári í táknmáli og svipaður fjöldi á öðru ári.
Barbara Peters aðstoðarrektor skólans og Beau Brewer táknmálskennari voru hér á landi í síðustu viku og kynntu sér táknmálsnám á Íslandi undir leiðsögn starfsmanna Samskiptamiðstöðvar heyrnarlausra og heyrnarskertra. Þær hafa nokkrar áhyggjur af af framtíð táknmálskennslunnar eftir sameiningu Kennaraskólans við Háskóla Nambíu því háskólinn hefur ekki táknmál á námskránni. Davíð Bjarnason verkefnastjóri ÞSSÍ í Namibíu segist hins vegar líta á sameiningu skólanna sem tækifæri til að koma táknmálskennslunni á háskólastig. "Ef rétt verður á málum haldið trúi ég því að sú verði raunin," segir hann.
"Það var ákaflega gagnlegt fyrir okkur að heimsækja Samskiptamiðstöðina og aðrar menntastofnanir í Reykjavík. Við erum reynslunni ríkari og höfum öðlast þekkingu sem nýtist okkur til að rökstyðja mikilvægi táknmáls fyrir samfélagið og fulltrúa háskólans," segir Barbara.
Hún bætir við að eftir heimsóknina geri þær báðar sér ljósa grein fyrir mikilvægi þess að nám í táknmáli sé í boði á háskólastigi og það hafi mikið gildi bæði fyrir samfélag heyrnarlausa og almennt fyrir Namibíu.
Barbara kveðst skila skýrslu um Íslandsferðina til verkefnisstjóra ÞSSÍ í Namibíu, stjórnenda nýstofnaðrar Samskiptamiðstöðvar heyrnarlausra í Namibíu og deildarstjóra menntasviðs Háskóla Namibíu. "Ég vænti þess líka að rektor háskólans skilji mikilvægi þess að bjóða upp á táknmál sem námsgrein við skólann. Við munum leggja áherslu á að táknmál verði námsgrein innan sérstakrar fræðilegrar einingar, einnig að táknmálskennsla verði í boði sem túlkanám og valgrein fyrir alla kennaranema," segir hún.
Heyrnarlaus börn víða um heim hafa kennara sem ekkert kunna í táknmáli og geta varla stafað nafn sitt með fingrunum, hvað þá miðlað námsefninu til nemendanna. Sá mikli áhugi sem táknmálsnámið vekur í kennaraskólanum í Windhoek gefur heyrnarlausum börnum í Namibíu vonir um að sá dagur renni upp fyrr en síðar að táknmálstalandi menntaðir kennarar taki að sér kennsluna og tryggi um leið eðlileg tjáskipti og miðlun upplýsinga í kennslustofunni. Að mati allra hlutaðeigandi er því ákaflega mikilvægt að tryggja áframhaldandi kennslu í táknmáli í kennaranámi.
|
"Tækifæri til að breyta lífi fólks"
- viðtal við Drífu Hrönn Kristjánsdóttur verkefnastjóra ÞSSÍ á Ssese eyjum | 
"Þeir sem starfa að þróunarmálum hafa tækifæri til að taka þátt í því að breyta lífsskilyrðum fólks til hins betra og það er bæði mjög heillandi hugmynd og mögnuð upplifun. Í gegnum starfið sérðu verða breytingar á lífi fólks og það er ótrúlega góð tilfinning að eiga hlutdeild í auknum lífsgæðum," segir Drífa Hrönn Kristjánsdóttir í viðtali en hún er stýrir stærsta verkefni Þróunarsamvinnustofnunar Íslands, þróunarverkefni í Kalangala héraði úti á eyjum í Viktoríuvatni í Úganda. Verkefnið hófst árið 2006 og lýkur árið 2015.
Oft er sagt að þróunarsamvinna sé langhlaup og það taki langan tíma að sjá raunverulegulegan árangur. Í ljósi þess að þróunarverkefnið á eyjunum er hálfnað, eða þar um bil, er Drífa spurð að því hvort það sé ekki rétt að árangurinn sé farinn að koma í ljós svo um munar.
