Vel heppnaður morgunverðarfundur ÞSSÍ og HR um lýðheilsu í Malaví
Stórstígar framfarir á tíu árum að mati íbúa í Monkey Bay |
Heilbrigðisþjónustan í Monkey Bay hefur að mati íbúa á svæðinu tekið stórstígum framförum og þeir telja að svæðissjúkrahúsið veiti næstum jafngóða þjónustu og hérðaðssjúkrahúsið í Mangochi. Á morgunverðarfundi ÞSSÍ og Háskólans í Reykjavík í gærmorgun var staða heilbrigðisverkefnis ÞSSÍ í Malaví til umræðu. Á fundinum kynntu Geir Gunnlaugsson prófessor við HR og Jónína Einarsdóttir prófessor frá HÍ niðurstöðu rannsóknar sem þau framkvæmdu á Monkey Bay svæðinu í apríl á þessu ári. "Ef íbúarnir gætu óskað sér einhvers þá væri það að efla svæðissjúkrahúsið í Monkey Bay enn meir en nú er, byggja fleiri ríkisreknar heilsugæslustöðvar til að komast hjá komugjöldum og fá lyf án kostnaðar og svo að bæta samgöngur á þann hátt að veikt fólk hafi greiðari aðgang að þjónustunni," sagði Jónína Einarsdóttir á fundinum.
Fram kom í erindum Jónínu og Geirs að huga þurfi að bættum samgöngum og mikilvægt sé að þróa eftirlit með sjúkrabílum. Einnig þurfi að auka þjónusta í þorpum og bæta aðstöðuna þar. "Bregðast þarf við nýjum reglum heilbrigðisráðuneytisins um hlutverk yfirsetukvenna og þá sérstaklega að bæta aðstöðu kvenna sem bíða fæðinga. Miklivægt er að styðja við heilsugæslu fyrir alla án gjaldtöku," sögðu þau.
Þróunarsamvinnustofnun Íslands hefur á liðnum áratug unnið með heilbrigðisyfirvöldum í Malaví að því að efla heilbrigðisþjónustuna á Monkey Bay svæðinu í Mangochi héraðinu í suðurhluta landsins. Á svæðinu búa rúmlega 110.000 manns. Stuðningur ÞSSÍ hefur m.a. falist í því að styrkja innviði heilbrigðisþjónustunnar með byggingu á svæðissjúkrahúsi þar sem í boði er fjölbreytt þjónusta á göngu- og legudeildum. Heilsugæslustöðin í Nankumba hefur einnig verið endurbætt og starfsfólk fengið símenntun í starfi. Heilsugæslustarfið hefur einnig verið eflt í þorpum á svæðinu með auknu aðgengi starfsfólks að mótorhjólum og svo sjúkrabíl fyrir veika íbúa, svo eitthvað sé nefnt.
Markmið rannsóknar Geirs og Jónínu var að skoða núverandi stöðu heilsugæslunnar á Monkey Bay svæðinu og breytingar á þjónustunni síðan samstarfið hófst. Annað markmið með rannsókninni var að koma með tillögur um heilbrigðisvísa svo hægt sé að meta árangur stuðnings ÞSSÍ við heilbrigðisþjónustu svæðisins við fyrirhuguð lok þess í desember 2011. Þau ræddu við rúmlega 140 einstaklinga í rannsókninni með aðstoð túlks.
Á morgunverðarfundinum flutti einnig Inga Dóra Pétursdóttir meistaranemi í þróunarfræðum erindi um heilsugæslu í skugga HIV og alnæmis.
Nálgast má úrdrátt úr erindum Geirs og Jónínu ásamt glærum fyrirlesaranna þriggja á vefsíðu ÞSSÍ.
|
| ESB: 800 milljarðar af þróunarfé út um gluggann? |
Dregin er upp dökk mynd af sóun á þróunarfé Evrópusambandsins í nýrri skýrslu og því haldið fram að 800 milljörðum íslenskra króna sé sóað að óþörfu. ESB er sem kunnugt er stærsti veitandi þróunaraðstoðar í heiminum en skortur á samhæfingu og skilvirkni dregur verulega úr gildi starfseminnar að því er fram kemur í rannsókninni: Aid Effectiveness: benefits of a European Approcah (Árangursrík þróunaraðstoð: ávinningur af evrópskri nálgun).
