| Stjórnvöld í Úganda vilja samþætta fullorðinnafræðslu:
Stuðningur við framkvæmdina
meginverkefni ÞSSÍ á þessu sviði í framtíðinni |
Fullorðinnafræðsla hefur lengi verið snar þáttur í starfsemi Þróunar-
samvinnustofnunar Íslands í Úganda. Framkvæmd hennar hefur tekið nokkrum breytingum á síðustu misserum að sögn Geir Oddssonar sem fer með þann málaflokk á umdæmisskrifstofunni hér í Kampala. "Stjórnvöld í Úganda hafa tekið ákvörðun um að samþætta fræðslu og menntun fullorðinna í öllum geirum og félagsmálaráðuneytið (Ministry of Gender, Labor and Social Development) heldur utan um þá samþættingu," segir Geir. "Við höfum unnið með ráðuneytinu um árabil að stefnumótun fullorðinnafræðslu, en í lok síðasta árs var byrjað að vinna með ráðuneytinu í að móta nýja stefnu og aðgerðaáætlun í fullorðinnafræðslu hér í Úganda með samþættinguna í huga. Það er líklegt að stuðningur við framkvæmd hennar verði aðaláhersla ÞSSÍ á þessu sviði í náinni framtíð. Það mun meðal annars skapast svigrúm til þess að styðja stefnu úgandískra stjórnvalda í gegnum ráðuneytið þar sem stuðningi okkar við framkvæmd fullorðinnafræðslu í Mukono héraði lauk um síðustu áramót og í Kalnagala héraði lýkur stuðningi okkar um næstu áramót. Þetta er einn þátturinn í þeirri viðleitni okkar að færa starfsemina frá beinum verkefnastuðningi."
Að sögn Geirs er meginmarkmiðið með samþættingunni að gera fullorðinsfræðslu aðgengilegri með þeim hætti að framboðið svari eftirspurninni. "Fyrir viðtakandann skiptir þetta miklu máli, það hefur verið sýnt fram á að fullorðinnafræðsla gegnir lykilhlutverki í því að auka aðgengi íbúa að margvíslegum upplýsingum, sem eykur möguleika þeirra til að bæta lífskjör og afkomu og taka virkan þátt í ýmiskonar uppbyggingar og þróunarstarfi í sinni heimabyggð," segir Geir.
Fullorðinnafræðsla í Úganda (Functional Adult Literacy, FAL) hefur þróast í þá átt að áherslan er ekki síst á lesfærni tengda tekjuöflun og atvinnusköpun, að sögn Geirs. Hann nefndir í því sambandi rekstur lítilla fyrirtækja eða aukna lesfærni sem gerir þátttakendum kleift að styðja börn sín í námi. "Læsi er hluti af daglegu líf, verkfæri til að takast á við dagleg viðfangsefni þar sem læsi kemur að gagni," segir hann. "Stjórnvöld stefna að því að styrkja enn frekar fullorðinnafræðslu í Úganda með auknu framboði fræðslu sem samsvarar fjölmörgum áhugasviðum þátttakenda. Með þessu hyggjast þau auka árangur og áhrif fullorðinnafræðslu í landinu. Ný stefna stjórnvalda hefur þetta að markmiði og ÞSSÍ hefur nú þegar byrjað að samþætta fullorðinnafræðslu inn í verkefni sín. Má þar nefna fiskgæðaverkefni sem unnið er með fiskimálaráðuneytinu (Quality Assurance for Fisheries Marketing). Í því verkefni er ein megináherslan á að auka vitund og þekkingu fiskisamfélaga á mikilvægi gæða fiskafurða og möguleikum á markaðsetningu. Aðferðin við fræðsluna byggist að miklu leyti á aðferðum fullorðinnafræðslu, sem hafa verið þróaðar í öðrum verkefnum studdum af ÞSSÍ," segir Geir Oddsson. -Gsal, Kampala
|
AidData.org
Nýr vefur með upplýsingum um framlög til þróunarmála |
"Annar megintilgangur nýju vefsíðunnar - www.AidData.org - er að safna saman upplýsingum sem áður voru dreifðar á marga staði, eða jafnvel ófáanlegar, á einn og sama staðinn, en með tilkomu gagnabankans er í fyrsta skipti hægt nálgast upplýsingar frá ólíkum veitendum þróunaraðstoðar á einn stað," segir Þórarinna Söebeck, útgáfu- og kynningarfulltrúi ÞSSÍ en hún hefur unnið fyrir hönd ÞSSÍ að upplýsingagjöf vegna nýrrar alþjóðlegrar vefsíðu sem heldur utan um framlög til þróunarmála.
