| Ríku þjóðirnar þær nískustu
- smáríki Evrópu verja mestu fjármagni til þróunarmála |
Tiltölulega fámennar Evrópuþjóðir skáka stórþjóðunum þegar kemur að rausnarskap gagnvart fátækum þjóðum, að því er fram kemur í árlegri þróunarvísitölu samtakanna Centre for Global Development (CGD). Vísitalan, Commitment to Development Index (CDI) var birt á dögunum og leiðir í ljós að stórveldin sjö, að Bretlandi undanskildu, eru ekki meðal þeirra tíu þjóða sem verja mestum fjármunum til þróunarsamvinnu.
Efstar á blaði voru norrænu þjóðirnar og Hollendingar sem eru númer eitt. Þegar litið er til umfangs og gæða eru Svíar hins vegar á toppnum. Ísland er ekki með á listanum yfir þær 22 þjóðir sem CDI nær yfir en miðað við opinbert framlag okkar til þróunarmála væri Ísland neðarlega á listanum, með tæplega 0.30% af vergum þjóðartekjum, líkt og Japan sem er í næst neðsta sæti.
DEVELOPMENT:Richest Countries Also the Stingiest
|
| Tímamótum fagnað í dag:
Sextíu ár liðin frá samþykkt yfirlýsingar SÞ um mannréttindi |
Í dag, á alþjóðadegi mannréttinda, eru liðin sextíu ár frá því mannréttindayfirlýsing Sameinuðu þjóðanna var samþykkt af allsherjarþingi Sameinuðu þjóðanna. Yfirlýsingin frá 1948 lagði grunninn að alþjóðlegu mannréttindakerfi nútímans. Á henni byggja helstu mannréttindasamningar og stjórnarskrárákvæði ríkja víða um heim. Mannréttindayfirlýsingin kveður á um grundvallarmannréttindi sem snerta alla, alls staðar og eru óháð tíma og rúmi.
Þessara tímamóta er minnst víða um heim með margvíslegum hætti. Hér á landi verður hátíðafundur í Iðnó í tilefni dagins á vegum utanríkisráðuneytis og Mannréttindaskrifstofu Íslands.
Sextíu ára afmæli yfirlýsingarinnar verður minnst víða um heim undir yfirskriftinni "virðing og réttlæti fyrir alla". Á hátíðafundinum í Iðnó verður kynnt ný þýðing yfirlýsingarinnar, auk útgáfu með verkum ungra hönnuða sem öll tengjast efni mannréttindayfirlýsingarinnar. Ávörp flytja Ingibjörg Sólrún Gísladóttir utanríkisráðherra, Brynhildur Flóvenz, lektor við Háskóla Íslands og Páll Ásgeir Davíðsson, forstöðumaður Eþíkos. Þá verður frumsýnd hreyfimynd um mannréttindi við undirleik hljómsveitarinnar Hjaltalín og leikkonan Ilmur Kristjánsdóttir fjallar um mannréttindayfirlýsinguna með sínum hætti.
Dagskrá hátíðarfundarins hefst kl. 16:30. Aðgangur er ókeypis og öllum opinn.
|
| Miklar vonir bundnar við nýtt bóluefni gegn malaríu |
 Niðurstöður tilrauna með nýtt bóluefni gegn malaríu lofa góðu. Þær sýna að nýja bóluefnið, RTS,S, virkar vel sem vörn gegn sýkingu í kornabörnum og börnum. Á hverju ári deyja um ein milljón barna af völdum malaríu, flest í Afríku. Nokkur bóluefni gegn þessum skæða sjúkdómi eru á tilraunastigi en RTS,S er komið lengst á veg og fer innan tíðar í þriðju prófun.
Niðurstöður úr annarri prófun mótefnisins birtust í tímaritinu New England Journal of Medicine.
Nánar |
| Þolinmæðin gagnvart Mugabe á þrotum? |
Vaxandi þrýstingur er meðal alþjóðasamfélagsins á Robert Mugabe, forseta Simbabve, að víkja úr embætti en kólerufaraldur sem geisar í landinu magnast dag frá degi. Evrópusambandið vill að Robert Mugabe fari frá völdum. Nicolas Sarkozy, forseti Frakklands, sem situr í forsæti Evrópusambandsins um þessar mundir, segir að Mugabe verði að víkja. Gordon Brown, forsætisráðherra Breta hefur skorað á þjóðir heims að gera Robert Mugabe ljóst að nú sé nóg komið. George Bush forseti Bandaríkjanna tekur í sama streng og sömuleiðis Desmond Tutu og fleiri og fleiri.
