| Alþjóðlegar fjármálastofnanir geta ekki komið þróunarlöndum til bjargar
Aukin fátækt blasir við flestum þróunarríkjum |
Þegar Alþjóðabankinn sendir frá sér skýrslu með heitinu "Synt á móti straumnum: hvernig þróunarríkjum farnast í heimskreppunni" - þá er nokkuð ljóst að mikil alvara er á ferðum. Í skýrslunni, sem tekin er saman í tilefni af G20 leiðtogafundi helstu iðnríkja heims í næsta mánuði, kemur fram að einungis þriðjungur þeirra Afríkuríkja sem standa veikast fyrir hafa þá stöðu að geta bægt frá meiri fátækt. Í öllum hinum ríkjunum blasir við að fátækt aukist.
Í skýrslunni kemur ennfremur fram að alþjóðlegar fjármálastofnanir hafi ekki fjárhagslegt bolmagn til þess að grípa inn í og greiða skuldir og óhagstæðan viðskiptajöfnuð í þeim 129 þróunarlöndum sem verða fyrir mestu skakkaföllum. Á þessu ári eru skuldirnar 270-700 milljarðar dala.
Gordon Brown forsætisráðherra Breta sagði á alþjóðlegri þróunarmálaráðstefnu í London í vikunni að Alþjóðabankinn og leiðandi fjármálakerfi í heiminum muni vinna saman að stofnun sérstaks sjóðs sem hafi það hlutverk að leiða fátækustu þjóðir heims gegnum kreppuna.
Barack Obama forseti Bandaríkjanna og Ban Ki-moon framkvæmdastjóri Sameinuðu þjóðanna ræddu vanda fátækra ríkja á fundi í Hvíta húsinu í gærkvöldi. Þar hvatti Obama þjóðir heims til að gera ráðstafanir til að tryggja að fátæk ríki verði ekki uppiskroppa með matvæli vegna fjármálakreppunnar.
Ennfremur segir í fréttum að Dominique Strauss-Kahn, yfirmaður Alþjóðagjaldeyrissjóðsins, vari við því að aukin fátækt geti leitt til mikillar ólgu og óeirða í þróunarlöndum.
|
| Marghliða þróunaraðstoð Svía í uppnámi:
Kröfur um umbætur og áhrif hjá stofnunum SÞ |
 Sænsk stjórnvöld telja að fjármunum sem greiddir eru til margra stofnana Sameinuðu þjóðanna sé ekki vel varið og láta að því liggja að hætta fjárstuðningi við þær nema hagkvæmni verði aukin og umbætur gerðar. Þá gera Svíar kröfu um aukin áhrif í stjórn viðkomandi stofnana.
Gunilla Carlsson ráðherra þróunarmála birti á mánudag grein í stærsta dagblaði Svíþjóðar, Dagens Nyheter, þar sem hún gerði grein fyrir ítarlegri úttekt á marghliða þróunarstofnunum en þær stofnanir fá því sem næst helming allra framlaga Svía til þróunarmála, um 15 milljarða sænskra króna á árinu 2009.
Sænsk stjórnvöld eru markvisst að freista þess að nýta betur það opinbera fé sem varið er til þróunarmála. Í fyrra var tvíhliða þróunarsamvinna til endurskoðunar og þá var ákveðið að skerpa fókus, fækka bæði samstarfslöndum og sviðum. Nú er tekið næsta skref í endurmati á þróunarmálum með úttekt á marghliða aðstoðinni sem fer til alþjóðstofnana. Úttektin er sú fyrsta sinnar tegundar í Svíþjóð og náði til 23 stofnana.
Meðal þeirra stofnana SÞ sem gagnrýndar eru í sænsku skýrslunni má nefna FAO, UNAIDS og UNIFEM.
Framlög Íslendinga til fjölþjóðlegra stofnana Sameinuðu þjóðanna á síðasta ári nam rúmum 500 milljónum króna, eða 28% af framlögum okkar til þróunarmála.
Grein Gunillu Carlsson í Dagens Nyheter
|
| Fátækar konur í sérstakri hættu |
 Anders Nordström framkvæmdastjóra SIDA, þróunarsamvinnustofnunar Svíþjóðar, vekur athygli á því í blaðagrein í Dagens Nyheter að fjármálakreppan sem nú ríður yfir heiminn bitni sérstaklega illa á konum í þróunarlöndum.
