|
|
| Veftímarit um þróunarmál |
Þróunarsamvinna
Samstarfsþjóðir 2. október 2009 |
|
| Fátækum fjölgar um eitt hundrað á hverri mínútu |
G20 ríkin ættu að grípa til skjótra aðgerða til að verja fátæk ríki gegn fjármálakreppunni sem leiðir tl þess að fátækum fjölgar um eitt hundrað á hverri mínútu, segir í frétt frá alþjóðlegu hjálparsamtökunum Oxfam.
Í fréttinni kemur fram að þróunarríki um heim allan berjist við afleiðingar alþjóðlegu fjármálakreppunnar sem veldur tekjumissi, atvinnuleysi og hefur leitt til þess að þeir sem búa við sult hafa aldrei í sögunni verið fleiri: rúmlega milljarður manna. Oxfam segir að kreppan hafi komið á þeim tíma þegar þróunarríkin áttu þegar í vanda vegna hækkandi matarverðs, flóða og þurrka og fæðuskorts sem rakinn er til breytinga á loftslagi.
Greining Oxfam á hagtölum frá ríkisstjórnum þjóðanna sunnan Sahara sýna að efnahagur þeirra versnar um 70 milljarða dala á þessu ári vegna alþjóðlegu fjármálakreppunnar - og ólíkt ríku löndunum geta þessar þjóðir ekki fengið lánsfé til að leysa vandann, segir í frétt Oxfam.
Að mati FAO, Matvælastofnunar Sameinuðu þjóðanna, er reiknað með að fjöldi vannærðra nái sögulegu hámarki á þessu ári en stofnunin telur að rúmlega ein milljón manna finni til sultar á hverjum degi, 1.020 þúsund manns. Fjölgun þeirra sem búa við sult á síðustu vikum og mánuðum er ekki tilkomin vegna lélegrar uppskeru heldur vegna afleiðinga af fjármálakreppunni sem veldur tekju- og atvinnumissi. Í október kemur út á vegum FAO ritið "The State Of Food Insecurity in the World" þar sem nýjar upplýsingar verður að finna. Nánar
|
| Nota ætti íþróttir í auknum mæli í þróunarverkefnum |
Nota ætti íþróttir í auknum mæli í íslenskum þróunarverkefnum vegna þess að með íþróttum er hægt að hafa jákvæð áhrif á nám og þroska barna og unglinga. Íþróttir hafa gífurlegt aðdráttarafl og eru vinsælasta skipulagða afþreying barna og unglinga. Með íþróttum má því á ódýran og einfaldan máta ná til fjölda ungs fólks og uppfylla hluta af mannréttindum þeirra.
Þetta er niðurstaða Lárusar Jónssonar í glænýrri meistararitgerð - Íþróttir án landamæra - þar sem hann veltir fyrir sér hvernig íþróttir hafa verið notaðar af Íslendingum í þróunarsamvinnu og hvaða þættir þurfi að vera til staðar til að nýta íþróttir á árangursríkan hátt í slikri samvinnu.
Þátttakendur í rannsókninni voru Ágústa Gísladóttir, Henrik Danielsen, Kristian Guttesen, Guðbjörg Bergmundsdóttir og Drífa H. Kristjánsdóttir. "Öll hafa þau reynslu af því að nýta íþróttir í þróunarsamvinnu en þó með misjöfnum hætti," segir Lárus. "Henrik og Kristian stóðu að þróunarverkefni í Namibíu þar sem þeir kenndu skák. Ágústa og Drífa starfa hjá ÞSSÍ og hafa reynslu af byggðarþróunarverkefni í Úganda þar sem skólaíþróttir eru hluti af byggðaþróunarverkefni. Guðbjörg var einn af stofnendum íþróttafélagsins
Kraftaverkin."
Lárus segir að einfalt sé að ná til samfélagsins í gegnum íþróttir og íþróttaþróunarverkefni og hann telur að þau þurfi hvorki að vera dýr né flókin í uppsetningu til þess að hafa jákvæð áhrif á menntun og þroska barna unglinga í þróunarlöndum. "Undir ákveðnum kringumstæðum geta íþróttir haft jákvæð áhrif á nám og þroska barna og unglinga en varast bera að gera íþróttum of hátt undir höfði því virði þeirra helst í hendur við aðra samfélagslega þætti. Aðkoma heimamanna er einn af lykilþáttum farsælla íþróttaþróunarverkefna og leiðtogar innan verkefna þurfa að vera mjög áhugasamir og helst að hafa reynslu af þróunarmálum eða öðrum sambærilegum verkefnum," segir hann.
