|
|
| Veftímarit um þróunarmál |
Þróunarsamvinna
Samstarfsþjóðir 1. apríl 2009 |
|
| Framlög til þróunarmála þau hæstu í sögunni á síðasta ári |
Framlög veitenda þróunaraðstoðar voru þau hæstu í sögunni á síðasta ári þrátt fyrir fjármálakreppuna. OECD (Efnahags- og framfarastofnunin) hvetur engu að síður ríkar þjóðir til að hækka framlögin.
OECD birti á mánudag skýrslu um framlög til þróunarmála. Þar kom fram að stuðningur við fátækustu þjóðir heims hafi aukist um 10,2% á árinu 2008 miðað við fyrra ár og nam tæpum 120 milljörðum dala, eða 0,3% af vergum þjóðartekjum þeirra þjóða sem veita þróunaraðstoð. Að mati OECD þurfa framlagsríkin að bæta við 10-15 milljörðum dala til að ná settum markmiðum í alþjóðlegri þróunaraðstoð sem heitið var fyrir árið 2010.
Fram kemur í skýrslunni að framlög til verkefna í tvíhliða þróunarsamvinnu hafi aukist mjög á síðustu árum og framhald hafi orðið á þeirri þróun milli áranna 2007 og 2008, aukningin 12.5%.
Um er að ræða meðaltalstölur frá þeim 22 þjóðum sem eru í DAC (Þróunarsamvinnunefnd OECD) en af þeim eru fimm þjóðir sem hafa náð takmarki SÞ um 0,7% framlög til þróunarmála af vergum þjóðartekjum, Danir, Luxemburgarar, Norðmenn, Hollendingar og Svíar. Íslendingar eru ekki aðildarþjóð að DAC enn sem komið er.
Oxfam welcomes aid increases but warns more needed to help poor people survive economic crisis
UK development aid jumps by a quarter, says OECD
|
| Leiðtogafundur G20 hefst í fyrramálið:
Líklegt að boðað verði til annars fundar síðar á árinu |
 Leiðtogar helstu ríkja heims eru saman komnir í Lundúnum og sitja leiðtogafund á morgun um leiðir út úr verstu fjármálakreppu sögunnar frá 1930. Fréttaskýrendur telja ólíklegt að samkomulag náist um ákveðna alþjóðlega áætlun til að örva hagkerfi heimsins. Gífurleg öryggisgæsla er í Lundúnum vegna fundarins en reiknað er með miklum mótmælum. Mikla athygli vekur koma Baraks Obama til Bretlands en þetta er fyrsta heimsókn hans til Evrópu frá því hann tók við forsetaembættinu í Bandaríkjunum í ársbyrjun.
Fréttaskýrendur telja að of mikill ágreiningur sé á milli Bandaríkjamanna og Breta annars vegar og annarra Evrópuþjóða hins vegar til þess að raunhæft sé að leiðtogafundurinn skili miklum árangri. Fyrrnefndu þjóðirnar vilja leggja mikið opinbert fé til að bjarga fyrirtækjum og afstýra atvinnuleysi en Evrópuríkin vilja síður varpa miklum skuldabagga á skattgreiðendur.
Að mati fréttaskýrenda bera drög að álytkun fundarins með sér að boðað verði til annars leiðtogafundar síðar á árinu.
Fulltrúar eftirtaldra þjóða og ríkjasambanda eiga sæti á fundinum:
Argentína, Ástralía, Bandaríkin, Brasilía, Bretland, ESB, Frakkland, Indland, Indónesía, Ítalía, Japan, Kanada, Kína, Mexíkó, Rússland, Sádí-Arabía, Suður-Afríka, Suður-Kórea, Tyrkland og Þýskaland.
|
| SIDA styrkir fjárhagslegt sjálfstæði kvenna |
 Þróunarsamvinnustofnun Svíþjóðar, SIDA, ætlar á næstu árum að leggja sérstaka áherslu á jafnréttismál í fátækum löndum. Fyrsta skrefið er að auka stuðning við ýmiss konar viðleitni sem felur í sér að styrkja fjárhagslegt sjálfstæði fátækra kvenna.
Alþjóða fjármálakreppan hefur komið illa við fólk um heim allan, segir í frétt SIDA, ekki síst konum sem þegar eru illa á vegi staddar. Bent er á að störf í hefðbundnum kvennagreinum hafi tapast og sífellt sé erfiðara að fá örlán án trygginga. Ti langs tíma sé einnig ástæða til að hafa áhyggjur af því að stúlkur fái síður að ganga menntaveginn, fleiri konur neyðist út í vændi og ofbeldi gegn konum aukist.
