|
|
| Veftímarit um þróunarmál |
Þróunarsamvinna
Samstarfsþjóðir 16. september 2009 | |
| Þróunaraðstoð bjargar tíu þúsund börnum á dag! |
Næst þegar einhver segir þér að þróunaraðstoð virki ekki, segðu þá að á hverjum degi sé tíu þúsund börnum bjargað! Þannig hljóðar upphaf fréttar í veftímaritinu Vort Land í Noregi en líkt og flestir aðrir fjölmiðlar í heiminum vitnar ritið í nýja skýrslu Barnahjálpar Sameinuðu þjóðanna sem staðfestir að miðað við tölur frá tíunda áratug síðustu aldar deyi nú tíu þúsund færri börn á hverjum degi.
Í frétt á íslenska vef UNICEF segir:
UNICEF birti í gær nýjar niðurstöður sem sýna að dánartíðni barna undir fimm ára aldri hélt áfram að lækka á árinu 2008. Samkvæmt niðurstöðunum hefur barnadauði dregist saman um 28% á árabilinu 1990 til 2008; úr 90 dauðsföllum á hverjar 1000 fæðingar í 65. Þetta þýðir að heildarfjöldi barna undir fimm ára aldri sem lést árið 2008 var 8,8 milljónir samanborið við 12,5 milljónir árið 1990. Árið 1990 er viðmiðunarár fyrir hin svokölluðu þúsaldarmarkmið Sameinuðu þjóðanna.
"Sé miðað við árið 1990 deyja nú 10.000 færri börn á hverjum degi," sagði framkvæmdastjóri UNICEF, Ann M. Veneman. "Þó mikill árangur hafi náðst er óásættanlegt að á hverju ári deyi 8,8 milljónir barna fyrir fimm ára afmælið sitt."
Kjersti Fløgstad framkvæmdastjóri UNICEF í Noregi segir að mikil lækkun á dánartíðni barna sé gott dæmi um árangur af þróunarstarfi og því hafi verið átakanlegt að heyra það í kosningabaráttunni í Noregi á dögunum að skortur sé á árangri af þróunarsamvinnu. "Án rausnarlegs framlags frá Noregi og öðrum þjóðum hefðum við aldrei séð þessar niðurstöður sem sýna að milljónum barna hefur verið bjargað," er haft eftir Kjersti.
UNICEF á Íslandi
|
| Namibía: Samskiptamiðstöð heyrnarlausra stofnuð að íslenskri fyrirmynd |
 Menntamálaráðuneyti Namibíu hefur úthlutað lóð fyrir nýja Samskiptamiðstöð heyrnarlausra og verið er að teikna húsnæði og ráða fólk til starfa. Stefnt er að því að starfsfólk námibísku samskiptamiðstöðvarinnar, sem hlotið hefur nafnið Center for Communication and Deaf studies (CCDS), komi til Íslands í þjálfun á næsta ári hjá Samskiptamiðstöð heyrnarlausra og heyrnarskertra.
"Það var verulega ánægjulegt að sjá hvernig þjónusta við heyrnarlausa er að festa rætur og spíra um allt land. Heyrnarlausir, sem fengið hafa þjálfun, eru farnir að kenna öðrum og túlkar túlka fyrir heyrnarlausa í námi. Viðhorf innan skólakerfisins eru að breytast þar sem skólamenn eru að vakna til vitundar um að heyrnarlausir geti menntast," segir Valgerður Stefánsdóttir framkvæmdastjóri Samskiptamiðstöðvar heyrnarlausra og heyrnarskertra í grein um táknmálsverkefni ÞSSÍ í Namibíu.
Fram kemur í grein Valgerðar að samskiptamiðstöðin CCDS verður opnuð nú á haustdögum og þar verði haldið áfram að vinna að uppbyggingu og þróun starfseminnar. Gert sé ráð fyrir að samskiptamiðstöðvarnar á Íslandi og í Namibíu eigi áframhaldandi samstarf þótt skrifstofu Þróunarsamvinnustofnunar í Namibíu verði lokað. "Þannig má fullyrða að hafin sé þróun í Namibíu sem getur ekki annað en eflst og dafnað og mun leiða til mikilla og jákvæðra breytinga á lífi heyrnarlausa í landinu," segir Valgerður.
