|
|
| Veftímarit um þróunarmál |
Þróunarsamvinna
Samstarfsþjóðir 18. júní 2009 |
|
Loftslagsbreytingar ógna:
Óttast að átök brjótist út í 23 Afríkuríkjum |
Óttast er að átök brjótist út af völdum loftslagsbreytinga í 23 ríkjum Afríku og pólítískur óstöðugleiki skapist meðal fjórtán annarra þjóða, að því er alþjóðlegur hópur undir forsæti Kofi Annans, fyrrverandi framkvæmdastjóra SÞ heldur fram í nýrri skýrslu. Hópurinn kallast Africa Progress Panel og birti skýrslu sína í síðustu viku.
Samkvæmt frétt AllAfrica eru loftslagsbreytingar þegar farnar að hafa neikvæð áhrif á líf milljóna íbúa í Afríku með minnkandi landbúnaðarframleiðslu og minnkandi fæðuöryggi, ýmiss konar vandamálum sem tengjast vatni, m.a. aukinni tíðni sjúkdóma, aukinni hættu á þurrkum og flóðum og búseturöskun við strendur vegna hækkandi yfirborðs sjávar.
Margar aðrar skýrslur hafa verið gefnar út að undanförnum um þá miklu vá sem loftslagsbreytingum fylgir. Nefna má skýrslu CARE um ógnvænlega fjölgun fólks sem lendir á vergangi og glænýja skýrslu um áhrif loftslagsbreytinga á líf íbúa Malaví frá írsku samtökunum Oxfam; hún kallast Winds of Change. Þá eru ótaldar forystugreinar í fjölmiðlum og greinaskrif um þá alvarlegu ógn sem við blasir vegna hnattrænnar hlýnunar.
|
| Úgandabúar sækja frum-kvöðlanámskeið í HR |
 Tólf verðandi leiðbeinendur á frumkvöðlanámskeiðum í Úganda eru komnir til Íslands á vegum Þróunarsamvinnu-stofnunar Íslands og sækja þjálfunarnámskeið í Háskólanum í Reykjavík. Hópurinn dvelur hér á landi í tvær vikur og fær leiðsögn um það hvernig fanga á viðskiptatækifæri og hvernig unnt er að gera viðskiptahugmynd að veruleika. Eftir námið hér á landi heldur hópurinn heim og miðlar þessari þekkingu áfram.
Frétt Morgunblaðsins í gær um hópinn frá Úganda.
Af hálfu ÞSSÍ hefur verið unnið að frumkvöðlaverkefninu í samstarfi við Fjárfestingastofu Úganda frá árinu 2007. Markmið verkefnisins er aðbæta aðgengi frumkvöðla í atvinnulífi Úganda að þjálfun og fræðslu til að auka getu þeirra til að taka þátt í atvinnulífinu og þjálfa þá til þátttöku í viðskiptum, þ.m.t. í meðhöndlun fjármála, bókhalds og notkun upplýsingatækni. Áhersla er lögð á að ná til fólks sem þegar er í viðskiptum í litlum og meðalstórum fyrirtækjum, með sérstaka áherslu á konur í slíkum viðskiptum. Verkefnið er rekið af Fjárfestingastofu Úganda með fjárhagslegum og leiðbeinandi stuðningi ÞSSÍ.
|
| Heilbrigðismál í brennidepli:
Þúsaldarmarkmiðin um barna- og mæðradauða sífellt fjarlægari |
 Áður en fjármálakreppan skall á voru þúsaldarmarkmiðin um lækkun á tíðni ungbarnadauða um tvo þriðju fyrir árið 2015 víðs fjarri. Sama gilti um markmiðin sem sett voru um fækkun mæðra sem látast af barnsförum. "Við sjáum framfarir í fækkun ungbarna sem látast en þegar kemur að mæðrunum eru niðurstöðurnar ekki upplífgandi," segir Jonas Gahr Støre utanríkisráðherra Noregs í New York þar sem hann ásamt fleiri stjórnmálaleiðtogum í heiminum var viðstaddur útkomu nýrrar skýrslu um heilbrigðismarkmið þúsaldarmarkmiðanna.
Framlög til heilbrigðismála í þróunarríkjum hafa hækkað um meira en helming frá árinu 2000 og hafa leitt til framfara sem þó eru engan veginn viðunandi. Að mati norska utanríkisráðherrans þarf að herða þessa baráttu, leita nýrra úrræða til að mæður geti fætt börn sín í öruggara umhverfi og þannig bæði bjargað eigin lífi og barnanna.
Styrkja þarf heilbrigðiskerfi í fátækustu löndum heims til þess að breyta þeim skelfilegu aðstæðum sem hagtölur gefa til kynna: í 49 fátækustu ríkjum heims 500 þúsund mæður af barnsförum á ári, 250 milljónir úr alnæmi og Alþjóðabankinn hefur leitt líkur að því að vegna kreppunnar fjölgi látnum kornabörnum um 200-400 þúsund á ári.