SIDA hefur í samstarfi við vísindamenn frá háskólanum í Stokkhólmi skoðað hugsanlegar afleiðingar fjármálakreppunnar á þróunarlönd. Niðurstaðan er sú að kreppan leiði til þess að stórkostlegur afturkippur verði í jafnréttismálum í heiminum, fátækar konur verði mestu fórnarlömb kreppunar: fleiri konur neyðist til að stunda vændi, ofbeldi gegn konum aukist oft á krepputímum, færri stúlkur fari í skóla og störf þar sem konur eru í meirihluta, t.d. í vefnaði, séu í sérstakri hættu.
Nordröm kallar eftir samvinnu við einkafyrirtæki og segir þau í samvinnu við SIDA verða að koma fátækustu konum heims til hjálpar.
|
| AGS: Hagvöxtur síðustu ára í Afríku að hverfa |
Alþjóðagjaldeyrissjóðurinn telur að fjármálakreppan í heiminum sé að gera að engu þann hagvöxt sem verið hefur í Afríkulöndum á síðustu árum. Nú spáir sjóðurinn hægari hagvexti en áður í sunnanverðri álfunni, hann verði á yfirstandi ári 3,3%, tvöfalt minni en fyrir tæpu ári þegar AGS spáði 6,3% hagvexti í álfunni.
Þessar upplýsingar koma fram í nýrri skýrslu AGS um efnahagshorfur í löndun sunnan Sahara: Impact of the Global Financial Crisis on Sub-Saharan Africa.
Tveggja daga ráðstefna hófst í morgun í Dar-es-Salaam í Tanzaníu þar sem rædd verða viðbrögð við þessari þróun.
|
| Ráðherrafundur norrænna og afrískra utanríkisráðherra |
Í morgun hófst í Helsingjaeyri á vesturströnd Sjálands ráðherrafundur norrænna og afrískra utanríkisráðherra sem stendur yfir í tvo daga. Meðal umræðuefna á fundinum eru loftslagsmál, kynþáttafordómar og öryggismál.
Fundinn sitja nærrænu utanríkisráðherrarnir fimm ásamt utanríkisráðherrum tíu Afríkulanda: Benin, Botsvana, Gana, Malí, Mósambík, Lesoto, Tansaníu, Suður-Afríku, Nígeríu og Senegal.
Þetta er áttundi fundur ráðherranna.
| |
|
|
|
| Óverðskulduð
athygli |
 |
|
Hættan er sú að þessi bók fái meiri athygli en hún verðskuldar. Það er í tísku að ráðast gegn þróunaraðstoð til Afríku. - Þannig hljóðar upphaf ritdóms Madeleine Bunting í The Guardian um Dead Aid, bók sambíska hagfræðingsins Dambishu Moyo. Í bókinni hvetur Moyo til þess að þróunarsamvinnu við Afríkuríki verði hætt því hún hafi gert illt verra. Afriku væri betur borgið án aðstoðar. "Þótt röksemdafærslan sé léleg mun Dead Aid upphefja Moyo. Margir koma til með að vilja kynna skoðanir hennar með ákefð til að skera niður í þróunarmálum nú þegar þrýstingur vex á að spara í ríkisútgjöldum... Tillaga hennar um að draga úr allri þróunaraðstoð á fimm árum er háskalega óábyrg: hún myndi leiða til lokana þúsunda skóla og heilsugæslustöðva um gervalla álfuna, hætt verður að veita lyf gegn HIV, malaríu og berkum, svo og matvælagjöf til nauðstaddra sem milljónir reiða sig á til lifsviðurværis."
Á sunnudag birtist heilsíðuumfjöllun um bókina í Morgunblaðinu með stuttu viðtali við höfundinn og í leiðara á mánudag var einnig fjallað um þær kenningar Moyo að Afríkuríkjum myndi farnast best ef þróunarsamvinnu yrði hætt.