"Þróunarverkefnið hér í Kalangala er langtímaverkefni og við vissum að bíða þyrfti lengur eftir að sjá breytingar gerast en í fullorðinnafræðsluverkefninu, sem var undanfari Kalanagala verkefnisins. Í fullorðinnafræðslunni sést strax við útskrift fyrsta bekkjarins eftir ársnám að fólk hefur öðlast nýja þekkingu og færni. Hins vegar sjáum við núna á fjórða ári verkefnisins að uppskeran er að koma í ljós og ég nefni sérstaklega stuðninginn við skólastarfið. Þar erum við að sjá fleiri krakka koma í skólann, þau fá betri aðbúnað, hærri einkunnir og dregið hefur úr brottfalli nemenda. Einnig höfum við stuðlað að því að þau fái kennslu í listgreinum og stundi íþróttir en gegnum íþróttastarfið hafa börnin hér líka haft tækifæri, oft í fyrsta sinn, til að ferðast um Úganda og ég tel að þessi reynsla barnanna komi til með að skila miklu inn í samfélagið hér í Kalangala, þ.e. að hér á eyjunum ílendist fólk með góða menntun. Og ég neita því ekki að mér finnst afskaplega gleðilegt að eiga hlutdeild í þessari ánægjulegu þróun!"
|
Hörð gagnrýni á stjórnvöld í mörgum Afríkuríkjum:
Fjárstuðningur erlendis frá við heilbrigðismál leiðir til lækkunar á eigin framlögum | 
Samkvæmt nýrri úttekt í læknaritinu The Lancet leiða framlög til heilbrigðismála í Afríkuríkjum til þess að viðkomandi ríki draga úr eigin framlögum til málaflokksins. Eins og kunnugt er hefur alþjóðlegur stuðningur við Afríkuþjóðir á sviði heilbrigðismála verið gífurlegur á síðustu árum og áratugum, tugir milljarða hafa verið eyrnamerktir baráttunni gegn alnæmi og öðrum sjúkdómum. Samkvæmt skýrslu The Lancet varð gífurleg hækkun á framlögum til heilbrigðismála á tíu ára tímabili, 1995 til 2006. Framlögin námu 8 milljörðum dala árið 1995 en voru komin í 19 milljarða árið 2006. Nú kemur í ljós að þessir fjármunir voru í einhverjum tilvikum notaðir af ríkisstjórnum í eitthvað annað sem ógerningur er að rekja.
Þeir sem stóðu að úttektinni greindu gögn um ríkisútgjöld til heilbrigðismála í fátækum ríkjum og jafnframt gögn um alþjóðleg framlög til málaflokksins. Í ljós kom að flestar þjóðir í Suður-Ameríku, Asíu og Miðausturlöndum tvöfölduðu framlögin til heilbrigðismála. Afríkuríkin skáru hins vegar niður og settu fjármagnið í aðra og óskylda málaflokka, jafnvel í verslunarferðir til Parísar fyrir ráðherra og eiginkonu hans, eins og nefnt er í frétt AP.
|
Norræn stefna í þróunarmálum - er hún til?
Fjögurra ára áætlun Íslands lögð fram á þingi í haust | 
Á mánudaginn var efnt til ráðstefnu í Osló undir yfirskriftinni "Hva skjedde med den nordiska bistandsmodellen?" eða "Hvað varð um norrænu stefnuna í þróunarmálum?" Samkvæmt grein í norska veftímaritinu Internationalle Udviklingsspørsmål var sú tíðin að litið var á stefnu norrænu þjóðanna, ásamt stefnu stjórnvalda í Hollandi og Kanada, sem mjög áþekka, bæði í þróunar- og utanríkismálum. Greinarhöfundur staðhæfir síðan að þessu sé ekki lengur þannig varið. Hann minnir á að gagnrýnin umræða um þróunarmál fari fram í mörgum löndum en svörin séu ólík þegar kemur að þróunarstefnum stjórnvalda. Þá eru rakin í fréttaskýringunni nokkur helstu umræðuefni um þróunarmál á Norðurlöndunum á síðustu misserum.
Danir kynntu 19. mars síðastliðinn ný drög að þróunarstefnu stjórnvalda. Almenningur í Danmörku hefur verið hvattur til að tjá sig um þá stefnu fram til 15. apríl en þá rennur út frestur til athugasemda. Stefnan kallast "Frihed fra fattigdom - frihed til forandring."
Hér heima hefur verið unnið á síðustu misserum að fyrstu fjögurra ára áætlun um alþjóðlega þróunarsamvinnu Íslands. Reiknað er með að hún verði lögð fram á þingi á komandi hausti.