Skýrslan um stöðu þessara mála - The 2009 Report of the Global Campaign for the Health Millennium Development Goals - kom út í New York á mánudaginn og lýsir hvernig þjóðir verja þróunarfé til verndar fátækum, einkum konum og börnum. Skýrslan byggir á annarri úttekt frá sérfræðingahópnum High-Level Task Force on Innovative Financing for Health Systems sem heitir More Money for Health and More Health for Money.
Frétt Bistandsaktuelt
|
| Konur og friðaröryggi - ráðstefnan hefst á morgun! |
Utanríkisráðuneytið og Háskóli Íslands standa fyrir alþjóðlegri ráðstefnu um ályktun öryggisráðs Sameinuðu þjóðanna nr. 1325 um konur, frið og öryggi, dagana 19.-20. júní 2009.
Umfjöllunarefni ráðstefnunnar er hvernig tryggja megi að konur taki með beinum hætti þátt í formlegum og óformlegum friðarferlum, þ.á.m. friðarumleitunum, friðarsamningum og friðaruppbyggingu. Á ráðstefnunni verður kannað hvaða leiðir eru færar fyrir stjórnvöld, alþjóðastofnanir og frjáls félagasamtök til að efla þátttöku kvenna í friðarferlum.
|
| 80% Svía vilja óbreyttan eða meiri stuðning við þróunarríki í kreppunni |
 Samkvæmt skoðanakönnun í Svíþjóð telja átta af hverjum tíu Svíum að vegna heimskreppunnar eigi þeir að styðja jafnmikið eða meira við bakið á íbúum þróunarríkjanna en áður. Hins vegar er aðeins helmingur aðspurðra fyllilega sannfærður um að þróunarfé sé nýtt til verkefna sem verða að mestu gagni.
Þetta eru meðal niðurstaðna í nýrri skoðanakönnun Sifo í Svíþjóð en Anders Nordström gerir könnunina að umtalsefni í grein í Sænska dagblaðinu á mánudag. Þar segir framkvæmdastjórinn að könnun sýni að SIDA (Þróunarsamvinnustofnun Svía) verði að bæta sig í úttektum og tryggja gæði þróunarstarfsins.
Fram kemur í grein Norströms að stuðningur þjóðarinnar sé ótrúlega mikill og könunin sýni að flestir Svia telja að alþjóðlegur þróunarsamvinna geti dregið úr fátækt og stuðlað að þróun. "En við eigum líka að sýna sjálfsgagnrýni," segir Norström. "SIDA og sumum öðrum þróunarsamvinnustofnunum hefur miktekist að nokkru leyti að útskýra hlutverk þróunaraðstoðar nú á dögum og hvernig slíkt starf fer fram. Og stundum eru væntingarnar óraunhæfar," segir hann.
Í greininni kemur fram að Svíar eru almennt forvitnir um starfsemi SIDA og þriðji hver óskar eftir enn frekari upplýsingum - sérstaklega um árangur þróunarsamvinnunnar.
Sænska dagblaðið |
|
Norðmenn vilja auka samskipti við þjóðir þar sem spillingin er mest |
Á dögunum var alþjóðlegur dagur gegn barnaþrælkun og þá var haldin í Osló ráðstefna UNICEF (Barnahjálpar Sameinuðu þjóðanna) undir yfirskriftinni "The Children are big Business - but is it good business to protect children". Þar flutti Erik Solheim þróunarmálaráðherra Noregs ræðu um samfélagslega ábyrgð á krepputímum. Hann fjallaði m.a. um mikilvægi þess fyrir Noreg að taka meiri þátt í uppbyggingu meðal spilltra þjóða því þar væri fátæktin mest. Sérstaklega hvatti hann einkafyrirtæki að auka samskipti við spilltar þjóðir.
Ef við ættum að sniðganga allar spilltar þjóðir ættum við aðeins um tvo fjárfestingakosti að ræða: Sviss og Svíþjóð, sagði ráðherrann.
Nánar | |
|
|
|
| Rúmlega 42 milljónir á vergangi vegna átaka |
 |
Samkvæmt glænýrri ársskýrslu Flóttamannastofnunar Sameinuðu þjóðanna eru rúmlega 42 milljónir manna á vergangi vegna átaka, þar af um 20 milljónir barna. Tölurnar eru frá miðju síðasta ári og síðan þá hafa bæst við þúsundir í Pakistan og Srí Lanka. Af þessum 42 milljónum voru 16 milljónir hælisleitendur og 26 milljónir á vergangi innan eigin lands.
