Íslendingar og Svíar hafa ákveðið að hætta þróunarsamstarfi við stjórnvöld í Níkaragva og nú hafa Danir ákveðið að skera niður framlög til þróunarmála í landinu og endurskipuleggja starfsemina. Ulla Tørnæs ráðherra þróunarmála í dönsku ríkisstjórninni var í vettvangsferð í Níkaragva á dögunum og sendi stjórnvöldum skýr skilaboð um að virða beri leikreglur lýðræðisins.
 
"Danir og aðrir veitendur þróunaraðstoðar hafa miklar áhyggjur af þróuninni í Níkaragva. Í viðræðum við ráðherra í ríkisstjórn Níkaragva og Daniel Ortega forseta landsins gerði ég þeim fulla grein fyrir afstöðu okkar. Það er óásættanlegt að lýðræðið eigi í vök að verjast í Níkaragva. Landið er áfram eitt það fátækasta í rómönsku Ameríku en það er tímabært að gera breytingar á stuðningi Dana og forgangsraða öðruvísi en við höfum gert," segir ráðherrann.
 
Vefsíða um viðskilnaðinn við Níkaragva
Sænsk stjórnvöld ákváðu árið 2007 að hætta samstarfi á sviði þróunarsamvinnu við Níkargava og draga jafnt og þétt úr umsvifum þar á árunum 2008-2011. Þótt opinberlega sé viðskilnaðurinn tilkominn vegna breytinga á stefnu Svía í þróunarmálum dylst engum að sænsk stjórnvöld voru ósátt við stjórnarfarið í Níkaragva sem hamlaði samvinnu á sviði þróunarmála.

Tveir Norðmenn, Tjostolv Moland og Joshua French, voru í gær dæmdir til dauða fyrir morð og njósnir í Kongó. Þeir voru sakfelldir fyrir morð á kongóskum bílstjóra sínum fyrr á þessu ári. Mennirnir tveir voru leiddir fyrir herdómstól í Kisangani í Austur-Kongó í maí og meðal ákæruatriða voru morð, njósnir, vopnasmygl. Ennfremur voru þeir taldir stofnað glæpaklíku og haft uppi áform um þjófnað og gripdeildir. Þeir voru sakfelldir fyrir öll atriðin og fengu fimmfalda dauðadóma en dómnum verður áfrýjað til æðra dómstigs. Ennfremur var gerð skaðabótakrafa á hendur norska ríkinu um 358 milljónir norskra króna.
 

Dom i en krigstid - Bistandsaktuelt

 

 

Fimm aldraðir Kenýabúar hafa farið í mál við bresku ríkisstjórnina fyrir meintar pyndingar á nýlendutímanum. Daginn eftir kæran var lögð fram birtist fólkið á tröppunum á Downingsstræti tíu þeirra erinda að afhenda Gordon Brown forsætisráðherra bréf þar sem lýst er í smáatriðum baráttu þeirra fyrir réttlæti.
 
Greint er frá þessum málaferlum í tímaritinu New African.
 
Þar segir að fá nöfn tengist óttaleysinu gegn nýlenduþjóðum jafn vel og "Mau Mau" þótt hreyfingin og sú grimmilega kúgun sem hún sætti af hálfu Breta í Kenýa sé að mestu leyti ósögð. Kærendurnir fimm, fólk á áttræðis- og níræðisaldri, vill nú gera upp sakirnar við kúgara sína í Bretlandi og leitar réttlætis vegna ólýsanlegra pyndinga sem beitt var gegn fylgismönnum á nýlendutímanum.
 

WHO (Alþjóðaheilbrigðismálastofnunin) leiðir nýja baráttuherferð gegn malaríu í löndum sunnan Sahara. Samkvæmt fréttum er ætlunin að byggja verksmiðjur sem framleiða malaríunet og dreifa 700 milljónum slíkra neta - sem breidd eru yfir rúm - fyrir árið 2015 til þess að draga úr dauðsföllum sem rekja má til malaríu. Ætlunin er líka að fá fræga knattspyrnukappa og trúarleiðtoga til þess að vekja athygli almennings á herferðinni og tilgangi hennar.
 

