Hvar á að bera niður til að ná mestum árangri í heilbrigðismálum í þróunarríkjunum? Margir hafa leitast við að svara þessari áleitnu spurningu. Bandarísku samtökin Center For Global Development telja sig hafa fundið svarið: Að bæta heilsufar unglingsstúlkna í þróunarlöndunum. Samtökin telja að betri heilsa stúlkna á unglingsaldri hafi margvísleg jákvæð áhrif og sé í raun lykillinn að mörgum framfaraþáttum, auki heilbrigði mæðra og barna, dragi úr áhrifum HIV smits og hraði félagslegri og efnahagslegri þróun.

 

Ný skýrsla frá samtökunum fjallar um þetta efni og kallast: Start With Girl: A New Agenda for Global Health. 

Hundruð þúsunda Afríkubúa um alla álfuna missa húsnæði sitt á hverju ári þegar yfirvöld þvinga þá úr húsum sínum.  Frá þessu segir á heimsíðu Amnesty International en Íslandsdeildin verður með "hús undirskriftanna" á Lækjartorgi næstkomandi laugardag, þar sem fólki gefst kostur á að setja nafn sitt á húsið, sem síðan verður sent til stjórnvalda í Nígeríu, þar sem þvinguðum brottflutningi hefur verið beitt í miklum mæli.
Húsið er hluti af táknrænni aðgerð á Lækjartorgi til stuðnings fólki sem sætir þvinguðum brottflutningi víða í Afríku. Ljósmyndir verða til sýnis, aðgerðakortum dreift, boðið upp á heimsókn í hreysi og heitt afrískt te.
Íslandsdeild Amnesty International hvetur fólk til að koma á Lækjartorg laugardaginn 10.október milli klukkan 13:00 og 15:00.


Nánar

Skelfilegur skortur er á tækjabúnaði í mörgum sjúkrahúsum í Úganda eins og fram kemur í fréttaskýringu breska ríkisútvarpsins BBC þar sem vakin er athygli á að mörg sjúkrahúsanna búa ekki einu sinni við nauðsynlegustu lækningatækin.
Í greininni segir að margir þættir hafa leitt til þess að ástandi er jafn bágborið og raun ber vitni. Meðal annars kemur fram sú skoðun fulltrúa danskrar þróunarsamvinnu að ráðuneyti heilbrigðismála ráði oft á tíðum ekki við álagið sem fylgi því t.d. að taka á móti risastórri lyfjasendingu, ráðuneytið hafi hvorki tíma, fjármagn né mannafla til að dreifa lyfjunum.
 

Fólksflutningar stuðla að þróun samfélags. Stjórnvöld verða að draga úr hindrunum þannig að fólk geti flutt innan landa og á  milli landa. Þetta kemur fram í skýrslu Þróunaráætlunar SÞ (Human Development Report) sem var birt á mánudaginn.
 
Í frétt Bistandsaktuelt í Noregi segir að þótt margir Norðmenn og aðrir íbúar Evrópu líti á búferlaflutninga fátæks fólks til Evrópu sem vandamál og tali á þá leið að "innflytjendur taka störfin frá okkur" sé raunveruleikinn allt annar. "Í fyrsta sinn beinir UNDP (Þróunarstofnun SÞ)kastljósinu á fólksflutninga í árlegri skýrslu sinni.. og svarar gagnrýni pólítskrar þröngsýni og fordóma í garð erlends vinnuafls," segir í fréttinni.
 
Í skýrslunni kemur fram að í fæstum tilvikum séu fólksflutningar frá þróunarríkjum til iðnríkjanna, en þegar slíkt eigi sér stað, sé það iðnríkjunum til hagsbóta en ekki til skaða.

 

Ísland er í þriðja sæti á lista Sameinuðu þjóðanna yfir lífskjör í löndum heims. Norðmenn búa við bestu lífskjör í heimi samkvæmt þróunarskýrslu sem birt var í dag. Níger er í neðsta sæti á listanum.
 

Talið er að nokkur vestræn ríki fresti greiðslum á beinum fjárhagslegum stuðningi við ríkisstjórn Sambíu sökum þess að þau telji stjórnvöld taka of slælega á spillingu, að því er Reuters fréttastofan hefur eftir heimildum. Sambía reiðir sig mjög á beinan fjárlagastuðning en veitendur þróunaraðstoðar eru uggandi eftir að nokkur alvarleg spillingarmál hafa komið upp. Ríkisstjórnina skortir enn um 25-30% til að fylla upp í fjárlagagatið og gæti því þurft að tilkynna um skattahækkanir að ná endum saman.