Lagt til að stofnuð verði sérstök Þróunarsamvinnustofnun í Hollandi:
Minni sýndarmennsku - meiri metnað, segir í nýrri úttekt |
Róttækar breytingar þarf að gera á þróunarsamvinnu Hollendinga, samkvæmt skýrslu sem birt var á mánudaginn. Í skýrslunni er lagt til að þróunarsamvinna verði tekin út úr hollenska utanríkisráðuneytinu og stofnuð verði sérstök þróunarsamvinnustofnun, NLAID, til þess að koma starfseminni úr höndum stjórnarerindreka og fela reksturinn sérfræðingum í þróunarmálum.
Óháð ráðgjafanefnd - Scientific Council for Government Policy - hefur unnið að úttekt á þróunarsamvinnu Hollendinga síðustu tvö árin og kemst að þeirri niðurstöðu að starfsemin sé brotakennd og hafi ekki skýran fókus. Skýrslan var afhent Bert Koenders utanríkisráðherra á mánudag og ber yfirskriftina: Minni sýndarmennska - meiri metnað.
Í skýrslunni segir að þörf sé á meiri fagmennsku í þróunarsamvinnu, hverfa verði af þeirri braut að bæta lífsskilyrði til skamms tíma en stuðla fremur að efnahagslegum framförum til lengri tíma litið. Lagt er til að samstarfslöndum Hollendinga verði fækkað úr 36 í 10 og jafnframt að áhersla verði lögð á ríki Afríku. Ennfremur eru gerðar tillögur um að Hollendingar starfi á sviðum þar sem sérþekking þeirra er mest á alþjóðavísu, eins og í landbúnaði og vatnsmálum.
Tvær skýringar eru gefnar á því að þróunarsamvinna Hollands hafi reynst ófagleg og gagnslítil, starfinu hafi í of miklum mæli verið stýrt af sendiráðum Hollands og frjálsum félagasamtökum.
Hollendingar hafa um árabil verið meðal þeirra þjóða sem veitt hafa mest til þróunarsamvinnu og eru í hópi þeirra fimm þjóða sem náð hafa 0,7% marki Sameinuðu þjóðanna um hlutfall til þróunarmála af vergum þjóðartekjum.
Radio Netherlands
Dutch development aid in the 21st century is unprofessional and ineffective.
Dutch should focus aid on 10 countries: report |
| Alþjóðleg neyðaraðstoð vanbúin að takast á við hörmungar eins og jarðskjálftana á Haítí |
Rúmri viku eftir landskjálftana á Haítí stendur heimurinn frammi fyrir þeirri staðreynd að þjóðir heims eru vanbúnar til að takast á við hörmungar af þessari stærðargráðu. Það skortir ekkert upp á viljann til að rétta íbúum Haítí hjálparhönd en hjálpin berst seint og skipulag björgunarstarfsins er ekki traustvekjandi. -Viðhorf í þessum dúr hafa verið áberandi í fréttaskýringum og leiðaraskrifum fjölmiðla víða um heim síðustu daga. Margir velta fyrir sér forystuhlutverki Bandaríkjamanna, næstu nágranna Haítí, og deilt er um áherslur þeirra í aðgerðum. Times í London segir í leiðara að hörmungarnar á Haítí séu að snúast upp í skömm. Alþjóðsamfélagið bregðist íbúum Haítí af þeirri einföldu ástæðu að ekki sé hægt að svara þeirri einföldu spurningu hver stjórni.
Ýmsir fjölmiðlar, m.a. New York Times og The Guardian, greina frá því að yfirmenn björgunarsveita hafi undrast það kapp sem Bandaríkjamenn lögðu í það að koma eigin fólki og tækjum á vettvang og bandarískum þegnum út úr landinu. Með yfirstjórn flugmála í höndum Bandaríkjamanna var kostað kapps um að koma þúsundum félaga úr björgunarsveitum á vettvang á sama tíma og flugvélar með matvæli, lyf og vatn frá Matvælastofnun SÞ voru gerðar afturreka á fimmtudag og föstudag í síðustu viku og komust loks til Haítí á laugardag. Flugvélar frá Frakklandi, Brasilíu og Ítalíu var líka synjað um lendingarleyfi og hermt er að franskur ráðherra hafi formlega lagt fram kvörtun við utanríkisráðuneytið bandaríska.
Einnig er gagnrýnt að USAID, Þróunarsmavinnustofnun Bandaríkjanna, hafi verið falið yfirumsjón með björgunaraðgerðum og einnig að stofnunin hafi talið nauðsynlegt að senda fulltrúa á staðinn til að meta aðstæður áður en gripið var til aðgerða. Að mati hagfræðingsins Jeffrey D. Sachs, sem skrifar í Washington Post, eru Bandaríkjamenn ekki best til þess fallnir að leiða endurreisnarstarfið í ljósi þess að íhlutun þeirra á síðustu tveimur áratugum í málefni Haítí hafi leitt til meira tjóns en ávinnings fyrir heimamenn.
