Krabbamein í þróunarlöndum:
Falinn vandi sem enginn segir frá, enginn greinir og enginn meðhöndlar |
Krabbamein veldur fleiri dauðsföllum í þróunarríkjunum en alnæmi, berklar eða malaría, segja sérfræðingar í heilbrigðismálum en í dag er alþjóðlegi krabbmeinsdagurinn, World Cancer Day. Rúmlega tólf milljón krabbameinstilvik greindust í heiminum á nýliðnu ári og 7.6 milljónir manna létust. Sífellt fleiri greinast í þróunarríkjum.
Rúmlega helmingur allra krabbameinstilvika og sex af hverjum tíu dauðsföllum verða í þróunarríkjum, þar sem veikt heilbrigðiskerfi þýðir í mörgum tilvikum að krabbamein jafngildir dauðadómi, að því er segir í frétt AFP fréttaveitunnar. "Krabbamein í þróunarríkjum er falinn vandi sem nánst enginn segir frá, enginn greinir og enginn meðhöndlar," segir David Knarr krabbameisnfræðingur við Oxford háskóla.
Lífslíkur þeirra sem fá krabbamein í þróunarríkjunum er óvenjulega litlar. Skilningur á sjúkdómnum er lítill, honum fylgir skömm og trú á hefðbundna græðara þýðir að flestir leita sér læknisfræðilegrar aðstoðar of seint, þegar sjúkdómurinn hefur breiðst út og hefur náð því stigi að vera ólæknanlegur.
Nánar |
| Afríka hluti af lausninni fremur en vandanum |
 Að mati Africa Progress Panel, sjálfstæðum samtökum undir stjórn Kofi Annan fyrrverandi framkvæmdastjóra Sameinuðu þjóðanna gæti Afríka fremur verið hluti af lausninni en vandanum sem þjóðir heims standa frammi fyrir í efnahagsmálum. Í nýrri skýrslu samtakanna, Africa: Preserving progress at a time of global crisis, kemur fram að fjárfesting í Afríku gæti orðið til þess að "endurræsa" hagkerfi heimsins og þar séu tækifærin gífurlega mörg. Fram kemur að í efnhagslegu og pólítísku tilliti séu framtíðarhorfur í álfunni betri en nokkru sinni.
Hins vegar er varað við því að heimskreppan geti leitt af sér stöðnun og jafnvel í einhverjum tilvikum þurrkað út ávinning síðustu ára. Mikilvægt sé að taka á fyrirsjáanlegum vanda sem tengist loftlagsbreytingum, stuðla að "grænni byltingu" til að auka matvælaframleiðslu og samstarfsþjóðir Afríku verði að standa við skuldbindingar sínar um framlög til þróunarsamvinnu.
"Eins og olía tryggir að vélar gangi snurðulaust í langan tíma er þörf fyrir þróunaraðstoð til að smyrja gangverk hagkerfis álfunnar," segir í skýrslunni.
Skýrslan (PDF) |
| Harðnandi átök og mikið mannfall á Srí Lanka |
Síðustu daga hafa dunið á okkur fréttir um hörmungar í borgarastríðinu á Srí Lanka, m.a. árásum á sjúkrahús í norðausturhluta landsins þar sem stjórnarherinn berst gegn tamíltígrum. Í gær skipuðu stjórnvöld íbúum á átakasvæðunum að forða sér þaðan og kváðust ekki geta tryggt öryggi þeirra. Greint var frá miklu mannfalli í morgun í borginni Suranthapuram eftir árásir í gærkvöldi.
