| Þriðjungur framlaga DAC ríkja til marghliða þróunaraðstoðar |
 Um fjórðungur framlaga til opinberrar þróunaraðstoðar í heiminum fer til alþjóðlegra stofnana. Samkvæmt nýjum tölum frá DAC (þróunarsamvinnunefnd OECD) námu framlög til slíkrar marghliða þróunaraðstoðar 28 milljörðum dala árið 2006. Til viðbótar fara 11 milljónir dala til marghliða stofnana í formi framlaga til eyrnamerktra verkefna sem þýðir að hlutfall marghliða þróunarsamvinnu nær því að vera um þriðjungur allra opinberra framlaga. Um 66% framlaga til þróunarmála renna því til tvíhliða þróunarsamvinnu.
Hér á landi eru hlutföllin líkast til svipuð: um 40% opinberra framlaga fara til Þróunarsamvinnustofnunar Íslands til tvíhliða samstarfs, en um 60% til utanríkisráðuneytis, bæði til tvíhliða og marghliða aðstoðar (sjá framlög til þróunarsamvinnu 2008).
DAC hefur tekið saman skýrslu um marghliða þróunaraðstoð sem gefin verður út í janúar á næsta ári og kallast: 2008 Report on Multilateral Aid. Þar kemur fram að alþjóðlegum stofnunum sem uppfylla skilyrði fyrir þátttöku í alþjóðlegum þróunarverkefnum hefur fjölgað gífurlega á umliðnum áratugum. Slíkar stofnanir voru 15 á árinu 1940 en eru nú 263. Að mati DAC kallar fjölgunin og flækjustigið, verklag og framkvæmd á nákvæma rannsókn á marghliða þróunaraðstoð í ljósi viðfangsefna þróunarsamvinnu á nýrri öld.
Fréttin úr fréttabréfi DAC |
| Norðmenn til mikillar fyrirmyndar, segir DAC |
 Norðmenn fá almennt góða dóma í glænýrri jafningjarýni þróunarsamvinnunefndar OECD. Í DAC Peer Review segir að Norðmenn séu til fyrirmyndar sem veitendur þróunaraðstoðar. Til þess er tekið að þeir veiti öðrum þjóðum meira til þróunarmála eða 0,95% af vergum þjóðartekjum og stefni í 1% á árinu 2009. Norðmenn séu einnig stöðugt að bæta kerfið sem alþjóðlega þróunarsamvinnan byggist á, svo og eigin stefnu í þróunarmálum og verkefni. Ennfremur styðji Norðmenn hugmyndir DAC um árangur þróunarsamvinnu og séu fljótir og sveigjanlegir að bregðast við nýjum aðstæðum og tækifærum.
"Noregur á langa og hrósverða og meira en hálfrar aldar sögu í þróunarsamvinnu. Þetta er framsækinn veitandi þróunaraðstoðar, reiðubúinn að styðja við nýjar og framsæknar leiðir í hugsun," segir m.a. í dómi DAC.
Nánar |
| Helmingi færri börn bólusett en tölur segja til um |
 Hópur þróunarríkja hefur stórlega ýkt tölur um börn sem hafa verið bólusett gegn banvænum sjúkdómum. Með því að oftelja börnin hafa viðkomandi ríkið fengið hærra fjárframlag en ella frá Sameinuðu þjóðunum. Samkvæmt skýrslu sem birt var í læknaritinu Lanzet á dögunum er talið að allt að því helmingi færri börn hafi verið bólusett en áður var talið.
Skýrsluhöfundar greindu gögn um börn sem áttu að hafa verið bólusett í verkefnum á vegum Sameinuðu þjóðanna og skyldum samtök eins og GAVI (Global Alliance for Vaccines and Immunization). Kannað var tímabilið 1986 til 2006 en samkvæmt opinberum tölum áttu á því árabili alls um 14 milljónir barna að hafa verið bólusett. Samkvæmt skýrslunni í Lancet er talið að börnin kunni að vera rúmlega 7 milljónir.
Ríki sem komu við sögu í þessari úttekt eru m.a. DR Kongó, Gínea, Líbería, Malí, Níger og Pakistan.
Sjá ennfremur frétt um GAVI í Bistandsutviklingen
|
| Við gerum mest fyrir fátæka, segja Hollendingar |
Hollendingar trónuðu í efsta sæti á þróunarvísitölu Centre for Global Development um þær þjóðir standa sig best í þróunarsamvinnu í heiminum eins og við sögðum frá í síðustu viku. CDI vísitalan (Committment to Development Index) tekur til 22ja iðnríkja og mælir frammistöðu þeirra í þróunarmálum á sjö ólíkum sviðum. Norrænu þjóðirnar og Hollendingar voru í efstu sætunum Hollendingarnir settir í efsta sætið. Svíar lásu hins vegar út úr tölfunni að þeir væru bestir miðað við gæði og umfang.
Á vefsíðu hollenska utanríkisráðuneytisins er frétt sem ber yfirskriftina: Hollendingar gera mest fyrir fátæka. Þar er vitnað í Nancy Birdsall framkvæmdastjóra CDG og haft eftir henni að engin þjóð standi Hollendingum framar við að bæta lífsgæðin í þróunarlöndum. Hún bar mikið lofsorð á Hollendinga fyrir að vera öðrum þjóðum fyrirmynd í þróunarsamvinnu.
