Veftímarit um þróunarmál
Þróunarsamvinna Samstarfsþjóðir
3. júní 2009
Skýrsla um tsnunami aðstoðina 2004:
Skortur á samhæfingu milli neyðar-og þróunaraðstoðar 
tsunamiAðgerðir í kjölfar flóðbylgjunnar (tsunami) í Suðaustur-Asíu í desember 2004 voru þær umfangsmestu og skjótvirkustu í sögu mannúðar- og neyðarsamtaka í heiminum. Yfirgripsmikil alþjóðleg úttekt frá júlí 2006 sýndi að það tókst að bjarga mannslífum og lina þjáningar en jafnframt að endurbóta væri þörf á mannúðaraðstoð. En hvaða áhrif höfðu aðgerðir á vettvangi á langtíma þróun á þessu svæði - því svarar glæný alþjóðleg úttekt þar sem tengslin á milli neyðaraðstoðar, umbóta og langtíma þróunar eru skoðuð ofan í kjölinn á þremur svæðum: í Indónesíu, Srí Lanka og Maldíveyjum.  

Fram kemur í frétt SIDA, sænsku þróunarsamvinnustofnunarinnar, að úttektin sýni margt jákvætt en ljóst sé að samræma hefðu þurft miklu betur ólík inngrip á fyrstu stigum til þess að hafa varanlega áhrif á þróun samfélaganna.
 
"Fjórum árum eftir tsnunami sjáum við að neyðaraðgerðirnar eftir flóðið höfðu mest langtímaáhrif hvað varðar að koma á eðlilegu lífi meðal fólks og að auka vitund fólks um hætturnar. Við tökum hins vegar eftir því að aðgerðirnar voru ekki fullnægjandi ef litið er til þess að draga úr fáækt eða byggja upp getu heimamanna," segir Stefan Dahlgren matsmaður sem leiddi rannsóknina.

Frétt SIDA
Óttast heimsfaraldur malaríu vegna lyfjaónæmis
©gunnisalSérfræðingar í heilbrigðismálum telja sig hafa fundið fyrstu dæmi um ónæmi gegn algengasta malaríulyfinu Artemisinin sem til þessa hefur verið árgursríkasta lyfið við þessum banvæna sjúkdómi. Vísindamenn óttast að ónæmið geti valdið heimsfaraldri.
 
Til þessa hefur ónæmið gegn lyfinu einvörðungu fundist á litlu svæði í Kambódíu nálægt tælensku landamærunum.
 
Tvisvar áður í sögunni hefur það gerst að sníkjudýrið sem býr að maki malaríunni hefur myndað ónæmi gegn lyfi. Hættan er sú að ónæma sníkjudýrið dreifist síðan frá Asíu til Afríku með skelfilegum afleiðingum.
 
Malaría verður um einni miljón manna að aldurtila á ári hverju.
 
Tvöföldun framlaga AGS til Afríku sunnan Sahara
©gunnisal Lán frá Alþjóðagjaldeyrissjóðnum til Afríkuríkja sunnan Sahara mun tvöfaldast á þessu ári vegna áhrifa af völdum alþjóðlegu efnahagskreppunnar.  Hún leiðir til þess að ríkjum í álfunni fjölgar sem þurfa á aðstoð að halda, að því er Roger Nord talsmaður AGS segir í fréttum. Hann segir vaxandi lánsþörf ríkja í þessum heimshluta endurspegla ástandið í efnhagsmálum heimsins en jafnframt sé það til marks um þá stefnu AGS að auka aðstoð við þjóðir Afríku.
 
Tansanía og Kenía fengu lán frá Alþjóðagjaldeyrissjóðnum síðastliðinn föstudag og stjórnvöld í Mósambík og Gana eiga í viðræðum við sjóðinn.

 Nánar
Blóðbaðið á Srí Lanka:
Voru tuttugu þúsund Tamílar drepnir
í lokaorrustunni?
Fáni Sri LankaThe Times í London fullyrðir að óhugnanlegt blóðbað hafi orðið á síðustu dögum borgarstyrjaldarinnar í Srí Lanka. Blaðið segist hafa heimildir fyrir því að rúmlega tuttugu þúsund óbreyttir borgarar Tamíla hafi verið drepnir, flestir í sprengiregni stjórnarhermanna. Tölurnar eru þrisvar sinnum hærri en þær sem gefnar eru út opinberlega.
 