Í frétt Bistandsaktuelt í Noregi segir að skýrslan sé fyrsta sjálfstæða tilraunin til að reikna út hvað slæm nýting á þróunarfé kostar í raun og veru. -Rannsóknin sýnir að ESB gæti sparað þrjá til sex milljarða evra með betri samvinnu. Í reynd þýðir þetta að unnt hefði verið að setja fé í þróunarverkefni í háum gæðaflokki með áþreifanlegum árangri og á sama tíma að draga úr skriffinnskubyrðinni sem lögð er á herðar samstarfsþjóða. Við veitum 60% af þróunarframlögum á heimsvísu og við getum valið um það að vera 60% af vandanum eða 60% af lausninni," er haft eftir Karel De Gucht, framkvæmdastjóra ESB á sviði þróunar- og mannúðarmála.
Skýrslan leiðir í ljós að samstarfsþjóðir, oft með veika stjórnsýslu, þurfa að sinna fimmtán mismunandi ESB löndum á sviði tvíhliða þróunarsamvinnu.
Nánar
|
Fæstir íbúa Afríku fá bóluefni gegn svínaflensu:
Munurinn á Jóni og séra Jóni |
Íslendingar hafa tryggt sér kaup á 300.000 skömmtum af bóluefni gegn inflúensu A(H1N1)v sem dugar til að fullbólusetja svo til alla þjóðina, að því er segir í upplýsingum landlæknisembættisins. Alþjóða-heilbrigðismálastofnunin (WHO) er á sama tíma með aðgerðaáætlun sem miðar að því að bólusetja 2% íbúa í sextán þróunarríkjum. Lokatakmark WHO er að bólusetja 10% fólks í 95 þróunarríkjum.
Samkvæmt Reutersfrétt síðastliðinn föstudag kynnti WHO aðgerðaáætlun vegna bólusetninga gegn svokallaðri svínaflensu sem á að ná til hartær eitt hundrað þróunarríkja en íbúar fyrstu ríkjanna sem eru sextán talsins - en voru þó ekki nafngreind - fá bóluefni á næstunni sem dugar 2% þjóðanna, þ.e. til hluta heilbrigðisstarfsmanna.
WHO hefur fengið að gjöf 156 milljónir skammta frá fjórum lyfjaframleiðendum eða ríkisstjórnum en væntir þess að ná 200 milljón skömmtum til dreifingar í 95 löndum.
Samkvæmt þessari frétt neita stjórnvöld í Bandaríkjunum að gefa skammta af bóluefni til þróunarríkjanna uns staðfest er að allir í áhættuhópi innan Bandaríkjanna hafi örugglega fengið sprautu.
U.S. won't donate H1N1 vaccine to developing countries until 'at-risk' Americans receive vaccine
|
| Barnadauði: Fjórða hvert dauðsfall af völdum lungnabólgu |
Fjórða hvert barn sem lætur lífið deyr af völdum lungnabólgu eða um tvær milljónir barna yngri en fimm ára á hverju ári. Á fimmtán sekúndna fresti deyr barn af völdum þessa skæða sjúkdóms sem verður fleiri börnum að aldurtila en nokkur annar sjúkdómur. Alþjóðaheilbrigðisstofnunin og Barnahjálp Sameinuðu þjóðanna ýttu úr vör átaki síðastliðinn mánudag - á alþjóðlegum degi lungnabólgu - sem ætlað er að draga stórlega úr dauðsföllum barna af völdum sjúkdómsins. Betri næring og aðgengi að bóluefni eru lykilþættir í átakinu.
Fulltrúar samtakanna segja að þekking á því hvernig megi afstýra barnadauða af völdum lungnabólgu sé til staðar. Tækin séu fyrir hendi. Það þurfi einfaldlega að nýta þau.
|
| Ráðgjafar frá Bifröst vinna með IFC - Alþjóðalánastofnuninni
Handbók um samfélagslega ábyrgð og kynjajafnrétti |
Nýlega kom út á vegum Alþjóðalánastofunarinnar (IFC) handbók um samfélagslega ábyrgð og kynjajafnrétti. Handbókin er afrakstur verkefnis sem ráðgjafahópur við rannsóknarsetur vinnuréttar og jafnréttismála við Háskólann á Bifröst tók þátt í að vinna. Ráðgjafasjóður Íslands við Alþjóðalánastofnunina, sem utanríkisráðuneytið fjármagnar, styrkti ráðgjafahópinn til verksins.