BBC
|
| Þróunaraðstoð og fóstureyðingar:
Obama tekur snúning á frægu banni |
Eitt fyrsta embættisverk nýkjörins forseta Bandaríkjanna var að aflétta reglu sem forveri hans hafði komið á og fól í sér bann við að nota almannafé til samtaka sem á einhvern hátt höfðu afskipti af barneignum og fóstureyðingum. Bannið hafði í för með mjög alvarlegar afleiðingar fyrir þróunarríki því Bandaríkin veittu enga styrki af opinberu fé til ýmiss konar hjálparsamtaka sem vinna að heilbrigðismálum í Afríku eða öðrum þróunarríkjum ef þar var minnst á fóstureyðingar. Reglan gekk undir heitinu "global gag rule" sem segir sína sögu.
Upphaflega kom Ronald Reagan þessari reglu á í forsetatíð sinni, Bill Clinton afnam hana en George W. Bush kom henni aftur á. Nú hefur Obama tekið enn einn snúninginn.
Guardian
|
| Ráðherraskipti í utanríkisráðuneyti og nýr aðstoðarmaður |
 Nýr utanríkisráðherra, Össur Skarphéðinsson, tók við embætti á mánudag af Ingibjörgu Sólrúnu Gísladóttur sem gegnt hefur embætti utanríkisráðherra frá 24. maí 2007. Össur, sem var skipaður iðnaðaðarráðherra 24. maí 2007, mun gegna því embætti áfram samhliða störfum í utanríkisráðuneytinu.
Kristján Guy Burgess hefur verið ráðinn aðstoðarmaður Össurar Skarphéðinssonar utanríkisráðherra. Kristján hefur meistarapróf í alþjóðastjórnmálum og alþjóðalögum. Hann hefur undanfarin ár sinnt verkefnum og verið ráðgjafi fjölmargra, opinberra aðila og einkafyrirtækja, á sviði alþjóðamála.
Nánar
|
| Afrísk fyrirtæki skjóta undan 160 milljörðum dala árlega |
Skattsvik og undanskot fyrirtækja í svokölluð skattaskjól eru ekki bundin við iðnríkin því að mati tveggja stærstu hjálparsamtaka Breta verða þjóðir Afríku af 160 milljörðum dala árlega vegna slíkrar háttsemi. Samtökin, Christian Aid og Action Aid, benda á að fátæk ríki glati dýrmætu fjármagni með þessum hætti sem ella nýttist í nauðsynlega þróun og aðgerðir vegna yfirstandandi fjármálakreppu.
Í frétt Guardian segja samtökin að rannsóknir þeirra sýni að í skorti á gagnsæi og notkun skattaskjóla, sem geri þennan verknað mögulegan, sé jafnframt finna ástæðuna fyrir fjármálakreppunni sem nú komi harðast niður á þróunarríkjum. Fram kemur í fréttinni að leiðandi stjórnmálamenn í Frakklandi og Þýskalandi hafi tekið höndum saman með forseta Bandaríkjanna sem hafi einsett sér að stemma stigu við þessari háttsemi.
Nánar | |
|
|
|
| Úganda: Neyðarástand í Karamoja vegna matarskorts |
 |
Gífurlegir þurrkar í Karamoja héraði í norðausturhluta Úganda hafa leitt til þess að neyðarástandi hefur verið lýst yfir á svæðinu vegna skorts á matvælum fyrir þúsundir íbúa. Ríkisstjórn Úganda hefur í samvinnu við Matvælaaðstoð Sameinuðu þjóðanna (WFP) sett upp aðgerðaáætlun til að koma mat til nauðstaddra og forða þannig 970 þúsund íbúum á svæðinu frá sulti.
Nánar |
| Mat á þróunarsamvinnu Dana í sunnanverðri Afríku |
|
Danir hafa um langt árabil þróunarmál í sunnanverðri Afríku og unnið þar þarft verk. Þessi svæðisbundnu verkefni hafa á margan hátt skilað góðum árangri en þörf er á því að skerpa fókusinn og bæta samstarf við aðra veitendur þróunaraðstoðar. - Þetta er niðurstaða nýrrar matsskýrslu um þróunarsamvinnu Dana í sunanverðri Afríku á árunum 2003-2007 en á þeim tíma náði stuðningur Dana til 30 mismunandi verkefna fyrir um 200 milljónir danskra króna.
