|
|
| Veftímarit um þróunarmál |
Þróunarsamvinna
Samstarfsþjóðir 15. apríl 2009 |
|
| Hjálparstarf hættulegra en friðargæsla SÞ |
Árásum, mannránum og morðum á alþjóðlegum mannúðar- og hjálparstarfsmönnum hefur fjölgað gífurlega á síðustu árum og hafa aldrei verið fleiri en árið 2008, að því er fram kemur í nýrri skýrslu. Alls voru 122 starfsmenn hjálparsamtaka myrtir í fyrra.
Í skýrslunni kemur fram að ráðist var á 260 starfsmenn mannúðarsamtaka á árinu 2008 í 155 alvarlegum tilvikum. Tíu árum áður voru slík tilvik 27 talsins. Aukið ofbeldi af pólítískum toga er helsta skýringin á fjölgun árása og flestar eru þær bundnar við þrjú lönd: Afganistan, Súdan og Sómalíu. Innlendir starfsmenn hjálparsamtaka eru sagðir í mestri hættu.
Skýrslan var unnin af Center on International Cooperation (CIC) í New York og The Overseas Development Institute (ODI) í London.
Mannrán verða sífellt algengari og nýjasta dæmið er frá Súdan þar sem tvær konur alþjóðlegu samtakanna Aide Médicale International var rænt á laugardag frá búðum sínum í Darfur. Mannræningjarnar hóta að taka konurnar af lífi.
Nánar
|
| Sameinuðu þjóðirnar rétti vettvangurinn til að ræða fjármálakreppuna
-leiðtogafundur boðaður 1.-3. júní |
 Miguel d'Escoto Brockmann forseti allsherjarþings Sameinuðu þjóðanna ætlar að boða til fundar með fulltrúum allra 192 þjóða SÞ til að ræða fjármálakreppuna og leiðir til að takast á við vandann. Hann telur að voldugustu ríki heims, G20 ríkin, hafi ekki umboð samfélags þjóðanna því á alþjóðavísu séu ríkin í miklum minnihluta.
"Lýræðislegasta leiðin til að ræða þessi mál sem snerta okkur öll er á vettvangi Sameinuðu þjóðanna," segir Brockmann. Hann bætir við að það sé samhljóða álit flestra þjóðarleiðtoga að siðferðilegir brestir séu rætur núverandi kreppu.
Reiknað er með að flestir þjóðarleiðtogar og forsætisráðherrar sæki leiðtogafund Sameinuðu þjóðanna sem boðaður er 1.- 3. júní.
Nánar
|
| Skömmtun á vatni í Mexíkóborg
-viðvörun fyrir aðrar stórborgir heims |
 Fimm milljónir manna, fjórðungur íbúa Mexíkóborgar, risu úr rekkju á fimmtudaginn í síðustu viku og komust að raun um að ekkert vatn rann úr krönum. Skýringin var sú að borgaryfirvöld eru farin að skammta vatn til borgarbúa og samkvæmt frásögn Time hefur ekki í annan tíma þurft að beita jafn harkalegri skömmtun. Og þær verða fleiri á næstunni. Vatnsbirgðir borgarinnar eru á þrotum og því þarf að nýta vel hvern dropa uns sumarrigningar hefjast og bæta ástandið.
Time hefur eftir Gracielu Martines, 44 ára húsmóður í borginni, að óþefurinn frá baðherberginu hafi neytt alla fjölskylduna, átta manns, út úr húsi. "Við höfum ekkert klósett, ég get ekki baðað börnin mín, ég get ekki eldað, ég get ekki þrifið skítinn á gólfinu. Og það sem er verst, við eigum nánast ekkert að drekka."
Mexíkóborg stendur frammi fyrir risavöxnum vatnsvandamálum og þarf að grípa til róttækra aðgerða til að afstýra hörmungum, segir Time, og segir vanda Mexíkóborgar viðvörun fyrir aðrar stórborgir heimsins. Tímaritið minnir á að vísindamenn hafi um áraraðir varað við því að þessi mikilvægi vökvi gæti orðið sá varningur sem þjóðir deildu um með skriðdrekum og sprengjum.
Nánar
|
| Farsíminn- þarfasti þjónninn í Afríku |
 Farsímatæknin setur sífellt meiri svip á mannlíf í Afríku og nýtist á margvíslegan hátt til umbóta í álfunni. Um 85% símnotenda í álfunni eiga farsíma og þar fjölgar slíkum símum mjög hratt. Farsímatæknin þykir sérstaklega gagnleg við upplýsingagjöf og upplýsingaöflun í heilbrigðismálum, sbr. mHealth sem við sögðum frá fyrir nokkru. Ýmiss konar verkefni eru í gangi þar sem farsíminn er notaður til að dreifa mikilvægum upplýsingum um sjúkdóma, ekki síst HIV/alnæmi og nú er til dæmis komin út fyrsta bókin um þetta efni sem sérstaklega er sniðin að farsíma.
