Norska ríkisstjórnin hefur endurskoðað fjárlög og bætt við 200 milljónum norskra króna til þróunarmála, 4 milljörðum íslenskra króna, sérstaklega til fátækra landa sem hafi orðið illa úti vegna heimskreppunnar. Samkvæmt frétt í Bistandsaktuelt hefur ríkisstjórnin hlustað á kröfur Sameinuðu þjóðanna og annarra sem hafa farið fram á stuðning við þær snauðu þjóðir sem verða verst úti vegna fjármálakreppunnar.
 
"Það eru ríku þjóðirnar sem hafa skapað fjármálakreppuna. Hún getur leitt til þess að 90 milljónir manna bætist í hóp fátækra á þessu ári. Umrætt fjármagn verður notað til að hjálpa þeim sem þurfa mest á því að halda," sagði Erik Solheim, umhverfis- og þróunarmálaráðherra Noregs.
 
Á sama tíma og Norðmenn auka við ætla Svíar að skera niður í þróunarsamvinnu um 4,5 milljarða sænskra króna, jafnvirði um 70 milljarða íslenskra króna. Þeir horfa fram á erfiðleika við að forgangsraða í málaflokknum, að því er fram kemur í þróunartímariti SIDA, Om Världen. Minnkandi þjóðartekjur hafa bein áhrif á framlög og milljarðarnir 35,4 sem reiknað var með á næsta ári eru komnir niður í 31 milljarð.
 
Fjármálakreppan hefur þessar afleiðingar að sögn blaðsins og samkvæmt horfum á árinu 2011 verður áfram minna fjármagn til þróunarmála en áætlanir geru ráð fyrir. Hvar nákvæmlega verður skorið niður hafa stjórnvöld enn ekki ákveðið en tveimur þáttum verður hlíft, annars vegar verkefnum sem tengjast loftslagsbreytingum og hins vegar verkefnum í þágu þeirra sem búa við sárustu fátæktina.
 
Sænska ríkisstjórnin hefur þegar ákveðið að dregið verði úr framlögum Svía til fjölþjóðlegra stofnana.
 

 

Ríkjandi fjármálakreppa hefur haft alvarlegar afleiðingar fyrir efnahag Afríku eins og sést í nýrri hagspá fyrir lönd álfunnar. Þar er gert ráð fyrir því að hagvöxtur dragist saman á þessi ári um helming frá fyrri spám sem gerðu ráð fyrir 5,7% hagvexti. Nú er talan komin niður í 2,8%.
 
Þetta kemur fram í "African Economic Outlook" en ritið kom út fyrr í mánuðinum í aðdraganda ársfundar Afríska Þróunarbankans sem haldinn var í Dakar í Senegal.
Ítarleg hagspá fyrir 47 ríki er í bókinni.

Spáin fyrir samstarfsþjóðir Íslendinga:

 

Úganda

Lokið er vel heppnuðu námskeiði um verksvið innlendra og alþjóðlegra stofnana sem koma að alþjóðlegri þróunarsamvinnu, friðarstarfi og neyðaraðstoð. Námskeiðið var haldið í samvinnu Rauða kross Íslands, Þróunarsamvinnustofnunar Íslands, utanríkisráðuneytisins og Endurmenntunarstofnunar Háskóla Íslands. Námskeið sem þetta hefur ekki áður verið haldið á Íslandi.
Námskeiðið samanstóð af fyrirlestrum og verklegum æfingum undir leiðsögn sérfræðinga frá ofangreindum stofnunum. Alls luk 25 manns námskeiðinu en færri komust að en vildu og því hefur verið ákveðið að efna til annars námskeið síðar á árinu.
Markmiðið með námskeiðinu var að efla gagnrýna umræðu um alþjóðastarf á þessu sviði og veita þátttakendum innsýn í flókið samspili ólíkra gerenda á vettvangi.
 

Þrátt fyrir niðurskurð í fjárlagafrumvarpi áströlsku ríkisstjórnarinnar sleppa nokkrir útgjaldaliðir undan niðurskurðarhnífnum, þar á meðal þróunarsamvinna. Ríkisstjórn Ástralíu ætlar lítillega að auka framlög til málaflokksins, úr 3.7 milljörðum dala í 3.8 milljarða. Ríkisstjórnin heldur fast í þá mörkuðu stefnu að verja innan fárra ára 0,5% af vergum þjóðartekjum til þróunarmála.

Tveir af hverjum þremur Bandaríkjamönnum vilja viðhalda eða auka núverandi framlög til heillbrigðismála í þróunarríkjum. Innan við fjórðungur telur að ríkisstjórnin verji nú þegar of miklum fjármunum í málaflokkinn. Þetta kemur fram í nýrri skoðanakönnun á vegum Kaiser Family Foundation. Niðurstöðurnar voru á þann veg að 39% vilja óbreytt framlag, 26% vilja auka framlagið og 23% telja að of miklum peningum sé varið í málaflokkinn.
 

Sænsk stjórnvöld hafa löngum litið á þróunarsamvinnu Evrópusambandins sem hálfgert vandræðabarn sem hafi skilað litlum árangri, verið svifaseint og einkennst af mikilli skriffinnsku. Af þeim sökum hafa Svíar fyrir löngu unnið að því að draga úr framlögum til ESB á þessu sviði. Nú er hins vegar U-beygja í afstöðu Svía, segir í frétt tímaritsins Om Världen.
 
Í fréttinni segir að utanríkisráðuneytið sænska sé að undirbúa tillögu sem geri ráð fyrir að stærri hluti af ESB framlaginu fari til sameiginlegra þróunarverkefna. Tímaritið segir margar ástæður fyrir þessari viðhorfsbreytingu hjá ráðuneytinu, traust þess á framkvæmdastjórn ESB sem veitenda þróunaraðstoðar hafi auksit á síðustu árum og ráðuneytið sé hrifið af aðgerðum sem framkvæmdastjórnin hafi unnið að til þess að auka skilvirkni þróunarsamvinnu, ekki síst með Parísaryfirlýsingunni.