Nánar |
| Aukin þátttaka kvenna í ríkisstjórnum í austanverðri Afríku |
|
Umræða um þátttöku kvenna í ríkisstjórnum hefur verið nokkur hér á landi síðustu daga í ljósi þess að í nýrri minnihlutastjórn Samfylkingar og Vinstri grænna eru jöfn hlutföll kynjanna og forsætisráðherrann kona. Grein IPS fréttastofunnar um þessi mál vekur því athygli en þar segir frá stöðu kvenna í stjórnmálum í austanverðri Afríku, m.a. í Kenía, Úganda, Tansaníu og Rúanda, en í síðasttalda landinu er hlutur kvenna mestur í heiminum, eða 56% þingmanna.
Nánar |
| Fulltrúi friðargælsunnar til starfa í Palestínu |
|
Fulltrúi Íslensku friðargæslunnar, Ólöf Magnúsdóttir, hélt um helgina til starfa í Palestínu í tveggja mánaða verkefni hjá Barnahjálp Sameinuðu þjóðanna, UNICEF. Ólöf mun aðstoða staðarskrifstofu Barnahjálparinnar við að miðla upplýsingum um aðstæður barna á átakasvæðum Palestínu og neyðaraðstoð þeim til handa. Annar Íslendingur, Guðmundur E. Birgisson sálfræðingur, starfar á vegum friðargæslunnar hjá sömu skrifstofu að eftirliti með barnaverndarmálum. Þessu til viðbótar eru fjórir fulltrúar á vegum friðargæslunnar í Mið-Austurlöndum sem allir vinna hjá undirstofnunum Sameinuðu þjóðanna m.a. að málefnum palestínskra og íraskra flóttamanna.
Nánar |
| Bandaríki Afríku? Gaddafi nýr leiðtogi Afríkusambandsins |
 |
Leiðtogafundur Afríkusambandsins (African Union, AU) í Eþíópíu hefur verið framlengdur sökum misklíðar sem komin er upp vegna hugmyndar um að setja á laggirnar Bandaríki Afríku, United States of Africa. Tillagan er borin upp af nýkjörnum leiðtoga Afríkusambandsins, Muammar Gaddafi frá Lýbíu, en að mati margra annarra leiðtoga gæti slíkt bandalag aukið á skrifræðið sem ekki er á bætandi, eins og BBC segir.
BBC
|
| UNIFEM-UMRÆÐUR á laugardag |
|
Næstkomandi laugardag 7. febrúar mun UNIFEM á Íslandi halda fund í fundaröð sinni UNIFEM-UMRÆÐUR. Markmið fundanna er að varpa ljósi á stöðu kvenna í þróunarríkjum og á stríðshrjáðum svæðum sem og að kynna starf UNIFEM. Fundurinn sem stendur í um klukkutíma verður haldinn í Miðstöð Sameinuðu þjóðanna að Laugavegi 42.
|
| Þróunarbanki Afríku þrefaldar lán vegna fjármálakreppunnar |
 |
Þróunarbanki Afríku áformar að þrefalda lán til Afríkulanda til að verjast áföllum af völdum heimskreppunnar. Donald Kaberuka, yfirmaður bankans, sagði á leiðtogafundi Afríkusambandsins (AU) í Eþíópíu að bankinn myndi styðja þau lönd sem stæðu verst með fjórþættum aðgerðum.
Nánar |
| Japanir slá ekkert af í framlögum til þróunarmála |
|
Þrátt fyrir fjármálakreppuna hafa stjórnvöld í Japan ákveðið að standa að fullu við skuldbindingar sínar í Afríku. Japanir höfðu gefið fyrirheit um að tvöfalda framlög sín til þróunarsamvinnu í Afríku og hafa nú staðfest að við þau fyrirheit verði staðið.
| |
|