Eins og fram kemur í eftirfarandi grein hjá IRIN fréttaveitunni í gær eru skoðanir Moyo mjög umdeildar. Því er til dæmis haldið fram að fyrir fátækt land eins og Sambíu, þar sem höfundurinn fæddist, myndi stöðvun þróunaraðstoðar ekki vera besti kosturinn við núverandi aðstæður í heiminum. Þá telur Paraminder Bahra, gagnrýnandi The Times, að kenningar Moyo séu illa ígrundaðar og líklega fremur til þess fallnar að auka fátækt en draga úr henni.
|
| Tákn vonar frumsýnd á mánudagskvöld |
 |
|
Heimildamynd Þróunarsamvinnustofnunar og Ríkisútvarpsins, Tákn vonar, verður frumsýnd í Sjónvarpinu næstkomandi mánudagskvöld.
Myndin fjallar um stöðu heyrnarlausra í Namibíu en aðalefni myndarinnar er saga ungrar heyrnarlausrar konu, Treshiu, sem vinnur sem sjálfboðaliði og kennir í litlum leikskóla í norðurhluta Namibíu. "Treshia er einstaklega heillandi persóna, býr yfir reisn þrátt fyrir margvíslegt mótlæti í lífnu og sagan hennar gefur tilefni til að skoða ýmsa þætti nánar og skýrir m.a. hvað fáfræði getur haft skelfilegar afleiðingar og hvað tækifæri til menntunar skipta miklu máli," segir Margrét Blöndal handritshöfundur myndarinnar. Vilhjálmur Þór Guðmundsson sá um kvikmyndatöku, klippingu og stjórnaði upptökum.
Myndin var tekin í Namibíu á síðasta ári en stærsta einstaka verkefni ÞSSÍ í landinu lýtur að endurbótum á menntun heyrnarlausra með áherslu á táknmál. Verkefnið er unnið í samstarfi við Samskiptamiðstöð heyrnarlausra og heyrnarskertra.
|
| Athyglisvert |
The health worker shortage in Africa: are enough physicians and nurses being trained?- Yohannes Kinfu et al.
|
| Alþjóðabankinn í naflaskoðun |
|
Stjórnendur Alþjóðabankans hafa skipað nefnd til að gera endurbætur á skipulagi bankans í ljósi fram kominnar gagnrýni þess efnis að bankinn hafi ekki brugðist nægilega hratt við fjármálakreppunni. Ernesto Zedillo forseti Mexíó mun leiða umbótahópinn.
Douglas Alexander þróunarmálaráðherra Breta er einn þeirra sem hefur talið Alþjóðabankann hafa verið of svifaseinan í viðbrögðum við kreppunni.
Þessa dagana er haldinn fundur í Lundúnum um þróunarmál í aðdraganda leiðtogafundar G20 ríkjanna sem hefst í byrjun apríl. Á ráðstefnunni hafa meðal annars tekið til máls Donald Kaberuka, yfirmaður Þróunarbanka Afríku, og tónlistarmaðurinn Bob Geldof, sem hefur látið þróunarmál sig miklu varða um langt árabil.
|
| Kraftaverkahjúkkur í Malaví |
 |
"Það var hátíðleg stund þegar Kraftaverkin voru formlega stofnuð með pompi og prakt í litlu þorpi í Malaví," segir Stefán Jón Hafstein á vefsíðu sinni. "Íslensku hjúkgrunarfræðingarnir Guðbjörg Bergmundsdóttir og Benedikta Svavarsdóttir stóðu að baki þessu nýja íþróttafélagi sem nú hefur eignast búninga, bolta, skó og mörk - allt með tilstyrk þeirra tveggja."
|
| Stuðningur Íslands við málefni kvenna í alþjóða- og þróunarstarfi |
 |
Ísland hefur stutt sérstaklega við málefni kvenna, eflingu jafnréttis, fræðslu og stuðning við mæður í sínu alþjóðastarfi og þróunaraðstoð. Fyrir ári síðan setti Ísland sér áætlun varðandi ályktun öryggisráðs Sameinuðu þjóðanna nr. 1325 um konur, frið og öryggi og hefur verið unnið að tíu skilgreindum markmiðum í því sambandi. Áætlunin er til þriggja ára.
Íslensk stjórnvöld eiga mikið og gott samstarf við þær stofnanir SÞ sem vinna að jafnréttismálum og eflingu á frumkvæðisrétti kvenna. Þar á meðal eru Þróunarsjóður SÞ í þágu kvenna (UNIFEM), Barnahjálp SÞ, og Mannfjöldasjóður SÞ. Auk þess styðja stjórnvöld aðgerðaáætlun Alþjóðabankans í jafnréttismálum.
| |
|
