|
|
| Veftímarit um þróunarmál |
Þróunarsamvinna
Samstarfsþjóðir 27. maí 2009 |
|
| Framlög til þróunarmála þegar tekin að skerðast |
Þjóðir með mikinn fjárlagahalla eru þegar farnar að skera niður framlög til þróunarmála, Ítalir um 56%, Írar og Svíar um 10% og Lettar hafa gengið lengst og hætt allri slíkri samvinnu, að því er fram kemur í frétt frönsku fréttastofunnar AFP. Frakkar ætla sjálfir á næstu þremur árum að veita á milli 0,4 til 0,5% til þróunarmála en segjast staðráðnir í því að halda markmiðinu um 0,7% fyrir árið 2015.
Heimskreppan hefur þegar fjölgað sárafátækum um 50 milljónir að mati Alþjóðabankans og Alþjóðagjaldeyrissjóðsins en báðar stofnanirnar hafa hvatt ríkar þjóðir til að halda við gefin fyrirheit um aukin framlög til þróunarmála. Árið 2005 hétu leiðtogar stórveldanna átta að tvöfalda framlög til þróunarmála en vanefndir voru á því á uppsveiflutímunum sem þá fóru í hönd. Hvað gerist þá nú á tímum niðursveiflu, spyrja menn.
Í fréttinni er haft eftir Emmanuel Frot hjá Institue of Transition Economics í Stokkhólmi að framlög til þróunarmála séu "auðveld skotmörk" ríkisstjórna sem þurfa að skera niður útgjöld. Frot rannsakaði á sínum tíma, uppúr 1990, áhrif efnahagslægðar á framlög til þrónarmála og komst að raun um að samdrátturinn var um 13% á ári að meðaltali. Hann skrifaði á dögunum grein í tímaritið Vox um hugsanleg áhrif fjármálakreppunnar á framlög til þróunarmála.
|
| Afríka hefur ekki séð ljósið
-sérþekking Norðmanna á endurnýjanlegum orkugjöfum verður leiðarljós í nýju samstarfsverkefni |
 Þorri íbúa Afríku býr við rafmagnsleysi og þeir sem á annað borð hafa rafmagn þekkja ekki annað en sífelldar rafmagnstruflanir. Bistandsaktuelt í Noregi gerir þessi mál að umtalsefni í gær og bendir á að það kosti svimandi upphæðir að greiða úr orkuvanda álfunnar, eða 47 milljarða dala.
Flest Afríkuríki sunnan Sahara reiða sig á ljósavélar eða rafala. Rúmlega helmingur allra stórra fyrirtækja notst við slíkan búnað. Fyrirtækin geta ekki treyst á rafmagnið sem þeim býðst því það myndi þýða minni sölu og skemmd á tækjum. Að meðaltali verður skyndilegt rafmagsleysi 56 daga á ári.
Þetta kom fram í máli Anton Eberhard prófessors við Háskólann í Höfðaborg þegar hann ýtti úr vör nýju verkefni "Energy and Development" - sem er samvinnuverkefni nokkurra orkufyrirtækja, norsku þróunarsamvinnustofnunarinnar NORAD, Norfund, SN Power og Energibedriftenes Association. Markmiðið er að nýta sérþekkingu Norðmanna á endurnýjanlegum orkugjöfum í þágu þróunarríkja. |
| Finnar leiða saman ESB og Bandaríkin í samstarf um þróunarmál |
Þjóðir Evrópusambandsins og bandarísk stjórnvöld hafa einróma lýst yfir stuðningi við frumkvæði frá Finnum um samstarf þjóða beggja megin Atlantshafsins sem lýtur að sjálbærri þróun til stuðnings fátækustu þjóðum heims. Markmiðið er að styrkja stöðu fátækra þjóða með auknu samstarfi ESB og Bandaríkjanna og þá fyrst og fremst með orðræðu á pólítískum vettvangi í því skyni að styrkja samstarf og innleiða verklagsreglur í samstarfi.
Frumkvæði Finna hefur mætt afar miklum skilningi og velvild af hálfu bandarískra stjórnvalda og Svía sem taka við forsæti ESB í sumar.
Bandaríkin og ESB eru langstærstu veitendur þróunaraðstoðar og samanlagt er hlutdeild þessara tveggja ríkjasambanda um 80% af heildarframlögum til þróunarmála og lítið eitt hærra þegar litið er til mannúðarmála.
Paavo Väyrynen þróunarmálaráðherra Finna greindi frá þess á fréttamannafundi í Brussel.
