|
|
| Veftímarit um þróunarmál |
Þróunarsamvinna
Samstarfsþjóðir 29. apríl 2009 |
|
| Frjáls félagasamtök eiga í vaxandi erfiðleikum með að afla fjár
- dæmi um að Íslendingar hætti stuðningi við styrktarbörn og gengishrun krónunnar veldur miklum erfiðleikum |
Frjáls félagasamtök á Íslandi finna fyrir vaxandi erfiðleikum við fjáröflun og þess eru dæmi að Íslendingar hafi hætt stuðningi við styrktarbörn vegna fjárhagserfiðleika. Í alþjóðastarfi veldur gengishrun íslensku krónunnar miklum erfiðleikum. "Gengishrunið hefur mjög mikil áhrif á alþjóðastarf og skuldbindingar Rauða krossins á alþjóðavísu," segir Sólveig Ólafsdóttir sviðsstjóri. "Fjárhagsáætlanir gera ráð fyrir sömu upphæð í krónum talið til verkefna eins og fyrir gengishrun en rauðvirði er um helmingi minna." Guðrún Margrét Pálsdóttir hjá ABC Barnahjálp tekur i sama streng og segir gengishrun krónunnar hafa bein áhrif. "Það hefur mikil áhrif á allt starf ABC að fá helmingi færri dollara til að senda og þótt allir skólar og barnaheimili ABC séu í rekstri er afar þröngt í búi, hádegiverður m.a. skorinn af í mörgum dagskólum og starfsfólki fækkað."
Nokkrir hætta en nýir bætast í hópinn
Ragnar Schram kynningarstjóri SOS Barnaþorpa segir að erfiðara sé að afla framlaga frá fyrirtækjum og þess séu dæmi að einstaklingar hafi hætt stuðningi við styrktarbörn sín. "Við höfum hins vegar fengið talsvert af nýjum styrktarforeldrum undanfarna mánuði og langflestir styrktarforeldrar hækkuðu framlög sín í haust vegna óhagstæðrar gengisþróunar. Hjá ABC Barnahjálp er sömu sögu að segja. "Vissulega hafa ýmis fyrirtæki hætt stuðningi og erfiðara er að sækja til fyrirtækja almennt auk þess sem einhverjir einstaklingar hafa þurft að hætta stuðningi vegna fjárhagserfiðleika. Aðrir hafa jafnvel gefið meira, hækkað framlag sitt og nýir bæst við. Samanlagt er því ekki samdráttur í tekjum ABC Barnahjálpar í íslenskum krónum talið," segir Guðrún Margrét.
Bera Þórisdóttir hjá Íslandsdeild SPES segir að styrkir séu færri og lægri, einnig sé erfiðara að finna styrktarforeldra.
"Já, við finnum fyrir meiri erfiðleikum en áður við öflun fjár," segir Sólveig Ólafsdóttir. "Rauði krossinn nýtur þess þó að hafa ekki byggt stóran hluta af tekjum sínum á styrkjum fyrirtækja eða fyrirtækjasamningum. Samdráttur verður engu að síður í tekjum og eins hafa söfnunarherferðir skilað mun minni tekjum en áður. Einnig er erfiðara en áður að fá fyrirtæki og aðila til samstarfs vegna alþjóðaverkefna en mikils velvilja gætir varðandi verkefni innanlands, sér í lagi sem lúta að viðbrögðum vegna efnahagsþrenginga," segir hún.
Ragnar Gunnarsson hjá Sambandi íslenskra kristniboðsfélaga segir að fyrstu þrjá mánuði ársins hafi sambandið fengið inn svipað og fyrir ári, hungsanlega um 5% minna. "Þetta á við um fastar tekjur og gjafir sem að miklu leyti koma frá trúföstum velunnurum starfsins. Hins vegar fengum við 15 milljóna króna gjöf í janúar sem hvatningu til okkar um að halda okkar striki. Vandi okkar er hins vegar sá að fjárhagsáætlunin hækkar milli ára úr 54 milljónum í 70,6 milljónir vegna aukins kostnaðar erlendis, einkum vegna gengismunar."