Jörðin sviðnar með degi hverjum, tré fella lauf og grasið færist frá grænu yfir í gult: Það er vor.  Daginn lengir um hálftíma í hvorn enda, það er ekki lengur hrollkalt við fótaferð og á hádegi slær upp fyrir 30 gráður.  Nú fara í hönd heitustu mánuðir ársins sem hér kallast sumar, þar til að fyrstu regndroparnir í átta mánuði taka að falla í lok nóvember; þá umhverfis landið og skrýðist hágrænu á augabragði og maís er sáð í tilbúna akra.
Stóra málið síðustu vikurnar hér í Malaví er giftingaraldur stúlkna....

 

Nánar - Dagbækur Stefáns Jóns í Malaví
 

Að minnsta kosti fimm milljarðar norskra króna af norsku þróunarfé - sem nemur 26.2 milljörðum króna - verður eftir í Noregi. Þetta fullyrðir norska tímaritið Kapital. Samkvæmt frétt E24 í Noregi kveðst Eva Bratholm kynningarstjóri NORAD ekki geta staðfest tölurnar en segir að stór hluti þróunarfjárins verði eftir innanlands og fari m.a. til norskra stofnana. Hún segir það vilja norskra stjórnmálamanna að hafa þennan hátt á.

 

Nánar
 

Fólksfjölgun og loftslagsbreytingar þarf að tvinna saman í samþætta stefnu er krafa sérfræðinga sem ræddu um kynheilbrigði og þróun á ráðstefnu í Berlín á dögunum. Áætlanir um fjölskyldustærð í þróunarríkjum hafa til þessa ekki verið skoðaðar í ljósi loftslagsbreytinga en engu að er vísað til þess í viðbragðsáætlanum vegna afleiðinga af hlýnun jarðar að fólksfjölgun skapi aukið álag á umhverfið.
 
Samkvæmt frétt IPS fréttaveitunnar hafa ríkisstjórnir fjörutíu fátækustu þjóða heims nýlega í áætlunum um loftslagsmál - sem Alþjóðaheilbrigðismálastofnunin hefur greint -tengt saman með beinum hætti málefni sem tengjast fólksfjölgun við loftslagsbreytingar.
 

Úganda er eina landið í austanverðri Afríku sem eru á réttri leið með að uppfylla fjórða lið þúsaldarmarkmiðanna um að draga úr barnadauða um tvo þriðju til ársins 2015. Fulltrúar WHO greindu frá þessu á dögunum en jafnframt kom fram að aðrar þjóðir á þessu svæði, Kenýa, Tansanía, Rúanda og Búrúndi, væru ólíklegar að ná markmiðinu nema því aðeins að aukinn kraftur væri settur í aðgerðir.
 

Rithöfundurinn Ngugi wa Thiong'o verður með fyrirlestur í Hátíðasal Háskóla Íslands klukkan þrjú í dag en hann er einn af gestum Bókmenntahátíðar í Reykjavík.
Ngugi wa Thiong'o er fæddur í Kenýa árið 1938 en hefur verið landflótta og dvalið í Bandaríkjunum og stundað fræðistörf í Irving-háskólanum. Fyrstu verk sín skrifaði Wa Thiong'o á ensku en síðar sneri hann við blaðinu og hóf að skrifa á móðurmáli sínu, gikuyu. Notkun hans á móðurmálinu er leið til þess að móta sjálfsmynd þjóðar sinnar eftir að nýlendutíma Breta lauk því enskan er tungumál valdsins og nær ekki að fanga hinn kenýska raunveruleika sem hann vill lýsa. Wa Thiong'o sat í fangelsi í Kenýa fyrir skoðanir sínar á áttunda áratug síðustu aldar og hélt í sjálfskipaða útlegð þegar hann losnaði, að því er fram kemur á vef Bókmenntahátíðar.