Doha fundurinn í næstu viku:
ESB eykur framlög þrátt fyrir kreppuna |
Evrópusambandið ætlar að standa við skuldbindingar um að auka framlög til þróunarlanda þrátt fyrir neikvæð áhrif fjármálakreppunnar. Þróunarríkin hafa að mestu komist hjá fyrstu áhrifum fjármálakreppunnar sökum þess að umsvif þeirra á heimsmarkaði eru lítil. Hagfræðingar óttast hins vegar óbein áhrif síðar eins og samdrátt í framlögum til þróunarmála, minni fjárfestingar og minni hagvöxt.
ESB hét því að auka framlög til þróunarmála í 0,56% af vergum þjóðartekjum fyrir árið 2010 og í 0,7% fyrir árið 2015. Óttast er að þessi fyrirheit nái ekki fram að ganga sökum fjármálakreppunnar.
Fulltrúar þjóða sem veita þróunaraðstoð hittast í Doha í næstu viku, frá 29. nóvember til 2. desember, og ræða markmið þróunarsamvinnu og áhrif kreppunnar á skuldbindingar í málaflokknum. Um fjörutíu þjóðarleiðtogar hafa tilkynnt um komu sína til fundarins, sem boðað er til af hálfu Sameinuðu þjóðanna, en athygli vekur að fulltrúar Alþjóðabankans og Alþjóðagjaldeyrissjóðsins ætla ekki að sækja fundinn. Sú ákvörðun er mjög gagnrýnd, t.d. í frétt IPS fréttaveitunnar frá því í gær.
Nánar |
| Barnvinsamlegustu Afríkuþjóðirnar:
Namibía og Máritíus efst - Malaví á topp tíu |
 Á alþjóðlegum "Degi barnsins" í síðustu viku, 20. nóvember, var kynnt ný skýrsla með lista yfir 52 Afríkuþjóðir þar sem þær eru metnar í ljósi þess hversu vinsamlegar þær eru börnum. Og það athyglisverða er að nokkrar fátækustu þjóðirnar eru jafnframt þær barnvinsamlegustu. Sumar ríkari þjóðanna í álfunni bregðast þegar kemur að verndun barna segja skýrsluhöfundar frá The Africa Child Policy Forum.
Máritíus og Namibía eru álitin vinsamlegustu þjóðirnar gagnvart börnum en mælistikurnar í könnuninni voru yfir fjörutíu talsins. Í næstu sætum eru bæði tiltölulega ríkar þjóðir eins og Túnis, Líbýa, Morakkó, Suður-Afríka og Algería - og fátækar þjóðir eins og Kenía, Malaví og Grænhöfðaeyjar. Í 11. og 12. sæti eru Rúanda og Burkino Faso, báðar þjóðirnar í hópi þeirra fátækustu.
Og þá er það verri endinn á listanum, löndin þar sem börnum eru búin verst skilyrði. Þau eru: Gíneá-Bissá, Eritrea, Mið-Afríkulýðveldið, Gambía, Saó Tome og Principe, Líbería, Chad, Svasíland, Comoros og Gínea.
Nánar
Myndin er af barni í Namibíu, ljósmynd:Gsal
|
| Annar stórfundurinn í Afríkuráðinu |
Frumkvæði sem miðar að því að draga úr fátækt í Afríku verður að halda áfram þrátt fyrir kreppur í fjármálum, orku- og umhverfismálum, sagði Asha-Rose Migiro aðstoðarframkvæmdastjóri Sameinuðu þjóðanna eftir annan stórfund Afríkuráðsins, Africa Commisson, sem haldinn var í höfuðborg Eþíópíu, Addis Ababa á dögunum.
Migiro er einn af sautján fulltrúum í Afríkuráðinu sem sett var á laggirnar af danska utanríkisráðuneytinu í apríl síðastliðnum. Megintilgangur ráðsins er stefnumörkun í atvinnumálum ungs fólks til að skapa þeim betri atvinnutækifæri. Talið er að í álfunni séu um 190 milljónir ungmenna á aldrinum 15 til 35 ára.
Anders Fogh Rasmussen er formaður Afríkuráðsins en auk hans og Migiro eiga sæti í ráðinu Ulla Tørnæs danski þróunarmálaráðherrann, Jakaya Kikwete forseti Tansaníu, Donald Kaberuka, forseti Þróunarbanka Afríku og fleiri leiðtogar í málefnum álfunnar.
Frá því Afríkuráðið var stofnað hefur það haldið fimm ráðstefnur um tiltekna málaflokka. Fyrsta ráðstefnan um menntun var haldin í Ouagadougaou í Burkino Faso í júní, í Maputó, Mósambík var haldin ráðstefna um konur og atvinnu í ágúst, í Accra í Gana var í september rætt um æsku og ativnnu og í sama mánuði var ráðstefna í Næróbí, Kenía, um loftlagsbreytingar og síðasta ráðstefnan var í Kampala, Úganda, í lok október þar sem hagvöxtur í Afríku var umfjöllunarefnið.
Nýjasta fréttablað Afric Commission
|
| Fimm milljónir látast árlega af völdum fátæktarsjúkdóma |
 Alnæmi, berklar og malaría valda dauða fimm milljóna manna á ári hverju. Þessi þrír banvænu sjúkdómar eru allir tengdir fátækt en á dögunum efndi framkvæmdastjórn Evrópusambandsins til tveggja daga alþjóðlegrar ráðstefnu um þá sjúkdóma sem tengjast örbirgð. Um 450 þátttakendur voru á ráðstefnunni, fólk úr vísindum, stjórnmálum, viðskiptum, frá frjálsum félagasamtökum og alþjóðlegum stofnunum.
