Malaví fær fyrst landa
neyðaraðstoð frá AGS |
 Malaví fær fyrst landa stuðning úr sérstökum neyðarsjóði Alþjóðagjaldeyrissjóðsins sem ætlaður er fátækum þjóðum sem verða fyrir óhagstæðum óviðráðanlegum efnhagslegum aðstæðum. Umræddur sjóður kallast Exogenous Schock Facility (EFS).
Malaví er sem kunnugt er eitt af fátækustu löndum heims en hagvöxtur hefur hins vegar verið þar einn sá mesti í heiminum á síðustu árum. Þjóðin varð fyrir miklu áfalli í haust þegar verð á eldsneyti hækkað mikið og einnig verð á áburði.
Reglur um EFS sjóðinn voru rýmkaðar í nóvember til að auðvelda fátækum þjóðum stuðning og Malaví varð fyrsta ríkið til að fá þessa sérstöku fjárhagslegu neyðaraðstoð upp á 77.1 milljón dollara lán til 10 ára á 0,5% vöxtum. Af fjárhæðinni voru strax greiddar út 51,4 milljónir dala.
Nánar |
| Enn mikil þörf á opinberri þróunaraðstoð við þróunarríki |
 "Dæmin um óspektir vegna matvæla í rúmlega fjörutíu löndum seint á árinu 2007 og á árinu 2008 eru hrópandi áminning um það að fyrir milljónir manna er það heilmikið basl að afla lífsnauðsynja. Og þrátt fyrir árangur í því að draga úr fátækt er þróunaraðstoð í mörgum tilvikum enn spurning um líf og dauða. Tvær tölur sýna hvað hefur áunnist og hvað er ógert. Fjöldi þeirra sem lifir á minna en einum dollara á dag gæti farið niður fyrir einn milljarð innan tíðar, og fjöldi kornabarna og barna sem deyja gæti farið niður fyrir tíu milljónir. En þetta er einum milljarði og tíu milljónum of margt fólk."
Þannig hljóðar upphaf kafla um yfirlit yfir opinbera þróunaraðstoð í heiminum til þróunarlanda í nýrri bók frá OECD: Development Aid At A Glance 2008.
Í yfirlitskaflanum segir ennfremur:
"Tilgangur opinberrar þróunaraðstoðar (ODA) er að aðstoða fólk í þróunarríkjunum við að brjótast út úr fátækt og taka fullan þátt í samfélaginu, og að styrkja þjóðina til þátttöku í alþjóðlega hagkerfinu."
Fram kemur í riti OECD að þau viðtökuríki sem fá mest opinbert fjármagn í þróunaraðstoð eru Nígería og Írak með samanlagt um fimmtung framlaga. Skuldaniðurfelling ræður mestu í Nígeríu. Í Bandaríkjadölum talið eru framlag Bandaríkjanna mest, um 20%, framlag ESB um 9% og framlög frá Bretum og Frökkum um 8%. Ef hins vegar er litið á hlutfall af vergum þjóðartekjum eru norrænu þjóðirnar efstar á blaði auk Luxemborgar.
Hægt er að fletta ritinu hér.
|
| UNICEF biður um einn milljarð Bandaríkjadala til neyðarhjálpar |
 Í nýrri skýrslu Barnahjálpar Sameinuðu þjóðanna, Humanitarian Action Report 2009, kemur fram að UNICEF þurfi rúmlega milljarð Bandaríkjadala til að aðstoða börn og konur á neyðarsvæðum víða um heim.
Í frétt Barnahjálpar SÞ á Íslandi segir:
Humanitarian Action Report er árleg fjárbeiðni UNICEF vegna neyðaraðstoðar og fer í ár fram á rétt rúmlega einn milljarð Bandaríkjadala til að aðstoða börn og konur í 36 löndum. Upphæðin í ár er 17 prósentustigum hærri en árið 2008, að stærstum hluta til að mæta aukinni þörf í austur- og suðurhluta Afríku.
"Ástandið í mörgum landanna, sem fjallað er um í skýrslunni, má skilgreina sem þögla eða gleymda neyð," sagði framkvæmdarstjóri UNICEF, Ann M. Veneman. "Konur og börn deyja á hverjum degi vegna sjúkdóma, fátæktar og hungurs, því miður vita fæstir af þessum dauðsföllum."
Nánar
|
| Ormafár í Líberíu - neyðarástandi lýst yfir |
 Forseti Líberíu hefur lýst yfir neyðarástandi í landinu vegna ormafárs sem geisar í landinu. Ormurinn (Spodoptera frugiperda) étur uppskeruna og hefur þegar borist til nágrannaríkja, bæði til Gíneu og Sierra Leone. Að sögn BBC fréttastofunnar hafa yfirvöld í Líberíu þegar óskað eftir alþjóðlegri aðstoð við að úða úr lofti efnum gegn pöddunni. Um er ræða tólffótung sem getur náð 5 cm lengd og telst vera eitt hættulegusta skaðræðiskvikindi sem þekkist í landbúnaði. Það kallast á ensku Army Worm.
Nánar
|
| Ríkisstjórn Tansaníu bannar starfsemi græðara til að vernda líf albínóa |
 Ríkisstjórn Tansaníu hefur gripið til þess ráðs að leggja blátt bann við starfsemi hefðbundinna græðara en til þessara úrræða er gripið af hálfu stjórnvalda til að freista þess að stemma stigu við manndrápum á albínóum (hvítingjum). Að minnsta kosti fjörutíu albinóar hafa verið myrtir frá miðju ári 2007 en líkamshlutar þeirra eru notaðir til lyfjagerðar.