Að margra mati bíður það verkefni Sameinuðu þjóðanna að taka forystu og leiða í framtíðinni björgunarstarf eftir náttúruhamfarir.
|
| Afríkubikarkeppnin á fullu! |
 Stefán Jón Hafstein í Malaví skrifar:
Það leyndi sér ekki að fyrsti leikurinn var hafinn: Á götuhornum stóð fólk og veifaði, aðrir dönsuðu og bílstjórar hrópuðu sín í milli á þeim fáu rauðu ljósum sem eru í borginni. Allir með tvo fingur á lofti, sigurtáknið, V. "Hver fjandinn" hugsaði ég, getur verið að Malaví hafi skorað tvö mörk? Ég renndi yfir á aðra útvarpsstöð og skildi ekkert sem sagt var í beinni útsendingu frá fótboltaleik nema orðin Malaví two zero! Í matvöruverslun var þjóðhátíð. Fólk söng og blístraði og svo fór undarlegur kliður um mannskapinn, búrsveinn kom dansandi fram og hrópaði og pokadýrin tóku gleðikipp: Þrjú núll! Kassadaman söng.
Það þarf ekki mikið til að fylla litla fátæka þjóð óhemju stolti. Þrjú núll! Stærsti sigur í sögu landsins. Það eru 25 ár síðan Malaví komst á Afríkubikarkeppnina.
|
Handtaka tveggja homma dregur dilk á eftir sér:
Skoskir þingmenn vilja hætta þróunarsamvinnu við Malaví |
Stjórnvöld í Malaví segja að þrátt fyrir að þau þurfi að reiða sig á alþjóðleg framlög sé Malaví fullvalda ríki með eigin lög og þau láti Vesturlönd ekki hafa áhrif á innanríkismál. Tilefni yfirlýsingarinnar er ályktun skoska þingsins og mannréttindasamtakanna Amnesty Interstational sem hafa fordæmt meðferð stjórnvalda í Malaví á tveimur karlmönnum sem hafa opinberlega lýst yfir því að þeir séu par. Þeir hafa verið í fangelsi frá því 27. desember þegar þeir tilkynntu að þeir hygðust ganga í hjónaband á næstunni og héldu hefðbundna trúlofunarveislu af því tilefni.
Brot þeirra gæti varðað 14 ára fangelsi samkvæmt lögum í Malaví.
Rúmlega tuttugu þingmenn á skoska þinginu hafa fordæmt handtökuna og hvatt ríkisstjórnina til þess að endurskoða þróunarsamvinnu við Malaví vegna málsins.
|
| UNICEF mistókst að draga úr barnadauða í Vestur-Afríku |
Barnahjálp Sameinuðu þjóðanna setti sér það markmið í verkefni sem náði til ellefu þjóða í Vestur-Afríku að draga úr barnadauða um 25% að minnsta kosti. Samkvæmt skýrslu sem breska læknaritið The Lancet birtir náðust þessi markmið ekki. Skýrsluhöfundar gerðu úttekt á verkefninu í þremur löndum, Benin, Gana og Malí.
Verkefnið kallaðist Accelerated Child Survival and Development Programme (ACSD) og náði til tiltekinna landsvæða í ellefu löndum. Verkefnið hófst árið 2001 og lauk 2005. Samkvæmt úttektinni sem birtist í Lancet náðist bestur árangur í Malí þar sem barnadauði minnkaði um 24% á tímabilinu, um 20% í Gana og 13% í Benin. Skýrsluhöfundar benda á að bæði í Gana og Benin hafi ekki dregið meira úr barnadauða en í öðrum ríkjum sem ekki tóku þátt í verkefninu.
|
| Hlutverk Sameinuðu þjóðanna í valdaskiptum heimi |
Alþjóðamálastofnun Háskóla Íslands, kanadíska sendiráðið á Íslandi og English-Speaking Union of Iceland boða til fundar með Patrick Whittman, yfirmanni málefna Sameinuðu þjóðanna í utanríkisráðuneyti Kanada, fimmtudaginn 21. janúar frá kl. 12:00 til 13:00 í fyrirlestrarsal 132 í Öskju. Wittman mun fjalla um hlutverk Sameinuðu þjóðanna í valdaskiptum heimi. Fundarstjóri er Alan Bones, sendiherra Kanada á Íslandi.
Patrick Wittman hefur starfað í utanríkisþjónustu Kanada frá árinu 1995, og sem yfirmaður málefna Sameinuðu þjóðanna frá árinu 2006. Þar áður starfaði hann meðal annars í Mósambík fyrir Sameinuðu þjóðirnar, fyrir kanadísku þróunarsamvinnustofnunina (CIDA) og fyrir Alþjóðasamvinnuráð Kanada (CCIC). Patrick lauk BA gráðu frá Toronto háskóla og MA gráðu í alþjóðasamskiptum frá Oxford háskóla.