Ritgerð Lárusar Jónssonar |
| Fjórar milljónir HIV smitaðra fá nú lyfjameðferð |
 Rúmlega fjórar milljónir manna með HIV smit í þróunarríkjum fá nú lífsnauðsynlega lyfjameðferð við sjúkdómnum, svokallaða ART meðferð. Samkvæmt nýrri skýrslu hefur HIV smituðum sem fá meðferðina fjölgað um 36% milli ára og þeir eru tífalt fleiri en fyrir tíu árum. Tölurnar eru miðaðar við árslok 2008.
Hlutfallslega hefur fjölgun HIV smitaðra í meðferð verið mest meðal þjóða sunnan Sahara þar sem þrjár milljónir manna fá nú ART meðferð við sjúkdómnum. Þótt mikill árangur hafi náðst á síðustu árum er enn talið að meirihluti HIV smitaðra fái enga meðferð, 44% séu hins vegar á lyfjum.
Nýtt bóluefni gegn alnæmi - Mbl.is |
| Hamfarir á Kyrrahafi og Filippseyjum:
Rauði kross Íslands tekur á móti framlögum |
Rauði kross Íslands tekur á móti framlögum til aðstoðar fórnarlömbum jarðskjálfta og flóðbylgju á Kyrrahafseyjum, og fellibyls og flóða á Filipseyjum. Hundruð manna hafa látið lífið á þessum svæðum undanfarna daga og tugir þúsunda eiga um sárt að binda.
Jarðskjálfti sem mældist 8 á Richter reið yfir Samóaeyjar í Kyrrahafinu í fyrrakvöld og fylgdi mikil flóðbylgja í kjölfarið. Yfir 100 létust í hamförunum, bæði á Samóaeyjum og nágrannaeyjunni Tonga og fjölda er enn saknað. Hundruð manna hafa misst heimili sín vegna jarðskjálfta og flóða. Þetta er mikið áfall á þessum eyjum þar sem innan við 300.000 íbúar búa.
Nánar á vef Rauða krossins |
Áhrif loftslagsbreytinga á síðasta ári:
Tuttugu milljónir neyddust
til að flýja heimili sín |
 Náttúruhamfarir af völdum loftslagsbreytinga eins og þurrkar, fellibyljir og flóð leiddu til þess að tuttugu milljónir manna - örlítið færri en íbúa Ástralíu - þurftu að yfirgefa heimii sín árið 2008. Þetta kemur fram í nýrri skýrslu þar sem færð eru sterk rök fyrir því að koma á reglulegu eftirliti með breytingum á heimilshögum vegna loftslagsbreytinga.
Alls neyddust 36 milljónir manna til að flýja heimili sín vegna skyndilegra náttúruhamfara, þar á meðal jarðskjálfta og skriðuföll. Á sama tíma flosnuðu 4.6 milljónir upp vegna átaka.
Nánar
|
| Af því að ég er stelpa
-skýrsla og verkefni Plan International vekur athygli |
 Vönduð skýrsla Plan International í Ástralíu um stöðu stúlkna og ungra kvenna - sem Veftímaritið sagði frá í síðustu viku - vekur verðskuldaða athygli. Þar segir að fjárfesting í stúlkum sé ein besta leiðin til að útrýma fátækt vegna þess að konur sem fái tækifæri til mennta verji nánast öllum tekjum sínum í þágu fjölskyldunnar. Skýrslan - Because I Am A Girl - sýnir að ungar konur eru fyrstar til að missa atvinnuna eða hætta námi auk þess sem stúlkubörn fá minnsta matarskammtinn þegar þröngt er í búi.
Plan International hefur fylgst með 140 stúlkum frá fæðingu en stúlkurnar koma frá níu þróunarríkjum. Ian Wishart, forstjóri Plan, segir að í mörgum löndum séu þau viðhorf enn ríkjandi að stúlkur séu ekki eins mikilvægar og piltar. "Fyrir stúlkur er staðan frekar dapurleg," segir Ian Wishart og bendir á að 100 milljónir stúlkna vanti inn í tölfræði um íbúafjölda í heiminum vegna þess að fóstrum stúlkubarna sé eytt.
