| Fundur umdæmisstjóra ÞSSÍ haldinn á Íslandi |
Allir umdæmisstjórar Þróunarsamvinnustofnunar Íslands eru staddir á Íslandi þessa dagana en árlegur fundur þeirra með framkvæmdastjóra og fulltrúum aðalskrifstofu er að þessu sinni haldinn hér heima. Um er að ræða tveggja daga fund þar sem fjallað er um helstu sameinginleg mál umdæmisskrifstofanna sex í samstarfslöndunum.
Meðal mála sem eru á dagskrá má nefna áhrif nýrra laga um alþjóðlega þróunarsamvinnu á starfsemi ÞSSÍ, nýtt ráðningaferli og undirbúningsfræðslu starfsfólks, horfur í rekstri stofnunarinnar 2009 og næstu ár, handbók um meðhöndlun skjala og brottförina frá Srí Lanka, svo fátt eitt sé nefnt.
Síðasti fundur umdæmisstjóranna fyrir rúmu ári var haldinn í Kampala í Úganda og þar áður í Mapútó, Mósambík.
Á myndinni eru t.f.v. Sighvatur Björgvinsson, framkvæmdastjóri, Tumi Tómasson (Srí Lanka), Stefán Jón Hafstein (Malaví), Vilhjálmur Wiium (Namibíu), Geir Oddsson (Níkaragva), Árni Helgason (Úganda) og Jóhann Pálsson (Mósambík).
|
| Mikill stuðningur Svía við þróunarsamvinnu |
Ný viðhorfskönnun meðal sænsku þjóðarinnar til þróunarsamvinnu sýnir að þrátt fyrir fjármálakreppuna er sem fyrr mikill stuðningur fyrir því að Svíar haldi áfram að veita þróunaraðstoð í ríkum mæli. Niðurstöðurnar koma á óvart, segir í frétt á vef SIDA, því á tímum efnahagsþrenginga hefur þeim fækkað sem styðja við mikinn stuðning við fátækar þjóðir. Bent er á að í niðursveiflunni í sænskum efnhag í upphafi tíunda áratugar síðustu aldar hafi gætt þess viðhorfs að draga ætti úr raunsnarskap í þróunarsamvinnu.
"Fyrir fólkið í samstarfslöndum okkar er það skiljanlega gleðiefni að stuðningur Svía er áfram fyrir hendi," segir Joachim Beijmo upplýsingafulltrúi SIDA.
Sex af tíu Svíum telja að núverandi framlög til þróunarsamvinnu séu hæfileg eða ættu að aukast. 17% vilja auka framlögin en 44% telja þau hæfileg. Þeir sem vilja draga úr framlögum er 15% og þeir sem vilja hætta þróunarsamvinnu eru um 5%. Um fimmtungur hefur ekki skoðun.
Svíar eru í hópi þeirra fáeinu ríkja sem uppfylla tilmæli Sameinuðu þjóðanna um 0,7% framlag af vergum þjóðartekjum til þróunarmála.
Sænska Hagstofan vann könnunina samkvæmt beiðni SIDA.
Nánar |
| Eþíópía: Miklar takmarkanir á starfsemi hjálparsamtaka |
 Þing Eþíópíu hefur samþykkt umdeild lög sem fela í sér miklar takmarkanir á starfsemi hjálparsamtaka í landinu. Samkvæmt nýju lögunum er útlendum hjálparsamtökum óheimilt að starfa á ýmsum sviðum eins og að mannréttindamálum, jafnréttismálum, lausnum deilumála og réttindum barna. Innlend samtök sem afla meira en 10% fjár utanlands frá eru sett undir sama hatt.
Frumvarpið var samþykkt á aðfangadag. Það hafði lengi verið til meðferðar í þinginu og mætt mikilli andstöðu fulltrúa frjálsra félagasamtaka.
Frétt BBC
|
| Sjö af tíu mestu hörmungum heimsins eru í Afríku |
 Fimm lönd Afríku eru á lista mannúðarsamtakanna Lækna án landamæra um tíu verstu hörmungarnar í heiminum. Þar við bætist að í mörgum Afríkuríkjum eru HIV/Aids og vannæring barna einnig viðvarandi vandamál.
Læknar án landamæra birta árlega lista yfir helstu neyðarverkefni í heiminum. Kongó er á listanum tíunda árið í röð.
Nánar |
| Bein framlög í peningum til Afríku? |
Göran Holmqvist, fyrrverandi framkvæmdastjóri SIDA, sænsku þróunarsamvinnustofnunarinnar, birti á dögunum grein í Guardian í Bretlandi og New Vision í Úganda um þróunarmál. Þar viðrar hann hugmyndir um beinar peningagreiðslur sem leið í þróunaraðstoð við Afríkuríki. Fjölmargir hafa skrifað athugasemdir við greinina í bloggkerfi Guardians.