Rauði krossinn
|
| Átökin á Srí Lanka:
Tugþúsundir óbreyttra borgara milli tveggja elda |
 Stjórnvöld á Srí Lanka hafa viðurkennt að hafa beitt stórskotaliðsárásum á svæði þar sem tugþúsundir óbreyttra borgara hafa verið innikróaðir vegna átakanna við Tamíltígra. Áður höfðu stjórnvöld gefið út yfirlýsingu þess efnis að hætt hefði verið notkun slíkra vopna. Að mati Mannréttindavaktarinnar þarf að hefja alþjóðlega rannsókn á brotum á lögum um vopnuð átök.
Talið er að um fimmtíu þúsund manns séu á flótta vegna átakanna milli hersins og Tamíltígranna og hafist við á örsmáum bletti á norðausturhluta eyjunnar. Samkvæmt upplýsingum frá Sameinuðu þjóðunum hafa um 6.500 óbreyttir borgarar fallið í átökunum síðustu þrjá mánuði.
Fulltrúar Sameinuðu þjóðanna eiga í viðræðum við stjórnvöld á Srí Lanka um aðstæður fólksins á átakasvæðunum og utanríkisráðherrar Breta og Frakka eru á leið til landsins. Carl Bildt utanríkismálaráðherra Svíþjóðar ætlaði að vera með þeim í för en var neitað um vegabréfsáritun til landsins.
|
| Börn í Malaví tekin úr skóla vegna samdráttar í bílasölu á Vesturlöndum
- engin skerðing á framlögum Breta til þróunarmála næstu tvö árin |
 Fyrirsögnin hljómar ótrúlega - hvernig má það vera að dræm sala á bílum á Vesturlöndum leiði til þess að börn í fátæku Afríkuríki séu tekin úr skóla? Jessica Sheperd greinarhöfundur breska dagblaðsins The Guardian í menntamálum skýrir orsakasamhengið.
Samdráttur í bílasölu í Bandaríkjunum og Evrópu hefur leitt til uppsagna farandverkamanna frá Malaví sem unnið hafa í námum í Suður-Afríku en málmarnir eru notaðir í bílavarahluti. Og fyrstu viðbrögð þessara farandverkamanna er að kalla börnin heim úr skóla og senda þau til vinnu.
Jessica segir einnig frá því í grein sinni - "Svöng börn eru ekki góðir námsmenn" - að skýrsla um menntamál sem kom út um helgina sýni að fyrirheitin um að öll börn njóti grunnskólamenntunar fyrir árið 2015 verði sífellt fjarlægari. Um er að ræða þúsaldarmarkmið númer tvö. Jessica vekur reyndar athygli á því að mikill árangur hafi náðst á þessu sviði því í skólum heimsins séu nú börnin 25 milljónum fleiri en árið 2000. Samkvæmt fyrrnefndri skýrslu - Education on the Brink - bendir margt til þess að fjármálakreppan hafi stöðvað þessa framþróun.
Fram kemur í greininni að samkvæmt fjárlagafrumvarpi Breta sem kynnt var á dögunum ætla bresk stjórnvöld EKKI að skerða framlög til þróunarmála á þessu ári og því næsta. Ennfremur kemur fram að Bandaríkjaforseti er staðráðinn í því að standa við fyrirheit sitt um að tvöfalda framlög Bandarikjanna á fyrsta kjörtímabilinu.
Grein Jessicu Sheperd
|
| Vorfundur Alþjóðabankans og AGS um nýliðna helgi:
Óttast að sárafátækum fjölgi um 53 milljónir |
 Fjármálaráðherrar
og ráðherrar þróunarmála frá helstu stórveldum heims fjölluðu um afleiðingar fjármálakreppunnar á þróunarríki á vorfundi Alþjóðbankans og Alþjóðagjaldeyrissjóðsins sem haldinn var um síðustu helgi. Í ályktun fundarins hvöttu ráðherrarnir ríkar þjóðir heims til að veita þróunarfé til fátækra þjóða með áminningu um að fátæktin í heiminum myndi ella aukast hratt og fleiri þjóðir verða fórnarlömb fjármálakreppunnar.