Nánar
| |
|
|
|
| Drengurinn sem beislaði vindinn |
 |
Komin er út bókin "Drengurinn sem beislaði vindinn" (The Boy Who Harnessed the Wind) sem er sönn saga, óvenjuleg og ævintýraleg um táningspilt frá Malaví. Pilturinn, William Kamkwamba, umbreytti þorpinu sínu með því að smíða vindmyllu sem færði fólkinu rafmagn. Vindmylluna smíðaði hann úr ýmiss konar drasli sem hann sankaði að sér og flestir héldu að hann væri orðinn galinn.
William hafði neyðst til að hætta námi fjórtán ára árið 2002 sökum þess að fátækir foreldrar hans höfðu ekki efni á að greiða skólagjöldin. Hann hélt hins vegar áfram sjálfsnámi, sat löngum stundum á bókasafni og lét sig dreyma. Þegar hann sá mynd af vindmyllu sem framleiddi rafmagn í alfræðibók varð ekki aftur snúið.
Heillandi saga sem verður örugglega kvikmynduð! Nánar
|
| Veftímaritið er á... |
Kíktu í heimsókn |
| V-dagurinn og UNICEF taka höndum saman |
|
|
Á dögunum ýttu V-dagssamtökin á Íslandi og UNICEF úr vör sameiginlegu átaki til að vekja athygli á umfangi kynferðisofbeldis gagnvart konum og stúlkum í Austur-Kongó. Á sama tíma verða samtökin með söfnun meðal íslensks almennings til styrktar verkefnum í þágu ungra kynferðisbrotaþolenda í landinu.
|
| Ætla að útrýma malaríu á sex árum |
 |
|
Tuttugu þjóðarleiðtogar Afríkuríkja hafa tekið höndum saman í baráttunni gegn malaríu og ætla að útrýma sjúkdómnum á sex árum - fyrir árið 2015. Malaría leggur um eina milljón manna að velli á ári hverju í álfunni. Baráttusamtökin kallast African Leaders Malaria Alliance.
Börn yngri en fimm ára og barnshafandi konur eru þeir þjóðfélagshópar sem malaría leggst þyngst á. Talið er að sjúkdómurinn kosti Afríkuríki um 12 milljarða dala á ári.
|
| Alvarlegt hungur í sjö Afríkuríkjum |
|
Rúmlega 23 milljónir íbúa í sjö ríkjum austur Afríku búa við alvarlegt hungur og örbirgð vegna langvarandi þurrka. Ástandið hefur ekki jafn skelfilegt í áratug að mati talsmanna hjálparsamtakanna Oxfam. Bresku samtökin hafa hrundið af stað nýrri söfnun til aðstoðar bágstöddum í þessum heimshluta og ætla að safna 9,5 milljónum punda. Löndin sjö eru Kenía, Eþíópía, Sómalía, Úganda, Súdan, Djíbútí og Tansanía.
Nánar
|
| Fréttir & fréttaskýringar |
|
|
| Forseti Malaví næsti forseti Afríkusambandsins? |
|
Bingu wa Mutharika forseti Malawi gæti orðið næsti forseti Afríkusambandsins (African Unicion) eftir að leiðtogar SADAC (Southern African Development Community) tilnefndu hann í stöðuna. Muhammar Gaddafi forseti Líbýu er núverandi forseti Afríkusambandsins.
Nánar |
| Smáflokkum hafnað í Mósambík |
|
Stjórnarskrárráð Mósambík hefur vísað frá kærum fjórtán smáflokka sem uppfylltu ekki skilyrði um þátttöku í sveitarstjórnarkosningum 28. október næstkomandi. Flokkarnir höfðu ekki lagt fram nauðsynleg gögn til að vera í framboði. Aðeins stórflokkarnir tveir, Frelimo og Renamo, sem löngum hafa eldað grátt silfur í mósambískum stjórnmálum bjóða fram í öllum þrettán kjördæmum landsins.
Nánar | |
|
|
 |
Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu stofnunarinnar.
Skráið ykkur í áskrift á heimasíðunni, www.iceida.is og látið vinsamlegast aðra með áhuga á þróunarmálum vita af tilvist veftímaritsins. Allar ábendingar um efni eru vel þegnar.
Þeir sem vilja afskrá sig af netfangalista, eða senda okkur ábendingu um efni, eru vinsamlegast beðnir um að senda slík erindi á netfangið iceida@iceida.is. Vegna veikinda kom Veftímaritið ekki út á miðvikudag eins og venjan er - beðist er velvirðingar á seinkuninni. Ritstjóri er Gunnar Salvarsson, gsal@iceida.is.
ISSN 1670-8105 |
| Bestu kveðjur, Útgáfu- og kynningardeild ÞSSÍ |
|
|
