Sífellt fleiri komast að þeirri niðurstöðu að til þess að stuðla að framförum í heiminum sé farsælast að fjárfesta í stúlkum og ungum konum. Þetta var m.a. niðurstaða ársfundar samtakanna Clinton Global Initiative sem í fyrsta sinn í fimm ár setti þetta þverlæga mál á oddinn í öllum verkefnum. Minna má á að á síðustu vikum hafa komið út markverðar skýrslur í tengslum við þróunarmál þar sem athyglinni er beint að þessum þjóðfélagshóp sérstaklega í þróunarríkjunum, m.a. skýrsla Plan International, Because I Am A Girl, skýrsla Center for Global Develeopment, Start With A Girl: A New Agenda for Global Health - og einnig er vert að benda á vefsíðuna Girl Effect, sem er merkilegt vefsvæði á vegum Nike Foundation. Þar má m.a. má lesa eftirfarandi:

* Þegar stúlka í þróunarlöndunum aflar sér menntunar í sjö ár eða lengur giftist hún fjórum árum síðar og eignast færri börn.
* Menntaðar stúlkur verða menntaðar konur sem - eins og rannsóknir sýna - eiga heilbrigðari börn og líkurnar aukast á því að börnin gangi menntaveginn.
* Þegar kona eða stúlka vinnur sér inn tekjur nýtur hún 90% af tekjunum í þágu fjölskyildunnar en hjá körlum ere sama hlutfall aðeins 30 til 40%.
Niðurstaðan? Að mennta stúlkur og konur - hvar sem er í heiminum - árangurinn birtist í lækkandi fæðingartíðni og meiri hagvexti. 

Lífslíkur í Malaví hafa aukist verulega á síðustu árum. Árið 2004 voru lífslíkurnar 39 ár en samkvæmt nýjustu Þróunarskýrslu SÞ eru lífslíkur í Malaví komar í 52 ár. Ekki kemur fram í skýrslunni hvaða meginástæður eru fyrir þessari jákvæðu þróun en samkvæmt frétt National í Malaví telja sérfræðingar í heilbrigðismálum að þakka megi hækkunina til betri næringar og fjölgunar þeirra sem hafa aðgang að lyfjameðferð vegna HIV og alnæmis.
Læsi er annað atriði sem vegur þungt á lífskjaralistanum. Í þeim efnum hafa Malavar einnig bætt sig undraskjótt á fáeinum árum og samkvæmt nýju Human Development Report 2009 er 71,8% fullorðinna læsir í Malaví, sú tala var 64.1% árið 2005.
Þótt margt jákvætt megi lesa út úr skýrslunni um framfarir í Malaví hækkað þjóðin þó aðeins um eitt sæti á lífskjaralistanum, fer úr 161. sæti í 160. sæti. Árið 2004 var Malaví í 166. sæti.
Dagblaðið Nation vekur athygli á því að tölurnar sem nýja skýrslan notar til viðmiðunar eru fjarri því að vera glænýjar, frá 2005 og 2006 segir blaðið, og því endurspeglar skýrslan ekki Malavíska "efnahagsundrið" sem mörgum hefur orðið tíðrætt um á síðustu misserum.
 

Börn í milljónatali sæta illri meðferð en samkvæmt nýrri skýrslu Barnahjálpar Sameinuðu þjóðanna hafa orðið framfarir á ýmsum sviðum. "Progress For Children" heitir skýrslan og er sú áttunda í röðinni frá stofnuninni en sú fyrsta sem fjallar um barnavernd og hvernig þjóðir standa að því að vernda börn gegn hvers konar skaða. Fjallað er m.a. um ofbeldi gegn börnum, barnahjónabörn, limlestingar á kynfærum kvenna, barnaþrælkun, mansal og misnotkun barna, börn á flótta og börn með fatlanir, svo eitthvað sé nefnt.
 

Því var spáð snemma á árinu að svínaflensan myndi bitna harðast á þróunarlöndunum, ef hún næði að þróast í heimsfaraldur. Samkvæmt skýrslu frá Sameinuðu þjóðunum sem breska dagblaðið Observer birti fyrri skömmu er óttast svínaflensufaraldurinn geti orðið milljónum að bana og valdið stjórnleysi í fátækustu þjóðum heims. Í vikunni var greint frá því í frétt frá Alþjóðaheilbrigðisstofnuninni (WHO) að um 100 þróunarríki fái bóluefni við flensunni fljótlega, eða jafnvel í byrjun nóvember. Lyfjafyrirtæki hafa gefið milljónir skammta af bóluefni og margar ríkar þjóðir heita því að fátækari þjóðir fái 10% af keyptum bóluefnum.

 

Samkvæmt nýjustu tölum WHO hafa um 4500 látist á heimsvísu af völdum flensunnar.

BBC