Cash Aid for Africa
| |
|
|
|
| Minnkar flæði fjármagns til þróunarríkja um 25%? |
 |
|
Að mati þróunarhagfræðinga verða áhrif alþjóða fjármálakreppunnar ekki minni í þróunarríkjunum en í iðnríkjunum. Alþjóðagjaldeyrissjóðurinn hefur til dæmis nýlega lækkað spár um hagvöxt í ríkjum sunnan Sahara um eitt til tvö prósentustig eða í 5.5% á árinu 2008 og 5,1% á árinu 2009. Samkvæmt nýrri úttekt Isabellu Massa og Dirk Willem de Velde hjá ODI (Overseas Development Institute) eru líkindi til þess að fjármagnsflæði til þróunarríkja dragist saman á næstu tveimur árum um 300 milljarða Bandaríkjadala, sem þýðir 25% samdráttur.
Í úttekt þeirra er sérstaklega kannað hver áhrif fjármálakreppunnar verða á hagkerfi þeirra Afríkuríkja sem hafa verið að rétta úr kútnum, s.s. Gana, Kenía, Malí, Mósambík, Rúanda, Senegal, Tansaníu og Úganda.
|
| Spá um minni hagvöxt í Mósambík |
|
Spár um hagvöxt í Mósambík á nýliðnu ári gerðu ráð fyrir 8% vexti en nýjar spár telja að hagvöxturinn á árinu verði 6,5%, að því er talsmaður ríkisstjórnarinnar sagði á dögunum. Lækkunin er til komin vegna hækkandi verðlags á eldsneyti og matvöru, auk alþjóðlegu fjármálakreppunnar.
Spár um hagvöxt á árinu 2009 segja að áhrif kreppunnar komi til með að halda áfram og leiða til þess að hagvöxturinn verði aðeins 6.7%.
Nánar |
| Hvað boðar nýárs blessuð sól fyrir Afríku? |
 |
BBC veltir vöngum yfir því hvað muni gerast á árinu 2009 í Afríku. Því er spáð að Mugabe hverfi úr forsetastóli Simbabve og við taki bandamaður hans, Jakob Zuma verði forseti Suður-Afríku en að flokkur hans, afríska þjóðarráðið (ANC), tapi fylgi. Ennfremur spáir BBC því að Alþjóða sakadómstóllinn (ICC) gefi út handtökuskipun á Bashir, forseta Súdan.
Lesendur bæta síðan margvíslegum spádómum á listann í viðauka með greininni.
Nánar |
| Fyrsta sápuóperan í Mósambík |
|
Fyrsta innlenda sápuóperan sem sýnd er í sjónvarpi í Mósambík verður á skjám landsmanna í þessum mánuði. Hún kallast "Ntxuva - Vitas em Jogo" en Ntxuva er mósambískt heiti á afrísku spili sem leikið er með steinum á tréborði með þar til gerðum holum. Sjónvarpsþáttunum er ekki aðeins ætlað að vera til skemmtunar heldur hafa þeir fræðslugildi og verður einkum lögð áhersla á ýmiss konar fróðleik um heilbrigðismál eins og HIV/AIDS.
Fyrirmyndin að þáttagerðinni er sótt til Brasilíu og framleiðendurnir koma þaðan með fjárhagslegum stuðningi frá sendiráði Bandaríkjanna.
Nánar |
| Maísskortur í Mangochi |
|
IRIN fréttaveitin birti á mánudag viðtal við Kassim Kalukwete, malavískan bónda á sextugsaldri í Mangochi héraði, sem telur að fæðuskortur sé yfirvofandi í héraðinu. Stjórnvöld í Malaví segja hins vegar að birgðir af maís séu nægar. Bóndinn segir það ekki rétt og nefnir að hungur blasi við fjölskyldu sinni og mörgum öðrum í þorpinu Kungumbe frá byrjun febrúar til loka marsmánaðar. Þá fyrst megi vænta nýrrar uppskeru.
|
| Besta bloggið 2008 |
|
Fjölmargir starfsmenn alþjóðlegra hjálparsamtaka og frjálsra félagasamtaka eru duglegir að nota blogg til að miðla upplýsingum um starf sitt og aðstæður á vettvangi á stríðs- og hörmunarsvæðum. Í þessum skrifum er oft á tíðum dregnar upp áhrifameiri og sterkari myndir en í opinberum fréttatilkynningum. Nánar | |
|
