Össur Skarphéðinsson utanríkisráðherra sækir 64. allsherjarþing Sameinuðu þjóðanna sem sett verður í dag og leiðir fund Norðurlandanna og Eystrasaltsríkja síðar í dag. Utanríkisráðherra flytur aðalræðu fyrir Íslands hönd í allsherjarþinginu laugardaginn 26. september.
Í gær sótti ráðherra leiðtogafund um loftslagsbreytingar sem aðalframkvæmdastjóri Sameinuðu þjóðanna, Ban Ki-moon, boðaði til. Þar tók hann þátt í hringborðsumræðum um hvernig megi tryggja hagvöxt í heiminum án þess að auka losun gróðurhúsalofttegunda. Utanríkisráðherra mun einnig sitja fund öryggisráðs Sameinuðu þjóðanna um afvopnunarmál og aðgerðir til að hefta útbreiðslu kjarnavopna á fimmtudag, 24. september.
Utanríkisráðherra mun eiga tvíhliða fundi með öðrum utanríkisráðherrum meðan á dvöl hans hjá S.þ. stendur

Ólafur Ragnar Grímsson, forseti Íslands, heldur til Bandaríkjanna í vikunni þar sem hann tekur þátt í þremur alþjóðlegum ráðstefnum þar sem hann mun eiga fundi með þjóðarleiðtogum og sérfæðingum í alþjóðamálum, loftlagsmálum og orkumálum.
Ólafur verður málflytjandi í pallborðsumræðum á heimsþingi Clinton stofnunarinnar þar sem rætt verður hvernig fjármálamarkaðir geta þjónað almannaheill á heimsvísu. Er hann þar í boði Bills Clinton, fyrrum Bandaríkjaforseta.
Þá verður Ólafur á meðal málflytjenda í boði Samkeppnisráðsins í Bandaríkjunum á leiðtogafundi um orkumál sem haldinn er í Washington. Þar verður fjallað um hvernig nýting hreinna og sjálfbærra orkugjafa getur aukið samkeppnishæfni þjóða. Fer hann yfir reynslu Íslendinga á því sviði.

Samkvæmt fjárlagafrumvarpi finnsku ríkisstjórnarinnar aukast framlög til þróunarmála um 50 milljónir evra og verða alls 966 milljónir á næsta ári. Það jafngildir 0,55% af áætluðum vergum þjóðartekjum.

Stofnun Bill og Melindu Gates hefur til þessa einkum stutt við bakið á verkefnum sem tengjast bættu heilsufari í Afríkuríkjum en stofninin tilkynnti í vikunni um átak meðal fátækra þjóða á sviði bankaviðskipta, m.a. sparifjárreikninga.
Bob Christen framkvæmdastjóri stofnunarinnar segir að það kunni að vera erfitt að skilja hvernig varsla sparifjár geti verið mikilvægt fyrir sárafátækt fólk. Hann segir hins vegar að aðgengi að öruggri vörslu sé forgangsmál hjá fátæku fólki um heim allan.
Stofnunin hefur ákveðið að verja 35 milljónum Bandaríkjadala í því skyni að byggja upp bankaþjónustu í fátækum ríkjum í samstarfi við samtökin Alliance for Financial Inclusion.

Frakklandsforseti áformar að hvetja G-20 ríkin á fundinum í Pittsburg í vikulokin að samþykkja svokallaðan "Tobin skatt" á alla fjármálagerninga til að sporna við spákaupmennsku og hvetja til ákvörðunartöku sem hafi langtímamarkmið að leiðarljósi. BBC greinir frá.
Tobin skatturinn er gömul hugmynd og er kennd við bandaríska hagfræðinginn James Tobin sem lagði til svipaða skattheimtu á áttunda ártug síðustu aldar. Þá var ætlunin að verja skattfénu til þróunarmála  en núna gæti hann komið fjármálageiranum til bjargar eða til að lífga við efnahag viðkomandi landa.
 
Nánar