Þórarinna segir að á síðunni megi finna upplýsingar frá tvíhliða framlagsríkjum og fjölþjóðastofnunum og nú sé í fyrsta skipti hægt að nálgast samanteknar upplýsingar um framlög nýrra framlagsríkja sem ekki eru aðilar að OECD-DAC, eins og t.d. Indlands, Brasilíu, Kóreu, Sádi Arabíu, Íslands og nýju ESB-landanna svo einhver séu nefnd. Að sögn Þórarinnu er hinn megintilgangur vefsíðunnar að veita mjög nákvæmar og ítarlegar upplýsingar um þróunarumsvif, alveg niður á einstök verkefni, og birta gögnin á aðgengilegu formi sem auðvelt er að nálgast og vinna með.
Dagana 22.-25. mars var haldin ráðstefnu í Oxford sem bar heitið Aid Transparency and Development Finance og fjallaði um gagnsæi í þróunarsamvinnu og framlögum til málaflokksins. Tilefnið var opnun nýju vefsíðunnar. "Þessi síða heldur utan um upplýsingar um fjárframlög til þróunarsamvinnu og er ætlað að veita yfirgripsmeiri og ítarlegri upplýsingar um þróunarverkefni en áður hefur þekkst. Síðan gerir þar með tilraun til að kortleggja þróunarsamvinnu í því skyni að bæta samstarf og áætlanagerð framlagsríkja og samstarfslanda þeirra," segir Þórarinna.
Verkefnið er stutt af Bill & Melinda Gates Foundation, Hewlett Foundation, Richard og Judy Finch, og National Science Foundation og er samstarfsverkefni College of William and Mary og Brigham Young University, en síðan byggir að hluta til á samruna PLAID (Project Level Aid) og AiDA (Development Gateway).
Á síðunni er hægt að leita eftir framlagsaðilum, samstarfslöndum, málaflokkum, verkþáttum (activities) og árum. Vefurinn er þó stöðugt í þróun og á næstunni verður hægt að skoða staðsetningu verkefna á kortum. Þá er á áætlun að safna gögnum frá félagasamtökum og stofnunum sem veita fé til þróunarsamvinnu.
Efni ráðstefnunnar er hægt að nálgast hjá ÞSSÍ.
|
| Gott á fuglinn fleygi sem fjötra engin bönd... |
|
"Gott á fuglinn fleygi, sem fjötra engin bönd, en fótur vor er fastur, er fljúga vill önd" - þessar ljóðlínur úr Skuggasveini kom upp í hugann þegar þessi sjón blasti við í miðbæ Kampala, höfuðborgar Úganda. Álkulegur marabústorkurinn hafði staðið þarna við vegkantinn ásamt nokkrum vegfarendum sem biðu þess að geta skotist á tveimur jafnfljótum yfir götuna. Þegar tækifæri gafst smeygði fólk sér milli bílanna og.. fuglinn líka. Svo samdauna eru marabústorkarnir orðnir mannfólkinu í Kampala að þeir gelyma þvi annað vefið að þeir eru fleygir. - Ljósmynd: Gsal |
| Yfir helmingur íbúa HIV smitaður í sumum fiskimannaþorpum |
Rúmlega 50% íbúa í sumum fiskimannaþorpum á Ssese eyjum í Úganda eru smitaðir af HIV veirunni og almennt fer hlutfall smitaðra hækkandi, að sögn Dr. Hillary Mitakalamire, sem stýrir heilbrigðismálum á héraðsskrifstofunni á Buggala eyju. Lífshættir farandverkamanna sem flytja frá einni verbúð til annarrar eru stór orsakavaldur í útbreiðslu HIV veirunnar. Landfræðileg lega eyjanna og samgönguerfiðleikar leiða til þess að fæstir HIV smitaðir eru í lyfjameðferð, eða aðeins einn af hverjum tíu.
