| Sárafátækt í Afríku næstu 200 árin? |
Sárafátækt verður viðvarandi meðal þjóða sunnan Sahara í Afríku næstu tvö hundruð árin nema því aðeins aðgerðir til að uppræta fátæktina verði stórauknar, að því er segir í nýrri skýrslu. Samtökin Social Watch gefa út skýrsluna en um er að ræða sameiginlegan vettvang baráttusamtaka sem hafa þróað mælitæki sem nefnist "basic capabilities index" (grunnfærnisvísitala) í þeim tilgangi að búa til mælistiku á harðbýli fólks á mismunandi stöðum í heiminum.
Í nýjustu skýrslu samtakanna hafna 80 þjóðir - þar sem um helmingur jarðarbúa býr - neðarlega á lista þegar þrenn viðmið voru tekin með í reikninginn: fjöldi barna sem deyr innan við fimm ára aldur, fjöldi barna sem lýkur grunnskólanámi, og fjöldi fæðinga þar sem menntuð ljósmóðir eða annar heilbrigðismenntaður einstaklingur er viðstaddur.
Af þessum áttatíu þjóðum má aðeins merkja framfarir hjá sextán þjóðum frá árinu 2000, segir í skýrslunni. Afturför hefur orðið hjá öðrum þjóðum, þar á meðal Chad, Níger, Malaví, Benin og Jemen, meðan óbreytt ástand er metið hjá þjóðum eins og Bangladesh, Úganda, Nígeríu, Madagaskar og Gana.
Nánar |
| Afturför í frjálsræði í Afríku á árinu 2008 |
Bandarísku félagasamtökin Freedom House staðhæfa að afturför hafi orðið meðal þjóða í sunnanverðri Afríku þegar litið er til pólítískra réttinda og persónuverndar. Í nýrri ársskýrslu samtakanna segir að merkja megi afturför í tólf ríkjum í Afríku, þ.e. hjá hartnær fjórðungi þjóða í álfunni. Framfarir hafi aðeins orðið meðal fjögurra þjóða, Sambíu, Comoros, Angóla og Fílabeinsströndinni.
Af þjóðum í sunnanverðri Afríku eru 10 ríki skilgreind frjáls, 23 ríki að hluta til frjáls og 15 ríki ófrjáls. Neðst á listanum eru Súdan, Miðbaugs-Gínea og Sómalía. Chad, Eritrea, Simbabve og Vestur-Sahara, eru sögð lítið skárri.
Nánar
|
| Mutharika rúllar upp kosningunum í Malaví |
Samkvæmt skoðanakönnun sem birt hefur verið í Malaví verður núverandi forseta landsins, Bingu Wa Mutharika og flokki hans (Democratic Progressive Party - Lýðræðislega framsóknarflokknum) ekki skotaskuld úr því að sigra í þing- og forsetakosningunum sem verða í Malaví 19. maí næstkomandi.
Niðurstöður könnunarinnar benda til yfirburðasigurs forsetans sem fengi 83% atkvæða ef gengið yrði til kosninga nú. Skæðasti andstæðingurinn, John Tembo og MCP flokkurinn, hlytu 12% og fyrrverandi forseti Bakili Muluzi og flokkur hans næðu aðeins 4,2% atkvæða.
|
| Kóngarnir fá ekki að koma til Kampala |
 Yfirvöld í Úganda hafa stöðvað fyrirhugaðan fund "hefðbundinna höfðinga" í Afríku með Muammar Gaddafi leiðtoga Líbýu í broddi fylkingar, með þeirri skýringu að fundurinn yrði of pólítískur, auk þess sem samkoman færi í bága við stjórnarskrá landsins.
