| Fimm læknar á Íslandi??
-fleiri malavískir heilbrigðisstarfsmenn í Manchester en Malaví |
Í Malaví er einn læknir á hverja 65 þúsund íbúa sem svarar til þess að á Íslandi væru fimm læknar að störfum að hámarki. Skortur á menntuðu heilbrigðisstarfsfólki er ekki bundinn við þróunarríki, hvarvetna í heiminum vantar menntað fólk á þessu sviði en þó er ástandið hvergi verra en í Afríku. Þar yfirgefa menntaðir læknar og hjúkrunarfólk heimaland sitt til að vinna erlendis. Aðhlynning veikra er því oftar en ekki í höndum hefðbundinna græðara sem eru umdeildir þó ekki fastara að orði kveðið.
Malaví er skólabókardæmi um þennan gífurlega vanda, þjóð þar sem heilbrigðisvandinn er geigvænlegur, hátt hlutfall mæðra deyr af barnsförum, barnadauði mikill þótt hann hafi minnkað, hlutfall HIV/alnæmissýktra hátt og sjúkdómar eins og malaría og berklar útbreiddir. Með öðrum orðum: þjóð sem sárlega þarfnast menntaðra lækna og annars heilbrigðisstarfsfólks. Þjóð sem menntar heilbrigðisstarfsfólk en hefur ekki fjármagn til að stöðva atgervisflóttann til annarra landa. Í grein D+C segir að fleiri malavískir heilbrigðisstarfsmenn séu að störfum í einni breskri stórborg, Manchester, en heima í Malaví.
Er þetta heilbrigt?
Nánar
|
| Einn milljarður dala í samgöngubætur átta Afríkulanda |
 Fulltrúar Vesturlanda og alþjóðlegra lánastofnana hafa sammælst um fjárhagslegan stuðning til umbóta á innviðum samfélaga í mið- og sunnanverðri Afríku. Samkvæmt Reuters frétt er fjárhæðin sem um ræðir einn milljarður dala. Tilkynnt var um samkomulagið á fjárfestingaráðstefnu í Lusaka, höfuðborg Sambíu.
Fjármunirnir verða notaðir við uppbyggingu á vegum, járnbrautum og höfnum í því skyni að bæta aðstæður til viðskipta milli þjóðanna í þessum heimshluta og koma vörum með skilvirkari og ódýrari hætti milli staða.
Bretar hafa aukin heldur tilkynnt um sérstaka 100 milljóna punda framlag í þessu skyni.
Löndin átta sem njóta góðs af þessum samgöngubótum eru Suður Afríka, Simbabve, Sambía, Tansanía, Lýðveldið Kongó, Malaví, Botsvana og Mósambík.
Nánar
|
| G20 fundurinn markar tímamót í baráttunni gegn kreppunni |
 Leiðtogar tuttugu ríkja, stærstu iðnveldanna og fjölmennustu ríkja jarðar, samþykktu á fundi sínum í Lundúnum að bregðast við efnahagskreppunni með því að verja sem nemur 1.1 trilljónum dala til Alþjóðagjaldeyrissjóðsins og Alþjóðabankans. Haft hefur verið eftir Barack Obama forseta Bandaríkjanna að sakomulagið marki tímamót í baráttunni gegn kreppunni. Hann varar þó við skjótum efnahagsbata.
Sérfræðingar eru sammála um að Alþjóðagjaldeyrissjóðurinn sé í raun sigurvegarinn á leiðtogafundinum í Lundúnum. Hann fái nýtt lánsfé upp á 500 milljarða dala og að aðildarríki hans hafi aðgang að 250 milljörðum til viðbótar í gjaldeyrisvarabirgðum í samræmi við stærð sína.
Niðurstaða leiðtoganna varð líka sú að endurskoða valdahlutföll innan Alþjóðagjaldeyrisjóðsins innan nokkurra ára og færa þau til samræmis við núverandi efnahagsstyrk ríkja.
Yfirlýsing fundarins
|
| Óttast að fjárstuðningur nái ekki til þeirra fátækustu í tæka tíð |
 Fjármagn sem leiðtogar G20 ríkjanna hétu að verja til stuðnings fátækustu ríkjum veraldar í báráttunni við fjármálakreppuna er meira en hjálpastofnanir höfðu reiknað með. Hins vegar óttast þær að fjármagnið nái ekki til þeirra fátækustu í tæka tíð. Samkvæmt yfirlýsingu fundarins ætla G20 ríkin að verja 50 milljörðum dala til að styðja við bakið á tekjulitlum þjóðum. Einnig staðfestu leiðtogarnir enn einu sinni að þeir myndu standa við skuldbindingar um þúsaldarmarkmiðin og gefin loforð um þróunarfé.
Nánar
|
| Fjárlagastuðningur - tvíeggjað sverð:
Evrópuráðið hættir beinum fjárlagastuðningi við Níkaragva |
Evrópuráðið hefur frestað að veita ríkisstjórn Níkaragva almennan fjárlagastuðning vegna efasemda um lögmæti nýafstaðinna sveitastjórnarkosninga í landinu. Níu veitendur þróunaraðstoðar hafa veitt Níkaragva beinan fjárlagastuðning og ætluðu að láta af hendi 122 milljónir dala á síðasta ári. Vegna óánægju með stjórnvöld í Managua varð beinn fjárlagastuðningur hins vegar aðeins 21 milljón dala. Nú hefur EC algerlega skrúfað fyrir slíkan stuðning á þessu ári að minnsta kosti.