Fregnir frá Tansaníu herma að græðarar láti bann stjórnvalda sem vind um eyru þjóða. Margir þeirra séu með opinbert leyfi til starfa og tilheyri eigin lækningasamtökum, sem andmæla banninu og segja að græðarar sinni 30% þjóðarinnar.
Forsætisráðherra Tansaníu, Mizengo Pinda, tilkynnti síðastliðinn föstudag að ríkisstjórin hefði afturkallað öll leyfi og sagði við það tækifæri að galdralæknarnar væru allir stórlygarar.
Að sögn New York Times er orðrómur af ýmsu tagi um albínóa er útbreiddur í Afríku, m.a. sú staðhæfing að þeir hverfi í stað þess að deyja. Greiddar eru fúlgur fjár fyrir heilsudrykki sem búnir eru til úr albínóum en slíkir drykkir eru sagðir gera menn efnaða, og einnig er þekkt að fiskimenn flétti albínóahári í net sín til að glæða veiðina.
Þessar sögur skýra hins vegar ekki hvers vegna morðaldan á albínóum hófst fyrir hálfu öðru ári og einskorðast við Tansaníu.
Myndin er tekin í skóla heyrnarlausra í Namibíu.
Óttast að græðarar sæki inn í Úganda í leit að albinóum
Um albínóa | |
|
|
|
| Regntími og hungurmánuðir í Malaví |
 |
Hellidembur dynja á Malaví. Á vegum úti ganga drungalegar verur undir stórum regnhlífum. ... En drungalegt er ástandið á meðan rignir, steingrá skýin grúfa yfir og hvergi glæta. Það er því ekki ,,bjart yfir" þessum ásjónum á þjóðveginum, en þær brosa konurnar, því þær eru með björg í bú. Rengtíminn er líka kallaður ,,hungurmánuðir". Uppskeran frá í fyrra kann að vera á þrotum eða því sem næst, fólk er vant því að láta sér lítið nægja og ganga svangt til verka. Minnir á Þorra, Góu og Mörsug á Íslandi, útmánuðina þegar fólk beið eftir vorinu.
Stefán Jón Hafstein umdæmisstjóri ÞSSÍ í Malaví skrifar á heimasíðu sína. |
| Óvenjumörg dauðsföll af völdum kóleru í Malaví |
 |
|
Óvenju margir hafa látist úr kóleru núna á rigningatímanum í Malaví, að því er segir í dagblaðinu Nyasa Times í Malaví. Nítján hafa látist frá því rigningarnar hófust. Það er engu að síður lág tala miðað við 2700 látna úr kóleru í nágrannaríkinu Simbabve. Nýjar tölur frá landinu segja reyndar að enn fleiri séu látnir eða um 3000.
Kóleran í Malví geisar í höfuðborginni Lilongve.
|
| Athyglisvert |
|
Nýr kynningarbæklingur um Þróunarsamvinnustofnun Íslands - á íslensku og ensku
|
| Matvælakreppan á eftir að versna, segir Oxfam |
|
|
Að mati bresku hjálparsamtakanna Oxfam á matvælakreppan í heiminum eftir að versna. Grípa þurfi til tafarlausra aðgerða til að afstýra því að hundruð milljóna manna líði hungur vegna hækkunar á matvælaverði og aukins skorts á eldsneyti og vatni. Samtökin segja að einn milljarður manna þurfi hjálp strax.
Í frétt frá Oxfam kemur fram að of lítið hafi verið fjárfest í landbúnaði um áratugaskeið og með nýjum ógnum af völdum loftlagsbreytinga sé fæðuöryggi engan veginn tryggt.
Sameinuðu þjóðirnar halda þessa dagana ráðstefnu í Madrid um matvælakreppuna.
|
| Bæði ógnir og tækifæri framundan |
 |
Fjórum dögum eftir valdatöku Baracks Obama í Bandaríkjunum var efnt til fundar í Washington um horfur í alþjóðlegum þróunarmálum með þátttöku hundraða sérfræðinga í þróunarmálum og fulltrúa samtaka sem starfa á þessu sviði. David Gergen, yfirmaður stjórnmálaskýringa hjá CNN, ritstjóri U.S. News and World Report og ráðgjafi fjögurra forseta, sat meðal annarra í pallborði. Hann sagði bæði ógnir og tækifæri framundan í nýrri stjórn. Hann benti á að nýi forsetinn hefði beina reynslu af fátækt í þróunarlöndum því hann hefði búið sem barn í Indónesíu. Hins vegar stæði Obama frammi fyrir stefnumörkun á mörgum sviðum og þyrfti að bregðst við gríðarmiklum efnahagslegum kröfum vegna heimskreppunnar.
Nánar um fundinn á vef Center for Global Development
|
| Srí Lanka:
Særðir komast hvergi |
|
Tígrarnir, skæruliðar tamíla á Sri Lanka, koma í veg fyrir flutning særðra frá átakasvæðunum í norðurhluta landsins. RUV segir að Sameinuðu þjóðirnar hafi greint frá þessu í morgun og sagt skæruliða hafa stöðvað bílalest með særða á leið frá átakasvæðunum.
"Stjórnarherinn á Sri Lanka hefur umkringt skæruliða á um 300 ferkílómetra svæði í norðurhluta landsins og að sögn Sameinuðu þjóðanna og Alþjóða Rauða krossins eru um 250 almennir borgarar innikróaðir á svæðinu og komast hvergi," sagði í frétt RUV.
| |
|