Fundurinn fer fram á ensku og er öllum opinn.
| |
 Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu ÞSSÍ.
Skráið ykkur í áskrift á heimasíðunni, www.iceida.is og látið vinsamlegast aðra með áhuga á þróunarmálum vita af tilvist veftímaritsins. Allar ábendingar um efni eru vel þegnar.
Þeir sem vilja afskrá sig af netfangalista, eða senda okkur ábendingu um efni, eru vinsamlegast beðnir um að senda slík erindi á netfangið iceida@iceida.is. Ritstjóri er Gunnar Salvarsson, gsal@iceida.is.
ISSN 1670-8105
Bestu kveðjur, Útgáfu- og kynningardeild ÞSSÍ
| |
|
| Níutíu bjargað úr rústunum á Haítí |
 |
Tekist hefur að ná níutíu manns lifandi út úr rústum húsa á Haítí eftir jarðskjálftana fyrir rúmri viku. Um 1700 sérþjálfaðir björgunarsveitarmenn hafa komið að björgun fólksins, þar á meðal rústabjörgunarsveitin íslenska. Fréttaveitan IRIN slóst í för með íslensku og bresku sveitinni á sunnudaginn var.
Utanríkisráðuneytið skipuleggur nú heimkomu björgunarsveitarinnar en hún er væntanleg heim annað kvöld, að því er segir í frétt ráðuneytisins.
Þá fer íslenskur læknir, Friðbjörn Sigurðsson, á morgun til Haítí þar sem hann mun starfa með læknateymi þýska Rauða krossins í einn mánuð, að því er segir í frétt Rauða krossins. |
| Veftímaritið er á... |
Kíktu í heimsókn |
| Fimmtíu konur settar í svartholið |
|
Það er til marks um þá spennu sem spáð fyrir þing- og forsetakosningar í Úganda á næsta ári að lögregla færði á mánudag fimmtíu konur í fangaklefa þegar þær kröfðust afsagnar yfirmanns yfirkjörnefndar. Fulltrúar helsta stjórnarandstöðuflokksins, FDC (Forum for Democratic Change), hefur krafist þess að konurnar verði leystar úr haldi en þær draga í efa af yfirkjörnefndin geti tryggt frjálsar og heiðarlegar kosningar á næsta ári. Þær vildu því sýna honum rauða spjaldið eins og sést á meðfylgjandi myndbandi.
Stjórnvöld í Úganda hafa lýst yfir því að hart verði tekið á hvers konar mótmælum í aðdraganda kosninganna.
|
| Fréttir og fréttaskýringar |
|
|
| Standa vörð um framlög til UNICEF |
|
Barnahjálp Sameinuðu þjóðanna (UNICEF) gegnir lykilhlutverki í tilraunum alþjóðasamfélagsins til að vernda þá sem verst eru settir af völdum fátæktar, einkum börn. Sú áhersla sem stofnunin leggur á jafnrétti kynjanna, ekki síst á sviði mennta- og heilbrigðismála, fellur auk þess einkar vel að stefnu Íslands í þróunarmálum. Í ljósi þeirra þýðingarmiklu starfa sem stofnunin hefur unnið, hafa íslensk stjórnvöld ákveðið að greiða jafnvirði 130 milljóna króna til UNICEF á árinu 2010.
|
| Einfalt próf - dýrmæt lausn |
|
Einfalt próf gæti komið í veg fyrir hundrað þúsund dauðsföll kvenna á ári í fátækum ríkjum af völdum leghálskrabbameins, að mati breska vísindamanna. Af krabbameinum er leghálskrabbamein helsta dánarorsök kvenna í þróunarríkjum og veldur þar mestu léleg heilbrigðisþjónusta og of mikill kostnaður við skimun og bóluefni eins og tíðkast á Vesturlöndum. Samkvæmt frétt Reuters benda breskir vísindamenn á einfaldari aðgerð sem kostar um tvo Bandaríkjadali sem lýst er sem sjónrænni skoðun með ediksýru.
Af 300 þúsund konum sem látast úr sjúkdómnum á ári hverju eru 85% í þróunarríkjum.
|
| Norrænn sjóður með nýjar áherslur |
|
Verkfræði- og náttúruvísindasvið, Land- og ferðamálafræðistofa og Alþjóðamálastofnun boða til kynningarfundar um Norræna þróunarsjóðinn. Helge Semb, framkvæmastjóri sjóðsins fjallar um sjóðinn og nýju áherslurnar á kynningarfundi síðdegis í dag, miðvikudaginn 20. janúar, frá kl. 16 til 17 í fundarherbergi á 3. hæð í Öskju. Nánar | |
|