Nánar |
| Unnt að afstýra flestum dauðsföllum barna í Úganda |
Niðurstaða nýrrar skýrslu um háa tíðni barnadauða í Úganda er sú að unnt hefði verið að afstýra langflestum dauðsföllum barna undir fimm ára aldri. Aðeins hefði þurft að koma á laggirnar tiltölulega ódýrum forvarnarverkefnum.
Skýrslan heitir "2007 Uganda Child Verbal Ausopsy Study" og var unnin af bandaríska stofnuninni Measure DHS (Demographic and health surveys) í samvinnu við Hagstofu Úganda. Skýrslan er mikill áfellisdómur yfir heilbrigðiskerfinu í Úganda sem hefur ekki tekið á þeim mikla vanda sem ungabarnadauðinn er, eins og segir í frétt African Future.
"Langflest dauðsföll barna undir fimm ára aldri í Úganda eru af völdum sjúkdóma sem auðvelt hefði verið að koma í veg fyrir," segir í skýrslunni.
Nánar | |
|
|
|
| Átján nýir sérskólar fyrir fatlaða |
 |
Museveni forseti Úganda hefur gefið menntamálaráðuneyti landsins fyrirmæli um að byggja átján sérskóla, einkum fyrir heyrnarlausa og blinda, að því er segir í fréttum frá Kampala. Tilmælin voru kunngerð í ræðu á alþjóðadegi fatlaðra fyrir nokkru. Fram kom í orðum forsetans að ríkisstjórnin áformi að bjóða ókeypis túlkaþjónustu fyrir heyrnarlausa. Ennfremur nefndi hann að ríkisstjórninni væri ljóst að fatlaðir nytu almennt ekki þeirrar þjónsutu sem veitt væri vegna HIV og alnæmis. "Ríkisstjórn mín mun tryggja að þeir hafi sama aðgang að upplýsingum, menntun, ráðgjöf og ARV eins og allir aðrir," sagði í ræðu forsetans.
Nánar |
| Um hálf milljón þarfnast matar í Mósambík |
 |
Miklar rigningar og hátt verð á matvælum hefur leitt til þess að í suður- og miðhluta Mósambík eru hartnær hálf milljón íbúa í mikilli þörf fyrir matvælaaðstoð, að því er ráðuneyti landbúnaðar hefur greint frá. Að mati ráðuneytisins eru um 450 þúsund í neyð þar af 150 þúsund í mjög alvarlegri neyð.
Nánar |
| Mikilvægt að fjárfesta í landbúnaði í Afríku |
|
Fjárfesting í landbúnaði er einhver áhrifamesta leiðin til að auka matvælaframleiðslu, lækka verð á matvælum og draga úr fátækt og vannæringu.
Þessi staðhæfing var leiðarljós námstefnu sem haldin var á dögunum á vegum háskólans í Kaupmannahöfn í samvinnu við Afríkuráðið, Africa Commisson, en yfirskrift námstefnunnar var "Hungur, heilsa og von".
Afrakstur námstefnunnar birtist í fjórtán tillögum sem greint er frá á heimasíðu Afríkuráðsins.
Nánar |
| Jólablað Hjálparstarfs kirkjunnar komið út |
 |
Jólablað Hjálparstarfs kirkunnar er komið út. Í blaðinu eru fjölmargar fræðandi og áhugaverðar greinar, m.a. ein grein um samstarfsverkefni ÞSSÍ og Hjálparstarfs kirkjunnar í Malaví undir yfirskriftinni "Sjálfsþurftarbændur í Malaví færa eggin í fleiri körfur." Verkefnið nær til tíu þorpa í Malaví og felst í stuðningi við fjölskyldur sjálfsþurftarbænda. "Verið er að efla þekkingu og færni fólks til að takast á við framfaraverkefni. Það er gert með því að kenna fólki að nýta vatn til að tryggja betur fæðuöryggi sitt og efla almenna afkomu. Grafið er eftir vatni og það notað í áveitur. Þannig verður spretta nýrra, þurrka þolnari og fjölbreyttari tegunda sem verkefnið færir með sér, miklu meiri. Taðið frá skepnunum sem fást í gegnum verkefnið, eykur enn á uppskeruna. Fiskiræktartjarnir sem eru nýjung, verða svo helsta prótínuppsprettan. Þannig er fólkið hætt að verða háð duttlungafullri rigningunni um einu fæðu sína. Vatnið, kamrarnir og heimatilbúnir vaskar til að þvo sér um hendurnar ásamt allri fræðslunni eykur hreinlæti og lengir lífið. Ekki síst á það við um alnæmissjúka sem hafa lamað ónæmiskerfi. Allt er svo unnið til framtíðar og sjálfbærni. Með gróðursetningu og öðrum aðgerðum binst vatnið betur jarðveginum þannig að vatnsból endurnýjast betur. Þróunarsamvinnustofnun Íslands kostar með okkur þetta verkefni sem og önnur í Afríku, og samstarfs- og framkvæmdaraðili er Hjálparstofnun Lúthersku kirkjunnar í Malaví," segir í greininni. Margt smátt - jólablað 2008 | |
|