Hún segir samstarf Þróunarsamvinnustofnunar, SHH og menntamálaráðuneytis Namibíu hafa verið afar ánægjulegt. Starfsfólk skrifstofu ÞSSÍ í Namibíu hafi ásamt heimamönnum unnið að þróun og uppbyggingu á þjónustu við heyrnarlausa í Namibíu eftir tillögum ráðgjafa SHH og mikill árangur hafi náðst.
Grein Valgerðar |
| Mannskæð átök á götum úti í Kampala um helgina |
"Það er allt um garð gengið og lífið gengur sinn vanagang. Á meðan á ólátunum stóð héldu menn sig heima og þrátt fyrir að við værum vitni að því sem var að gerast í miðborginni á föstudaginn þá var aldrei nein hætta á ferðum fyrir okkur Íslendinga eða starfsfólk okkar á umdæmisskrifstofunni," segir Árni Helgason umdæmissstjóri ÞSSÍ í Kampala, höfuðborg Úganda en þar voru miklar róstur á föstudag og um helgina. Alls létust 21 í þessum mannskæðu átökum og samkvæmt fréttum hefur Mannréttindavaktin krafist rannsóknar á hlut lögreglunnar í dauðsföllunum. Sex hundruð voru handtekin.
Árni segir að það hafi vissulega verið ógnvekjandi sjón að sjá óeirðalögreglu og her gráan fyrir járnum "stilla til friðar" með hörku og vopnavaldi. Hann nefnir hins vegar að mótmælendur hafi ekki sýnt minni hörku og beitt skotvopnum, múrsteinum og bareflum. "Verst er að miklar líkur eru á því að þetta sé forsmekkurinn af því sem verða mun algengt í aðdraganda forsetakosninga árið 2011," segir hann.
Átökin eru rakin til spennu milli Yoweri Museveni forseta Úganda og Ronalds Mutebi II konungs Búgandaríkis sem er eitt fimm konungsríkja í landinu. Rósturnar hófust síðastliðinn fimmtudag þegar ríkisstjórnin synjaði konungnum að ferðast inn á tiltekið svæði í borginni. Ungmenni af Búgandaættbálknum reiddust ferðabanninu og þyrptust út á götur, stálu m.a. skotfærum frá lögreglustöð og þá fór allt í bál og brand.
|
| Nánast ómögulegt að ná þúsaldarmarkmiðunum |
 Fjármálakreppan leiðir til þess að afar ólíklegt er að þúsaldarmarkmið Sameinuðu þjóðanna um að draga úr sárafátækt um helming fyrir árið 2015 náist, að því er segir í nýrri skýrslu UNCTAD (United Natins Conference On Trade And Development) sem birt var á ráðstefnu á dögunum. Alþjóða fjármála- og efnhagskreppan hefur dregið verulega úr hagvexti í þróunarríkjum.
Nánast öll þróunarríki hafa upplifað mikinn samdrátt frá miðju ári 2008, segir í skýrslunni. Þjóðir í Asíu og Suður-Ameríku hafi veitt mest viðnám við ástandinu en miklir erfiðleikar steðji að þjóðum Austur-Evrópu og hagkerfi þjóða í Afríku taki skell á árinu 2009 auk þess sem landsframleiðsla muni minnka verulega meðal þjóða í löndum sunnan Sahara.
Þessi þróun leiði til þess að nánast ómögulegt sé að ná þúsaldarmarkmiðum Sameinuðu þjóðanna fyrir árið 2015.
Fram kemur í skýrslunni að víða um heim sé verðhjöðnun - ekki verðbólga - helsta ógnin á næstu misserum.
Nánar
|
|
Markmiðum náð í meirihluta verkefna Alþjóðabankans |
 Skilgreind markmið hafa náðst í tveimur af hverjum þremur verkefnum Alþjóðabankans sem tengjast heilbrigðismálum, samkvæmt nýrri úttekt sem kynnt verður í Osló í dag. Umsvif Alþjóðabankans á þessu sviði hafa minnkað í hlutfalli við aðra málaflokka en engu að síður hefur stuðningurinn verið víðtækur eins og tölurnar gefa til kynna, 17 milljörðum Bandaríkjadala var varið til verkefna á þessu sviði á árabilinu 1997 til 2008.