Markmiðið er einkum að efla vitund fyrirtækja um efnahagslegan ávinning af því að nýta framlag beggja kynja og gæta að jafnrétti - jafnt innan fyrirtækja sem í allri virðiskeðjunni,- gagnvart birgjum, neytendum, samfélaginu og umhverfi. Handbókinni er ætlað að vera til leiðbeiningar varðandi gerð sjálfbærniskýrslna. Slíkar skýrslur eiga að meta stöðu og árangur fyrirtækja um allan heim hvað varðar félagslega ábyrgð og jafnrétti kynjanna. Sérstakt mið er tekið af stöðu nýmarkaðsríkja
Elín Blöndal, prófessor við lagadeild, stýrði ráðgjafarhópnum en auk þess sátu í honum Ingibjörg Þorsteinsdóttir, dósent við lagadeild og Birgir Óli Sigmundsson, meistaranemi í viðskiptadeild, sem aðstoðarmaður. Hlutverk hópsins var einkum að útbúa þau viðmið um félagslega ábyrgð og jafnrétti sem lögð hafa verið til grundvallar í lokaskýrslu verkefnisins. Einnig að vinna að rannsóknarþætti verkefnisins og gerð handbókarinnar.
Verkefnið fól í sér frumkvöðlavinnu í samþættingu félagslegrar ábyrgðar fyrirtækja og kynjajafnréttis. Fram til þessa hafa svonefndar sjálfbærniskýrslur aðeins að takmörkuðu leyti fjallað um kynjajafnrétti. Verkefnið er margþætt og flókið m.a. fyrir þær sakir að viðmiðunum sem sett eru fram í lokaskýrslunni er ætlað að ná til fyrirtækja út um allan heim án tillits til stærðar eða starfsgreinar. Auk þess er hér í fyrsta skipti gerð tilraun til að setja fram viðmið um jafnrétti kynjanna varðandi alla þætti í virðiskeðju fyrirtækja.
Elín Blöndan telur ávinninginn af þátttöku í verkefninu er margvíslegan, einkum aukin fagleg þekking hér á landi á samþættingu jafnréttismála og félagslegrar ábyrgðar. Sú þekking og reynsla telur hún að muni nýtast vel í frekari störfum fyrir við rannsóknarsetrið og við Háskólann á Bifröst. Hún telur að íslensk stjórnvöld hafi með stuðningi við verkefnið stuðlað að mikilvægri þróun á sviði jafnréttismála og félagslegrar ábyrgðar fyrirtækja.
Nánar |
| Tuttugu ára afmæli Barna-sáttmála SÞ í þessum mánuði |
Í þessum mánuði eru tuttugu ár liðin frá því Barnasáttmáli Sameinuðu þjóðanna var samþykktur á allsherjarþinginu. Allar þjóðir innan vébanda SÞ hafa staðfest sáttmálann að tveimur löndum frátöldum: Bandaríkjunum og Sómalíu. Enginn annar mannréttindasáttmáli er staðfestur jafn víða.
Á þeim tuttugu árum sem liðin eru frá samþykkt Barnasáttmálans hafa orðið margvíslegar framfarir í málefnum barna: nefna má að barnadauði hefur minnkað um 28% á heimsvísu frá 1990, skólasókn barna jókst á sex ára tímabili úr 81% í 85%, frá 2001 til 2006 voru 95 þúsund barnahermenn afvopnaðir, umskurður stúlkubarna er bannaður með lögum nánast alls staðar og um það bil helmingur þjóðanna sem staðfest hafa sáttmálann hafi bannað líkamlegar refsingar í skólum.