Fulltrúar þeirra 185 ríkja sem sæti eiga í Alþjóðabankanum og Alþjóðagjaldeyrissjóðnum sátu fundinn.
Danska utanríkisráðuneytið
|
| Sameiginleg skrifstofa í Súdan stóð ekki undir væntingum |
Sex þjóðir settu á fót sameiginlega þróunarmálaskrifstofu í Suður-Súdan eftir friðarsamninga árið 2005. Nú hefur verið gert úttekt á starfseminni af hálfu NORAD og niðurstaðan er sú að skrifstofan hafi ekki staðið undir væntingum.
Samkvæmt Parísaryfirlýsingunni er gerð krafa til veitenda þróunaraðstoðar að samræma störf sín í þróunarríkjun. Stofnun sameiginlegrar skrifstou sex framlagsríkja í Suður-Súdan var tilraunaverkefni um slíkra samræmingu. Úttektin leiðir í ljós að tilraunin hafi að litlu leyti heppnast og einkum megi skýra þá niðurstöðu af utanaðkomandi þáttum.
Nánar
|
| Þróunarsamvinna um þjóðgarð |
Franska þróunarsamvinnustofnunin AFD hefur ákveðið að veita einni milljón evra til verkefna í einum þekktasta þjóðgarði Mósambík, Gile National Reserve, í Zambezia héraði. Ætlunin er að nýta fjármagnið til umverfisverndar og verndar á dýrum i útrýmingarhættu eins og svarta nashyrningnum.
Nánar
| |
|
|
|
| Málþing um áhrif efnahagskreppunnar á ríki Afríku |
 |
Málþing á vegum Norrænu Afríkustofnunarinnar, utanríkisráðuneytisins og Þróunarsamvinnustofnunar Íslands verður haldið á fimmutdaginn í næstu viku, 7. maí, kl. 14.00 - 17.00 í Öskju, náttúrufræðihúsi Háskóla Íslands.
Verkefna- og ráðgjafaráð Norrænu Afríkustofnunarinnar kemur saman í Reykjavík 8. maí næstkomandi og af því tilefni er boðað til málþings um áhrif kreppunnar á Afríku. Erindi halda þau Ann Pettifor hagfræðingur og sérfræðingur í skuldum og fjármálakreppum, Fantu Cheru forstöðumaður rannsókna hjá Norrænu Afríkustofnuninni og Stefán Ólafsson prófessor við Háskóla Íslands. Jafnframt verður kynnt bók Kristínar Loftsdóttur prófessors við Háskóla Íslands, The Bush is Sweet: Identity, Power and Development among WodaaBe Fulani in Niger. Bókin er nýkomin út á vegum Norrænu Afríkustofnunarinnar.
Nánar |
| Öryggið á oddinn í nýrri stefnu Breta í þróunarmálum |
 |
Öruggari samfélög og aukið öryggi eru lykilatriði í nýrri stefnu breskra stjórnvalda í þróunarmálum sem fela í sér umtalsverða stefnubreytingu, að því er Douglas Alexander ráðherra þróunarmála sagði í ræðu á dögunum. Fram kom í máli hans að öryggi væri lykilatriði í baráttunni við fátækt og hann hvatti Sameinuðu þjóðairnar og alþjóðasamfélagið til þess að viðurkenna öryggismálin með sama hætti og grunnþjónustu eins og heilbrigði, menntun og vatn sem lykatriði í þróunarstarfi.
Nánar |
| Alþjóðaráðstefna um menntamál í þróunarlöndum |
 |
Nýlokið er tveggja daga alþjóðlegri ráðstefnu í Kaupmannahöfn um menntamál í þróunarlöndunum en ráðstefnan var haldin á vegum danska utanríkisráðuneytisins og alþjóðlegs samstarfsráðs um menntamál, Education for All Fast Track Initiative (EFA FTI). Um tvö hundruð gestir sóttu ráðstefnuna, sérfræðingar í mennta- og þróunarálum frá fátækum löndum, fulltrúar þeirra þjóða sem veita þróunaraðstoð, fulltrúar Sameinuðu þjóðanna og frjálsra félagasamtaka.