Á fundinum var ætlunin að ræða hugmyndir Gaddafi um einingu Afríku, m.a. sameiginlegan gjaldmiðil og sameiginlegan her. Samtökin voru stofnun á síðasta ári þegar á þriðja hundrað afrískir konungar og einræðisherrar útnefndu Gaddafi "konung konunganna".
|
| Malaví: Skráning um vannæringu með SMS |
 Tilraunaverkefni er hafið í Malaví um gagnasöfnun vegna vannæringar sem fer fram með tilstilli farsíma og SMS skeyta yfir Netið. Um er að ræða fjögurra mánaða tilraunaverkefni í þremur hérðuðum Malaví en kerfið, RapidSMS, var þróað af UNICEF, Barnahjálp Sameinuðu þjóðanna. Áður var upplýsingum um hæð og þyngd barna safnað á þar til gerð eyðublöð með ærinni fyrirhöfn og tók langan tíma. Nýja SMS aðferðin flýtir mikið fyrir og ætti að auðvelda viðbrögð við vannæringu barna. Malaví er meðal þeirra landa þar sem flest börn deyja áður en fimm ára aldri er náð og þau sem ná fimm ára aldri eru að stórum hluta vannærð.
Nánar | |
|
|
|
| Noregur:
Listaverk valið í nýja miðstöð þróunarsamvinnu |
 |
Norðmenn eru að reisa Miðstöð fyrir þróunarsamvinnu í miðborg Oslóar og áforma að opna miðstöðina formlega síðar á þessu ári. Á heimasíðu NORAD segir frá því að á dögunum hafi verið tilkynnt um sigurvegara í samkeppni um listaverk í nýju miðstöðina. Marte Johnslien heitir listakonan sem varð hlutskörpust og verkið hennar kallast "Afríska Guernica". Þetta er þrívíddarverk byggt á hinu víðfræga málverki Pablo Picassos "Guernica".
Nánar |
| Barist gegn alnæmi í sveitum Malaví |
 |
"Söngur ómar um sveitir Malaví þegar fulltrúar Rauða kross Íslands koma að heimsækja leikskóla, sem byggður var fyrir aðstoð frá Íslandi. Í Malaví syngja menn þegar þeir eru glaðir og þegar þeir eru sorgmæddir. Söngurinn er ekki bara til hátíðarbrigða heldur er hann hluti af daglegu lífi." Þannig hljóðar upphaf frásagnar Þóris Guðmundssonar sviðsstjóri alþjóðasviðs Rauða krossins en hann var í Malaví á dögunum.
Þórir heldur áfram:
"Hér í litlu þorpi í Chiradzulu í Malaví er rituð nútímasaga Afríku. Nærri því einn af hverjum fimm fullorðnum íbúum Malaví er smitaður alnæmisveirunni. Þeir liggja fyrir í beddum eða sitja við dyr leirkofa með stráþaki. Sumir hafa fengið lyf sem halda veirunni í skefjum en aðrir eru langt leiddir og komast vart á sjúkrahús til að láta skoða sig. Þetta eru bæði karlar og konur."
Nánar |
| Svarta gullið finnst í Úganda |
|
Greint hefur verið frá "heimsklassa" olíufundi í Úganda þar sem breska fyrirtækið Heritage Oil hefur verið við olíuleit í félagi við Tullow Oil. Samkvæmt frétt BBC gæti verið um stærsta olíufund að ræða í sigdalnum við Albertsvatn.
|
|
Flóð verða 25 að aldurtila í Mósambík |
 |
Úrhelli og flóð hafa orðið 25 að aldurtila í miðhluta Mósambík á síðustu tveimur vikum. Óttast er að ástandið eigi enn eftir að versna á næstu vikum. Samkvæmt Reuters frétt eru flestir hinna látnu börn sem drukknuðu þar sem þau reyndu að synda í vatnsflaumnum. Fjölmörg heimili hafa eyðilagst í flóðunum og yfirvöld eru að koma upp neyðarskýlum. Ennfremur hafa vegir og brýr og rafmagnsmöstur orðið fyrir skemmdum. Zambezi fljótið rennur um fjögur héruð í Mósambík og veldur árlegum usla. Fyrir tveimur árum léstu 45 og 285 þúsund manns misstu heimili sín.
Nánar |
| Ný bók |
 |
African Development: Making Sense of the Issues and Actors
eftir Todd J. Moss
Nánar | |
|