Margt er hins vegar enn ógert: á hverjum degi látast 25 þusund börn yngri en fimm ára, flest þeirra vegna sjúkdóma sem unnt er að lækna á auðveldan hátt eins og niðurgangspestir, lungnabólga og mislingar. Á þessu ári verða 1,8 milljónir barna og ungmenna yngri en 18 ára fórnarlömb mansals, um það bil ein milljón ungmenna yngri en 18 ára sætir varðhaldi um heim allan. Þrátt fyrir bann við limlestum á kynfærum stúlkna eru 8000 stúlkur umskornar á hverjum degi. Og 300 þúsund börn búa í flóttamannabúðum við óboðlegar aðstæður og stöðugan ótta um að vera vísað úr landi.
Átaks þörf ef tryggja á velferð barna
Dr. Gunnar Pálsson fastafulltrúi Íslands flutti á dögunum ávarp í tilefni af tuttugu ára afmæli Barnasáttmálans í umræðu þriðju nefndar allsherjarþingsins um réttindi barna. Gunnar sagði m.a.:
"Dauðsföllum barna í þróunarríkjunum hefur fækkað og fleiri börn sækja skóla en nokkru sinni. Betur má þó ef duga skal. Milljónir barna búa við fæðuskort og takmarkaðan aðgang að menntun og heilsugæslu, auk þess sem alvarleg brot á réttindum barna, þ.m.t. kynferðislegt ofbeldi, mansal, þrælkun og barnahermennska eiga sér stað um allan heim."
Íslenskt vefsetur Barnasáttmálans |
Þróunarsjóður vegna loftslagsbreytinga
Samkomulag leiðtoga ESB en fjárhæðin óljós |
 Fréttaskýrendur eru ekki á einu máli um árangur af samkomulagi leiðtoga Evrópusambandsins á dögunum um stuðning við þróunarríki vegna hlýnunar jarðar. Í sumum fjölmiðlum er því fagnað að leiðtogarnir hafi náð samkomulagi um stofnun sjóðs í þágu þróunarríkja meðan aðrir segja að samkomulagið sé lítils virði þar sem leiðtogarnir hafi ekki náð samkomulagi um fjárhæðir, þ.e. nákvæmlega hversu mikið fé þróunarríkin eigi að fá í sinn hlut vegna loftslagsbreytinga. Enn aðrir segja að með því að skilja við málið án niðurstöðu hafi síðasta tækifærinu til að ná árangri á leiðtogafundinum í Kaupmannahöfn verið glutrað niður.
Leiðtogar ESB hétu því að greiða "sanngjarnan hlut" í alþjóðlegum sjóði til stuðnings fátækum ríkjum en ekki hversu stór sá hlutur yrði. Leiðtogarnir voru hins vegar sammála um það að árið 2020 komi þróunarlöndin til með að þurfa um 100 milljarða evra á ári til að takast á við loftslagsbreytingar.
Áhrif loftslagsbreytinga á Afríku
| |
|
|
|
| Enza - ný íslensk hjálparsamtök |
 |
Enza eru íslensk hjálparsamtök sem miða að því að hjálpa stúlkum og konum sem verða barnshafandi en þurfa að gefa frá sér barn sitt vegna fátæktar og/eða útskúfunar. Starfsemin fer fram í Mbekweni fátækrahverfinu í Suður-Afríku. Í mörgum tilfellum hefur þeim verið útskúfað úr samfélögunum sem þær búa í, eða þá að þær flýja án þess að fólk viti af ástandi þeirra og ákveða að gefa barnið. Þannig geta þær snúið aftur og haldið lífi sínu áfram eins og ekkert hafi í skorist. Séu þær hins vegar útskúfaðar eiga þær fáa kosti aðra en að skapa sér nýtt líf. Nánari upplýsingar um starfsemina er að finna á heimasíðu samtakanna. |
| Kosningarnar í Mósambík:
Guebuza sigraði með yfirburðum |
 |
Það fór eins og reiknað hafði verið með: Armando Guebuza forseti Mósambík vann yfirburðasigur í kosnsingunum sem fram fóru í landinu síðastliðinn miðvikudag. Tilkynnt var um úrslitin síðastliðinn mánudag og þá kom í ljós að flokkur forsetans - Frelimo - hafði fengið 71% atkvæða í þingkosingunum þegar talningu var lokið frá þorra kjörstaða. Í forsetakosningunum vann Guebuz enn stærri sigur, hlaut 76% atkvæða, en fulltrúi Renamo hlaut 15% og fulltrúi nýju Lýðræðishreyfingarinnar (MDM) fékk 9% atkvæða.