Sum verkefnin tókust fádæma vel og m.a. er tilgreint í úttektinni malaríuverkefni í Eritreu þar sem dauðsföllum af völdum sjúkdómsins fækkaði um 85%. Önnur verkefni tókust verr og skýrsluhöfundar segja að almennt valdi árangur verkefna í Afríku vonbrigðum, t.d. hafi aðeins eitt af hverjum þremur HIV/alnæmisverkefnum tekist vel. | |
|
|
|
| Peningana eða lífið! |
 |
Komugjöld á heilsugæslustöðvar eru oft spurning um líf eða dauða fyrir milljónir manna meðal fátækustu þjóða heims. Sá sem er of snauður til að greiða komugjöld borgar með lífi sínu, eins og segir í glænýrri skýrslu hjálparsamtakanna OXFAM. Sextíu samtök leggja til í skýrslunni - Peningana eða lífið ( Your Money Or Your Life) - að í sjö þróunarríkjum verði heilsugæsla boðin ókeypis. Löndin eru: Burúndi, Gana, Líbería, Malaví, Mósambík, Nepal og Síerra Leone. Í næstu viku, 23. september, boðar allsherjarþing Sameinuðu þjóðanna til leiðtogafundur um heilbrigðismál og þá reynir, að sögn talsmanna OXFAM, á það hvort leiðtogar heims eru reiðubúnir að styðja tillögur um ókeypis heilbrigðisþjónust i umræddum löndum og bjarga þannig þúsundum mannslífa. Í skýrslunni kemur m.a. fram að rúmlega hálf milljón barnshafandi kvenna deyi árlega vegna þess að þær fá ekki aðgengi að nauðsynlegri heilbrigðisþjónustu. Ennfremur eru dæmi um að sjúklingar séu sviptir frelsi og haldið nauðugum innan heilbrigðisstofnana vegna þess að þeir geta ekki greitt komugjöld. |
| Veftímaritið er á... |
Kíktu í heimsókn! |
| Bóluefni gæti bjargað milljón börnum á ári |
|
|
Rúmlega ein milljón barna deyr árlega af völdum tveggja sjúkdóma sem tengjast lungnabólgu, sjúkdóma sem bóluefni gætu auðveldlega ráðið bót á, segir í niðurstöðum rannsóknar sem birt er í læknatímarinu Lancet.
Um er að ræða sjúkdómana Streptococcus pneumoniae og Haemophilus influenzae B eða Hib en af völdum þeirra látast árlega 1.2 milljónir barna undir fimm ára aldri. Örugg og árangursrík bóluefni eru til fyrir báða sjúkdómana en 95% dánartilfella eru meðal fátækra þjóða í Afríku og Asíu.
Nánar
|
| Lýðræði í Níkaragva og fatlaðir í Afríku |
 |
Eins og jafnan eru margar áhugaverðar greinar og fréttir um þróunarmál í nýjasta tölublaði Udvikling sem gefið er út af danska utanríkisráðuneytinu. Nefna má ítarlega umfjöllun um lýðræði - eða öllu heldur skort á lýðræði - í Níkaragva þar sem velt er m.a. vöngum yfir því hvort það hafi verið réttmæt ákvörðun Dana að draga úr þróunarsamvinnu við annað fátækasta land Mið-Ameríku í ljósi þess að lýðræði á undir högg að sækja. Ennfremur er í blaðinu fimm síðna úttekt á stöðu fatlaðara í þróunarlöndum sem er allt frá því að vera afleit upp í það að vera til fyrirmyndar.
Nýtt tölublað Udvikling í Danmörku |
| Logarnir kepptu í Danmörku |
 |
Logarnir, landslið Malaví í knattspyrnu, var á keppnisferðalagi í Danmörku í síðasta mánuði en liðið undirbýr sig af kappi eins og mörg önnur landslið undir heimsmeistarakeppnina í fótbolta sem fram fer í Suður-Afríku á næsta ári. Samkvæmt frétt á vef utanríkisráðuneytisins danska kepptu Logarnir við Køge sem náði að pota inn sigurmarki á síðustu mínútum leiksins. Liðið er í 108. sæti á FIFA listanum en Íslendingar eru í 92. sæti.
Nánar | |
|
|
 |
Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu stofnunarinnar.
Skráið ykkur í áskrift á heimasíðunni, www.iceida.is og látið vinsamlegast aðra með áhuga á þróunarmálum vita af tilvist veftímaritsins. Allar ábendingar um efni eru vel þegnar.
Þeir sem vilja afskrá sig af netfangalista, eða senda okkur ábendingu um efni, eru vinsamlegast beðnir um að senda slík erindi á netfangið iceida@iceida.is. Ritstjóri er Gunnar Salvarsson, gsal@iceida.is.
ISSN 1670-8105 |
| Bestu kveðjur, Útgáfu- og kynningardeild ÞSSÍ. |
|
|