Fjárlagastuðningur - tvíeggjað sverð, er heiti á grein í tímaritinu Development and Cooperation þar sem fjallað er um beinan fjáralagastuðning og sérstaklega greint frá reynslunni af honum í Níkaragva. Bent er á að ákvörðun um að hætta almennum fjárlagastuðningi við fátækt ríki eins og Níkargva sé líka tvíbent, alls óvíst er að sú ákvörðun styrki lýðræðið í landinu og ólíklegt að félagsleg staða þeirra fátækustu batni. Daniel Ortega, forseti Níkaragva, segir að ríkisstjórn Venesúela hafi heitið því að fylla upp í fjárlagagatið sem Evrópuráðið skilur eftir sig.
Nánar | |
|
|
|
| Brottfluttir senda færri krónur heim |
 |
Ein afleiðing fjáramálahrunsins á Vesturlöndum sem bitnar harkalega á fátæku fólki þróunarríkja lýsir sér í færri krónum sem berast til föðurlandsins frá brottfluttum íbúum. Margar fátækar fjölskyldur reiða sig á slíkar peningasendingar en samkvæmt útreikningum Alþjóðabankans er talið að þær minnki um 8% á árinu. Góðu fréttirnar eru hins vegar þær að þessar greiðslur koma líkast til með að hækka strax aftur á næsta ári. Það er marks um að hér er ekki um neina smáaura að ræða að peningasendingar til þróunarlanda frá brottfluttum íbúum námu 305 milljörðum dala á síðasta ári. Þær hækkuðu um 16% árið 2007 og 18% árið 2006. Talið er að þær verði á þessu ári 280-290 milljarðar dala og lítillega hærri á næsta ári. Remittances to poor nations face dip |
| Alnæmi:
Hægt að bjarga flestum með flýtimeðferð |
 |
Með því að hefja ARV meðferð gegn HIV/alnæmi mun fyrr en hingað til hefur tíðkast væri hægt að draga úr dauðsföllum af völdum sjúkdómsins um meira en 90%, að því er fram kemur í rannsóknarniðurstöðum sem birtar eru í læknatímaritinu New England Journal of Medicine Nánar
|
| Noregur:
Utanríkisráðuneytið vill fleiri Norðmenn til starfa hjá UNDP |
 |
Norska utanríkisráðuneytið hefur skrifað bréf til Þróunarhjálpar Sameinuðu þjóðanna (UNDP) og farið fram á að fleiri Norðmenn verði ráðnir til stofnunarinnar. Norðmenn eru meðal þeirra þjóða sem leggja Þróunarhjálpinni til hæstu framlögin.
Í grein í Bistandsaktuelt segir fyrrverandi framkvæmdastjóri UNDP, Kemal Dervil, að algengt sé að þjóðir þrýsti á um að störf fylgi framlögum, með símhringingum eða öðrum óformlegum leiðum, en það sé einsdæmi að skrifuð séu formleg bréf í því skyni. Honum mislíkar einnig hugmyndin um fylgni á milli fjárframlaga og starfa.
Nánar |
| Verstu flóð í 50 ár |
|
Stór landsvæði í sunnanverðri Afríku eru undir vatni vegna verstu flóða á þessum slóðum í fimmtíu ár, að því er Rauði krossinn staðhæfir. Rúmlega eitt hundrað hafa farist í flóðunum og hálf milljón manna hefur orðiði fyrir skakkaföllum vegna þeirra. Flóðasvæðið nær frá Namibíu í vestri til Mósambík.
Nánar |
| Þúsaldarmarkmiðin á sýningu í Kaupmannahöfn |
 |
Þúsaldarmarkmiðin eru viðfangsefni nýrrar sýningar eða viðburðar á danska tilraunasafninu Experimentarium í Kaupmannahöfn. "En verden på spil" kallast leikurinn, sem opnaði fyrir almenning í síðustu viku. Árlega koma um 300 þúsund gestir í safnið og þeim gefst kostur á að upplifa ójöfnuðinn og óréttlætið sem fólk elst upp við ef það fæðist í fátæka hluta heimsins. Sýningarsvæðið er um 250 fermetrar. Frétt danska utanríkisráðuneytisins
|
| Fréttir & fréttaskýringar |
|
|
| Skröksaga |
 |
Skröksaga læddist inn í síðasta tölublað sem bar upp á 1. apríl en þar var sagt frá óvæntum fundi með Dambisu Moyo höfundi bókarinnar Dead Aid. Þegar að var gáð reyndist þetta uppspuni frá rótum og biðjum við þá sem hlupu apríl innilegrar velvirðingar. Einnig er ástæða til að biðja þá velvirðingar sem allt fram til þessa hafa talið sig hafa misst af fundinum. -Ritstj.
| |
|