Eftir kosningarnar er líklegt að stjórnarflokkurinn - sem hefur verið við völd fra lokum borgarastyrjaldarinnar - hafi 193 sæti af 250 á mósambíska þinginu. Renamo hlaut 17% atkvæða í þingkosningunum og MDM 4%.
Nánar
|
| Madonna í Malaví |
 |
|
Fréttir frá Malaví síðustu dagana hafa snúist um eitt: Madonnu. Stórstjarnan var vikutíma í landinu ásamt börnum sínum, þar af tveimur sem fæddust í Malaví, og starfsmönnum hjálparsamtakanna Raising Malawi sem hún stofnaði árið 2006. Á þeim tíma sem Madonna dvaldi í landinu tók hún skóflustungu að nýjum skóla fyrir munaðarlausar stúlkur sem rís skammt utan við höfuðborgina Lilongwe. Einnig fór Madonna í heimsókn á heimilið þar sem David, ættleiddi sonur hennar, var áður en hún kom til sögunnar.
|
| Veftímaritið er á... |
Lítið við! |
| Á döfinni |
UNIFEM-UMRÆÐUR: Að vera kona í Malaví
Stella Samúelsdóttir og Inga Dóra Pétursdóttir fjalla um líf og stöðu kvenna í Malaví á UNIFEM-UMRÆÐUM laugardaginn 7. nóvember kl 13:00 í húsnæði Miðstöðvar Sameinuðu þjóðanna að Laugavegi 42.
|
| Kapuscinski fyrirlestrar um þróunarsamvinnu |
|
Háskólar í tólf nýjum aðildarríkjum Evrópusambandsins verða með fyrirlestra um þróunarsamvinnu á næstu misserum. Fyrirlestraröðin kallast "Kapuscinski fyrirlestrar" í höfuðið á pólska fræðimanninum Ryszard Kapuscinski en að fyrirlestraröðinni koma Evrópusambandið og Þróunaráætlun SÞ.
Nánar |
| Aldrei fleiri börn bólusett |
 |
Samkvæmt nýrri skýrslu Barnahjálpar Sameinuðu þjóðanna eru nú fleiri börn bólusett gegn banvænum sjúkdómum en nokkru sinni fyrr. Þrátt fyrir það munu að minnsta kosti 24 milljón kornabörn fara á mis við þessa mikilvægu heilsuvernd án frekara fjármagns og bætts aðgengis.
Nánar
|
| Fjölmenni á fundi um mansal |
|
Fjölmenni sótti fund um mansalsmál sem utanríkis- og dóms- og mannréttindaráðuneyti stóðu að síðastliðinn föstudag. Á fundum bar varamanssalsfulltrúi Öryggis- og samvinnustofnunar Evrópu, ÖSE, lof á aðgerðaráætlun stjórnvalda í mansalsmálum.
Össur Skarphéðinsson utanríkisráðherra, sem opnaði fundinn, minnti í upphafi á þá áherslu sem ríkisstjórnin leggur á baráttuna gegn mansali og minnti í því sambandi á aðgerðaráætlunina. Dró hann m.a. athygli á nauðsyn þess að alþjóðlegir sáttmálar, t.d. Palermó-sáttmálinn, tækju gildi, en að því væri stefnt á yfirstandandi þingi.
|
| Um Veftímaritið |
 |
Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu stofnunarinnar.
Skráið ykkur í áskrift á heimasíðunni, www.iceida.is og látið vinsamlegast aðra með áhuga á þróunarmálum vita af tilvist veftímaritsins. Allar ábendingar um efni eru vel þegnar.
Þeir sem vilja afskrá sig af netfangalista, eða senda okkur ábendingu um efni, eru vinsamlegast beðnir um að senda slík erindi á netfangið iceida@iceida.is. Ritstjóri er Gunnar Salvarsson, gsal@iceida.is.
ISSN 1670-8105 Bestu kveðjur, Útgáfu- og kynningardeild ÞSSÍ
| |
|