Alþjóða Flóttamannadagurinn er á sunnudaginn, 20. júní.
|
| Norrænu þjóðunum hampað í nýrri rannsókn |
 |
Þróunarsamvinna hefur langtímaáhrif á hagvöxt og "norræna" aðstoðin hefur reynst best. Þetta er niðurstaða nýrrar rannsóknar sem Alþjóðagjaldeyrissjóðurinn hefur gefið út: Development Aid and Economic Growth: A Positive Long-Run Relation, eftir Camelia Minoio & Sanjay G. Reddy. Nýja rannsóknin byggir á mælingum á hagfræðilegum þáttum út frá gögnum frá þróunarríkjum yfir fjörutíu ára tímabil: 1960-2000. Merkilegasta niðurstaðan er líkast til sú að þróunarsamvinna hefur langtímaáhrif á hagvöxt og að áhrifin komi oft ekki fram fyrr en á tíu til tuttugu árum. Í rannsókninni er einnig leitast við að kanna hvers konar þróunaraðstoð gefist best. Þar skipta höfundarnir veitendum þróunaraðstoðar í þrjá hópa og komast að þeirri niðurstöðu að "norrænu" þjóðirnar, Norðmenn, Svíar, Danir og Finnar, séu í hópnum sem talinn er sýna bestan árangur. Skýrslan: Development Aid and Economic Growth: A Positive Long-Run Relation |
| Leiðtogafundur í gíslingu? |
 |
Vestrænir stjórnarerindrekar gera því skóna að fyrrverandi utanríkisráðherra Níkaragva sem nú er í forsæti allsherjarþings Sameinuðu þjóðanna hafi í hyggju að halda réttarhöld yfir kapítalismanum með því að taka leiðtogafund um fjármálakreppuna í einskonar gíslingu. Í Reutersfrétt segir að stjórnareindrekar frá G20 þjóðunum gagnrýni Miguel D´Escoto Brockmann og lýsi leiðtogafundinum - sem verður haldinn dagana 24.-26. júní - sem "brandara" ,"harmleik" og "tímasóun."
Stjórnarerindrekarnir sem Reuters ræddi við vildu ekki koma fram undir nafni. Þeir halda því fram að gera eigi leiðtogafundinn að vettvangi fyrir þá sem vilja gera aðför að kapítalismanum. Talsmaður D´Escoto segir gagnrýnina ekki réttmæta.
Benedikt páfi hvatti á sunnudaginn þjóðarleiðtoga til þess að líta á fjármálakreppuna sem tækifæri til að stemma stigu við vaxandi fátækt og hungri.
Nánar
|
| Frakkar og Ítalir sagðir svíkja lit |
|
Frakkar og Ítalir fá bágt fyrir dugleysi sitt í þróunarmálum í nýrri skýrslu samtakanna ONE sem saka stjórnvöld í löndunum tveimur fyrir svik frá Gleneagles samþykkti í Skotlandi árið 2005. Þá samþykktu stórveldin átta -G8 hópurinn - að auka stuðning við Afríku. Meðal höfunda skýrslunnar eru Bill Gates og Desmond Tutu.
|
| Malaví: 20% barna í fullu starfi |
 |
Fimmta hvert barn í Malaví undir fimmtán ára aldri er í fullu starfi og sækir því ekki skóla og annar fimmtungur er í hlutastarfi. Stúlkur fremur en drengir eru sviptir námstækifærum og verða nauðbeygðar að taka að sér störf, launuð eða ólaunuð.
Stefán Jón Hafstein umdæmisstjóri ÞSSÍ ræddi m.a. menntamál í Malaví í morgunþætti Rásar 2 í morgun.
|
| Moskítónet koma í veg fyrir dauða þúsunda barna |
|
Moskítóflugan, sem ber malaríu í menn, er hættulegasta dýr Afríku, segir í frétt Barnahjálpar Sameinuðu þjóðanna á Ísalndi. "Um það bil milljón manns deyja árlega af völdum sjúkdómsins og milli 190 og 330 milljónir smitast. Um 90% tilfella koma upp sunnan Sahara-eyðumerkurinnar, í fátækustu löndum heimsins."
| |
|
|
 |
Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu stofnunarinnar.
Skráið ykkur í áskrift á heimasíðunni, www.iceida.is og látið vinsamlegast aðra með áhuga á þróunarmálum vita af tilvist veftímaritsins. Allar ábendingar um efni eru vel þegnar.
Þeir sem vilja afskrá sig af netfangalista, eða senda okkur ábendingu um efni, eru vinsamlegast beðnir um að senda slík erindi á netfangið iceida@iceida.is. Ritstjóri er Gunnar Salvarsson, gsal@iceida.is.
ISSN 1670-8105 |
| Bestu kveðjur, Útgáfu- og kynningardeild ÞSSÍ. |
|
|
