Verið er að endurskoða fyrirkomulag þróunarsamvinnu af hálfu Evrópusambandsins og reiknað er með því að línur skýrist á síðari hluta þessa árs. Helsta fræðistofnun Breta á sviði þróunarmála, ODA, gaf á dögunum út greinargerð (Background Note) um stefnumörkun og skipulag þróunarsamvinnu ESB og höfundarnir velta þar upp ýmsum möguleikum.
 
Nú þegar Íslendingar hafa formlega sótt um aðild að ESB er vert að vekja sérstaka athygli á þessum greinarskrifum og fleirum skyldum greinum.
 

Augustine Nsumba miðjumaðurinn hjá Vestmannaeyingum skoraði eina markið í baráttuleik Eyjamanna við Þrótt á dögunum en þessi skæði sóknarmaður er fæddur og uppalinn í Úganda. Gústi, eins og hann er kallaður i Eyjum, hefur reynst Eyjapeyjum vel í sumar og skoraði tvö eftirminnileg mörk á móti Breiðabliki fyrr í sumar leik sem endaði 4:3 fyrir ÍBV.
 
Nsumba kom til liðs við Eyjamenn í fyrra og skoraði þá fjögur mörk í 1. deildinni. Heima fyrir komu knattspyrnuhæfileikar hans snemma í ljós, þar var honum líkt við Lionel Messi hjá Barcelona og gengur undir viðurnefninu Uganda Messi.
 
Þrír knattspyrnumenn frá Úganda eru í liði Eyjamanna í sumar, auk Nsumba eru í liðinu varnarmaðurinn Andrew Mwesigwa sem skorað hefur eitt mark og sóknarmaðurinn Tonny Mawejje sem hefur skorað tvö mörk í sumar.
 
Nú er ÍBV liðið svo gott sem búið að tryggja sér áframhaldandi veru i Úrvalsdeildinni hér heima. Strákarnir frá Úganda eiga stóran þátt í því.
 

Margar fátækar afrískar fjölskyldur reiða sig á fjárframlög frá skyldmönnum sem starfa á Vesturlöndum. Skólasókn barna ræðst m.a. í mörgum tilvikum af slíkum stuðningi. Fjármálakreppan í vestrænum ríkjum leiðir til þess að dregið hefur úr peningasendingum til Afríku frá ættingjum á Vesturlöndum. Að mati Alþjóðabankans gæti samdrátturinn verið á bilinu 1-6% og þegar horft er til þess að á árinu 2007 námu þessir fjármunir 19 milljörðum Bandaríkjadala sést að það munar um hvert prósent. 

 

Menningartengd þróunarsamvinna hefur verið hluti af þróunarsamvinnu Norðmanna frá því snemma á níunda áratug síðustu aldar. Nú hefur verið lagt mat á þennan stuðning í nýrri skýrslu. Helsta niðurstaðan er sú að slíkur stuðningur geti verið mikilvægur þáttur í efnahagslegri þróun en tryggja verði öflugan staðbundinn stuðning.
 
Úttektin nær til áranna 2000-2008 þar sem Norðmenn veittu 275 milljónum norskra króna í menningartengd verkefni, þar af fóru 60% til verkefna á vegum UNESCO. Þau verkefni eru gagnrýnd fyrir veikan stuðning í viðkomandi landi. Sami veikleiki er einnig helsta gagnrýni á verkefni í Eþíópíu, Malaví og Nepal en nokkur verkefna í þessum þremur löndum - sem sérstaklega voru skoðuð - fá hins vegar fína umsögn.

Aldrei hafa fleiri Íslendingar styrkt starf Barnahjálpar Sameinuðu þjóðanna (UNICEF) og nú. Í ágústbyrjun voru heimsforeldrar UNICEF á Íslandi yfir 14.000 talsins en heimsforeldrar styrkja samtökin með mánaðarlegum framlögum sem renna til hjálpar- og þróunarstarfs í þágu barna í fátækustu löndum heims. Það er því ljóst að þrátt fyrir þrengingar á Íslandi ætla Íslendingar ekki að gleyma þeim börnum sem búa við sárustu neyðina.
 
Meira á vef UNICEF (Barnahjálp SÞ)

Alain Joyandet ráðherra þróunarmála í frönsku ríkisstjórninni hefur sett fram þá hugmynd að búa til lottó á Netinu til að afla fjár til þróunarmála. Ætlunin er að safna um 10 milljónum evra á ári fyrir verkefni eins og að ýta undir skólasókn stúlkna í Afríku.
 
Ekki eru allir jafn hrifnir af hugmyndinni eins og sjá má í meðfylgjandi grein.
 

Breska þróunarsamvinnustofunin, DFID, hefur sett upp vefsvæði með ítarlegum upplýsingum um verkefni sem stofnunin fjármagnar í þróunarríkjum víðs vegar um heiminn. Um er að ræða gagnagrunn með samantekt um hvert og eitt verkefni, markmið þess og hversu mikið það kostar.