Heilbrigðisþjónusta á eyjunum er almennt ófullnægjandi, mikill skortur er á læknum og öðrum heilbrigðisstarfsmönnum og aðeins sjö heilsugæslustöðvar eru starfræktar á þeim 64 eyjum sem eru byggðar. Hillary segir í samtali við Veftímaritið að erfitt sé að fá lækna til starfa í afskekktum eyjasamfélögum og fæstir starfi lengur en nokkra mánuði í senn. Jafnvel á stærstu eyjunni þar sem aðstaða er fyrir skurðaðgerðir eins og keisaraskurði skortir lækni til að framkvæma aðgerðir. Konur í barnsnauð sem þurfa á keisaraskurði að halda verða því að fara með ferju upp á fasta landið sem tekur að lágmarki þrjá klukkutíma. "Oftast er það of seint", segir Hillary.
Hluti af byggðaþróunarverkefni ÞSSÍ á eyjunum lýtur að heilbrigðismálum og Hillary læknir segir þann stuðning ómetanlegan, teymi hafi verið þjálfuð upp í fjölmörgum þorpum og sinni fræðslustarfi um algenga sjúkdóma og ÞSSÍ kosti bát og eldsneyti til vitjana í fjölmörgum eyjasamfélögum. Þá eru heilsugæslustöðvar ekki lengur myrkvaðar eftir að sólin er sest því fyrir íslenskt þróunarfé hafa stöðvarnar verið rafvæddar með sólarorku og því unnt að vera með starfsemi allan sólarhringinn ef nauðsyn ber til. Einnig hefur ÞSSÍ tryggt heilsugæslustöðvunum hreint vatn og fyrir allan þenna mikilvæga stuðning er Hllary læknir afar þakklátur. "Það má vissulega merkja framfarir í heilbrigðismálum á eyjunum en skrefin fram á við eru bæði fá og smá," segir hann. -Gsal, Ssese eyjum.
|
Aukin þéttbýlismyndun í þróunarríkjum:
Stórborgir þenjast út og verða risavaxnar |
Helmingur mannkyns býr í borgum og talið er að innan tveggja áratuga verði um 60% mannkyns með búsetu í þéttbýli. Stækkun borga er hvergi hraðari en í þróunarlöndum. Þar fjölgar borgarbúum að meðaltali um fimm milljónir á hverjum ári. Haldi fram sem horfi verða til á næstu áratugum risastórir samvaxnar borgir sem ná yfir gríðarlegt landflæmi og hýsa tugmilljónir manna. Þessari þróun er lýst í nýútkominni athyglisverðri skýrslu HABITAT, búsetunefndar Sameinuðu þjóðanna, State of World Cities.
Að mati Ban Ki-moon framkvæmdastjóra Sameinuðu þjóðanna, sem skrifar inngang skýrslunnar, eru borgir skólabókardæmi um nokkur þau erfiðustu viðfangsefni sem samfélög glíma við, svo sem mengun, sjúdóma, atvinnuleysi og skort á viðunandi húsaskjóli.
World's biggest cities merging into 'mega-regions'
Innovative Design Could Transform Urban Planning in Developing Countries
Vefsíðan: Alternaty Routes to Urban Density
|
Alþjóðlegi heilbrigðisdagurinn í dag:
Þéttbýlismyndun og heilsa yfirskrift dagsins |
Alþjóðlegi heilbrigðisdagurinn er í dag, 7. apríl. WHO - Alþjóðaheilbrigðisstofnunin - hefur ákveðið að dagurinn verði helgaður þéttbýlismyndun og heilsu. Með þessari áherslu væntir WHO þess að dagurinn veki athygli á áhrifum þéttbýlismyndunar á velferð þeirra sem lifa og starfa í borgum. Sérstakri herferð verður ýtt úr vör í dag sem ber yfirskriftina "1000 borgir, 1000 líf".
