| Íslenska táknmálsverkefnið nær athygli fjölmiðla í Namibíu |
Fjölmiðlar í Namibíu hafa í vikunni birt fréttir af verkefni Þróunarsamvinnustofnunar Íslands og menntamálaráðuneytis Namibíu í þágu menntunar heyrnarlausra þar sem áherslan er á táknmál. Verkefnið er sem kunnugt er stærsta verkefni ÞSSÍ í Namibíu og hefur verið unnið í samstarfi við yfirvöld menntamála í landinu en fulltrúar frá Samskiptamiðstöð heyrnarlausra og heyrnarskertra á Íslandi hafa borið hitann og þungann af verkefninu fyrir hönd Íslands.
Í namibísku fjölmiðlunum er vísað til fréttatilkynningar frá Vilhjálmi Wiium, umdæmisstjóra Þróunarsamvinnustofnunar í Windhoek.
|
Konur sem deyja af barnsburði:
Líkurnar 300 sinnum meiri í þróunarríkjum en iðnríkjum |
Konur í fátækustu ríkjum heims eru 300 sinnum líklegri til að deyja við barnsburð eða af orsökum sem rekja má til þungunar en konur í iðnríkjum, samkvæmt árlegri skýrslu UNICEF um stöðu barna í heiminum, State of the World's Children. Auk þess er barn, sem fæðist í þróunarlandi, 14 sinnum líklegra til að látast á fyrstu mánuðum ævi sinnar en barn sem fæðist í iðnvæddu ríki. Þetta kemur fram í fréttatilkynningu frá Unicef, Barnahjálp Sameinuðu þjóðanna.
Í skýrslunni er að finna lista yfir fjölda atriða sem varða velferð barna í heiminum, s.s. menntun, bólusetningu, heilsugæslu, aðhlynningu þungaðra kvenna, næringargjöf, barnaþrælkun, giftingar barna, útbreiðslu HIV/alnæmis og aðgang að hreinu vatni. Þar sem upplýsingar um Ísland liggja fyrir má sjá að börn á Íslandi búa við mjög góðar aðstæður og kemur m.a. fram að Ísland er enn með lægstu tíðni barnadauða (undir 5 ára aldri) í heimi, ásamt Andorra, Liechtenstein, Luxemborg, Singapúr og Svíþjóð.
Heilsa og lífslíkur mæðra og ungabarna haldast í hendur þar sem margar af þeim aðferðum sem notaðar eru til að bjarga lífi mæðra gagnast nýfæddum börnum. Skýrslan skoðar þessi tengsl nánar og þau úrræði sem gætu minnkað muninn milli ríkra og fátækra landa í þessu tilliti.
|
| Barnungar mæður í mestri hættu |
Í skýrsla Barnahjálpar Sameinuðu þjóðanna um stöðu barna árið 2009 - sem er að þessu sinni helguð heilsu mæðra og nýbura - kemur m.a. fram að stúlkur sem verða mæður áður en þær ná fimmtán ára aldri eru fimm sinnum líklegri til að deyja af barnsförum en konur sem eru komnar yfir tvítugt. Á hverju ári deyja 70 þúsund stúlkur af barnsförum á aldrinum 15 til 19 ára, að því er fram kom í máli Ann Veneman framkvæmdastjóra UNICEF þegar skýrslan var kynnt á dögunum.
Nánar
Frétt Irin um barnungar brúðir í Níger: Early marriage - from rural custom to urban business.
|
| Heilsa mæðra og nýbura:
Stóraukin opinber þróunaraðstoð á síðustu árum |
Opinber þróunaraðstoð vegna heilsu mæðra- og nýbura hefur stóraukist á síðustu árum, að því er fram kemur í skýrslu Barnahjálpar S.Þ. um stöðu barna 2009. Alþjóðleg framlög vegna heilsu mæðra og nýrbura hækkuðu um 64% á árunum 2003 til 2006. Ennfremur hefur samstarf aukist mjög á nýliðnum árum í málaflokknum, m.a. fyrir tilstilli H8 (Health Eight) hópsins sem samanstendur af átta alþjóðlegum stofnunum á sviði heilbrigðismála. Einnig er nefnt í skýrslunni að aukin samstaða sé um það hvernig unnið skuli að úrbótum í málaflokknum og Accra Agenda for Action nefnd í því sambandi, svo og sameiginleg yfirlýsing WHO, UNICEF, Mannfjöldastofnunar SÞ og Alþjóðabankans.
Sjá 5. kafla í skýrslu UNICEF, bls. 90 |
| Svört spá SÞ: 1.000.000.000 mun líða hungur á árinu |
Í fyrsta sinn í sögu mannkyns mun meira en einn milljarður manna líða hungur, að mati Sameinuðu þjóðanna. Svo svört er spáin fyrir árið 2009. Þrátt fyrir fyrirheit vestrænna ríkja um að draga úr sárafátækt munu áhrif dýpkandi efnahagskreppu í heiminum leiða til þess að rúmlega milljarður manna mun finna fyrir matarskorti.