Janez Potocnik framkvæmdastjóri vísinda og rannsókna hjá ESB spurði í opnunarávarpi sínu hvort fundargestum þætti erfitt að gera sér í hugarlund þann fjölda sem léti lífið af völdum þessara þriggja sjúkdóma. "Ímyndið ykkur að nánast öll danska þjóðin væri þurrkuð út á einu ári af smitsjúkdómi. Myndum við umbera það? Ég held að svarið sé öllum ljóst."
Tilgangur ráðstefnunnar var meðal annars sá að skilgreina þröskulda í rannsóknum og útskýra hvaða gildi rannsóknir sem unnar eru á vegum ESB geta haft í baráttunni gegn þessum þremur sjúkdómum. Sjötta rammaáætlun ESB (FP6) gerir ráð fyrir rúmlega 450 milljónum evra til rannsókna og þróunar á nýjum lyfjum, bóluefnum og klínískum rannsóknum á sjúkdómum tengdum fátækt. Unnið er að ríflega 80 verkefnum með þátttöku yfir 250 rannsóknahópa.
Frekari upplýsingar
| |
|
|
|
16 daga átak gegn kynbundnu ofbeldi |
|
Í gær efndi UNIFEM á Íslandi til morgunverðarfundar
sem markar upphafið að 16 daga átaki gegn kynbundnu ofbeldi. 25 nóvember er alþjóðlegur baráttudagur gegn ofbeldi gegn konum. Á þriðja tug samtaka og stofnana standa sameiginlega að átakinu dagana 25. nóvember til 10. desember.
Heiðursgestur fundarins var Gro Lindstad yfirmaður UNIFEM á sviði samstarfs við ríkisstjórnir og þjóðþing. Ingibjörg Sólrún Gísladóttir utanríkisráðherra ávarpaði einnig fundinn og nýútkomið tímarit UNIFEM var kynnt.
|
| Alþjóðlegt umræðutorg:
Hugmyndir um þróun |
|
"Ideas for Development" kallast alþjóðlegt blogg til að örva umræðu um þróunarmál. Vefsvæðið er vettvangur fagfólks, fræðimanna, námsmanna og almennings, einskonar umræðutorg fyrir upplýsingar, sjónarmið og framtíðarsýn í þessum málaflokki: þróunarmálum. Lítið endilega við á Ideas4development |
| Nýtt tölublað veftímarits Stefáns Jóns um Afríku |
 |
|
|
| Eldgos í Níkaragva |
|
Gos er í eldfjallinu San Cristobal í Níkaragva og jarðskjálftar fylgja umbrotunum, segir í AP frétt. Fjallið spýr ösku og gasi en íbúar í nágrenni fjallsins eru ekki í hættu. Eldfjallið er í rúmlega eitt hundrað kílómetra fjarlægð frá Managua, höfuðborg Níkaragva.
|
| Jarðgas finnst í tveimur lindum |
|
Jarðgas hefur fundist í tveimur lindum undan ströndum Inhambane, fátækasta héraðs Mósambík, en suður-afríska stórfyrirtækið SASOL hefur farið fyrir hópi fyrirtækja sem fengu leyfi stjórnvalda til olíuleitar sumarið 2005. Litlar upplýsingar er enn að hafa um fundinn annað en að jarðgasið fannst á rúmlega 1300 metra dýpi. Hvort raunhæfir vinnslumöguleikar eru fyrir hendi á eftir að koma á daginn og yrði vitaskuld mikil lyftistöng fyrir efnahag Mósambíkur.
Reutersfrétt
|
| Logarnir skapa spennu í Malaví - komast þeir á HM? |
 |
Landslið Malaví í fótbolta, Logarnir, eru að gera allt vitlaust í heimalandinu því þeir eru að skapa miklar væntingar um þátttöku á sjálfri Heimsmeistarakeppninni í knattspyrnu sem verður haldin árið 2010. Það yrði ekki lítið afrek fyrir þessa litlu og snauðu þjóð ef landslið þeirra kæmist áfram í HM í Suður-Afríku 2010. Einum manni er þakkað fyrir þá velgengni sem Logarnir hafa notið upp á síðkastið: þjálfaranum Kinnah Phiri sem tók við liðinu í vor. Sjálfur var Kinnah í gullaldarliði Malava 1977 til 1988. Frétt um Logana og kraftaverkaþjálfarann Kinnah. |
| Níkaragva:
Svikin við byltinguna |
 |
...Níkaragva í dag, tveimur árum eftir að Sandínistar sneru aftur til valda, engin hugmyndafræði, engin ljóðlist, engin rómantík. Stjórnin, sem forsetinn Ortega fer fyrir, er lofsöngur um grimma bölsýni. Eða dæmisaga um mannlegan veiklega, gamla sagan um það hvað gerist með hugsjónamennina, ævinlega og hvarvetna, þegar þeir komast eitt sinn til valda. Animal Farm endurtekið sýknt og heilagt. Áhrifamikil grein í breska dagblaðinu Independent um byltingasvikin í Níkaragva: Betrayal of the revolution. | |
|