En Afríkusambandið stendur hins vegar með Mugabe.
Fréttir um Simbabve:
| |
|
|
|
| Fréttaskýringaþættir um þróunarmál |
 |
"Þaðan sem ég kem frá Vestur-Afríku er þekkt máltækið: "Sá sem er kjáni fertugur verður alltaf kjáni - og flest Afríkuríki hafa verið sjálfstæð í fjörutíu ár." Þannig hefst annar tveggja nýlegra fréttaskýringaþátta Panorama á BBC um þróunarmál. Sá sem heldur á hljóðnemanum er Sorious Samura frá Sierra Leone.
Fyrri þátturinn nefnist:
|
| Alþjóðadagur gegn spillingu |
 |
Í gær, 9. desember, var alþjóðadagur gegn spillingu og víða um heim fjallað í fjölmiðlum og málþingum um leiðir í baráttunni við það útbreidda og hættulega fyrirbæri. Allsherjarþing Sameinuðu þjóðanna ákvað árið 2003 að helga 9. desember ár hvert baráttunni gegn spillingu og tilgangurinn var sá að auka meðvitund almennings um spillingu í samfélögum og vekja jafnframt athygli á hlutverki sáttmála SÞ gegn spillingu (UNCAC) í baráttunni við að draga úr henni.
Sameinuðu þjóðirnar segja að viðhorf til spillingar séu að breytast. Aðeins fyrir tíu árum hafi fólk hvíslast á um spillingu. Nú séu dæmi um vaxandi óþolinmæði gagnvart spillingu og sífellt fleiri stjórnmálamenn og forstjórar séu kallaðir fyrir rétt og sakfelldir.
Fjölmiðlar hafa miklu hlutverki að gegna í þessu sambandi. Einn þekktast blaðamaðurinn í Mósambík sem skrifaði gegn spillingu í landinu á sínum tíma var myrtur í nóvember árið 2000 í Maputo. Hann hét Carlos Cardoso. Nefnd samtaka blaðamanna í Bandaríkjunum, CPJ (Committee to Protect Journalists) sem rannsakaði mál Cardoso átta mánuðum eftir lát hans komst að því að blaðamenn í Mósambík voru enn hræddir við að skrifa um spillingu. Á sögu Carduso er minnst hér bæði vegna alþjóðadagsins gegn spillingu og nýrra frétta frá Mósambík að meintur banamaður hans, Anibalzinho, hafi í þriðja sinn sloppið úr fangelsi í Mapútó. Í þriðja sinn!
Alþjóðadagur gegn spillingu
|
| Um milljarður við hungurmörk |
 |
Sveltandi fólki fjölgar.
Matvaælastofnun Sameinuðu þjóðanna telur að hátt matvælaverð hafi bætt 40 milljónum einstaklinga í hóp þeirra sem svelta. Vannærðir eru hátt í einn milljarður, 963 milljónir manna, segir FAO í nýrri skýrslu, flestir í Afríku og Asíu.
Þótt verð á matvælum hafi lækkað síðustu vikurnar vegna fjármálakreppunnar fækkar þeim sem hafa efni á almennilegum málsverði, segir í skýrslunni.
Sveltandi fólki fjölgar ár frá ári þrátt fyrir að efst á blaði þúsaldarmarkmiðanna sé að fækka sárafátælkum um helming fyrir árið 2015.
Reutersfrétt |
| Almenningur á Srí Lanka styður hernaðinn gegn Tamíltígrum |
|
Ríkisstjórn Srí Lanka hefur mikinn stuðning almennings í landinu í borgarastríðinu gegn Tamíltígrum og flestir eru þeirrar skoðunar að tígrarnir verði yfirbugaðir innan tíðar, að því er fram kom í skoðaðanakönnun sem birt var í dag. Þar kom fram að 75% aðspurðra voru hlynnt hernaðaraðgerðum sem einu leiðinni til að koma í veg fyrir hryðjuverk. Ennfremur leiddi könnunin í ljós að rúmlega helmingur svarenda taldi að borgarastyrjöldinni yrði lokið fyrir lok næsta árs. Þá töldu 91% svarenda að þeir hefðu ekki trú á því að Frelsisher Tígranna væri réttmætur fulltrúi minnihlutahóps Tamíla. Nánar | |
|
Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með þvi sem hæst ber hverju sinni. Efni veftímaritsins þarf ekki endilega að endurspegla stefnu stofnunarinnar. 