Enginn Íslendingur var meðal frummælenda á ráðstefnunni í Noregi á mánudag.
Nordisk utviklingsdebatt - fortsatt likesinnet? (Internationalle udviklingsspørsmål) Burde hatt bedre resultater - frásögn Bistandsaktuelt af fundinum
|
| Alvarlegur skortur á heilbrigðisstarfsfólki í 50 ríkjum | 
Þúsaldarmarkmiðum sem snúa að heilbrigðismálum er teflt í tvísýnu vegna skorts á heilbrigðisstarfsfólki. Í rúmlega fimmtíu ríkjum er alvarlegur skortur á fólki með heilbrigðismenntun, ekki síst í svokölluðum óstöðugum ríkjum. Samkvæmt upplýsingum frá DFID - Þróunarsamvinnuustofnun Breta - sem fram komu á ráðstefnu í Bretlandi í síðustu viku skortir 800 þúsund heilbrigðisstarfsmenn fram til ársins 2015 í Afríku einni.
Af 34 ríkjum sem eru verst á vegi stödd hvað varðar þúsaldarmarkmiðin eru 22 flokkuð með óstöðugum ríkjum, þ.e. ríkjum þar sem ríkisstjórnir eru ýmis of veikar eða ófúsar til að veita grunnþjónustu til þegnanna. Í þessum ríkjum er talið afar brýnt að bregðast við skorti á heilbrigðisstarfsfólki.
Á ráðstefnunni var Liberia tekið sem dæmi um þennan vanda. Þar voru starfandi 237 læknar fyrir borgarastyrjöldina en nú að henni lokinni eru starfandi 23 læknar í landinu.
Skortur á fagmenntuðu fólki í heilbrigðismálum er þó ekki bundinn við ríki sem nýkomin er út úr stríðsátökum. Úganda býr t.d. við mikinn og alvarlegan skort á læknum og hjúkrunarfólki. Þar er einn læknir á hverja 20 þúsund íbúa. Ef horft er til sérfræðilækna verður ljóst hversu ástandið er alvarlegt, í landinu eru t.d. aðeins starfandi 23 bæklunarlæknar, þ.e. einn á hverja 300 þúsund íbúa.
Fæðingartíðni er sú þriðja hæsta í heiminum í Úganda, íbúunum fjölgar um 3.4% á ári hverju og konur eiga að meðaltali 6.7 börn. Með stöðugt aukinni fólksfjölgun eykst álagið á heilbrigðiskerfið en það er mjög vanmáttugt til að mæta þörfinni. Barnadauði er mikill í Úganda, 435 börn á hverja 100 þúsund, og segir mikla sögu um ástand heilbrigðismála í landinu. Ennfremur hefur mæðradauði ekkert breyst í fjóra áratugi: í Úganda deyja 16 konur á hverjum degi af barnsförum.
|
|
|
|
|
| Fyrsti staðarráðni verkefnisstjórinn með doktorsgráðu |  |
Dulce Mungoi sem hefur gegnt stöðu verkefnisstjóra félagslegra verkefna hjá Þróunarsamvinnustofnun Íslands í Mósambík frá árinu 2009 er fyrsti staðarráðni verkefnisstjórinn með doktorsgráðu. Dulce varði doktorsritgerð sína á dögunum við háskólann í Rio Grande do Sul í Brasilíu. Ritgerðin er skrifuð á portúgölsku og hetir "Identidades viajeiras: Família e Transnacionalismo no contexto da experiencia migratória para as minas da terra do Rand, África do Sul".
Ritgerðin er mannfræðileg greining á reynslu mósambískuk þjóðarinnar á straumi farandverkamanna til Suður Afríku, og þá sérstaklega námuverkamanna. Hún reynir er að varpa ljósi á þau alþjóðlegu hreyfiöfl sem finna má í kapítalísku hagkerfi og hafa áhrif á farandverkamennsku, ásamt því að skilja fyrirbærið út frá kenningalegu sjónarhorni. Ritgerðin byggir á rannsókn sem gerð var í suðurhluta Mósambíkur, en þátttakendur voru námuverkamenn, fyrrverandi námuverkamenn og fjölskyldur þeirra ásamt opinberum stofnunum og félagasamtökum sem áhrif hafa á straum farandverkamanna.