Nánar
|
| SIDA fær fyrirmæli um að hætta stuðningi í Níkaragva |
|
Ríkisstjórnin í Svíþjóð hefur gefið Þróunarsamvinnustofnun Svíþjóðar, SIDA, fyrirmæli um að hætta beinum fjárstuðningi við Níkargva á sviðum heilbrigðismála og landbúnaðar. Einnig eru fyrirmæli um að hætta samstarfi við Hæstarétt landsins og skrifstofu ákæruvaldsins.
Nánar |
| Sérfræðingur til starfa hjá Barnahjálp SÞ í Súdan |
|
Fulltrúi íslensku friðargæslunnar, Steinar Þ. Sveinsson, hélt á dögunum til starfa í Súdan í tveggja mánaða verkefni hjá Barnahjálp Sameinuðu þjóðanna, UNICEF. Steinar mun starfa á fjölmiðlaskrifstofu Barnahjálparinnar í höfuðborginni, Kartúm, við að miðla upplýsingum um aðstæður barna í Súdan og neyðaraðstoð Barnahjálparinnar þeim til handa, með sérstakri áherslu á Darfúr hérað. Íslenska friðargæslan hefur áður sent sérfræðinga til starfa á vegum Barnahjálparinnar í Súdan og nú starfar einn íslenskur sérfræðingur við vörustjórnun í suðurhluta landsins
Nánar |
| Mósambík: Minnkandi tekjur af útflutningi sjávarfangs |
 |
Útflutningstekjur af sjávarútvegi drógust verulega saman í Mósambík á árinu 2008 borið saman við árið á undan, eða um 31%, að því er dagblaðið Notícias greinir frá. Ellefu þúsund tonn voru flutt út af fiski í fyrra en þrettán þúsund árið áður. Í fréttinni kemur fram að skýringar á minnkandi tekjum af greininni sé að leita í minnkandi framleiðslu og verðlækkunum á alþjóðlegum mörkuðum og áhrifa af hækkandi eldsneytisverði.
Nánar |
| Breski Rauði krossinn á leið til Namibíu
- freistar þess að afstýra farsóttum á flóðasvæðum |
|
|
Enn eru um 54 þúsund íbúar á vergangi á flóðasvæðunum í Namibíu og samkvæmt veðurspánni er rigning í kortunum. Flóðin eru þau verstu í landinu í fjörtíu ár en þau hófust fyrir sex vikum og hafa haft áhrif á rúmlega hálfa milljón íbúa. Sérsveit frá breska Rauða krossinum er á leiðinni til Namibíu og hefur það hlutverk að freista þess að afstýra sjúkdómum en hreinlæti er mjög áfátt í búðum þeirra sem ekki hafa getað snúið til sín heima.
Nánar |
| Á döfinni |
|
Mansal: Þrælasala nútímans
Næstkomandi laugardag 2. maí mun UNIFEM á Íslandi halda áfram með fundaröð sína UNIFEM-UMRÆÐUR. Katrín Hauksdóttir, meistaranemi í alþjóðasamskiptum
- Mansal og vændi á alþjóðavísu-
Hildur Jónsdóttir, sérfræðingur á jafnréttis- og vinnumálasviði félags- og tryggingamálaráðuneytisins
-Mansal á Íslandi og aðgerðaáætlun íslenskra stjórnvalda
Nánar
Hádegisrabb RIKK: Alþjóðaviðskipti og konur í þróunarlöndum 30. apríl kl. 12-13 Ragna Sara Jónsdóttir ráðgjafi.
| |
|
|
 |
Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu stofnunarinnar.
Skráið ykkur í áskrift á heimasíðunni, www.iceida.is og látið vinsamlegast aðra með áhuga á þróunarmálum vita af tilvist veftímaritsins. Allar ábendingar um efni eru vel þegnar.
Þeir sem vilja afskrá sig af netfangalista, eða senda okkur ábendingu um efni, eru vinsamlegast beðnir um að senda slík erindi á netfangið iceida@iceida.is. Ritstjóri er Gunnar Salvarsson, gsal@iceida.is.
ISSN 1670-8105 |
| Bestu kveðjur, Útgáfu- og kynningardeild ÞSSÍ |
|
|