Nánar |
| Fundur með höfundi Dead Aid |
 Dambisa Moyo höfundur umdeildu bókarinnar "Dead Aid: Why Aid Is Not Working" heldur á næstu dögum í fyrirlestraferð til Bandaríkjanna til að kynna bókina en Moyo er búsett í Bretlandi. Hún er í tveggja daga heimsókn hér á landi á leið sinni vestur um haf og umboðsmenn hennar frá útgáfufyrirtækinu Farrar, Straus og Giroux leituðu til ÞSSÍ eftir stuðningi um opinn fyrirlestur höfundarins hér á landi. Því miður gat ÞSSÍ ekki orðið við þeirri bón en útgefendurnir féllust á að Moyo héldi fund með starfsmönnum til að ræða kenningar sínar. Moyo sem er hagfræðingur frá Sambíu hefur m.a. lagt til að hætt verði allri þróunarsamvinnu á næstu tíu árum. Hér má m.a. sjá gagnrýni á bók hennar frá David Roodman hjá CGD (Center for Global Development).
Fundurinn með Dambisu Moyo verður í dag í fundasal ÞSSÍ á 3. hæð í Þverholti 14 og hefst kl. 14:30. Allir velkomnir meðan húsrúm leyfir. |
| Námskeið hjá Endurmenntunarstofnun:
Þróunarsamvinna, mannúðar- og friðarstarf á vettvangi erlendis |
|
 Nýtt námskeið er að hefjast hjá Endurmenntunarstofnun Háskóla Íslands um þróunarsamvinnu, mannúðar- og friðarstarf á vettvangi erlendis. Námskeiðið er haldið í samstarfi við Friðargæsluna, Rauða krossinn og Þróunarsamvinnustofnun Íslands.
Námskeiðið fer fram á ensku og íslensku og er ætlað þeim sem starfa, eða hafa áhuga á að starfa, á þessum vettvangi og þeim sem hafa áhuga á að kynna sér alþjóðlegt hjálparstarf.
Umsóknarfrestur er til 15. apríl. Á umsókn þarf að koma fram starfsheiti, menntun og aldur umsækjanda.
|
| Rúmur milljarður án fæðuöryggis |
|
Fæðuöryggi er ekki tryggt fyrir rúmlega einn milljarð jarðarbúa sem horfir fram á hungur á þessu ári vegna hækkandi matvælaverðs og áframhaldandi fjármálakreppu, að því er Jacques Diof framkvæmdastjóri FAO sagði á mánudag. Hann segir þörf á fjárfestingu upp á 30 milljarða dala á ári í landbúnaði til að stöðva útbreiðslu hungurs. Reuters
|
| Megrunarþrá skapar störf í Namibíu |
 Sífelld þrá Vesturlandabúa til að léttast hefur skapað þúsundir starfa í Namibíu. Húdíakaktusinn sem þar vex, býr yfir þeim eiginleikum að eyða hungurtilfinningu og er orðin vinsæl megrunarvara á Vesturlöndum. RUV sagði frá í Sjónvarpsfrétt í gærkvöldi.
Fram kom að kaktusinn er orðinn þriðja helsta útflutningsvara Namibíu "enda margir Vesturlandabúar sífellt í megrun", eins og sagði í fréttinni.
| |
|
|
|
| Stórmerkileg kortlagning malaríusvæða |
 |
Vísindamenn sem leita leiða í baráttunni gegn malaríu hafa kortlagt þau svæði í heiminum þar sem sjúkdóminn er að finna og birt kortið á Netinu. Að mati vísindamanna er unnt að nota kortlagninguna í stefnumótandi aðgerðum til að draga úr smithættu á áhættusvæðum, jafnvel svo mikið að smithættan verði engin. Hægt er að skoða af talsverðri nákvæmni hvaða svæði í 87 löndum malaría er þekkt og hversu hátt hættustigið er. Þannig má til dæmis sjá á Namibíukortinu að þar er malaría óþekkt ef frá eru talin nyrstu héruðin.
Nánar
|
| Madonna vill annað barn frá Malaví |
 |
Söngkonan Madonna er í Malaví og bíður úrskurðar dómara um ættleiðingu á fjögurra ára stúlkubarni, Mercy James. Reiknað er með að úrskurðurinn liggi fyrir á föstudag. Með Madonnu í ferðinni til Malaví er þriggja ára sonur hennar, David, sem hún ættleiddi frá Malaví árið 2006. Þau heimsóttu kynföður drengsins í gær, í fyrsta sinn frá ættleiðingunni.