Blaðið segir að stjórnvöld á Srí Lanka staðhæfi að herinn hafi hætt notkun þungavopna 27. apríl og búið þannig um hnúa að skjólbelti hafi verið afmarkað fyrir hundrað þúsund Tamíla, menn, konur og börn. Stjórnvöld segja að allt mannfall óbreyttra borgara sé á ábyrgð Tamíltígranna sem hafi falið sig meðal flóttamanna.
 
The Times segir hins vegar að loftmyndir, opinber gögn, lýsingar vitna og vitnisburður séfræðinga segi aðra sögu. "Með heimspressuna og hjálparsamtök fjarri vettvangi átakanna hóf herinn ofsafengna árás sem hófst í lok aprílmánaðar og stóð yfir í þrjár vikur. Með stórsókninni lauk 26 ára borgarastríði Srí Lanka við Tamíltígrana á kostnað saklausra borgara," segir blaðið.
Greinargerð um kosningarnar í Malaví:
Flokkur forsetans í sterkri stöðu með meirihluta
 SJH
Malaví hefur í pólitískum skilning stigið yfir merkilegan þröskuld, hvernig úr spilast er annað mál, segir Stefán Jón Hafstein umdæmissstjóri ÞSSÍ í greinargerð til utanríkisráðuneytis um nýafstaðnar forseta- og þingkosningar í Malaví. Stefán segir að ljóst sé að DPP, flokkur forsetans, verði í gríðarlega sterkri stöðu með meirihluta. "DPP sem er klofningsflokkur frá fyrra kjörtímabil er því kominnn í lykilaðstöðu.  Stjórnarandstaðan er í sárum og gamlir refir eins og Muluzi (fyrrv. forseti) og Tembo forsetaefni tveggja flokka núna munu hverfa af sviðinu og víkja fyrir nýju blóði," segir hann.
 
Að mati Stefáns er staðan því gjörbreytt frá fyrra kjörtímabili þegar forsetinn átti í stöðugri glímu við þingmeirihluta sem ekki fylgdi honum. "Þetta sterka umboð má því skoðast sem skref fram á við fyrir styrkari stjórn, en felur líka í sér hættuna á misnotkun valds eins og þekkt er."
 

Kosningar til Evrópuþingsins næstu daga:
Þegar Danir kjósa eiga þeir að hugsa um þróunarmál
GunnisalÞróunartímarit Dana, Udvikling, hefur síðustu vikurnar staðið fyrir umræðu á samskiptavefnum Facebook um kosningarnar til Evrópuþingsins sem fram fara á næstu dögum. Tímaritið hefur kallað eftir skoðunum fólks og leggur áherslu á að þróunarmál verði í hávegum höfð þegar Danir ganga inn í kjörklefann, enda sé mikið í húfi þegar stærsti veitandi þróunarastoðar í heiminum fái nýtt þing.
 
Hverjir verða þjóðkjörnir arkitektar að evrópskri þróunartefnu næstu fimm árin, spyr Udvikling. Hægt er að fylgjast með umræðunni, jafnvel taka þátt í henni, og lesa greinar á Facebook síðu Udvikling.
 
Ráðstefna SÞ í desember um loftslagsmál í Kaupmannahöfn:
Samkomulag þegar í sjónmáli? 
jörðinHeimurinn er á réttri braut í þá átt að semja um traustan samning fyrir fundinn í Kaupmannahöfn í lok ársins, sagði Yvo de Boer, talsmaður loftslagsmála Sameinuðu þjóðanna við upphaf tólf daga ráðstefnu í Bonn á mánudag. Að mati Boer er engu vafa undirorpið að desemberfundurinn í Kaupmannahöfn leiði til niðurstöðu. 

 Nánar
 
 
 
 
Mikil fjölgun kvenna á malavíska þinginu
gunnisal
Konum fjölgaði umtalsvert á þingi í Malaví í nýafstöðnum forseta- og þingkosningum en eru þó áfram í miklum minnihluta, 43 af 193. Þær voru 14% þingmanna fyrir kosningar en eru nú 22% sem er talsvert minna en markmiðið sem SADAC (Southern African Development Community) setti árið 2005 en það var 30%. Og hlutfallið er enn minna en flestir SADAC leiðtogar skrifðu undir í ágúst á síðastliðnu ári í "Protcol On Gender and Development" skjalinu sem gerir ráð fyrir 50% hlutdeild kvenna fyrir árið 2015.
 