Því er spáð að árið 2030 verði sex af hverjum tíu íbúum jarðar búsettir í borg.
| |
|
|
|
| Ráðstefna um frumkvæðisrétt kvenna |
 |
Dönsk stjórnvöld stóðu fyrir ráðstefnu í vikunni fyrir páska um frumkvæðisrétt og atvinnuþátttöku kvenna með vísan í þriðja þúsaldarmarkmiðið en Danir hafa um langt árabil lagt þunga áherslu á jafnréttismál í þróunarsamvinnu. Í september á þessu ári verður haldinn leiðtogafundur í New York um þúsaldarmarkmiðin og ráðstefnan í Kaupmannahöfn á dögunum var haldin til þess að skerpa áherslur á alþjóðavísu um jafnréttismálin sérstaklega. Tillögur fundarins er hægt að lesa hér. |
| Veftímaritið er á... |
Kíktu í heimsókn |
| Stærsta og ljótasta stytta veraldar? |
 |
Risastytta af fjölskyldu sem flýr eldgos hefur leitt til mótmælaöldu í Dakar, höfuðborg Senegals, en styttan er reist í tilefni af því að 50 ár eru liðin frá því landið hlaut sjálfstæði. Styttan - sem er hærri en Frelsisstyttan í New York - minnir að sögn fréttaskýrenda á gömul sovésk minnismerki en reiði almennings í Senegal snýst þó fremur um bruðlið og kostnaðinn við gerð styttunnar því mörgum finnst fátæk þjóð í efnahagsþrengingum hafa annað við fjármagn að gera en verja þeim til styttugerðar.
|
| Af konum og börnum í Zimbabve og Tógó |
|
Magnfríður Júlíusdóttir ræðir um kvennastýrð heimili í Zimbabve og Alda Lóa Leifsdóttir ræðir um aðstæður ungs fólks í Tógó og starfsemi Sóleyjar og félaga í þágu heimilis systur Victorine á Unifem umræðum, laugardaginn 10. apríl kl. 13:00 í húsnæði Miðstöðvar SÞ að Laugavegi 42.
Fundurinn stendur í klukkutíma, aðgangur er ókeypis og allir velkomnir.
|
| Þúsaldarmarkmið um heilnæmt vatn innan seilingar |
 |
Í sameiginlegri skýrslu Alþjóðaheilbrigðisstofnunarinnar (WHO) og UNICEF, sem kynnt var á alþjóðlegum degi vatnsins á dögunum, eru settar fram niðurstöður sem kalla á blendin viðbrögð.
Fram kemur í skýrslunni að um 87% mannkyns, eða 5,9 milljarðar manna, neyta öruggs drykkjarvatns. Þetta eru vissulega góð tíðindi og benda til þess að sjöunda þúsaldarmarkmið Sameinuðu þjóðanna, sem lýtur að því að draga úr þeim fjölda sem ekki hefur aðgang að hreinu drykkjarvatni um helming á árabilinu 1990 til 2015, verði náð.
|
| Um Veftímaritið |
 |
Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu ÞSSÍ.
Skráið ykkur í áskrift á heimasíðunni, www.iceida.is og látið vinsamlegast aðra með áhuga á þróunarmálum vita af tilvist veftímaritsins. Allar ábendingar um efni eru vel þegnar.
Þeir sem vilja afskrá sig af netfangalista, eða senda okkur ábendingu um efni, eru vinsamlegast beðnir um að senda slík erindi á netfangið iceida@iceida.is. Ritstjóri er Gunnar Salvarsson, gsal@iceida.is.
Við biðjumst velvirðingar á því að geta ekki notað íslenskar gæsalappír í viðtölum en bandarískt sniðmót Veftímaritsins leyfir ekki notkun þeirra.
Bestu kveðjur,
Útgáfu- og kynningardeild ÞSSÍ | |
|