Fréttir af Malavíferð Madonnu eru eitt helsta fréttaefni fjölmiðla í heiminum þessa vikuna, fréttir gærdagsins um söngkonuna voru um 3000 talsins.
AP
|
| Breyta viðhorfum og tryggja gæðaeftirlit |
 |
- skrifað undir samning um fiskgæðaverkefni í Úganda
Ætlunin er að breyta viðhorfum og tryggja gæðaeftirlit með fiski til neyslu í Úganda og til útflutnings með nýju verkefni sem Þróunarsamvinnustofnun Íslands og stjórnvöld í Úganda skrifuðu undir á dögunum. Að sögn Gunnars Þórðarsonar verkefnisstjóra fiskimála í Úganda er gert ráð fyrir endurskipulagningu á gæðaeftirliti og þjálfun eftirlitsmanna sem munu sjá um eftirlit og kennslu í fiskveiðihéruðum og við löndunarstaði við Viktoríuvatn, Albertsvatn og Koyoga. Náin samvinna verður við héraðsstjórnir og samtök fiskimanna.
Nánar á heimasíðu ÞSSÍ |
| Borða sjaldnar og taka börnin úr skóla |
 |
Afleiðingar fjármálakreppunnar eru þegar farnar að koma niður á fátæku fólki í þróunarlöndum. Glænýjar rannsóknir IDS, Institute of Development Studies, í fimm fátækum löndum sýna að fátækt fólk er farið að næra sig sjaldnar og taka börn úr námi, vegna beinna áhrifa kreppunnar. Þá sýna rannsóknir IDS ennfremur að fleiri grípa til ólöglegra eða háskalegra ráða. Löndin sem rannsóknin náði til eru Bangladesh, Indónesía, Kenía, Jamaíka og Sambía.
|
| Vonir dvína þegar Kínverjar kippa að sér hendinni |
 |
Kínverjar hafa til skammst tíma haft uppi stórkostleg áform um fjárfestingar í ýmsum Afríkuríkjum og það er síst ofsagt að þeir hafi vakið gífurlegar vonir heimamanna. Nú eru Kínverjar hins vegar farnir að draga í land og benda á pólítískan og efnahagslegan óstöðugleika. New York Times birtir fréttaskýringu um stefnubreytingu Kínverja gagnvart Afríku, t.d. löndum eins og Kongó og Gíneu. "Vonir Kongóbúa um að þeir gætu reitt sig á Kínverja voru svo miklar að þeir voru tilbúnir að snúa baki við vestrænum veitendum þróunaraðstoðar..." Greinin í New York Times |
| Ákall frá Úganda |
|
Syda Bumba fjármálaráðherra Úganda hefur óskað eftir stuðningi veitenda þróunaraðstoðar um aðstoð í fjármálakreppunni. Að sögn AllAfrica fréttaveitunnar er þetta fyrsta opinbera beiðni ríkisstjórnar í Afríku um aðstoð við afleiðingar heimskreppunnar. Ráðherrann átti í fyrradag fund með fulltrúum ýmissa franskra veitenda þróunaraðstoðarí Kampala.
Nánar |
| Stefnt að.... |
|
Ofsagt var í frétt í síðasta Veftímariti að íslensk stjórnvöld hafi samþykkt þriggja ára áætlun um stuðning við Afganistan. Rétt er að stefnt er að slíkri áætlun. Beðist er velvirðingar á missögninni.
| |
|
|
 |
Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með því sem hæst ber hverju sinni. Efni veftímaritsins þarf ekki endilega að endurspegla stefnu stofnunarinnar.
Skráið ykkur í áskrift á heimasíðunni, www.iceida.is og látið vinsamlegast aðra með áhuga á þróunarmálum vita af tilvist veftímaritsins. Allar ábendingar um efni eru vel þegnar.
Þeir sem vilja afskrá sig af netfangalista, eða senda okkur ábendingu um efni, eru vinsamlegast beðnir um að senda slík erindi á netfangið iceida@iceida.is. Ritstjóri er Gunnar Salvarsson, gsal@iceida.is.
ISSN 1670-8105 |
| Bestu kveðjur, Útgáfu- og kynningardeild ÞSSÍ. |
|
|