Nánar |
| Barnadauði minnkar um fjórðung, segir WHO |
 Börnum sem látast áður en fimm ára aldri er náð hefur fækkað um fjórðung frá árinu 1990, að því er fram kemur í nýjum tölum frá WHO, Alþjóðaheilbrigðis-stofnuninni. WHO vekur jafnframt athygli á nauðsyn þess að ná sambærilegum árangri á örðum sviðum, sérstaklega hvað varðar heilsu mæðra og nýbura.
Í nýrri skýrslu frá WHO, "World Health Statistics" kemur fram að á árinu 2007 hafi 9 milljónir barna látist en 12.5 milljónir árið 1990. Efasemdir eru þó uppi um að þúsaldarmarkmið númer fjögur um að fækka dauðsföllum barna undir fimm ára aldri um tvo þriðju fyrir árið 2015 náist í Afríkuríkjum og öðrum fátækum ríkjum.
Innan við þrjú börn af hverjum þúsund deyja á Íslandi, Finnlandi og Svíþjóð áður en fimm ára aldri er náð. Í Sierra Leone þar sem ástand þessara mála er verst deyja 262 börn af hverjum þúsund - meira en fjórðungur.
Nánar |
| Gervifætur til Gaza - þróunaraðstoð til fyrirmyndar? |
Morgunblaðið benti í leiðara á mánudag á fyrirmynd að þróunaraðstoð Íslendinga: för átta Íslendinga til Gaza að gefa þrjátíu gervifætur! Því miður er átakanlegur hugtakaruglingur í þessari forystugrein sem er öllum ljós sem eitthvað þekkja til þróunarmála. Ferðin til Gaza var mannúðarmál, hjálparstarf af sama meiði og fjölmörg verkefni sem einstaklingar og fyrirtæki sinna af mikilli gæsku og breyta örugglega lífi þeirra sem í hlut eiga. Slíkir styrkir og framlög streyma stöðugt til fólks sem á um sárt að binda víða um veröld. Val á þeim sem njóta fylgir oft ekki neinum sérstökum skilgreindum leikreglum eða hlutlægu mati og eftirfylgni er oft ábótavant ef hún er þá einhver.
Þróunarsamvinna eða þróunaraðstoð er af öðrum toga, ávallt til lengri tíma og hefur það markmið að breyta högum stórra hópa/þjóða/héraða á þann hátt að umbætur geti orðið sjálfbærar til lengri tíma litið. Sjúkrahúsverkefni Þróunarsamvinnustofnunar í Monkey Bay i Malaví er að því leyti líkt umræddu hjálparstarfi á Gaza að það hjálpar sjúkum, en verkefnið í Malaví er ætlað miklu stærra hlutverk fyrir fleira fólk til lengri tíma sem hluta af uppbygginu landsins í heild, en ekki bara fyrir útvalda einstaklinga.
Ímyndið ykkur ef átta sérfræðingar færu á kostnað skattgreiðenda til að aðstoða þrjátíu einstaklinga í þróunarríki - væri það þróunaraðstoð fyrir fyrirmyndar? Hvað yrði það stór hluti heildarkostnaðar við að sjá 30 einstaklingum fyrir gervilimum? Og hvað um sjálfbærni verkefnisins? Hvað gerist eftir að þessir 8 hverfa á braut? Hver sér um þjónustu við þá sem fengu gervilimina?
Alltof sjaldan skrifa íslenskir leiðarahöfundar - eða fjölmiðlar yfirhöfuð - um þróunarmál. Því ber auðvitað að fagna því að þessi mál séu tekin til umfjöllunar en hér hefði betur verið heima setið en af stað farið.
Vert er hins vegar að taka undir orð leiðarahöfundar þar sem hann gagnrýnir íslensk stjórvöld fyrir framlög til þróunarmála. "Þrátt fyrir ítrekuð fyrirheit er langt frá því að Íslendingar nái þeim markmiðum sem Sameinuðu þjóðirnar settu um framlög efnuðustu ríkja heims í þróunaraðstoð og kreppan mun tryggja að bið verður eftir því að Íslendingar geti gengið uppréttir í þeim efnum," segir leiðarahöfundur Morgunblaðsins.
Leiðarinn |
| Helgi Ágústsson formaður Barnaheilla |
Helgi Ágústsson fyrrverandi sendiherra var nýlega kjörinn formaður Barnaheilla, Save the Children, á Íslandi. Hann tekur við formennsku af Hildi Petersen. Alþjóðasamtök Barnaheilla, Save the Children, fögnuðu 90 ára afmæli á dögunum, eða 19. maí. Það var Eglantyne Jebb sem stofnaði samtökin árið 1919 . Hún var með þeim fyrstu til að benda á að það væri réttur barna til að alast upp í öryggi og friði, að því er segir á heimasíðu Barnaheilla. Frá upphafi hafa samtökin lagt áherslu á að styðja börn og fjölskyldur þeirra í löndum þar sem stríð og átök ríkja og hafa ríkt.
| |
|
|
|
| Afríkudagurinn haldinn hátíðlegur |
 |
Ban Ki-moon framkvæmdastjóri Sameinuðu þjóðanna flutti ávarp í gær í tilefni af Afríkudeginum en hann er haldinn árlega á þeim degi þegar Afríkusambandið (AU) var stofnað árið 1963. Ki-moon gerði að umtalsefni helstu málefni sem Afríka glímir við nú um stundir og endurtók fyrirheit um stuðning Sameinuðu þjóðanna við þjóðir Afríku um varanlegan frið, öryggi og sjálfbæra þróun.