Til hamingju, Dulce! |
| Athyglisvert | |
Diversity in Donorship - Field lessons, ritstj. Adele Harmer and Ellen Martin (ODI)
Evaluating the Millennium Villages: Responses, but Few Answers, eftir Michael Clemens (CGD)
Trail of Death - LRA Atrocities in Northeastern Congo (HRW) UGANDA:NGOs Judging Oil Palm on Hearsay, Says U.N., eftir Paul Virgo
MOZAMBIQUE:Earthquakes: Not a Matter of If, But When, eftir Armando Nenane
Smoking in Africa: The business, the culture, the risks - fréttaskýring (VOA)
Young Superheroes in a Hut, eftir Nicholas D. Kristhof (NYTimes) Agriculture: Dispute over food security, eftir Hartmut Meyer and Annette von Lossau
Romanticizing the indigenous, eftir Pepijn Jansen (The Broker) Every Dollar Counts: How Global AIDS Donors Can Better Link Funding Decisions to Performance (CGD)
What does an effective multilateral donor look like?, eftir ecilie Wathne and Edward edger (ODI)
Transparency of Climate Financing Under Threat: Additionality to Follow?, eftir Daniel Coppard (DI)
Football crazy? (Developments) UGANDA:Trying to Blow the Whistle on Corruption. eftir Evelyn Matsamura Kiapi |
| Veftímaritið er á.... | 
Kíktu í heimsókn |
| Söfnun fyrir Haítí í fullum gangi |  |
Uppbyggingarstarf á Haítí er í fullum gangi. Samkvæmt upplýsingum á heimasíðu Hjálparstarfs kirkjunnar hafa 80% heimilislausra (1.2 milljónir manna) fengið nauðsynlegt byggingarefni til að koma sér upp bráðabirgða húsnæði. Verið er að undirbúa 7.400 hektara land norðan við höfuðborgina Port-au-Prince fyrir þá sem þurfa tímabundna búsetu á nýju svæði. Upplýsingarnar eru fengnar frá ACT Alliance, Alþjóða hjálparstarfi kirkna.
Barnaheill greinir frá því í frétt að börn séu enn í hættu á Haítí. "Jarðskjálftinn 12. janúar sl. hafði gríðarleg áhrif á líf rúmlega þriggja milljóna íbúa á Haítí. Þriðjungur þeirra missti heimili sín og áhrif þessara miklu náttúruhamfara á börnin verða seint metin til fulls. Þau sem lifðu af hafa misst fjölskyldur sínar, vini, eigur og nánasta umhverfi. Mitt í rústunum og umrótinu, verða börn viðkvæmari fyrir sjúkdómum, slysum, misnotkun og misbeitingu. Framtíð þeirra er óviss þar sem menntakerfi Haítí er í molum," segir í fréttinni.
|
| Birna til Haítí |  | |
Birna Halldórsdóttir hélt til Haítí í gær, þriðjudaginn 13. apríl, til starfa fyrir Rauða kross Íslands. Birna mun starfa með finnskri og franskri sveit við dreifingu hjálpargagna Alþjóða Rauða krossins. Birna er mannfræðingur og hefur langa reynslu af störfum fyrir Rauða kross Íslands, bæði á landskrifstofu og við alþjóðleg neyðarverkefni. Síðast starfaði Birna í Malaví þar sem hún vann við að skipuleggja og útfæra verkefni til að tryggja fæðuframboð fyrir skjólstæðinga malavíska Rauða krossins.
|
| Featured Article |  |
Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu ÞSSÍ.
Skráið ykkur í áskrift á heimasíðunni, www.iceida.is og látið vinsamlegast aðra með áhuga á þróunarmálum vita af tilvist veftímaritsins. Allar ábendingar um efni eru vel þegnar.
Þeir sem vilja afskrá sig af netfangalista, eða senda okkur ábendingu um efni, eru vinsamlegast beðnir um að senda slík erindi á netfangið iceida@iceida.is. Ritstjóri er Gunnar Salvarsson, gsal@iceida.is.
Við biðjumst velvirðingar á því að geta ekki notað íslenskar gæsalappír í viðtölum en bandarískt sniðmót Veftímaritsins leyfir ekki notkun þeirra.
Bestu kveðjur,
Útgáfu- og kynningardeild ÞSSÍ |
|
|