En þótt farsímavæðingin í Afríku hafi verið hröð á síðustu árum eiga aðeins 28 af hverjum 100 farsíma. Til samanburðar eru 111 farsímar á hverja 100 íbúa í Evrópu. Um 350 milljónir íbúa Afríku eiga ekki farsíma og nú óttast ýmsir að þessi stóri hópur fari á mis við framþróun því farsíminn bæti bæði félagslega og efnahagslega stöðu þeirra sem búa yfir slíkum grip. Áður fyrr hafi verið talið um stafrænu gjána (digital divide) en nú séu menn að koma auga á aðra gjá: farsímagjána (mobile divide).
Veftímaritið safnaði saman nokkrum nýlegum fréttum sem tengja saman farsíma og Afríku og þar kemur meðal annars í ljós að farsíminn er notaður í baráttu gegn sjúkdómum í landbúnaði, við stuttmyndagerð í Kongó, fræðslu til samkynheigðra karla í Tansaníu og svo fundum við líka frásögn af einum af frumkvöðlum farsímatækninnar í Afríku: Mo Ibrahim frá Súdan.
| |
|
|
|
| Draumasmiðjan í sigurför til Namibíu |
 |
Einn þáttur táknmálsverkefnis ÞSSÍ í Namibíu er stuðningur við menningu heyrnarlausra og starf sem miðar að aukinni meðvitund fólks um táknmál sem sérstakt tungumál. "Döff" leikhús er tiltekið menningarform þar sem heyrnarlausir og heyrandi leikendur starfa hlið við hlið og setja á svið tvítyngd leikverk ætluð heyrandi og heyrnarlausum áhorfendum. Í febrúar heimsóttu þrír meðlimir Draumasmiðjunnar frá Íslandi, ásamt túlki, Namibíu með það fyrir augum að vinna með namibískum leiklistarnemendum og heyrnarlausum, að uppsetningu leikverks í Þjóðleikhúsinu í Namibíu.
Trúðar og sögur heyrnarlausra á fjölum Þjóðleikhúss í Namibíu, grein Davíðs Bjarnasonar verkefnastjóra ÞSSÍ í Namibíu |
| Margt smátt fjallar um veftímaritið |
 |
Margt smátt - fréttablað Hjálparstarfs kirkjunnar fylgdi með Fréttablaðinu í byrjun mánaðarins. Í blaðinu var að vanda margvíslegt áhugavert efni, m.a. umfjöllun um Veftímarit um þróunarmál. Einnig er í blaðinu að finna grein um Breytendur, ungliðahreyfingu Hjálparstarfs kirkjunnar, sem mótmælir harðlega þingsályktunartillögu um Íslandsákvæði Kyoto bókunarinnar um takmörkun útblásturs gróðurhúsalofttegunda.
|
| Aukin menningartengd þróunarsamvinnu Svía |
 |
SIDA, þróunarsamvinnustofnun Svía og Kulturrådet (opinber menningarstofnun Svía) hafa gert með sér samstarfssamning til ársins 2012 í því skyni að auka hlut menningar í þróunarsamvinnu, m.a. í alþjóðlegum þróunarverkefnum
|
| Fréttir & fréttaskýringar |
|
| Sjóræningjar með 19 skip í haldi |
 |
Sjóræningjar frá Sómalíu réðust í gær á bandarískt flutningaskip undan strönd landsins með sprengjuvörpum og skothríð. Árásin mistókst en skipið skemmdist nokkuð, að því er sagði í frétt RUV í morgun.
Í fréttinni sagði:
Sjóræningjar hafa náð fjórum skipum á sitt vald frá því í fyrradag, tveimur kaupskipum og tveimur egypskum fiskiskipum. Þeir reyndu að taka fleiri en mistókst. Sjóræningjarnir hafa ráðist á 78 skip það sem af er ári. Þeir hafa að sögn 19 skip á valdi sínu og halda um 300 skipverjum í gíslingu. Tilraunir erlendra ríkja til að stöðva sjóránin virðast lítt duga þótt á þessum slóðum séu um 20 herskip frá tíu ríkjum sem fylgja flutningaskipum um mesta hættusvæðið. Leiðin um Aden-flóa er ein fjölfarnasta siglingaleið heims
| |
|
|
 |
Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu stofnunarinnar.
Skráið ykkur í áskrift á heimasíðunni, www.iceida.is og látið vinsamlegast aðra með áhuga á þróunarmálum vita af tilvist veftímaritsins. Allar ábendingar um efni eru vel þegnar.
Þeir sem vilja afskrá sig af netfangalista, eða senda okkur ábendingu um efni, eru vinsamlegast beðnir um að senda slík erindi á netfangið iceida@iceida.is. Ritstjóri er Gunnar Salvarsson, gsal@iceida.is.
ISSN 1670-8105 |
| Bestu kveðjur, Útgáfu- og kynningardeild ÞSSÍ. |
|
|
