Þróunarsamvinnustofnun Íslands afhenti á dögunum sjávarútvegsráðuneyti Namibíu tuttugu og fimm lófatölvur ásamt fylgihlutum. Markaði afhendingin formleg lok á samstarfsverkefni ÞSSÍ og ráðuneytisins, en verkefnið fólst í að bæta öflun löndunarupplýsinga á fiski veiddum undan ströndum Namibíu.
 
Að sögn Vilhjáms Wiium umdæmisstjóra ÞSSÍ í Namibíu er sjávarútvegur mikilvæg atvinnugrein í Namibíu og gildir þar einu hvort horft er til tekna, atvinnu eða gjaldeyrisöflunar. Hann segir að um fimmtungur útflutningstekna landsins komi frá sjávarútvegi og nær sex hundraðshlutar af landframleiðslu eigi rætur að rekja til útvegs.
 

Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu stofnunarinnar.          
Bestu kveðjur, Útgáfu- og kynningardeild ÞSSÍ

Á hverju ári fæðast yfir 50 milljónir barna sem fá ekki fæðingarvottorð. Þessi börn verða af mikilvægum réttindum því einstaklingur án fæðingarvottorðs á t.d. ekki rétt á heilsugæslu og börnum án fæðingarvottorðs er meiri hætta búin en öðrum vegna mansals, ofbeldis og annarrar illrar meðferðar, eins og fram kemur i nýrri skýrslu Plan International samtakanna. Á vegum samtakanna hafa á síðustu árum um 40 milljónir einstaklinga í 32 þjóðlöndum fengið fæðingarvottorð en átak í þessum málum var hrundið af stokkunum árið 2005.
Nú er komin út skýrsla um árangurinn studd margvíslegum dæmum af því réttleysi sem einkennir líf einstaklings án fæðingarvottorðs.

Frumvarp gegn samkynhneigðum - Anti-Homesexuality Bill - hefur verið lagt fram á þingi í Úganda þar sem m.a. dauðrefsing liggur við "brotum" hjá þeim sem hafa ítrekuð kynmök og fangelsa má þá sem snerta hvorir aðra á "samkynhneigðan hátt". Frumvarpið mætir harðri andstöðu víða um heim og felur að margra dómi í sér gróft mannréttindabrot.

 

Þingmaðurinn sem leggur frumvarpið fram, David Bahati, segir að þau rök hafi ekkert vægi því samkynhneigð sé ekki mannréttindi.

Museveni, forseti Úganda, hefur ekki opinberlega lýst yfir stuðningi við frumvarpið en ítrekað lýst yfir andúð á samkynhneigð á trúarlegum forsendum.

 

"Frumvarpið er svo ómannúðarlegt... það óvirðir allt sem lýtur að því er vera manneskja. Ég meina, þú getur ekki sagt við mig að þú viljir drepa mig af því ég er samkynhneigður," segir Gerald Sentogo í viðtali við IPS fréttaveituna er hann er stjórnarmaður í félagi sem kallast Sexual Minorities í Úganda.

 

Í frumvarpinu er dauðarefsingu tilgreind sem refsing undir það sem kallað er ágeng samkynhneigð. Í þessum hluta frumvarpsins segir að "síendurteknir lögbrjótar" meðal samkynhneigðra geti átt yfir höfði sér dauðarefsingu. Dauðarefsingu sé einnig heimiluð ef samkynhneigðir eru í sambandi við einstakling yngri en 18 ára, fatlaðan einstakling HIV jákvæðan. Þá er heimildarákvæði í lögunum að þvinga megi einstaklinga sem sýna ágenga samkynhneigð undir HIV próf.

 

Fram hafa komið hugmyndir um að veitendur þróunaraðstoðar hætti stuðningi við Úganda verði frumvarpið að lögum. Úganda er sem kunnugt er eitt af fjórum samstarfsríkjum Íslands í þróunarsamvinnu. 

Alla þessa viku hafa verið viðburðir hér og þar í samfélaginu í tilefni af tuttugu ára afmæli Barnasáttmálans. Í dag safna ungmennaráð umboðsmanns barna, Barnaheilla og UNICEF  hvunndagshetjum til stuðnings ályktunar ráðanna um velferð íslenskra barna.
Ungmennaráðin hafa samið ályktun sem snýr að velferð barna á Íslandi.Ályktunin verður afhent forsætisráðherra á morgun, fimmtudag. Til að kanna stuðning almennings við innihald ályktunarinnar munu ungmennaráðin safna stuðningsaðilum í verslunarmiðstöðinni Smáralind frá 17 til 19, í dag miðvikudaginn 18. nóvember. Allir stuðningsaðilar verða færðir í sérstakan hvunndagshetjubúning.
Á föstudag verður sérstök afmælisdagskrá í Snælandsskóla kl. 14.
 

Alnæmi er sá sjúkdómur sem veldur flestum dauðsföllum og sjúkdómum meðal kvenna á barneignaaldri meðal þjóða sem búa við fátækt, segir í tímamótaskýrslu um heilsu kvenna og stúlkna sem WHO, Alþjóðaheilbrigðismálastofnunin hefur gefið út. Einnig kemur fram að óvarið kynlíf sé á heimsvísu leiðandi áhættuþáttur sem stuðli að ótímarbærum dauða kvenna í barneign. Skýrslan kallast "Evedence Today, Tomorrow´s Agenda" og þar er sýnt fram á að fjölmörgum sviðum sé heilsa kvenna vanrækt og sagt að tímabært sé að setja þessi brýnu mál í forgang.
Í skýrslunni er staðhæft að konur og stúlkur séu sérstaklega berskjaldaðar fyrir HIV smiti vegna ýmiss konar líffræðilegra og félagslegra þátta, m.a. er bent á veika félagslega og efnhagslega stöðu kvenna. Sú staða geti leitt af sér takmörkun á frelsi og geti leitt til áhættuhegðunar sem felst t.d. í því að þær veigra sér við að fá nauðsynlegar upplýsingar til að tryggja heilsufarslegt öryggi þeirra. Nefnt er í skýrslunni að einungis 38% kvenna á heimsvísu geti lýst helstu leiðum til að forðast smit og borið saman við unga menn séu færri konur sem vita að smokkurinn er vörn gegn HIV. Gögn frá sextán löndum í Afríku sunnan Sahara sýna einnig að HIV tíðini er almennt hærri hjá unglinsstúlkum en karlkyns jafnöldrum þeirra. Ein meginástæðan fyrir því er sú, segir í skýrslunni, að ungar stúkur eru oft í tygjum við eldri menn sem hafa meiri kynlífsreynslu og eru líklegri til að vera smitaðir.


Skýrslan: Woman And Health: Today´s Evidence, Tomorrow´s Agenda