Þessar upplýsingar koma fram í grein Independent í Bretlandi. Þar segir að fjölgun þeirra sem eiga ekki til hnífs og skeiðar gerist þrátt fyrir metuppskeru annað árið í röð. Skýringin er sú að fólkið er svo blásnautt að það hefur ekki fé til að kaupa þann mat sem framleiddur er.
Því er við að bæta að Þróunarsamvinnustofnun Íra - Irish Aid - hefur ákveðið að setja hungur á oddinn í starfsemi sinni. Ætlunin er að Írar verði leiðandi á þessu sviði í heiminum, að því er fram kom í máli Peter Power þróunarmálaráðherra Íra. Skýrt var frá ákvörðun Íra í gær, miðvikudag.
| |
|
|
|
Geta fjölmiðlar unnið að þróunarverkefnum?
|
 |
Bresku dagblöðin Guardian og Observer ákváðu fyrir rúmu ári að breyta því hvernig þau fjalla um þróunarmál. Fjölmiðlarnir vildu hverfa frá þeirri hefðbundnu leið í umfjöllun um þróunarmál að senda blaðamann á vettvang sem gæfi tölulegar upplýsingar um fátækt og hoppaði síðan aftur upp í flugvél heim. Undir hælinn sé lagt hvort hann fari síðar aftur á vettvang en þá sé það því aðeins til að skrifa snyrtilega framhaldsfrétt um það hvernig framlag lesenda hafði nýst við að byggja nýjan skóla eða nýja borholu. Blöðin ákváðu semsagt að breyta um stíl: fylgja eftir þriggja ára þróunarsamvinnuverkefni í Katine, sveitahéraði í norðaustur Úganda. Verkefnið á svæðinu var unnið af Amref (African Medical og Research Foundation) og Farm-Africa með fjármagni frá lesendum blaðanna og Barcleys bankanum. Verkefnið hefur nú staðið yfir í fimmtán mánuði og reglulega birtast í bresku blöðunum fréttir af gangi mála og á vefnum eru blöðin með sérstakt vefsvæði helgað Katine verkefninu. Þá var á dögunum efnt til málþings í London um fjölmiðla og þróunarmál þar sem verkefni Guardian og Observer var í brennidepli. |
| Spilling hættulegasti vandinn í Mósambík |
|
Spilling er hættulegasti vandinn sem við er að etja í Mósambík að mati Ana Maria Gemo yfirmanns þeirrar stofnunar sem berst gegn spillingu. "Spillinginn er ekki það eina slæma sem grefur undan þróun samfélagsins en hún er örugglega sú hættulegasta," sagði Ana í erndi sem hún flutti í Maputo í vikunni og kallaði: Spilling sem þröskuldur í þróun.
Hún gerði smáspillingu að umtalsefni og vísaði þar til útbreiddrar hegðunar sem "gerði líf borgaranna óbærilegt." Dæmi sem hún nefndi í þessu sambandi eru t.d. þegar kennarar fara fram á mútugreiðslur af nemendum, þegar heilbrigðisstarfsmenn krefa sjúklinga um aukagreiðslur eða þegar lögregluþjónar eru aðeins reiðubúnir að rannsaka rán ef fórnarlambið greiðir þeim sérstaklega fyrir.
Fram kom í máli Ana að 422 opinberir embættismenn hefðu í einum mánuði á síðasta ári verið kærðir fyrir spillingu.
Nánar |
| Obama mun berjast fyrir bættri heilsu mæðra og barna |
 |
Fulltrúar baráttusamtaka sem tengjast heilsu mæðra og barna, svo og vísindamenn á þessu sviði, taka fagnandi kjöri Baracks Obama sem forseta Bandaríkjanna. Í nýjasta tölublaði Bistandsaktuelt í Noregi er rætt við Sharon L. Camp frá Guttmacher Institute sem segir að ekki aðeins sé kominn í Hvíta húsið maður með áhuga á þessum málaflokki heldur sé einnig hærra hlutfall vinveittra þingmanna í báðum deildum Bandaríkjaþings.
Nánar |
| Aukið tvíhliða samstarf Malaví og Kína |
 |
Yang Jiechi kínverski utanríkisráðherrann hefur verið í Malaví til að styrkja nýtilkomin tengsl við stjórnvöld en rúmt ár er síðan Malaví og Kína tóku upp stjórnmálasamband. Á fundi með forseta Malaví, Bingu wa Mutharika, var ákveðið að auka tvíhliða samstarf mili landa undir merkjum China-Africa Cooperation Forum. Þau verkefni sem unnið hefur verið að hafa að sögn forsetans gengið vel og verið efnahagsleg og félagsleg lyftistöng fyrir íbúa landsins.
Nánar | |
|