Eins og við greindum frá í síðasta Veftímariti er kona hins vegar í fyrsta sinn varaforseti landsins, Joyce Banda.
 
Myndin er af Marjorie Ngaunje, fyrrverandi heilbrigðisráðherra Malaví.
 

Nánar
Athyglisvert
 
Veftímaritið á...
facebook
Kíktu í heimsókn
Lýðræðissinnum fjölgar í Afríku
gunnisal
Sextíu og tvö prósent Afríkubúa kjósa lýðræði, að því er fram kemur í nýrri skoðanakönnun Afrobarometer. Í könnuninni kemur fram að stuðningur Afríkubúa við pólítískar ríkisstjórnir hefur aukist um 72% á árunum 1999 til 2008. Stuðningurinn er mismikill frá einu landi til annars, þannig styðja 85% lýðræði í Botsvana en aðeins 39% á Madagaskar.
 
Aukið ofbeldi í kjölfar heimskreppu
Heimskreppan hefur leitt til þess að heimurinn er ofbeldisfyllri og óstöðugri en áður og Íslendingar eru ekki lengur friðsamasta þjóð heims. Þetta kemur fram í nýjum alþjóðlegum friðarvísi, Global Peace Index, sem samtökin Vision of Humanity taka saman. Ný-Sjálendingar eru friðsamasta þjóð veraldar en búsáhaldabyltingin á Íslandi varð til þess að við féllum niður í fjórða sætið. Írak vermir botnsætið.
 

Nánar
Norðmenn númer þrjú
Norðmenn vörðu rúmum 900 milljónum norskra króna til þróunarmála á vegum Sameinuðu þjóðanna árið 2007 og samkvæmt nýbirtum lista yfir gjöfulustu þjóðirnar eru Norðmenn nr. 3 á listanum eftir Bandaríkjunum og Bretum. Norðmenn voru áður i sjötta sæti. Á árinu 2007 fengu Sameinuðu þjóðirnar 19 milljarða dala til þróunarmála, einum milljarði meira en árið áður.

Nánar
Rauði krossinn styður jafningjafræðslu í Malaví
aids
Frá árinu 2002 hefur Rauði kross Íslands veitt Rauða krossinum í Malaví fjárhagslega og tæknilega aðstoð vegna alnæmisverkefnis í Nkalo í Chiradzulu héraði í suðurhluta landsins. Verkefninu er ætlað að ná til 42.000 manns og hluti þess felst í jafningjafræðslu meðal ungmenna á svæðinu. Vonast er til að þessi þáttur starfsins geti dregið verulega úr útbreiðslu alnæmis í héraðinu. Frá þessu segir á heimasíðu Rauða krossins.
 
Þar segir ennfremur:

"Markmið jafningjafræðslunnar er að veita ungu fólki fræðslu um kynheilbrigði og lífsleikni. Þetta er eitt af því mikilvægasta sem við getum gert til að hjálpa ungmennum að verjast alnæmissmiti," segir Hólmfríður Garðarsdóttir heilbrigðisráðgjafi Rauða kross Íslands í Malaví. "Fræðslan fer þannig fram að ungir sjálfboðaliðar kenna jafnöldrum sínum í smáum hópum með svipaðan bakgrunn og áhugamál. Oft fer þetta starf fram í skólum eða í tengslum við ýmsa viðburði þar sem ungmenni hittast."

Fréttir & fréttaskýringar
 
Á döfinni

 
 
Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu stofnunarinnar.          
 
Skráið ykkur í áskrift á heimasíðunni, www.iceida.is og látið vinsamlegast aðra með áhuga á þróunarmálum vita af tilvist veftímaritsins. Allar ábendingar um efni eru vel þegnar.  

Þeir sem vilja afskrá sig af netfangalista, eða senda okkur ábendingu um efni, eru vinsamlegast beðnir um að senda slík erindi á netfangið iceida@iceida.is. Ritstjóri er Gunnar Salvarsson, gsal@iceida.is.
  
ISSN 1670-8105
 

Bestu kveðjur, Útgáfu- og kynningardeild ÞSSÍ