Veftímarit um þróunarmál 
Þróunarsamvinna
Samstarfsþjóðir 
19. nóvember 2008
Ráðherrafundur Afríkuríkja um fjármálakreppuna
Kreppan ógnar þróun Afríku
 
UNUFTPAfríka verður sú heimsálfa sem líður mest fyrir fjármálakreppuna að mati Donalds Kaberuka, forseta Þróunarbanka Afríku, en þrjú hundruð ráðherrar Afríkuríkja ræddu fjármálakreppuna í heiminum á fundi í síðustu viku sem haldinn var í Túnis.
 
Í frétt Reuters segir að kreppan komi á þeim tíma þegar hagkerfi Afríku hafi verið að rétta úr sér en nú neyðist ríkisstjórnir til að fresta eða draga úr verkefnum sem áttu að örva vöxt og draga úr fátækt. Nefnt er að mörg Afríkuríki hafi varið áratugum í aðlögun hagkerfanna til að laða að fjárfesta og bera af sér það óorð að fjárfestingatækifæri í löndunum væru áhættusöm.
 
Fundurinn var haldinn í nafni Afríska þróunarbankans (AfDB), Afríkusambandsins (AU) og Efnahagsnefndar SÞ um Afríku (ECA).

Reutersfrétt

AllAfrica

 
Einn fulltrúi frá Afríku á G20 leiðtogafundinum
Sameiginlegt átak þjóða þarf til að koma efnahagslífi heimsins aftur á réttan kjöl. Þetta er niðurstaða leiðtogafundar 20 ríkja sem lauk í Washington á sunnudag, G20 hópsins svonefnda. Bush Bandaríkjaforseti varaði við því að gripið yrði til verndarstefnu og hafta í aðgerðum gegn heimskreppunni en meðal þess sem rætt er á fundinum var efling Alþjóðagjaldeyrissjóðsins og Alþjóðabankans.
 
Leiðtogar 20 ríkja og fulltrúar alþjóðastofnana ræddu á fundinum heimskreppuna og leiðir út úr henni. Eini fulltrúi Afríku á fundinum var Kgalema Motlanthe, forseti Suður-Afríku.
 
 
Tyrkir auka þróunarsamvinnu
 
tikaTyrkir hafa á síðustu árum aukið verulega framlög til alþjóðlegrar þróunarsamvinnu. Samkvæmt fréttum frá Ankara nema framlög Tyrkja á síðustu fjórum árum 5 milljörðum dala. Þróunarsamvinnustofnun Tyrkja, TIKA, hefur starfað frá árinu 1992.
 
Árið 2004 voru samstarfslönd TIKA 72 en þeim hefur fjölgað á síðasta árum og voru orðin 131 á síðasta ári. Stærsta samstarfslandið var Afganistan en þar á eftir komu Kyrgyztan og Kazahstan.
 
Nánar
Alþjóða klósettdagurinn 
 notoilets
Alþjóða klósettdagurinn er í dag, 19. nóvember. Það kann að hljóma lygilega en um 40% íbúa heimsins hafa ekki aðgang að klósetti. Hugsið ykkur - fleiri en einn af hverjum þremur í heiminum þarf að létta af sér á víðavangi.
 
Þannig hefst frétt um klósettdaginn í Alert Net fréttaveitunni en í fréttinni er mestu rými varið í kynningu á einfaldri klósettsmíð sem kallast Arbor Loo og hefur verið notað í dreifbýli Eþíópíu með góðum árangri, að sögn.
 
Times fjallar líka um þennan merkisdag og segir frá útgáfu bókar eftir blaðakonuna Rose George sem heitir: The Big Necessity: The Unmentionable World of Human Waste and Why it Matters. "Frásögn af holræsum Lundúna og fátækrahverfa í Nýju Delí og hátækni klósetta í Tókíó - George lærist að skilja að hreinlæti er ekkert aðhlátursefni - þar getur skilið á milli lífs og dauða."

Greinin í Time
 
 
 
 
Icemark Africa í fréttum:
Mikil spurn eftir kibuzi í London 
Credit: Wambi Michael/IPS
Fyrirtæki Kristjáns Erlingssonar í Úganda, Icemark Africa, var í fréttum IPS fréttaveitunnar í gær. Þar er rætt við James Kanyije framkvæmdastjóra fyrirtækisins um ásókn í banana og aðra ávexti á erlendum mörkuðum, en Icemark Africa er með um 60% alls útflutnings á grænmeti og ávöxtum frá Úganda.
 
Kristján Erlingsson hefur starfrækt fyrirtækið um árabil. Í september á þessu var fyrirtækið einnig í fréttum en þá afhenti Kristján kvennaliði Úganda í ruðningsbolta fjárstyrk en liðið stefnir á heimsmeistarakeppni í ruðningi. Icemark Africa hefur síðustu fimm árin verið helsti styrktaraðili liðsins.
 
Áhugavert
 
 
 
Jafnrétti og þróunarfé
woman
"Það er nokkuð ljóst að konur eru um það bil helmingur mannkyns; það er jafn augljóst að í þróunarríkjunum bera þær meira en helming byrðanna. Því er spurt: hversu stóran hluta þróunaraðstoðar bera þær úr býtum? Óheppilegt svar við þeirra spurningu er önnur spurning: hver veit.
 
Þannig hljóðar upphaf fréttar með yfirskriftinni Watch the Gender Space þar sem einmitt er fjallað um þetta óljósa svar og hvað gera þurfi til að tryggja jafnan aðgang kynjanna að þróunarfé. Önnur athyglisverð frétt um jafnréttismál birtist í vikunni hjá IPS fréttaveitunni: Gender Budgeting Still Finding Its Feet.
 
Í þessu samhengi má ennfremur nefna að á dögunum var  birtur listi yfir þjóðir með tilliti til þess hvernig þær standa sig í jafnréttismálum. Þar eru Norðmenn í fyrsta sæti, Finnar í öðru sæti, Svíar í þriðja og Íslendingar í fjórða. Á botninum eru Yemen, Chad og Sádí-Arabía. BBC greinir frá.
 

Watch the Gender Space
 
Orange farsímakerfið tekið upp í Úganda
Franski Síminn ætlar að setja upp Orange farsímakerfið í Úganda innan fárra mánaða og fjárfesta í kerfinu fyrir 200 milljónir dala á næstu þremur árum, að því er BBC greinir frá. Þessar fyrirtætlanir eru kunngerðar eftir að franska fyrirtækið keypti 53% hlut í úgandíska farsímafyrirtækinu Hits Telecom.
 
Mikill vöxtur er í þessum markaði í Úganda eins og víðar í Afríku en í frétt BBC kemur fram að 17% íbúa Úganda nota farsíma. Ennfremur er bent á að sumir sérfræðingar líti svo á að farsímavæðing sé mikilvægur hlekkur í baráttunni gegn fátækt, einkum til sveita.
logo 
Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með þvi sem hæst ber hverju sinni. Efni veftímaritsins þarf ekki endilega að endurspegla stefnu stofnunarinnar.          
 
Skráið ykkur í áskrift á heimasíðunni, www.iceida.is og látið endilega aðra sem þið vitið að hafa áhuga á þróunarmálum vita af tilvist veftímaritsins.   

Þeir sem vilja afskrá sig af netfangalista eru vinsamlegast beðnir um að senda beiðni til okkar á netfangið iceida@iceida.is.
  
Bestu kveðjur, Útgáfu- og kynningardeild ÞSSÍ.