Framkvæmdastjórinn nefndi einnig yfirstandandi efnahagskreppu í ávarpi sínu og sagði hún kæmi á tíma þegar Afríkuþjóðir hefðu um árabil sýnt samfelldan hagvöxt og aukið jafnvægi. "Við verðum að vernda þá fátækustu í álfunni og það fólk sem er varnarlausast," sagði Ki-moon.
Nánar
|
| Veftímaritið á... |
Kíkið í heimsókn! |
| Kvennabaráttan hefst í Malaví |
 |
Þegar stjórnarflokkurinn DPP vann kosningasigur í Malaví á dögunum settist kona í stól varaforseta, Joyce Banda. Hún ætlar að setja kvennabaráttu á dagskrá stjórnmálanna. "Konur eru líka menn. Afrískir leiðtogar hafa tilhneigingu til að gleyma því. Mutharika forsseti valdi rétt þegar hann bað mig um að gefa kost á mér sem varaforseti," segir Joyce Banda. Hún var áður utanríkisráðherra og þar áður ráðherra jafnréttis- og félagsmála. Myndin var tekin 2004 þegar Árni Magnússon þáverandi félagsmálaráherra var í opinberri heimsókn í Malaví.
|
| Baráttan um réttindi yfir landi |
|
Sænska þróunarsamvinnustofnunin SIDA efnir á morgun til málstofu um mál sem verður sífellt fyrirferðarmeira og hættulegra: baráttu fátækra fyrir landsréttindum. Að því er fram kemur á heimasíðu SIDA leiða þessi baráttumál fátækra í vaxandi mæli til ofbeldisverka, að fólk lendi á vergangi og vistkerfi hrynja. Á málþinginu verður málið tekið til efnislegrar skoðunar. ræddar hugsanlegir leiðir til lausna og hvað Svíar geti gert til að leggja lóð á vogarskálar.
|
| Sóley & félagar í fjáröflun |
|
|
Sóley & félagar hafa verið talsvert í fréttum undanfarið en þetta styrktarfélag sem vinnur með systur Victo og styður við samfélagshjálp hennar í bænum Aneho í Togo í Afriku. Systir Victo hefur verið hér á landi undanfarið og kynnt starfsemina, m.a. á málþingi Afríkustofnunarinnar í Öskju fyrr í mánuðinum.
Sóley & félagar voru með fjáröflunardag síðastliðinn laugardag og héldu um kvöldið styrktartónleika í Reykjavík. Verkefni félagsins er að styðja við starf Victo sem þegar er umfangsmikið og að gera henni kleift að þróa það með því að safna styrktarforeldrum fyrir 90 börn og byggja fyrir hana hús og skóla í Aneho, að því er segir á heimasíðu félagsins.
|
| Fréttir & fréttaskýringar |
|
|
| Líf milljóna barna í Norðaustur-Afríku í hættu |
|
Langvarandi matvælakskortur, vopnuð átök og stjórnmálalegur óróleiki ógna velferð og lífi milljóna barna í Norðaustur-Afríku, segir í frétt á heimasíðu Barnahjálpar SÞ á Íslandi.
Þar segir ennfremur:
"Sá ótti að milljónir fjölskyldna líði alvarlegan skort ef ekki er gripið til bráðra aðgerða virðist nú vera orðinn að veruleika. Nú þegar er talið að um 19,8 milljónir manna, þar af fjórar milljónir barna undir fimm ára aldri, þurfi á neyðaraðstoð að halda."
Nánar | |
|
|
 |
Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu stofnunarinnar.
Skráið ykkur í áskrift á heimasíðunni, www.iceida.is og látið vinsamlegast aðra með áhuga á þróunarmálum vita af tilvist veftímaritsins. Allar ábendingar um efni eru vel þegnar.
Þeir sem vilja afskrá sig af netfangalista, eða senda okkur ábendingu um efni, eru vinsamlegast beðnir um að senda slík erindi á netfangið iceida@iceida.is. Ritstjóri er Gunnar Salvarsson, gsal@iceida.is.
ISSN 1670-8105 |
| Bestu kveðjur, Útgáfu- og kynningardeild ÞSSÍ |
|
|
